Kaisara Ena Gau Henia Kaisara Dekenai
“Ibounai ta ta dekenai edia davana do umui henidia.”—ROMA 13:7.
IESU ia hahedinaraia Dirava do ita henia gaudia idia noho bona Kaisara, eiava Gavamani do ita henia gaudia idia noho. Iesu ia gwau: “Kaisara ena gaudia umui henia Kaisara dekenai, Dirava ena gaudia umui henia Dirava dekenai.” Unai hereva kwadogi amo, ia idia inai henia taudia dekenai daradara ia havaraia, bona iseda hetura karana Iehova ida bona iseda kara Gavamani dekenai do ita abia lalohadaina maorona ia henia. Ita daradara lasi dahaka dainai “iena hereva dekenai idia hoa bada”!—Mareko 12:17.
2 Vaia, Iehova ena hesiai taudia ese idia laloa bada gauna ginigunana be Dirava ena gau do idia henia Dirava dekenai. (Salamo 116:12-14) Unai idia karaia noho lalonai, idia be idia laloatao Iesu be ia gwau gau haida Kaisara do idia henia. Edia lalona ena hemami, Baibel amo idia hadibaia gauna, ese idia ia hamaoroa, mai guriguri danu Kaisara dekenai do idia henia lao ena hetoana do idia laloa namonamo totona. (Roma 13:7) Hari inai negai, taravatu diba momo taudia momo idia gwau gavamani ena siahu be mai hetoana bona taunimanima bona gavamani gabu ibounai dekenai be lalona ena taravatu henunai idia noho.
3 Aposetolo Paulo be ena toretore ai tanobada taudia ia herevalaia neganai, unai lalona ena taravatu ia gwauraia, ia gwau: “Iena kara be taunimanima dekena amo ia hunia lasi. Dirava sibona ese iena kara ia hedinaraia vadaeni idia ibounai dekenai. Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni. Inai gaudia idia itaia dainai, idia be Dirava ena hunia gaudia idia kamonai diba danu. Unai dainai idia be dala lasi edia kerere idia hunia, bona ‘Lau diba lasi’ herevana idia gwauraia diba lasi.” Bema unai abidadama lasi taudia ese unai lalona ena taravatu idia laloa, unai ese edia lalona ena hemami do ia hamarerea. Unai dainai, Paulo ma ia gwau: “Iuda lasi taudia be Mose ena Taravatu idia diba lasi, to idia haida ese sibodia edia laloa diari dekena amo taravatu idia badinaia. Inai taudia ese madi Taravatu idia davaria lasi, to edia laloa maoro dekena amo sibodia edia taravatu idia haginia. Idia edia kara ese ia hedinaraia, Dirava ena Taravatu be edia kudouna dekenai ia noho vadaeni. Idia edia kudouna ena laloa [“lalona ena hemami,” NW] ese ia hamomokania Dirava ena Taravatu be edia kudouna lalonai ia noho.”—Roma 1:19, 20; 2:14, 15.
4 Lagani 1800 murinai, England ena taravatu diba momo tauna William Blackstone be inai ia torea: “Unai lalona ena taravatu, ia noho ena daudau be taunimanima idia noho ena nega ena daudau hegeregerena bona Dirava ese ia biagua gauna, be momokani maduna ibounai ia hereaia. Tanobada hegegemadai, tano ibounai lalonai, bona nega ibounai, badinaia ena maduna ia noho: taunimanima idia haginia taravatu be anina lasi bema unai taravatu idia badinaia lasi.” Blackstone be ma “ia hedinarai taravatuna,” Baibel lalonai ia noho, ia herevalaia ia gwau: “Taunimanima idia haginia taravatudia be inai badina ruaosi, lalona ena taravatu bona ia hedinarai taravatuna, latanai idia gini; anina be, taunimanima idia haginia taravatu be idia amo idia idau lasi be namo.” Unai be Mareko 12:17 ai Iesu ese Dirava bona Kaisara ia herevalaia herevana ia hamomokania. Ia hedinarai, kahana haida dekenai Dirava be Kaisara ese Keristani tauna ena amo ia noia diba gauna ena hetoana ia atoa. Iuda Taudia edia Kota Badana ese aposetolo taudia idia koua Iesu sivaraina do idia harorolaia lasi neganai, idia be unai kahana ta ena hetoana idia hanaia. Unai dainai, aposetolo taudia be idia hereva maoro idia gwau: “Dirava ai kamonai henia be namo, taunimanima ai kamonai henia be dika.”—Kara 5:28, 29.
“Dirava Ena Gaudia”
5 Lagani 1914 dekena amo, Iehova, Siahu Ibounai Diravana, be Keriso ena Mesia Basileiana amo ia pavapava, bona unai neganai Keristani taudia idia diba be namo Dirava ena gaudia be Kaisara dekenai do idia henia lasi. (Apokalupo 11:15, 17) Hari, Dirava ena taravatu Keristani taudia dekenai ena anina be bada herea; ia hamaorodia, namona be idia be “tanobada ena lasi.” (Ioane 17:16) Dirava, edia Mauri Henia Tauna, idia gwauhamata henia dainai, namona be idia hahedinaraia goevagoeva idia be sibodia idia biagua lasi. (Salamo 100:2, 3) Paulo ia torea bamona, “ita be Lohiabada ena.” (Roma 14:8) To unai sibona lasi, Keristani tauna ena bapatiso ai, ia be gwaumaoro ia abia ia be Dirava ena hesiai tauna, unai dainai ia be Paulo ida ia gwau diba: “Dirava sibona ese aonega ai dekenai ia henia, vadaeni inai gaukara ai karaia diba.”—2 Korinto 3:5, 6.
6 Aposetolo Paulo be inai ia torea danu: “Inai dagi lalonai lau moale bada.” (Roma 11:13) Momokani unai bamona ita karaia danu be namo. Ena be hesiai gaukarana be ful-taim ita karaia eiava pat-taim ita karaia, to ita laloatao Iehova sibona ese iseda hesiai gaukara ia henia. (2 Korinto 2:17) Reana haida ese iseda dagi hamomokania gaudia do idia tahua dainai, namona be gwauhamata bona bapatiso Keristani taudia ta ta idia noho hegaegae, edia dagi hamomokania gaudia idia gwauraia totona bena do idia hahedinaraia idia be momokani Dirava ena hesiai taudia. (1 Petero 3:15) Iena kara lalonai ia harorolaia gaudia ia hahedinaraia be namo. Keristani tauna be Dirava ena hesiai tauna dainai, ia ese kara goevadia ia abia hidi bona badinaia be namo, ruma bese ena lalo-tamona ia habadaia, ia kara momokani, bona taravatu bona noho namo ia laloa bada. (Roma 12:17, 18; 1 Tesalonika 5:15) Keristani tauna ena mauri lalonai, iena hetura karana Dirava ida bona Ia ese ia henia hesiai gaukarana be mai edia anina bada. Do ia lalodia boio lasi Kaisara ena hahegani ta dainai. Ia hedinarai, unai do ita gwauraidia “Dirava ena gaudia.”
“Kaisara Ena Gaudia”
7 Iehova ena Witness taudia idia diba “gavamani do idia kamonai henia” be maoro. (Roma 13:1) Unai dainai, bema Kaisara, Gavamani unai, ese gau haida idia noia maoro, edia lalona ena hemami, Baibel amo idia hadibaia gauna, ese ia koudia lasi dainai, edia hereva do idia badinaia. Hegeregere, Keristani taudia momokanidia be takisi idia henia taudia namo hereadia. Germany ai niuspepa ladana Münchner Merkur be Iehova ena Witness taudia ia herevalaia ia gwau: “Idia be Federal Republic lalonai mai momokani ida bona nega korikori ai takisi idia henia taudia namo hereadia.” Italy ai niuspepa ladana La Stampa ia gwau: “Idia [Iehova ena Witness taudia] be tano ena kamonai taudia namo hereadia: koikoi dalana amo takisi henia karana idia reaia lasi eiava edia namo dainai dala idia tahua lasi taravatu aukadia do idia badinaia lasi totona.” Iehova ena Witness taudia be unai bamona idia karaia badina ‘edia lalona dekenai idia diba dala maorona be unai.’—Roma 13:5, 6.
8 “Kaisara ena gaudia” be takisi henia karana lalonai sibona, a? Lasi. Paulo be gau haida, hegeregere gari bona hemataurai ia gwauraia danu. Germany ena diba bada tauna ta Heinrich Meyer be ena buka ladana Critical and Exegetical Hand-Book to the Gospel of Matthew lalonai, inai ia torea: “[Kaisara ena gaudia] ia herevalaia neganai . . . ita be taunimanima edia takisi sibona ita laloa lasi, to ena lohia dalana maorona lalonai do ia abia be maoro gaudia ibounai.” Histori torea tauna E. W. Barnes, be ena buka The Rise of Christianity, lalonai ia gwau bema Keristani tauna ena takisi ia do henia lasi, do ia henia, bona “unai hegeregerena Gavamani ese ia henia maduna ibounai ma haida do ia abia dae, to gau badana be Kaisara dekenai Dirava ena gau ia henia lasi.”
9 Gavamani be reana dahaka do idia noia diba to Dirava sibona ena gau do ia abia kava lasi? Haida idia laloa takisi monina sibona do idia henia to ma gau ta lasi. Idia laloa nega ia haorea karana ta be Kaisara dekenai do idia henia be namo momokani lasi, badina tiokratik gaukaradia totona idia gaukaralaia diba. To, momokani ena be ‘Dirava ita lalokau henia, mai eda kudouna ibounai, mai eda lauma ibounai, mai eda lalona ibounai, bona mai eda goada ibounai,’ to Dirava ia laloa lasi ita be gau ma ta do ita karaia lasi to hesiai gaukara helagana sibona. (Mareko 12:30; Filipi 3:3) Haheitalai ta be, headava Keristani tauna be sisiba ia abia, nega do ia henia ena adavana hamoalea totona. Unai bamona kara be dika lasi, to aposetolo Paulo ia gwau unai be “tanobada gaudia” idia be “Lohiabada ena gaukara” lasi.—1 Korinto 7:32-34; 1 Timoteo 5:8 itaia.
10 Ma danu, Keriso be ena hahediba taudia ia hagania takisi do idia ‘henia lou,’ bona unai anina be Dirava dekenai ita gwauhamatalaia negana do ita gaukaralaia—badina iseda mauri ibounai be ita gwauhamatalaia vadaeni. Bema tano ta ena takisi davana ena averes be 33 pesen (tano haida dekenai be sisina ataiai), unai anina be lagani ta ta ai moni gaukara tauna ta be Gavamani ena moni naria dipatmen dekenai hua hani ia abia monina ia henia. Eiava ita gwau diba, gaukara tauna ena gaukara laganidia iboudiai amo, lagani 15 be “Kaisara” ese ia noia takisi monina abia totona ia haorea. Sikuli ena kahana, mani oi laloa danu. Tano momo lalonai idia atoa taravatu ia gwau namona be natu maragidia be lagani haida lalonai sikuli do idia lao henia noho. Lagani hida do idia sikuli ena namba be tano ta ta ai idia idau. Gabu momo herea lalonai unai nega ena lata ia daudau sisina. Momokani unai bamona sikuli be mai ena namo, to Kaisara ese ia abia hidi, natuna ena mauri laganidia hida be unai dala ai do ia haorea, bona Keristani tama sina be Kaisara ena hereva idia badinaia.
Ami Ena Gaukara Karaia Taravatuna
11 Tano haida dekenai Kaisara ese ia gwauraia gauna ta be ami ena gaukara do idia karaia. Lagani 1900 murinai, unai dala be bese momo herea ese tuari neganai bona haida be maino negana ai idia haginia. France dekenai lagani momo lalonai unai maduna idia gwauraia rara takisi, anina be tatau matamata iboudiai do idia gini hegaegae, edia mauri do idia henia edia Gavamani totona. Unai be Iehova idia gwauhamata henia taudia ese do idia henia diba gauna, a? Keristani ginigunadia ese unai kara be edena bamona idia laloa?
12 Keristani ginigunadia be idia hekwarahi tano taudia namodia ai idia lao totona, to edia abidadama dainai ma ta ena mauri idia utua lasi eiava Gavamani totona edia mauri idia atoa diho lasi. The Encyclopedia of Religion ia gwau: “Ekalesia taudia ginigunadia, Tertullian bona Origen danu, ese idia hamomokania, Keristani taudia be taunimanima ta ena mauri ia utua diba lasi, bona unai hakaua herevana dainai Roma ena ami lalonai idia vareai lasi.” Profesa C. J. Cadoux be ena buka ladana The Early Church and the World ai inai ia torea: “Ema bona Marcus Aurelius ena lohia negana [161-180 C.E.], herevana dahaka ia vara, to Keristani tauna be ena bapatiso murinai tuari tauna ta ai ia lao diba lasi.”
13 Dahaka dainai Kerisendom dubudia edia memba taudia be unai bamona idia laloa lasi? Badina lagani 300 C.E. murinai idia badinaia dalana idia haidaua dainai. Katolik bukana A History of the Christian Councils ia gwau: “Keristani momo, . . . Dirava diba lasi pavapavadia henunai, be ami gaukaradia idia karaia lasi totona idia be mai edia tomadiho ena hakaua herevadia, bona ami lalonai idia vareai lasi, bema lasi do idia heau. Hakaua Oreana [Arles ena, 314 C.E. ai idia hebou], ese Constantine ia haidaua gaudia ia laloa neganai, ia gwauraia maduna ta be Keristani taudia be do idia tuari, . . . badina be Ekalesia be maino ai ia noho (maino lalonai), Keristani taudia ia tura henia lohiana ta henunai.” Iesu ena hahediba idia rakatania dainai, unai nega amo ema bona hari, Kerisendom ena dubu gunalaia taudia ese edia mamoe idia hagoadaia edia bese ena ami dekenai idia vareai, to taunimanima ta ta be edia lalona ena hemami dainai edia lalona idia hadaia, ami lalonai do idia vareai lasi.
14 Unai kara dekenai Keristani taudia be taunimanima momo ese idia abia hidi dalana do idia badinaia, a? Lasi. Bema gwauhamata bona bapatiso Keristani tauna ta ia noho tanona dekenai tomadiho ena haroro taudia be ami gaukara do idia karaia taravatuna ese ia guidia lasi, namona be unai dala ia tahua, badina ia be haroro tauna ta. (2 Timoteo 4:5) Tano haida, United States bona Australia danu, be tuari negana lalonai danu unai bamona dala idia karaia. Bona maino negana ai, taunimanima iboudiai be ami gaukara do idia karaia taravatuna idia atoa tanodia momo lalonai, Iehova ena Witness taudia dekenai unai taravatu idia atoa lasi, badina idia be tomadiho ena haroro taudia dainai. Unai dainai idia be edia gaukara amo taunimanima idia durua noho diba.
15 To, bema Keristani tauna ia noho tanona ai tomadiho ena hesiai taudia dekenai unai taravatu idia kokia lasi be edena bamona? Unai neganai, ia be sibona ena lalona, Baibel amo ia hadibaia lalona, ena hemami do ia badinaia bena dala do ia abia hidi be namo. (Galatia 6:5) Kaisara ena siahu do ia laloa danu, to ena maduna Dirava dekenai do ia laloa namonamo be namo. (Salamo 36:9; 116:12-14; Kara 17:28) Keristani tauna ia laloatao Keristani tauna momokanina ena toana ia hahedinaraia karana be ia ida edia abidadama be tamona taudia ia lalokau henidia, herevana idia be idau tanodia ai idia noho eiava iduhu ma haida taudia. (Ioane 13:34, 35; 1 Petero 2:17) Bona, ia ese Baibel ena hakaua herevadia Isaia 2:2-4; Mataio 26:52; Roma 12:18; 14:19; 2 Korinto 10:4; bona Heberu 12:14 dekenai do ia laloaboio lasi.
Gaukara Idauna
16 To, tano haida dekenai, ena be Gavamani be tomadiho edia hesiai taudia dekenai ami gaukara taravatuna idia kokia lasi, to idia lalo-parara haida be ami gaukara do idia ura lasi karaia. Unai tano momo lalodiai, edia lalona ena hemami dainai idia ura lasi taudia idia doria lasi ami gaukaradia karaia totona. Gabu haida dekenai gaukara idaudia, hegeregere edia noho gabuna ai heduru gaukaradia, idia gwauraia edia bese totona idia karaia gaukara idauna, ami gaukara lasi unai. Ia gwauhamata vadaeni Keristani tauna be unai bamona gaukara ia karaia diba, a? Unai neganai danu, ia gwauhamata bona bapatiso Keristani tauna be sibona dala do ia abia hidi, ena lalona, Baibel amo ia hadibaia lalona, ena hemami hegeregerena.
17 Toana be Baibel negadia ai, taravatu hegeregerena do idia karaia gaukaradia idia karaia danu. Histori bukana ta ia gwau: “Iudea ai idia noho taudia edia amo takisi bona davana ma haida idia abia sibona lasi, to gaukara danu [gavamani dekenai idia henia gaukaradia, mai edia pei lasi]. Unai be Ist tanodia edia kara, bona Helene bona Roma gavamanidia ese idia badinaia. . . . Taravatu Matamata danu be pei lasi gaukaradia edia sivarai haida ia gwauraia, unai ese unai kara ena bada ia hahedinaraia. Unai kara idia badinaia dainai, tuari taudia be Simona, Kurene tauna, idia doria Iesu ena korosi [satauro auna] ia huaia (Mataio 5:41; 27:32; Mareko 15:21; Luka 23:26).”
18 Unai hegeregerena, tano haida edia taunimanima be Gavamani eiava edia gabu ena siahu taudia ese idia hamaorodia edia noho gabudia edia gaukara idauidau idia karaia totona. Nega haida gaukara tamona idia gwauraia, hegeregere ranu guri do idia geia eiava dala do idia karaia; nega haida be do idia karaia loulou gaukaradia, hegeregere wiki ta ta iboudiai lalonai dala, sikuli, eiava hospital do idia hagoevaia. Iehova ena Witness taudia dekenai, bema unai bamona gaukara idaudia be noho gabuna ena namo totona bona tomadiho koikoi edia gaukara ia durua lasi eiava dala ta ai edia lalona ena hemami ia hadikaia lasi, nega momo unai gaukara idia karaia. (1 Petero 2:13-15) Nega momo unai kara dainai taunimanima be iseda toana namona idia diba bona nega haida unai ese Witness taudia idia samania koikoi taudia edia hereva ia koua; idia gwau Witness taudia be gavamani ena hereva badinaia lasi taudia.—Mataio 10:18 itaia.
19 To, bema Gavamani ese Keristani tauna ta ia hamaoroa ena bese totona gaukara naria oreana ta henunai gaukara ta, ami gaukarana lasi, do ia karaia be edena bamona? Unai neganai danu, Keristani tauna be dala do ia abia hidi ena lalona ena hemami maorona hegeregerena. “Ita ibounai Dirava ena Kota henia gabuna ena vairana dekenai do ita gini.” (Roma 14:10) Bema Keristani taudia be Kaisara ese ia hamaorodia gau ta idia karaia, namona be mai guriguri ida unai kahana idia tahua bona idia laloa namonamo.a Bona reana aonega dalana be kongregesen lalonai idia noho Keristani taudia goadadia ida oi kikilaia. Unai murinai oi sibona ese emu dala oi abia hidi.—Aonega Herevadia 2:1-5; Filipi 4:5.
20 Unai kahana ia tahua noho lalonai, Keristani tauna ese Baibel ena hakaua herevadia haida do ia laloa be namo. Paulo ia gwau namona be ‘Gavana bona gavamani ena siahu taudia do ita kamonai henia. . . . Bona do ita naria hegaegae kara namodia ibounai do ita karaia totona. . . . Do ita manau. Nega ibounai taunimanima ibounai dekenai manada kara do idia karaia.’ (Tito 3:1, 2) Unai nega lalonai, Keristani tauna ese do idia henia ami lasi gaukarana ia tahua namonamo be namo. Bema idia abia dae, edia Keristani lalo-maoromaoro, idia be tanobada ena lasi lalohadaina, be do idia dogoatao noho diba, eiava? (Mika 4:3, 5; Ioane 17:16) Bema idia karaia, anina be tomadiho koikoi danu do idia gaukara, a? ( Apokalupo 18:4, 20, 21) Unai gaukara ese edia Keristani maduna idauidau hagugurua dalana do ia koua eiava ia hamaragia, a? (Mataio 24:14; Heberu 10:24, 25) To danu, lauma dalanai do idia goada idia lao noho diba, bena reana ful-taim haroro gaukara do idia karaia, a?—Heberu 6:11, 12.
21 Bema Keristani tauna be mai ena momokani ida unai henanadai ia haerelaidia bena ia laloa unai gaukara idauna be ‘gaukara namona’ bona gavamani ia kamonai henia dainai do ia karaia, unai be edena bamona? Unai be Dirava vairanai ia ese ia abia hidi dalana. Elda taudia bona ma haida ese ena lalona ena hemami idia matauraia be namo bona Keristani taudia namodia ta hegeregerena ia do idia laloa noho. To, bema Keristani tauna ta ia laloa unai gaukara idauna do ia karaia lasi, iena lalohadai idia matauraia danu be namo. Ia danu be taunimanima vairanai ia kerere lasi bona mai lalokau ida heduru ia abia be namo.—1 Korinto 10:29; 2 Korinto 1:24; 1 Petero 3:16.
22 Ita, Keristani taudia, be ‘idia mataurai henia tauna dekenai do ita matauraia.’ (Roma 13:7) Ita ese noho namo do ita laloa bada bona do ita ura maino bona taravatu badinaia taudia hegeregerena do ita noho. (Salamo 34:14) Reana “king taudia totona, bona lohia taudia ibounai totona” do ita guriguri, bema iseda Keristani maurina bona gaukarana ia haidaua diba gauna ta dekenai dala idia abia hidi gwauraia neganai. Kaisara ena gau ita henia Kaisara dekenai dainai, iseda ura be ‘Dirava ita badinaia bona matauraia lalonai, mai maino danu do ita noho namonamo.’ (1 Timoteo 2:1, 2) To kara hereadaena be inai: Basileia sivaraina namona do ita harorolaia, ia be taunimanima edia dala tamona, unai amo ita be mai eda lalo-parara ida Dirava ena gau be Dirava dekenai ita henia.
[Footnotes]
a The Watchtower, May 15, 1964, rau 308, paragraf 21 itaia.
Oi Gwauraia Diba, A?
◻ Keristani tauna ese ena kara Kaisara dekenai bona Dirava dekenai ia laloa namonamo neganai, do ia laloa bada gauna ginigunana be dahaka?
◻ Dahaka be Dirava do ita henia to Kaisara ita henia diba lasi?
◻ Dahaka gau haida ita henia Kaisara dekenai be maoro?
◻ Idia haheganilaia ami gaukaradia ita laloa neganai, dahaka siri haida ese ita idia durua diba dala maorona ita abia hidi totona?
◻ Dahaka gau haida ita laloatao be namo bema ita idia hamaoroa bese ena gaukara idaudia, ami gaukaradia lasi, do ita karaia totona?
◻ Iehova bona Kaisara dekenai, dahaka do ita karaia noho?
[Study Questions]
1, 2. (a) Iesu ese ia hahedinaraia, Keristani taudia ese edia maduna Dirava dekenai bona Kaisara dekenai be edena bamona do idia laloa namonamo? (b) Iehova ena Witness taudia idia laloa bada gauna ginigunana be dahaka?
3, 4. Haida ese lalona ena taravatu, ia hedinarai taravatuna, bona taunimanima idia haginia taravatudia be edena bamona idia herevalaia?
5, 6. (a) Lagani 1914 ai Basileia ia vara dainai, Keristani taudia be dahaka idia laloa namonamo be namo? (b) Keristani tauna be edena bamona ia hahedinaraia ia be haroro tauna?
7. Takisi henia karana dekenai Iehova ena Witness taudia edia kara be edena bamona?
8. Iseda maduna Kaisara dekenai be takisi monina sibona ita henia, a?
9, 10. Dahaka dainai Keristani tauna be do ia laloa Kaisara ena gau do ia henia lasi, to dahaka hereva momokanidia ia laloatao be namo?
11, 12. (a) Tano momo lalonai Kaisara be dahaka ia noia? (b) Keristani ginigunadia ese ami gaukaradia be edena bamona idia laloa?
13. Dahaka dainai Kerisendom taudia momo ese ami gaukara idia laloa dalana be Keristani taudia ginigunadia ese idia laloa hegeregerena lasi?
14, 15. (a) Badina be dahaka gabu haida dekenai Keristani taudia be idia noinoi diba, ami gaukara karaia taravatuna ese ia guidia lasi totona? (b) Bema unai taravatu ese Keristani tauna danu ia guia, ami gaukara ia karaia eiava lasi ia laloa neganai, dahaka hakaua herevadia Baibel lalonai ese do ia durua dala maorona ia abia hidi totona?
16. Tano haida dekenai, ami gaukaradia idia abia dae lasi taudia be Kaisara ese ia hamaorodia dahaka gaukara idaudia do idia karaia?
17. Baibel be gaukara idauna, ami gaukarana lasi, idia karaia sivaraina ta ia gwauraia, a?
18. Dahaka gaukara idaudia, ami eiava tomadiho gaukaradia lasi, be Iehova ena Witness taudia ese nega momo idia karaia?
19. Keristani tauna be dahaka do ia karaia guna, bema Kaisara ese ia noia gaukara idauna ta be nega taina lalonai do ia karaia?
20. Dahaka henanadai bona Baibel ena hakaua herevadia ese Keristani tauna do ia durua bese ena ami lasi gaukara idaudia do ia laloa namonamo totona?
21. Herevana bese ena ami lasi gaukara idauna ia laloa noho tadikakana be edena dala ia abia hidi, to kongregesen ese edena bamona ia idia laloa be namo?
22. Herevana ita dekenai dahaka ia vara, to ita be dahaka do ita karaia noho?
[Picture on page 16, 17]
Aposetolo taudia ese Iuda Kota Badana idia hamaoroa: “Dirava ai kamonai henia be namo, taunimanima ai kamonai henia be dika”