Dirava ena Hahemaoro Herevadia Ita Harorolaia be Namo
“Oi toreisi, oi dekenai lau gwauraia herevadia iboudiai oi hamaorodia. Idia dainai oi gari lasi.”—IEREMIA 1:17.
1. Iehova ena Witness taudia ese ‘edia diari edena bamona idia hahedinaraia,’ Nazi Germany lalonai?
“IEHOVA ena Witness taudia be Ala-Ala Bada Basileiana [Nazi Germany] lalonai idia dagedage henidia, bona ma nega haida hisihisi idia ania danu.” (Holocaust Studies Annual, Volume 11—The Churches’ Response to the Holocaust) South Africa ena niuspepa ta, Daily News, July 15, 1939 gauna, ese danu Germany ena Witness taudia ia gwauraidia, ia gwau: “Ena diari ia idau diba lasi lamepana ta bamona, inai Keristen tataudia bona hahinedia edia orea maragina be edia abidadama dekenai idia gini auka. Idia be ginigini ta bamona, Munich ena Pavapava [Adolf Hitler] ena ohena ia gwadaia, bona idia hahedinaraia do ia mase.” Unai hereva dainai, Iesu ena hereva ita laloa lou, ia gwau ia murinai idia raka taudia be “tanobada taudia ibounai edia diari” ai do idia lao, bona edia diari be tanobada taudia vairadiai do idia hahedinaraia be namo, idia be unai dainai hisihisi do idia ania be herevana.—Mataio 5:11, 12, 14-16.
2, 3. Ta be Sri Lanka dekenai ia haroro goadagoada bona ia gari lasi sivaraina mani oi gwauraia.
2 Ripoti ma ta Sri Lanka amo ia mai ese Tamil Witness tauna matamatana ta ladana David Gunaratnam ia gwauraia. Unai gabu dekenai dagedage taudia ese gavamani idia tuari henia noho, bona nega ta ami taudia ese hari Witness tauna bona tatau matamatadia haida idia dogodiatao idia henanadai henidia totona, bena Ieremia hegeregerena ia ese ia haroro henidia, ia gari lasi. Ripoti ia gwau: “Opesa bona ami taudia oredia be iena diba bona ena kara momokani idia hoalaia. Ia hamaorodia, ia gwau, ‘Unai tatau haida, dagedage taudia umui gwauraidia taudia, bema lau hedavari henidia, inai hereva be idia dekenai do lau harorolaia danu.’ ”
3 Unai hanuaboi ai dagedage taudia ese ia na ena ruma amo idia abia oho, idia samania, idia gwau ia ese ami taudia ia durudia. Ia hereva goadagoada, ia gwau unai tuari amo ia gini siri, ma ia gwau ia ese Dirava ena Basileia ena sivarai ia harorolaia sibona. Ia gwau: “Lau ese Dirava ena gaukara lau karaia noho bona do lau karaia noho. Lau ese kamonai taudia iboudiai lau haroro henidia.” Unai gari lasi Witness tauna be unai dagedage taudia ese idia pidia mase. Madi, iena adavana bona edia beibi merona ia masetanidia.—Kara 7:51-60 itaia.
4 America tanona ta dekenai Iehova ena Witness taudia idia dagedage henidia, bona Katolik bona Presbyterian haroro taudia haida ese unai dagedage karadia idia gwauraia namo. Unai tano amo ia mai ripotina be inai: “Iehova ena Witness taudia 5 be tuari oreana lalonai idia noho . . . Idia dadabadia loulou, bona idia ta ta be sibona sibona dibura dekenai idia koudia bona aniani idia henidia lasi. Politikol opesa ta, aiemai tuari oreana ia hadibaia tauna, ese ia panisidia, badina be idia ese ami taudia idia haroro henidia dainai. Ia gwau Iehova ena Witness taudia idia dika momokani, tomadiho dainai idia gwau-edeede taudia oredia iboudiai idia hanaidia.”
Dagedage Idia Haheaukalaia
5 Oibe, tomadiho bona politikol gunalaia taudia ese Ieremia idia dagedage henia hegeregerena, tanobada ibounai lalonai unai gunalaia taudia ese Iehova ena Witness taudia idia tuari henidia. Dahaka dainai unai bamona idia karaia? Ena be maino karadia ai bona taravatu badinaia karadia ai Witness taudia ese taunimanima oredia idia hereadia, to edia inai taudia ese Dirava ena Basileia ena sivarai idia badulaia bona idia dadaraia dainai, idia laloa Dirava ena Hereva ese taunimanima ia hakereredia diba. Witness taudia idia haroro goadagoada bona kara maoromaoro idia badinaia goadagoada neganai, unai ese Satana ena tanobada ena politikol, bisinesi, bona tomadiho oreadia edia mataganigani bona edia koikoi ia hahedinaraia.—Ioane 15:18, 19; 1 Ioane 5:19.
6. Haida ese idia dagedage henidia neganai, Iehova ena Witness taudia be dahaka idia karaia?
6 To, ena be Iehova ena Witness taudia edia inai taudia ese dibura ai idia koudia, idia dadabadia, bona idia haida idia hamasedia, to tanobada ibounai lalonai Iehova ena Witness taudia idia kara, Ieremia ia kara hegeregerena. Mai edia lalokau bona mai edia hemataurai ida idia ese Dirava ena hahemaoro herevadia, taunimanima idia moalelaia lasi herevadia, idia harorolaia noho, bese idauidau dekediai. (2 Timoteo 2:23-26) Idia diba Dirava idia kamonai henia be namo, taunimanima idia kamonai henidia be dika. (Kara 4:19, 20; 5:29) Paulo ese Heberu Keristen taudia ia tore henidia sisibana idia laloa, Paulo ia gwau Dirava ena ura do idia karaia noho mai edia haheauka ida. Bena gwauhamata ena anina, mauri hanaihanai, do idia itaia. Unai dainai, Paulo bona Ieremia hegeregeredia, namona be ita be inai bamona ita hereva diba: “Ita be Dirava ena dala do ita rakatania lasi. Ita be boio taudia lasi. Lasi, to ita be abidadama taudia dainai mauri do ita abia.”—Heberu 10:35-39.
Hari Inai Negai Ieremia Bamona Oreana ese Kerisendom ena Kerere Idia Hahedinaraia
7 Iehova ese ena peroveta taudia na Israel bona Iuda dekenai ia siaidia loulou; unai hegeregerena ia ese ena witness taudia ia siaidia, iena hahemaoro karana do idia harorolaia loulou totona. (Ieremia 7:25, 26; 25:4, 8, 9) Lagani 1919 lalonai Dirava ese Keriso ena tadikaka oredia, horodia taudia, ia hagoadadia lou, bena unai nega amo ema bona harihari, Dirava ena hahemaoro herevadia, hisihisi badana herevadia, be Kerisendom dekenai idia harorolaia, idia gari lasi. (Ieremia 11:9-13 itaia.) Unai lagani lalonai magasin ta ladana The Golden Age idia halasia. Gabeai, lagani 1937 lalonai, ena ladana idia hatoa Consolation bona lagani 1946 lalonai ena ladana idia hatoa Awake! Lagani momo lalodiai idia gaukaralaia, Kerisendom ena tomadiho herevadia koikoidia bona ena Keristen tomadiho koikoina hahedinaraia totona.
8, 9. (a) Dahaka dainai dubu oreadia idia gwauraia dika, lagani 1922 lalonai? (b) Idia gwau dahaka hisihisi badana be idia dekenai do ia vara?
8 Unai hegeregerena, October 11, 1922 ena Golden Age ese tomadiho koikoi inai bamona ia gwauraia dika: “Dubu oreadia, mai edia haroro taudia, bona mai edia gunalaia taudia bona mai edia turadia danu, be idia hekwarahi, guna idia noho oreadia idia hamauridia bona idia haginidia lou totona . . . to edia ura do idia hagugurua lasi, badina be idia be Mesia ena basileia ena kahana ta lasi. To idau, Tanobada Ibounai Tuarina [Ginigunana] negana lalonai, unai dubu oreadia idauidau edia haroro taudia ese Lohiabada Iesu Keriso idia badinaia lasi; idia be bisinesi badadia ida bona politikol taudia badadia ida idia gaukara hebou, Tanobada Ibounai Tuarina karaia badabada totona.”
9 Unai samani herevadia ma haida be inai: “Idia ese Lohiabada bona ena basileia idia dadaraia bona edia kamonai lasi karana idia hahedinaraia dalana ma ta be inai: Satana ena orea ida idia gaukara hebou mai edia ura ida, bona tanobada taudia iboudiai vairadiai idia haroro, idia gwau League of Nations oreana amo Dirava ena basileia be politikol dalanai idia hahedinaraia tanobada dekenai.” Dokonai “hisihisi badana” eiava hahemaoro karana idia herevalaia, idia gwau: “Keriso Iesu ena hereva hegeregerena, ‘hisihisi bada herea’ be tanobada besedia iboudiai dekenai do ia vara, ‘Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.’ ”
10. Lagani 1926 lalonai Kerisendom ena kerere be edena bamona idia hahedinaraia?
10 Ieremia bamona idia karaia gaukarana be Gima Kohorona magasin, buklet, bona buka amo idia habadaia. Lagani 1926 lalonai buka ta ladana Deliverance lalonai Kerisendom ena hahediba herevadia koikoidia idia hahedinaraia goevagoeva. Rau 203 dekenai ia gwau: “Hahediba herevadia koikoidia be [hereva momokani ia negea vadaeni oreana, Kerisendom lalonai] idia abia dae haraga, bona hereva momokani ena gabunai idia atodia. Unai hahediba herevadia koikoidia haida be inai: toi tamona diravana, lauma iboudiai idia mase diba lasi, kara dika taudia idia hahisidia ela bona hanaihanai, Dirava ese tomadiho gunalaia taudia na siahu ia henidia, bona pavapava be siahu ia henidia taunimanima do idia lohiadia totona. Gabeai mero maragina Iesu ena sinana Maria be dirava ta ai idia halaoa; bona edia orea taudia idia haganidia ia do idia tomadiho henia badina be ia be Dirava ena sinana.”
Kerisendom Idia Hadibaia
11 Unai buka ese danu ia hahedinaraia haroro taudia ese tuari idia durudia, ia gwau: “Bisinesi oreadia bona politikol oreadia ese tuari oreadia idia siaidia tuari totona, bena inai tomadiho oreadia idauidau edia haroro taudia ese unai tuari oreadia idia hanamodia, idia be edena bese totona idia tuari be herevana. Haroro taudia iboudiai ese Dirava tamona idia guriguri henia koikoi, idia noia idia tuari heheni noho oreadia do ia hanamodia. (Ieremia 7:31 itaia.) Bena unai buka ese ia hahedinaraia Dirava ese ia kota henidia gwauraia, ia gwau: “Satana ena orea ena kahana iboudiai tanobada dekenai idia noho, be idia haboudia noho, Aramagedono ena tuari badana totona.”—Apokalupo 16:14-16.
11, 12. (a) Idia ese dubu oreadia gunalaidia taudia edia kerere ma ta edena bamona idia hahedinaraia? (b) Ieremia oreana ese taunimanima edena bamona idia hadibadia dika do idia davaria?
12 Ieremia ena nega lalonai tomadiho gunalaia taudia idia gwau, idia be dika do idia davaria lasi bona idia be Dirava ida maino idia karaia; “unai hegeregerena inai tomadiho oreadia gunalaia taudia be sibodia dekenai idia gwau dika do idia davaria lasi, ma idia gwau idia be Keriso ena ladana idia abia dainai idia be hegeregere, to Diabolo ena lahi idia gadaralaia noho. Miri be sibodia edia matana ai bona edia bamodia edia matana ai idia atoa, unai amo sibodia edia matana idia hakepulua bena hereva momokani idia itaia diba lasi.” (Deliverance, rau 270) Idia be sibodia idia koia dalana be unai Bible Student taudia ese idia hahedinaraia, unai nega lalonai Iehova ena Witness taudia edia ladana be unai.—Mataio 7:21-23.
13. Dahaka be lagani 1931 lalonai ia vara, bona badina be dahaka ia vara be maoro?
13 Gabeai, Bible Student taudia be Ieremia hegeregerena ai idia lao momokani; lagani 1931 lalonai hebouhebou ta be Columbus Ohio, U.S.A. dekenai idia abia neganai, hereva ta idia halasia, idia gwau inai gari lasi Keristen taudia edia orea ena ladana do idia hatoa “Iehova ena Witness Taudia.” (Isaia 43:10-12) Lagani 700 bamona idia do noho ema bona Iesu ia vara neganai, Iehova ese unai lada ia hahedinaraia, Israel besena be iena witness taudia ia gwauraidia neganai. Unai dainai, lagani 100 bamona murinai, Ieremia be peroveta tauna ai ia lao neganai, ia danu be Iehova ena witness tauna ta. (Ieremia 16:21) Unai hegeregerena, Iesu be Iuda tauna ta hegeregerena tanobada dekenai ia mai neganai, ia be ena Tamana, Iehova ena witness tauna ta. (Ioane 17:25, 26; Apokalupo 1:5; 3:14) Unai dainai, Dirava ena nega korikorina ai, iena orea taudia be inai lada, Dirava ese ia hatoa ladana, “Iehova ena Witness Taudia” idia abia be maoro.—Ioane 17:6, 11, 12.
Kerisendom ena Koikoi Idia Hahedinaraia
14 Hanaia lagani 70 lalodiai, Iehova ena Basileia helarona mai hairaina idia harorolaia noho lalonai, Iehova ena Witness taudia ese danu samani herevadia bona hahemaoro herevadia momo herea idia harorolaia. Buklet bona buka milion momo herea lalodiai, Bible ena hereva amo Kerisendom ena kerere idia hahedinaraia; idia hahedinaraia tomadiho ariara hahinena, “Babulono badana” lalonai ia be mai ena siahu bada herea, Apokalupo karoa 17 bona 18 lalodiai idia gwauraia dika hahinena unai.
15. Lagani 1955 lalonai, Kerisendom ena kerere be edena bamona idia hahedinaraia?
15 Lagani 1955 lalonai Iehova ena Witness taudia ese buklet ladana Christendom or Christianity—Which One Is “the Light of the World”? milion momo idia hariharilaidia. Unai buklet momo herea be Kerisendom ena haroro taudia idia henidia. Bona unai buklet ese dahaka ia gwauraia idia dekenai? Ieremia hegeregerena ia gwau: “Ena be Kerisendom be mai ena heduru gaudia momo dainai ena kohu bona diba bona tuari siahuna ese tanobada besedia oredia edia ia hanaia, to Kerisendom be ‘tanobada ena diari’ ai ia lao lasi. Badina be dahaka? . . . Ia ese [Bible ena] Keristen tomadiho dalana ia harorolaia lasi bona ia badinaia lasi.” Bena inai henanadai ia gwauraia: “Tomadiho koikoi oreadia edia kerere hahedinaraia karana be edia orea taudia dagedage henidia karana bamona a? Unai be idau tomadiho oreadia lalo-dika henidia karana dainai, Keristen taudia ese idia karaia lasi be namo a?”
16. Witness taudia ese Kerisendom ena kerere idia hahedinaraia neganai, idia sibodia idia kara kerere unai a? Mani oi herevalaia.
16 Unai henanadai ena haere be inai: “Lasi; badina be bema ita gwau unai kerere hahedinaraia karana be kerere, anina be Iesu Keriso ese Iuda taudia ia dagedage henidia mai ena lalo-dika ida, . . . bona Iehova ena idau negai peroveta taudia iboudiai [Ieremia danu], Iesu ia do vara lasi neganai idia peroveta taudia, be taunimanima dagedage henidia taudia bona idau tomadiho orea taudia lalo-dika henidia kava taudia, badina be idia iboudiai ese tomadiho momokani idia negea Iuda taudia bona idau besedia edia tomadiho koikoi idia hahedinaraia dainai.” Momokani, Keristen taudia momokanidia be “tanobada taudia ibounai edia diari” ai idia lao totona, namona be idia ese lauma ‘diburana’ idia hahedinaraia be namo. (2 Korinto 6:14-17) Taunimanima idia gwauraidia dika lasi, to unai taunimanima be edia hesiai taudia ai idia halaodia oreadia idia gwauraidia dika. Unai dainai Iehova ese Ieremia ia oda henia, ia gwau: “Oiemu rami oi kwatua; oi toreisi, oi dekenai lau gwauraia herevadia iboudiai oi hamaorodia. Idia dainai oi gari lasi . . . Oi do idia tuari henia, to oi do idia halusia lasi, badina be ‘lau be oi ida, bena oi do lau hamauria.’ Iehova ena hereva unai.”—Ieremia 1:17, 19.
Ieremia Gaukarana be Kahirakahira Do Idia Hagugurua
17 Iehova ena Witness taudia ese Dirava ena hahemaoro herevana idia hamanokaia a? Momokani, hari inai nega lalonai taunimanima idia laloa tomadiho idauna gwauraia dika karana be kerere. To, Iehova ena Witness taudia edia buka ese Kerisendom hahemaoro henia sivaraina idia gwauraia hedinarai noho, guna idia karaia bamona. Hegeregere, hanaia laganidia 4 lalodiai Iehova ena Witness taudia ese buka ladana Mauri Hanaihanai Paradaiso Lalonai 32 milion idia printaia, gado 76 ai. Unai buka ese henanadai momo ia haerelaidia. Unai henanadai haida be inai: “Mase ena Anina be Dahaka?” “Dahaka Dainai Dirava ese Kara Dika Ia Koua Lasi?” bona “Edena Tomadiho be Momokani?” To unai buka ese danu taunimanima ia hadibadia, tanobada ibounai ena tomadiho koikoi basileiana do idia rakatania haraga be namo.
17, 18. (a) Vanegai laganidia lalodiai Iehova ena Witness taudia ese edia Ieremia gaukarana edena bamona idia karaia noho? (b) Lalo-maoro taudia edena bamona idia sisiba henidia?
18 Ena karoa 25 ena ladana be “Satana ena Tanobada Dikana Eiava Dirava ena Nega Matamatana?” Unai karoa lalonai ia gwau: “Bible ese tomadiho koikoi ia gwauraia ‘ariara hahinena badana,’ mai ena ladana ‘Babulono Badana.’ . . . Bona momokani, idau nega amo ema bona hari, tomadiho be politik danu idia gaukara hebou, bona nega momo gavamani ia biagudia toho.” Unai dainai, unai buka ia gwau taunimanima be dahaka do idia karaia be namo? Ia henanadai, ia gwau: “Oi be dahaka oi ura henia—Satana ena tanobada eiava Dirava ena nega matamatana? Bema Dirava ena nega matamatana oi ura henia, namona be tanobada mai ena tomadiho koikoi amo oi siri. Inai oda do oi badinaia: ‘Egu orea taudia e, [Babulono Badana] amo umui raka lasi.’ (Apokalupo 18:4)”
19. Edena bamona oi hahedinaraia diba hari inai negai Ieremia ena gadona ia manoka lasi?
19 Inai hapararaia bona hahemaoro herevana mai siahuna be buka ta ladana Worldwide Security Under the “Prince of Peace” lalonai idia gwauraia hedinarai goevagoeva, unai buka be lagani 1986 lalonai idia halasia (6 milion idia karaia, gado 25 dekenai). Ia ese Kerisendom ena haroro taudia edia kerere ia hahedinaraia, ‘edia haroro amo tatau matamatadia edia lalona idia ania [Tanobada Ibounai Tuarina ena] tuari gabudia dekenai do idia vareai totona.’ Ma ia gwau: “Kerisendom be Atai Herea Diravana ena inai tauna ta bamona ia karaia ema bona harihari. Momokani Dirava ese ia naria lasi, bona unai dainai do ia ore haraga diba.” (Rau 30-32 itaia.) Hari inai negai Ieremia ena gadona ia manoka lasi! Ena be tomadiho gunalaia taudia bona politikol taudia ese Dirava ena hahemaoro herevadia harorolaia gaukarana idia koua toho, to iena kamonai witness taudia idia gaukara noho, hadibaia gaukarana idia hagugurua gwauraia.—Ieremia 18:18.
20. Dahaka dainai Iehova ena Witness taudia ese Iehova ena hahemaoro herevadia be bese idauidau dekenai do idia harorolaia noho?
20 Bona dahaka dainai inai gaukara do idia karaia ore be namo? Badina be Iehova, guba bona tanobada edia Lohia Badana ese tanobada besedia bona edia tomadiho oreadia edia davana ia henidia gwauraia. Iehova be koikoi besena Iuda bona koikoi hanuana Ierusalem dekenai ia gwauraia henanadaina be mai anina Kerisendom dekenai, hari inai nega lalonai; ia gwau: “Iehova ia gwau: ‘Unai gau dainai edia davana do lau henidia lasi a? Inai bamona bese latanai davana do lau atoa lasi a?’ ” Unai dainai, Iehova ena Witness taudia ese bese idauidau taudia do idia lao henidia loulou. Taunimanima momo ese edia haroro herevana idia moalelaia lasi, badina be idia dekenai ia be hahemaoro herevana mai hisihisina. To taunimanima haida dekenai unai hereva be moale sivaraina—Dirava ena Basileia ena sivarai namona unai.—Ieremia 5:9, 29; 9:9; Kara 8:4, 12.
21. Ena be idia perovetalaia hisihisi bada hereana be ia vara gwauraia, to dahaka helaro namona be Ieremia gaukarana idia kamonai henia taudia vairadiai ia noho? (Salamo 37:9, 11, 18, 19, 28, 29)
21 Ena be momo idia gwau Ieremia be hisihisi badadia harorolaia tauna mo sibona, to iena hereva amo ia ese helaro namona ia hahedinaraia Iuda taudia dekenai. (Ieremia 23:5, 6; 31:16, 17) Unai hegeregerena, Iehova ena Witness taudia ese “hisihisi bada herea,” Dirava ese Aramagedono ai do ia karaia hahemaorona, idia harorolaia noho lalonai, idia ese danu “guba matamatana bona tanobada matamatana” edia hahenamo idia harorolaia, anina be Dirava ese hahemaoro goevagoeva bona Paradaiso be tanobada dekenai do ia havaraia lou, bona taunimanima ese mauri hanaihanai do idia abia. (Mataio 24:21, 22; Apokalupo 16:16; 21:1-4) Unai dainai, namona be harihari Iehova ena hahemaoro herevana do oi kamonai henia, bona Ieremia gaukarana badana hagugurua karana do oi durua.—Ieremia 38:7-13 itaia.
Inai Oi Laloatao A?
◻ Iehova ena Witness taudia be edena bamona idia dagedage henidia, Ieremia idia dagedage henia bamona?
◻ Dahaka dainai Witness taudia idia haroro noho mai edia haheauka ida?
◻ Ieremia gaukarana be edena bamona idia habadaia?
◻ Dahaka hereva vanegai idia halasidia ese idia hahedinaraia edia samani herevadia idia haidaua lasi?
◻ Ena be hisihisi bada herea sivaraina idia harorolaia, to dahaka helaro namona danu idia harorolaia?
4. America tanona ta dekenai, Iehova ena Witness taudia be edena bamona idia dagedage henidia bona haroro taudia ese unai kara idia gwauraia namo?
5. Ieremia dekenai ia vara hegeregerena, nega momo badina be dahaka Witness taudia idia dagedage henidia?
7. Hari inai nega lalonai Witness taudia ese Iehova ena peroveta taudia mai edia kamonai, Israel bona Iuda dekenai ia siaidia taudia, edia kara be edena bamona idia tohotohoa?
14. Hanaia laganidia 70 lalodiai, Kerisendom ena kerere be edena bamona idia hahedinaraia?
[Picture on page 25]
Gabeai, Maria be dirava ta ai idia halaoa, “Dirava ena Sinana” idia gwauraia
[Picture on page 26]
Lagani 1931 lalonai Bible Student taudia ese inai lada “Iehova ena Witness Taudia” idia abia dae, edia hebouhebou dekenai, Columbus, Ohio dekenai
[Pictures on page 27]
Tanobada ibounai lalonai Iehova ena Witness taudia ese Ieremia ena kara idia tohotohoa