Basileia Haroro Ripoti
Paraguay Ena Gabu Daudaudia ai Anina Idia Havaraia
PARAGUAY ena Watch Tower Society branch opesi idia diba momokani ena teritori dekenai Basileia ena sivarai namona idia harorolaia be gau badana. (Kara 1:8) Hari, gau badana be taunimanima iboudiai be Basileia dekenai diba idia abia bona Iehova idia hesiai henia hari tanobada dikana ia do hadokoa lasi “hisihisi bada herea” negana lalonai. (Mataio 24:21, 22) Henuna sivarai ese idia hahedinaraia dahaka idia karaia kongregesen lasi gabu daudaudia dekenai idia noho taudia idia durudia totona. Branch ena ripoti be inai:
Dala idia hegaegaelaia nega sisina lalonai special pioneer gaukara idia abia taudia ese kongregesen lasi gabu daudaudia ibounai dekenai idia haroro totona. Lagani 1990 ena hesiai laganina lalonai, November ia lao January edia hua lalonai, tadikaka bona taihu 39 ese hanua badadia bona taoni maragidia handred tamona dekenai idia haroro; unai gabudia ai Basileia harorolaia pablisa taudia be lasi. Idia be buka 6,119, buklet 4,262, bona magasin 5,144 idia hariharilaidia. Unai gaukara dainai pablisa orea matamatadia momo idia vara.
◻ Kongregesen lasi ena daudau teritori dekenai ia haroro pioneer taihuna ta be hahine ta dekenai Mauri Hanaihanai Paradaiso Lalonai bukana ia henia. Unai pioneer ia gwau ia ura Bible stadi ia dekenai ia karaia, bona unai hahine be mai moale danu ia ura. Pioneer ia giroa neganai, unai hahine sibona lasi to iena tau bona edia natudia ten danu idia naria hegaegae. Ia vadivadi negana gabena ai, unai ruma bese taudia bona edia turadia bona dekena taudia idia hegaegae vadaeni Bible stadi idia abia totona! Unai hahine ese ia boiridia mai, ia gwau stadi be namo herea bona Iehova ese ia henia helarona bona hahenamodia be namo herea. Unai hereva be guna ta ese idia ia hadibaia lasi, unai dainai ia laloa namona be iena turadia bona dekena taudia danu ese unai sivarai namona idia kamonai.
Pioneer ese stadi ia karaia negadia ta ta iboudiai, taunimanima momo idia mai dainai edia toana be kongregesen maragina ta bamona. Unai kamonai taudia be henanadai momo idia henia bona stadi dekenai idia haere. Unai pioneer ese ia hamaorodia teritori ibounai ia haroro henia ore murinai, ena turadia ida do ia lao gabu matamatana ta dekenai, unai neganai hahine be mai lalo-hekwarahi ia henanadai dahaka do ia vara idia kamonai vadaeni taudia dekenai. Dala idia karaia kahirakahira ia noho kongregesen ta edia tadikaka idia mai stadi idia henia noho totona. Hari idia be special pioneer taudia idia siaia unai mamoe bamona kamonai taudia idia durudia totona.
◻ Kongregesen lasi ena gabu daudauna ma ta dekenai ia lao ruma ta ruma ta neganai, pioneer taihu ta be lagani ten gunanai Mauri Hanaihanai Ia Lao Henia Hereva Momokanina bukana ia abia tauna ta ia davaria. Unai buka ia abia ena nega murinai ia be Iehova ena Witness taudia ia davaria lou lasi. To, ia diba Iehova, ia gwauraia tuari orea iboudiai edia Iehova, be Dirava momokanina tamona sibona bona Ia sibona ita tomadiho henia be maoro. Ia sibona ena ura dainai, ia diba taudia iboudiai dekenai Iehova ena sivarai ia herevalaia. Wiki ta ta iboudiai ia be kilomita toi ia raka lao kamonai tauna ta bona iena hahine dekenai, Dirava ena sivarai be idia dekenai ia herevalaia totona, badina ia gwau, ‘Bema lau vadivadi henia karana lau hadokoa, idia be Iehova do idia laloaboio.’ Unai headava tauna bona hahine sibona lasi, to taunimanima ma ten idia ura Bible stadi idia abia—unai bamona ia vara badina unai kamonai tauna ese ia haroro henidia dainai.
Ita hoa badina dina haida gunanai, pioneer tauna ese ia do vadivadi henia lasi neganai, unai tauna ese unai gabu ena pris tauna ta bona ia ida idia raka hebou taudia ia koudia iena ruma lalonai idia vareai lasi totona, idia be Maria kaivakukuna idia loalaia neganai; ia hamaorodia ia be kaivakuku ia abidadama henia lasi. Pris tauna ia badu dikadika. Unai hanuaboi unai tauna be Iehova ena heduru totona ia guriguri. Unai dainai pioneer ia mai neganai iena moale be bada herea! Dala idia hegaegaelaia nega ibounai Bible stadi ia abia totona, bona unai tauna be tiokratik oreana ena dala dekenai ia goada ia lao.
Momokani, Iehova be Paraguay dekenai taunimanima haboua gaukarana ia hanamoa, unuseniai tadikaka idia gaukara bada kongregesen lasi ena gabu daudaudia dekenai haroro idia karaia namonamo totona.—Mataio 24:14.