KAROA 8
Sivarai Namona Harorolaia Taudia
IEHOVA ese do ita badinaia diba haheitalai namona ta ia henia, unai be iena Natuna, Iesu Keriso. (1 Pet. 2:21) Ta be Iesu murinai ia raka neganai, ia be Dirava ena sivarai namona harorolaia tauna ai ia lao. Iesu ia hahedinaraia unai gaukara amo laga-ani do idia abia, ia gwau: “Umui hesiku bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Egu huaia auna do umui huaia bona lau dekenai diba umui abia, badina lau be manau bona lalomanada tauna bona goada matamata do umui davaria.” (Mat. 11:28, 29) Unai boiboi idia abia dae taudia dekenai unai gwauhamata ia momokani!
2 Iesu be Dirava ena Hesiai Tauna Badana dainai, taunimanima haida ia boiria iena murinai idia raka totona. (Mat. 9:9; Ioa. 1:43) Iesu ese hesiai gaukara karaia dalana ia hadibadia bona unai gaukara karaia totona idia ia siaia lao. (Mat. 10:1–11:1; 20:28; Luka 4:43) Gabeai, taunimanima 70 ma ia siaia Dirava ena Basileia ena sivarai namona idia harorolaia totona. (Luka 10:1, 8-11) Iesu ese unai hahediba taudia ia siaia lao neganai, ia hamaorodia: “Umui ia kamonai henia tauna be lau ia kamonai henia. Bona umui ia dadaraia tauna ese lau ia dadaraia danu. Bona lau ia dadaraia tauna ese lau ia siaia Diravana ia dadaraia danu.” (Luka 10:16) Unai amo Iesu be ena hahediba taudia dekenai ia hahedinaraia idia dekenai ia henia gaukarana be mai anina bada. Idia be Iesu bona Atai Momokani Diravana edia gwaukau taudia! Hari inai negai Iesu ena boiboi “oi mai egu hahediba tauna ai oi lao” herevana idia badinaia taudia danu, be unai bamona. (Luka 18:22; 2 Kor. 2:17) Unai boiboi idia abia dae taudia ibounai be Dirava ena hereva hegeregerena Basileia ena sivarai namona do idia harorolaia, bona hahediba taudia halaoa gaukarana do idia karaia.—Mat. 24:14; 28:19, 20.
3 Iesu ena boiboi ita kamonai bona ena murinai ita raka dainai, Iehova Dirava bona Iesu Keriso ita diba. (Ioa. 17:3) Iehova ena dala ita dibaia. Iehova ena heduru amo iseda lalona ita giroa, mauri matamata ita atoa, bona Iehova ena kara maoromaoro taravatudia ita badinaia. (Roma 12:1, 2; Efe. 4:22-24; Kol. 3:9, 10) Unai ibounai ita laloa bada dainai iseda mauri be Iehova dekenai ita gwauhamatalaia bona unai gwauhamata be ranu bapatisona amo ita hahedinaraia. Ita Bapatiso neganai Dirava ena hesiai taudia ai ita lao.
4 Hanaihanai ita laloatao Dirava ena hesiai gaukara ita karaia totona iseda kara bona iseda kudouna ia goeva be namo. (Sal. 24:3, 4; Isa. 52:11; 2 Kor. 6:14–7:1) Iesu Keriso ita abidadama henia dainai iseda lalomamina ia goeva. (Heb. 10:19-23, 35, 36; Apok. 7:9, 10, 14) Aposetolo Paulo ese Keristani taudia ia hagoadaia gau ibounai idia karaia Dirava idia hanamoa totona, unai amo ma haida do idia hahekwakwanaia lasi. Danu, aposetolo Petero ese ia hahedinaraia kara namodia ita hahedinaraia neganai, abidadama lasi taudia be hereva momokani dekenai ita veridia mai diba. (1 Kor. 10:31, 33; 1 Pet. 3:1) Edena dala ai ta oi durua diba sivarai namona harorolaia tauna ai ia lao totona?
PABLISA MATAMATADIA
5 Kamonai tauna ida Baibel stadi oi hamatamaia negana amo, namona be oi hagoadaia ia dibaia gaudia be ma haida dekenai ia herevalaia totona. Ia oi hagoadaia nega bona gabu idauidau ai ena varavara, turadia, gaukara hebou taudia, bona ma haida ia haroro henia totona. Unai mai anina bada dalana amo, Baibel stiuden taudia oi durua diba Iesu Keriso murinai idia raka totona bona sivarai namona harorolaia taudia ai idia lao. (Mat. 9:9; Luka 6:40) Stiuden tauna be hereva momokani dekenai ia tubu ia lao bona nega bona gabu idauidau ai haroro karana ia manadalaia neganai, do ia ura haroro gaukara ia karaia.
OI BADINAIA GAUDIA
6 Ta oi do boiria lasi haroro totona, bona kongrigeisen ai ena haroro ripoti ia do henia lasi neganai, gau haida ia badinaia guna be namo. Ta ese haroro gaukara ia karaia neganai, ia hahedinaraia ia be Iehova ena Witnes tauna ta. Unai dainai ena mauri lalonai Iehova ena kara maoromaoro taravatudia ia badinaia bena bapatiso lasi pablisa ai ia lao diba.
7 Ta oi stadi henia bona ia ida Baibel ena hakaua herevadia oi herevalaia neganai, iena noho dalana do oi dibaia. Reana do oi itaia, stadi amo ia dibaia gaudia ia badinaia noho. To, elda taudia do idia ura stiuden ena mauri lalonai gau haida be umui ruaosi ida do idia kikilaia hebou.
8 Elda oreana ena kodineita ese dala do ia karaia elda taudia rua (idia ta be hesiai komiti tauna) be umui ruaosi ida do idia herevahereva totona. Elda be momo lasi kongrigeisen dekenai, elda ta bona ia hegeregere bona laloa maoromaoro hesiai tauna ta ese unai kahana idia karaia diba. Idia abia hidi tadikaka ese unai idia karaia haraga be namo. Bema elda ese kongrigeisen heboudia dekenai stiuden tauna ena ura idia dibaia, namona be hebou murinai umui herevahereva diba. Namona be umui herevahereva neganai gari mamina ia noho lasi to umui ibounai umui moale. Baibel stiuden be pablisa ena gwaumaoro umui do henia lasi neganai, namona be inai ia badinaia:
(1) Ia abia dae Baibel be Dirava ena Hereva.—2 Tim. 3:16
(2) Baibel ena hahediba herevadia ia diba bona ia abia dae, bema ta ese ia henanadai neganai, Baibel ena hereva hegeregerena do ia haere to sibona ena lalohadai o tomadiho koikoi edia hahediba hegeregerena do ia haere lasi.—Mat. 7:21-23; 2 Tim. 2:15
(3) Ena noho dalana hegeregerena, Baibel ese ia gwauraia hahegani hegeregere, Kongrigeisen heboudia ai Iehova ena taunimanima ida ia bamoa karana ia badinaia.—Sal. 122:1; Heb. 10:24, 25
(4) Ia be Baibel ena taravatu matabodaga dekenai hegeregere , heudahanai, adavana momo adavaia karana, tatau ida idia mahuta hebou tatau (eiava hahine ida idia mahuta hebou hahine) ia diba, bona unai taravatu ia badinaia. Bema ia headava vadaeni, namona be taravatu hegeregerena idia headava.—Mat. 19:9; 1 Kor. 6:9, 10; 1 Tim. 3:2, 12; Heb. 13:4
(5) Baibel ena taravatu inuinu kekero karana dekenai ia badinaia, bona kuku, buatau, eiava drag ania karana ia dadaraia.—2 Kor. 7:1; Efe. 5:18; 1 Pet. 4:3, 4
(6) Hebamo dikana dadaraia karana ena namo ia diba.—1 Kor. 15:33
(7) Guna ia lao henia tomadiho koikoi oreadia ibounai ia rakatania. Edia hebou dekenai ia lao lasi, bona edia gaukara idauidau ia durua lasi.—2 Kor. 6:14-18; Apok. 18:4
(8) Tanobada ena politikol karadia ibounai amo ia gini siri.—Ioa. 6:15; 15:19; Iam. 1:27
(9) Ia ese Isaia 2:4 ena hereva ia abia dae bona badinaia, tanobada besedia edia heiriheiri lalonai ia vareai lasi.
(10) Ia ura momokani Iehova ena Witnes ta ai ia lao.—Sal. 110:3
9 Bema elda taudia be stiuden ena lalohadai unai gaudia dekenai idia diba lasi, vadaeni namona be ia ida ataiai idia gwauraia siri haida idia herevalaia hebou. Namona be stiuden ia laloparara Iehova ena Witnes taudia ida idia haroro taudia be Baibel ena taravatu hegeregerena idia noho be gau badana. Iena haere amo elda taudia do idia laloparara, do ia karaia be namo gaudia ia diba bona ia hegeregere do ia haroro matamaia eiava lasi.
10 Namona be elda ese stiuden tauna idia hadibaia haraga bema ia hegeregere eiava lasi. Nega momo edia herevahereva murinai unai idia gwauraia. Bema ia hegeregere, elda taudia be mai moale ida ia do idia abia dae pablisa ai ia lao totona. (Roma 15:7) Namona be ia idia hagoadaia haroro gaukara ia hamatamaia diba bona hua dokonai ripoti ia henia totona. Elda taudia ese idia hadibaia diba ta be bapatiso lasi pablisa ai ia lao bona haroro ripoti ginigunana ia henia neganai, ia totona Kongrigeisen ena Pablisa Rekodi ta idia karaia bona kongrigeisen ena faila dekenai idia atoa. Elda taudia ese inai pablisa amo idia abia pesenol infomeisen be faila dekenai idia atoa unai amo orea ese tanobada hegegemadai Iehova ena Witnes taudia ese idia karaia tomadiho gaukara iduaidau idia gunalaia diba bona pablisa be hesiai gaukara idauidau do ia durua bona iena hetura karana Iehova ida do ia hanamoa noho. Danu elda taudia ese pablisa matamatadia idia hadibaia diba jw.org ai ia noho Iehova ena Witnes taudia edia Global Data Protection Policy hegeregerena edia pesenol infomeisen idia abia.
11 Bema pablisa matamata ita tura henia bona ia karaia gaudia ita laloa bada, unai ese ia do ia durua bada. Bona ia do ia hagoadaia ena hesiai gaukara Iehova dekenai ia habadaia bona hanaihanai hua ta ta edia dokonai ena haroro ripoti ia henia totona.—Fili. 2:4; Heb. 13:2.
12 Bema elda taudia idia itaia Baibel stiuden be ia hegeregere vadaeni haroro gaukara ia karaia totona, ia dekenai Iehova Ena Ura Ia Karaia Orea bukana ta idia henia. Ia ese haroro ripoti ginigunana ia henia murinai, namona be hadibaia hereva kwadogina amo kongrigeisen taudia idia hadibaia, ia be bapatiso lasi pablisa matamatana.
MATAMATA TAUDIA DURUA
13 Natuna maragidia danu be sivarai namona harorolaia pablisa ai idia lao diba. Iesu ese natu maragidia ia abia dae bona ia hanamodia. (Mat. 19:13-15; 21:15, 16) Ena be natudia hadibaia karana be tama sina edia maduna, to kongrigeisen lalonai ma haida ese mai ura bada ida Basileia harorolaia gaukara idia ura karaia matamata taudia do idia durua diba. Bema oi be tama eiava sina ta, haroro gaukara dekenai emu haheitalai namona ese emu natudia do ia durua, Dirava ena hesiai gaukara idia goadalaia totona. Bema natuna ta be haheitalai namona, bona ma haida dekenai ena abidadama ia gwauraia hedinarai, edena dala ma haida ai ita durua diba?
14 Namona be tama eiava sina be Kongrigeisen Hesiai Komiti ena elda ta danu ia herevahereva bema ena natuna be ia hegeregere pablisa ai ia lao totona. Elda oreana ena kodineita ese dala do ia karaia elda taudia rua (idia ta be hesiai komiti tauna) be unai natuna bona ena abidadama tama sina eiava ia idia naria taudia danu idia herevahereva totona. Bema unai natuna be Baibel ena hereva momokani ia diba bona ia hahedinaraia ia ura ia haroro, unai ese ia hahedinaraia do ia goada diba. Unai bona gau ma haida idia lalohadailaia murinai, unai elda ruaosi ese idia abia hidi diba bema unai natuna be ia hegeregere bapatiso lasi pablisa ai ia lao diba eiava lasi. (Luka 6:45; Roma 10:10) Natu maragina ta ida umui hebou neganai, badadia danu umui herevalaia gau haida be do umui herevalaia lasi, hegeregere tomadiho koikoi ena amo raka siri karana, eiava politikol karadia.
15 Emui hebou lalonai namona be iena gaukara goada karana dainai umui hanamoa, bona umui hagoadaia bapatiso be ena tahua gauna ai ia atoa. Tama sina idia gaukara goada edia natuna ena lalonai hereva momokani idia atoa dainai, idia umui hanamoa danu be namo. Tama sina ese edia natuna idia durua noho totona, elda ese idia hagoadaia inai kahana “Hereva ta Keristani Tama Sina Dekenai,” rau 179-181 ai idia itaia diba.
GWAUHAMATA BONA BAPATISO
16 Bema Dirava ena taravatu badinaia karana bona haroro gaukara amo oiemu diba bona lalokau Iehova dekenai oi hahedinaraia, emu hetura karana ia danu oi hagoadaia be namo. Edena dala ai? Emu mauri oi gwauhamatalaia bona ranu bapatiso amo unai oi hamomokania.—Mat. 28:19, 20.
17 Gwauhamata karana ese ia hahedinaraia ta be gaukara helagana do ia karaia. Dirava oi gwauhamata henia anina be guriguri amo oi gwauhamata emu mauri do oi gaukaralaia ia oi hesiai henia, bona iena dala ai oi raka totona. Anina be ia sibona do oi tomadiho henia ela bona hanaihanai. (Deu. 5:9) Inai be oi sibona ese do oi karaia gauna. Ta ese oi totona do ia karaia diba lasi.
18 To, Iehova oi hamaoroa oi be ia ena sibona be hegeregere lasi. Namona be ma haida dekenai oi hahedinaraia Iehova oi gwauhamata henia vadaeni. Unai oi hahedinaraia totona Iesu hegeregerena ranu ai oi bapatiso. (1 Pet. 2:21; 3:21) Bema emu lalona oi hadaia vadaeni Iehova oi hesiai henia bona oi ura bapatiso, dahaka oi karaia be namo? Namona be elda oreana ena kodineita dekenai emu ura oi gwauraia hedinarai. Ia ese dala do ia karaia elda haida danu oi herevahereva, unai amo do idia diba bema Dirava ena taravatu bapatiso taudia totona oi badinaia. Hereva haida oi dibaia totona, mani “Hereva ta Bapatiso Lasi Pablisa Dekenai” rau 182-184 ai, bona “Idia Ura Bapatiso Idia Abia Taudia Edia Henanadai” rau 185-207 ai, oi riviulaia.
HARORO GAUKARA ENA RIPOTI
19 Idia hanaia lagani lalodiai, tanobada hegegemadai tomadiho momokani ia tubu daekau ena ripoti ese Iehova ena taunimanima ia hagoadaia momokani. Iesu ese ena hahediba taudia ia hamaoroa sivarai namona be tanobada ibounai dekenai do idia harorolaia negana amo, Keristani taudia momokanidia idia ura unai ia guguru dalana idia diba.—Mat. 28:19, 20; Mar. 13:10; Kara 1:8.
20 Iesu Keriso ena murinai idia raka taudia ginigunadia be mai moale danu haroro gaukara ena sivarai idia gwauraia bona idia kamonaia. (Mar. 6:30) Baibel bukana Kara ese ia hahedinaraia, Pentekoste 33 C.E. ai hahediba taudia 120 edia latanai lauma helaga ia diho. Daudau lasi, hahediba taudia edia namba ia daekau lao 3,000 bena gabeai 5,000 bamona. Baibel ese ia hahedinaraia “dina ta ta ai Iehova ese taunimanima ia hamauria,” bona “hahelaga taudia momo be abidadama taudia ai idia lao.” (Kara 1:15; 2:5-11, 41, 47; 4:4; 6:7) Orea ena tubu sivaraina ese hahediba taudia ia hagoadaia bada! Unai ripoti namodia ese idia ia durua Dirava ena gaukara idia karaia noho totona, ena be Iuda ena tomadiho gunalaia taudia idia dagedage bada!
21 Lagani 60-61 C.E. bamona ai, Paulo ese Kolose taudia ia tore henidia neganai, ia gwau “sivarai namona be tanobada ibounai dekenai huahua ia havaraia bona ia bada ia lao noho” bona “tanobada hegegemadai idia harorolaia” vadaeni. (Kol. 1:5, 6, 23) Keristani taudia ginigunadia ese Baibel ena Hereva idia badinaia, bona lagani 70 C.E. ai Iuda taudia edia nega ia do ore lasi neganai, lauma helaga ese idia ia hasiahua tanobada hegegemadai haroro gaukara idia hagugurua totona. Abidadama Keristani taudia ese unai gaukara ia guguru ena ripoti idia kamonai neganai, edia lalona ia hagoadaia momokani!
Dokona ia do ginidae lasi neganai, haroro gaukara ia guguru noho karana oi moalelaia, a?
22 Unai hegeregerena, hari inai negai Iehova ena orea idia ura Mataio 24:14 ena guguru karana ena ripoti idia torea namonamo, ia gwau: “Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.” Ita be Dirava ena gwauhamata hesiai taudia dainai, ita dekenai mai anina bada gaukarana ia noho. Namona be dokona ia do ginidae lasi neganai, iseda haroro gaukara ita hagugurua be namo. Iehova ena heduru amo unai gaukara do idia hagugurua momokani, bona bema unai gaukara ita durua, Iehova ena lalonamo do ita abia.—Ese. 3:18-21.
OIEMU HARORO GAUKARA ENA RIPOTI
23 Dahaka do ita ripotilaia? Orea ese ia henia Haroro Gaukara Ena Ripoti pepana ai ia hahedinaraia dahaka infomeisen do ita torea. To henunai idia nohogaudia ese oi do ia durua.
24 Kolom ena ladana “Henia Gaudia (Printaia bona Elektronik Faila)” ena kahana ai, Witnes lasi taudia dekenai oi henia pablikeisen—idia printaia eiava elektronik gauna—edia namba oi torea. “Vidio Hahedinaraia Neganai” ena kahana ai, nega hida iseda orea ese ia halasia vidio oi hahedinaraia ena namba oi torea.
25 “Lou Henia Ibounai” oi ripotia neganai, Witnes lasi tauna ena ura habadaia totona nega hida oi lou henia ena namba oi torea. Lou henia oi karaia diba vadivadi karana amo, revareva, telefon, teks meseij o emeil amo eiava pablikeisen ma haida be kamonai tauna dekenai oi abia lao karana danu. Baibel stadi oi karaia negadia ta ta ai, lou henia tamona oi torea diba. Bema tama eiava sina ese wiki ta lalonai ruma bese tomadiho ia hakaua lalonai bapatiso lasi natu ta ia helai, lou henia tamona idia duahia diba.
26 Ena be Baibel stadi be wiki ta ta ai ita karaia, to hua dokonai stadi tamona sibona ita torea. Pablisa ese idia karaia Baibel stadi idauidau ena namba be Haroro Gaukara Ena Ripoti pepana ena kolom ladana “hua lalonai oi karaia stadi idauidau ibounai” ena henunai idia torea be namo. Unai ripoti lalonai Witnes lasi taudia danu idia karaia stadi edia namba idia torea. Danu hesiai komiti tauna ena hakaua henunaimanoka tadikaka eiava taihu ta oi stadi henia neganai, eiava Mauri Moalelaia Hanaihanai! bukana ia do haorea lasi bapatiso matamata tauna oi stadi henia neganai, Baibel stadi ta oi ripotia diba danu.
27 “Haroro Hora Iboudiai” ena ripoti ita torea namonamo be gau badana. Ruma-ta-ruma-ta, lou henia, Baibel stadi, eiava nega bona gabu idauidau ai Witnes lasi taudia oi haroro henia horadia oi torea. Bema pablisa rua idia haroro hebou bona idia ruaosi ese ruma taudia idia hereva henia, haroro horana idia ripotia diba, to idia ta ta sibona ese ena lou henia o Baibel stadi do ia ripotia diba. Tama sina be Ruma Bese Tomadiho lalonai edia natudia idia hadibaia neganai, wiki ta ta ai hora tamona sibona idia ripotia diba. Pablik tok idia henia tadikaka be unai tok ena hora idia ripotia diba. Pablik tok ai gado ia hahanaia tauna ese unai nega ia ripotia danu. To, gaukara ma haida, hegeregere haroro totona ita hegaegae, haroro hebouna ita karaia, stoa dekenai ita lao, bona unai bamona gaudia ma haida ita karaia neganai, unai nega ita ripotia lasi.
28 Pablisa ta ta be mai guriguri ida edia lalomamina hegeregerena do idia diba edena nega be maoro edia ripoti ai idia torea totona. Pablisa haida be taunimanima momo idia noho gabudia ai idia haroro, to haida be taunimanima momo lasi teritori dekenai idia haroro bona gabu daudau idia loaloa. Teritori be idauidau; pablisa ese edia hesiai gaukara idia laloa dalana danu be idauidau. Hakaua Oreana be tanobada hegegemadai Kongrigeisen ibounai dekenai haroro hora duahia karana dekenai taravatu aukana ta idia atoa lasi eiava ta idia abia hidi lasi haroro ripoti torea karana do ia sekea totona.—Mat. 6:1; 7:1; 1 Tim. 1:5.
29 Haroro gaukara ena hora oi ripotia neganai, idia guguru hora sibona oi torea. To unai ia idau diba, bema pablisa ta be buruka o gorere dainai ruma eiava hospital dekenai ia noho eiava badina ma ta dainai ia loaloa diba lasi. Unai bamona pablisa ese miniti 15 o ma haida ia ripotia diba. Ena be hua ta lalonai miniti 15 sibona ia haroro, to ia ripotia be namo. Unai amo ia be hanaihanai Basileia ia harorolaia pablisa hegeregerena do idia duahia. Gorere badana ta eiava aksiden ia abia dainai hua ta eiava haida lalonai ia loaloa diba lasi pablisa be unai dala ia badinaia diba. To, inai dala be haroro gaukara dekenai idia lao diba lasi pablisa taudia sibona totona. Hesiai komiti ese do ia abia hidi edena pablisa be ia hegeregere unai dala ia badinaia totona.
KONGRIGEISEN ENA PABLISA KADI
30 Oiemu hua ta ta ena haroro ripoti be Kongrigeisen ena Pablisa Kadi dekenai idia torea. Unai kadi be kongrigeisen ena. Bema oi ura kongrigeisen ma ta dekenai oi hanaia, namona be emu elda taudia oi hadibaia. Seketere ese dala do ia karaia emu kadi be emu kongrigeisen matamatana dekenai do ia siaia lao totona. Unai dala amo emu kongrigeisen matamatana ena elda taudia ese oi do idia welkam henia bona durua diba abidadama ai oi goada totona. Bema hua ta o rua lalonai emu kongrigeisen do oi bamoa lasi, namona be emu kongrigeisen dekenai emu ripoti do oi siaia noho.
HARORO GAUKARA ITA RIPOTIA ENA BADINA
31 Nega haida oi laloaboio dainai, emu haroro gaukara ena ripoti oi henia lasi, a? Unai dainai, nega ta ta ai ita ibounai ese hadibaia hereva ita abia be namo. To, bema ita ibounai ese ripoti henia karana ita lalohadailaia namonamo bona ena badina ita lalopararalaia, hua ibounai iseda haroro gaukara ena ripoti do ita henia.
32 Haida idia henanadai: “Iehova be ena hesiai gaukara lalonai lau karaia gaudia ia diba vadaeni, dahaka dainai kongrigeisen dekenai ripoti lau henia?” Momokani, Iehova ese iseda gaukara ia itaia bona ia diba mai kudouna ibounai ida ita karaia eiava lasi. To namona be ita laloatao, Iehova ese Noa be dina hida bouti lalonai ia noho, bona Israela taudia be lagani hida tano gagaena ai idia loaloa be ia torea. Dirava ese abidadama taudia bona gwau-edeede taudia edia namba ia torea. Ia ese Kanana tanona abia totona Israela taudia edia kwalimu sivaraidia, bona abidadama hahemaoro taudia ese idia hagugurua gaudia be ia torea. Oibe, Dirava ese iena hesiai taudia idia karaia gaudia edia sivarai be Baibel lalonai ia torea. Iehova ese lauma helaga ena siahu amo unai sivarai ibounai idia torea dainai, ia hahedinaraia ia ese ripoti torea maoromaoro karana ia laloa bada.
33 Baibel lalonai idia noho sivarai gunadia ese ia hahedinaraia, Iehova ena taunimanima ese ripoti bona rekodi idia torea maoromaoro. Nega momo, Baibel ese ia gwauraia sivaraina ena anina do ia hedinarai namonamo lasi bema namba maorona idia torea lasi. Mani inai haheitalai haida oi laloa: Genese 46:27; Esodo 12:37; Gunalaia Taudia 7:7; 2 King Taudia 19:35; 2 Sivarai 14:9-13; Ioane 6:10; 21:11; Kara 2:41; 19:19.
34 Ena be iseda ripoti ai Iehova ena hesiai gaukara lalonai ita karaia gaudia ibounai ia hahedinaraia lasi, to Iehova ena orea dekenai idia be mai anina bada. Aposetolo taudia edia negai, hahediba taudia be haroro gaukara amo idia giroa lou neganai, Iesu dekenai “idia karaia bona hadibaia gaudia ibounai” idia ripotilaia. (Mar. 6:30) Nega haida, ripoti ese idia hahedinaraia iseda hesiai gaukara ena kahana haida ita hanamoa be namo. Ripoti ese ia hahedinaraia diba, gaukara haida ita karaia namonamo, to kahana haida, hegeregere pablisa edia namba, be ia daekau haraga lasi. Unai ena badina be reana kongrigeisen idia hagoadaia eiava hekwakwanai haida idia hamaoromaoroa be namo. Elda taudia be ripoti do idia itaia, bena dala do idia tahua kongrigeisen tauna ta eiava kongrigeisen ibounai ena tubu dalana ia koua gauna do idia hamaoromaoroa.
35 Ripoti amo orea ese pablisa momo lasi gabudia do ia diba. Edena gabu dekenai gaukara ia tubu haraga? Edena gabu ai gaukara be ia tubu haraga lasi? Edena pablikeisen do idia gaukaralaia diba taunimanima ese hereva momokani idia dibaia totona? Ripoti amo, orea ese do ia diba edena pablikeisen be haroro totona tanobada ena gabu idauidau dekenai do idia siaia be namo, bona unai hegeregerena do idia halasia.
36 Ita momo dekenai ripoti be hagoadaia gauna. Tanobada hegegemadai iseda tadikaka edia haroro sivaraidia ese ita idia hamoalea bada, ani? Pablisa edia namba ia bada ia lao ena ripoti ita kamonai neganai, Iehova ena orea ena tubu dalana ita dibaia. Ekspiriens idauidau ese iseda kudouna idia hamoalea, bona iseda ura haroro gaukara dekenai ia habadaia. (Kara 15:3) Unai dainai, hanaihanai haroro ripoti henia karana be mai anina bada, unai amo ita hahedinaraia iseda tadikaka ibounai ita lalodia bada. Unai gau maragina ita karaia neganai, ita hahedinaraia Iehova ena orea ena heau dalana ita badinaia.—Luka 16:10; Heb. 13:17.
TAHUA GAUDIA ATOA
37 Namo lasi iseda haroro gaukara be ma ta ida ita hahegeregerea. (Gal. 5:26; 6:4) Iseda noho dalana be idauidau. To, bema iseda hesiai gaukara habadaia totona tahua gaudia namodia ita atoa bona ita badinaia, namo bada ita abia diba. Unai tahua gaudia ita hagugurua neganai, do ita moale bada.
38 Ia hedinarai goevagoeva, Iehova ese “hisihisi badana” amo do ia hamauria taudia haboua gaukarana be ia haharagaia noho. Ita be Isaia ena peroveta herevana ena guguru negana ai ita noho, ia gwau: “Namba maragina be tausen ai do ia lao, bona bese maragina be bese goadana ai do ia lao. Lau, Iehova, ese nega korikori ai unai do lau karaia haraga.” (Apok. 7:9, 14; Isa. 60:22) Hari inai nega dokona ai, sivarai namona harorolaia taudia ai ita lao be hahenamo badana!—Mat. 24:14.