“Hereva Momokani Do Oi Hadibaia Maoromaoro”

DIRAVA ena Hereva lalonai be hakaua herevadia momo herea, bona idia be mai anina bada, iseda mauri lalonai do ita kwalimu totona. Unai Hereva ese haroro tauna ia durua diba, taunimanima do ia hadibadia, do ia sisiba henidia, bona do ia hamaoromaorodia. (2 Timoteo 3:​16, 17) To, Dirava ese ia henia hakaua herevadia amo namo do ita abia guguru totona, namona be aposetolo Paulo ena sisiba Timoteo dekenai ita badinaia; ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”​—⁠2 Timoteo 2:⁠15.

Haida idia gwau Dirava ena Hereva be inai gau bamona: tauanina ia hagoadaia ratana, aniani korikori, goada ia henia lou bona ia hagoevaia ranuna, hevarivari, bona tuari kaiana mai matana. Bema haroro tauna ese unai hereva edia anina ia lalo-pararalaia, Baibel do ia gaukaralaia namonamo diba.

Dirava Ena Hereva Ena Rata Henia Karana

Beibi matamatadia ese rata idia inua be gau badana. Beibi ia tubu daekau lalonai, ena sinana be sisina sisina aniani korikori ia henia, to matamana ai, rata sibona be hegeregere iena bogana dekenai. Dala momo ai, Dirava ena Hereva idia diba sisina mo taudia be beibi bamona. Herevana ta be Dirava ena Hereva ura henia matamata tauna, eiava nega taina daudau lalonai kamonaia tauna, to bema Baibel ena hereva haragadia sibodia ia lalo-pararalaia, lauma dalana ai ia be beibi bamona bona lauma ‘ratana’ ia abia be namo. Ia be do hegeregere lasi “aniani korikori,” Dirava ena Hereva ena dobu gaudia unai, do ia lalo-pararalaia.​—⁠Heberu 5:⁠12.

Korinto ena kongregesen matamatana ai idia noho taudia be unai bamona, Paulo be inai bamona ia tore henidia neganai: “Unai dainai rata dekenai umui lau ubua. Aniani aukadia umui dekenai lau henia lasi, badina umui be do goada lasi.” (1 Korinto 3:⁠2) Namona be Korinto taudia ese “Dirava ena hereva, diba hamatamaia gaudia” idia dibaia guna. (Heberu 5:⁠12) Lauma dalana ai idia do tubu daekau lasi dainai, idia hegeregere lasi “Dirava ena laloa dobu gaudia” idia lalo-pararalaia.​—⁠1 Korinto 2:⁠10.

Paulo hegeregerena, Keristani haroro taudia hari inai negai idia hahedinaraia idia be lauma dalana ai beibi bamona taudia edia namo idia tahua, unai dainai “rata” idia henidia, anina be, idia durudia Keristani hahediba herevadia badadia do idia dibaia namonamo totona. Idia ese kamonai matamata taudia bona idia do lo lasi taudia idia hagoadaia, ‘lauma ena rata goevagoeva do idia ura henia.’ (1 Petero 2:⁠2) Aposetolo Paulo ia hahedinaraia ia diba kamonai matamata taudia ese heduru idauna idia abia be namo; ia gwau: “Rata ia inua tauna be do beibi bamona. Ia be maoro bona kerere edia toana ia diba lasi.” (Heberu 5:⁠13) Dirava ena hesiai taudia ese Hereva ena rata goevana be Baibel stadi amo kamonai matamata taudia bona diba maragi taudia idia henidia bona kongregesen lalonai idia gwauraia neganai, namona be idia kara metaira, mai edia hemataurai, mai edia hebogahisi, bona mai edia manau ida.

Dirava Ena Hereva Ena Aniani Korikori Gaukaralaia Karana

Keristani tauna ta be do ia tubu daekau ela bona hahemauri do ia abia totona, “rata” sibona be hegeregere lasi. Baibel ena hereva badidia ia lalo-pararalaia goevagoeva bona ia abia dae vadaeni neganai, ia hegeregere ‘aniani korikori, tau badadia’ edia, do ia abia. (Heberu 5:⁠14) Edena dala amo unai ia karaia diba? Dalana be, ia sibona ia stadi loulou bona Keristani heboudia ia lao henidia loulou. Unai bamona kara namodia ese Keristani tauna ia durua, lauma dalana ai do ia goada, do ia lo, bona haroro gaukarana ai anina do ia havaraia. (2 Petero 1:⁠8) Namona be ita laloaboio lasi, lauma aniani be diba sibona lasi, to Iehova ena ura karaia karana danu.​—⁠Ioane 4:⁠34.

Hari inai negai, ‘hesiai tauna mai ena kamonai bona mai ena kara maoromaoro’ be mai ena gaukara, nega maorona ai aniani be Dirava ena hesiai taudia do ia henidia bona ia durudia, “Dirava ena aonega idauidau” do idia lalo-pararalaia totona. Iehova ese ena lauma amo, Baibel ena hereva dobudia ia hahedinaraia unai hesiai tauna mai ena kamonai ena amo, bona nega ibounai unai hesiai tauna be “aniani neganai [lauma] aniani” ia halasia. (Mataio 24:​45-47; Efeso 3:​10, 11; ma danu Apokalupo 1:​1, 2 itaia.) Keristani taudia ta ta iboudiai edia maduna ta be ia halasia herevadia do idia gaukaralaia guguru.​—⁠Apokalupo 1:⁠3.

Momokani, Baibel ena “hereva haida edia anina davaria be auka”; lo Keristani taudia dekenai danu unai be auka. (2 Petero 3:⁠16) Baibel ena hunia gaudia, peroveta herevadia, bona hereva hegeregeredia edia anina do ita davaria totona, namona be ita stadi goadagoada bona unai hereva ita laloa dobu. Unai dainai, siboda eda stadi ita karaia neganai namona be Dirava ena Hereva ita tahua namonamo. (Aonega Herevadia 1:​5, 6; 2:​1-5) Elda taudia ese unai bamona idia karaia be gau badana, kongregesen do idia hadibaia totona. Kongregesen Buka Stadi eiava Gima Kohorona Stadi idia naria, o pablik tok idia henia, o hahediba gaukarana ma ta idia karaia neganai, namona be idia herevalaia gaudia idia diba goevagoeva bona idia hegaegae vadaeni, lauma aniani aukana be kongregesen idia henia lalonai do idia hadibaia namonamo.​—⁠2 Timoteo 4:⁠2.

Goada Ia Henia Lou Bona Ia Hagoevaia Ranuna

Iesu ese Samaria hahinena ranu gurina ai ia hamaoroa ranu do ia henia, ia ‘lalonai sinavai bamona do ia heau noho, . . . mauri hanaihanai do ia henia’ totona. (Ioane 4:​13, 14; 17:⁠3) Unai ranu, mauri ia henia ranuna, anina be hahemauri abia totona Dirava ese ena Mamoe Natuna ena amo ia henia gaudia iboudiai, bona unai gau be Baibel ese ia gwauraidia. Unai “ranu” ita ura henia taudia ta ta iboudiai, ese lauma bona Keriso ena headava matamata hahinena edia boiboi herevana ita abia dae, bona ‘mauri ranuna ita abia dae, ia be davana lasi.’ (Apokalupo 22:⁠17) Unai ranu bema ita inua, mauri hanaihanai ita abia diba.

Inai danu, Baibel ia gwau edena kara be maoro Keristani taudia korikoridia totona. Dirava ese ia gwauraia karadia hegeregeredia ita kara neganai, Iehova ena Hereva ese ita ia hagoevaia, iseda kara dika, Iehova Dirava ese ia inai henia karadia, “ia huria goeva.” (1 Korinto 6:​9-11) Unai dainai, Dirava ena lauma ese ia havaraia Herevana lalonai ia noho hereva momokanina, be hurihuri ‘ranuna’ idia gwauraia. (Efeso 5:⁠26) Bema Dirava ena hereva momokani ese unai dala ai ita do ia hagoevaia dalana ita kehoa lasi, ia ese iseda tomadiho do ia abia dae lasi.

‘Hereva momokani idia hadibaia maoromaoro’ elda taudia be ranu ida idia hahegeregerea. Isaia ia gwau idia be “tano kaukau gabudia lalonai sinavai maragidia hegeregere.” (Isaia 32:​1, 2) Elda taudia mai edia lalokau be unai hegeregerena, bema inai bamona idia kara neganai: Lauma dalana ai edia tadikaka idia naria totona idia vadivadi henidia, bona Dirava ena Hereva amo idia hagoadaia lou bona idia hadibadia.​—⁠Mataio 11:​28, 29 itaia.a

Kongregesen taudia ese elda taudia edia vadivadi idia ura henia. Bonnie ia gwau: “Elda taudia edia kara manau lau diba, bona lau moale badina be Iehova ese idia ia henia dainai.” Lynda, mai ena natuna to adavana be lasi hahinena, ia gwau: “Baibel ena hagoadaia herevadia amo, elda taudia ese lau idia durua do lau kwalimu totona. Egu hereva idia kamonaia bona hebogahisi idia hahedinaraia.” Michael ia gwau: “Edia kara bona edia hereva dainai, lau mamia lau be taunimanima ia lalodia oreana lalonai lau noho.” Ma ta ia gwau: “Lau lalo-metau bada negadia ai, elda taudia edia vadivadi ese lau idia durua unai do lau hanaia.” Elda tauna ta ena vadivadi, lauma dalana ai ta ia hagoadaia vadivadina, be ranu keruma hegeregerena, goada matamatana ia henia. Elda taudia mai edia lalokau ese mamoe bamona taudia idia durua, Baibel ena hakaua herevadia edia anina edia mauri dekenai idia lalo-pararalaia totona neganai, unai ese edia lalona ia hagoadaia.​—⁠Roma 1:​11, 12; Iamesi 5:⁠14.

Hevarivari Bamona, Dirava Ena Hereva Oi Gaukaralaia

Ta ese aniani korikori ia ania neganai, unai be aniani ena mamina do ia moalelaia totona sibona lasi. To, ia laloa aniani ese ena tauanina do ia hagoadaia bena do ia gaukara diba. Mero maragina ia laloa, aniani amo ena tauanina do ia tubu bena lo tauna ai do ia lao. Lauma aniani danu be unai bamona. Siboda eda Baibel stadi karaia karana amo moale ita abia diba, to ita karaia ena badina be unai sibona lasi. Lauma aniani ese ita ia haidaua be namo. Ita ia durua, lauma ena huahua ita dibaia bona ita havaraia, bona ‘mauri matamata do ita kwatua. Inai mauri matamata be Dirava ese ia havaraia. Bona ia ese nega ibounai diba matamata ia henia noho, ia lao bona Dirava ena toana momokani do ita abia.’ (Kolose 3:10; Galatia 5:​22-24) Lauma aniani ese ita ia durua, lo taudia ai do ita lao, bena ita hegeregere Baibel ena hakaua herevadia ita badinaia, iseda hekwakwanai do ita hanaidia totona bona ma haida do ita durudia, edia hekwakwanai do idia hanaidia totona danu.

Edena dala amo ita diba, Baibel ese ita ia haidaua vadaeni eiava lasi? Baibel be hevarivari bamona ita gaukaralaia be namo. Iamesi ia gwau: “Dirava ena hereva do umui kamonai kava lasi, to umui badinaia danu. . . . Bema tau ta be hereva ia kamonai sibona, to ia badinaia lasi, ia be sibona ena vairana ena toana hevarivari lalonai ia itaia bamona. Iena vairana ena toana korikori ia itaia, vadaeni ia raka siri, bona maoromaoro iena vairana ena toana ia laloaboio momokani. To taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.”​—⁠Iamesi 1:​22-25.

Dirava ena Hereva ita tahua namonamo bona siboda eda kara be Dirava ena taravatu ida ita hahegeregerea neganai, anina be iena Hereva ita “itaia namonamo.” Bema unai bamona ita karaia, ita be ‘hereva kamonai kava lasi, to badinaia’ taudia ai do ita lao. Baibel ese anina namona ita lalonai do ia havaraia.

Dirava Ena Hereva be Tuari Kaiana Bamona

Vadaeni, aposetolo Paulo ese ita ia hadibaia, edena dala amo Dirava ena Hereva be tuari kaiana bamona ita gaukaralaia diba. Ia ese ‘lauma dikadia, guba dekenai idia noho, bona inai tanobada ia gunalaia lauma dika badana, mai ena siahu taudia, bona tanobada ena dibura lohiadia’ ia sisibalaia neganai, ia gwau namona be ‘Lauma Helaga ena tuari kaia danu do ita dogoatao. Ia be Dirava ena hereva.’ (Efeso 6:​12, 17) Dirava ena Hereva be tuari kaiana bamona ita gaukaralaia diba, “Dirava ena diari” idia koua lalohadaidia utua oho totona.​—⁠2 Korinto 10:​3-5.

Momokani, “Dirava ena hereva be ia mauri noho, bona ia be mai ena siahu.” (Heberu 4:⁠12) Iehova be ena lauma ese ia havaraia Herevana ena rau amo, taunimanima ia hereva henidia. Oi gaukaralaia namonamo, taunimanima hadibadia totona bona hahediba herevadia koikoidia hahedinaraia totona. Oi gaukaralaia, taunimanima edia lalona do oi hagoadaia, goada matamata do oi henidia, do oi ha-uradia, bona lauma dalana ai do oi hagoadadia totona. Bona namona be Iehova ese ‘gau namodia ibounai oi dekenai do ia henia, iena ura do oi karaia’ totona, bena do oi hegeregere nega ibounai ‘Dirava hamoalea karadia do oi havaraia.’​—⁠Heberu 13:⁠21.

[Footnotes]

[Picture on page 31]

Elda taudia ese ‘hereva momokani idia hadibaia maoromaoro’ neganai, taunimanima idia hagoadaia