Painia Gaukara Ena Hahenamo
“Lohiabada ena hanamoa sibona ese, kohu momo oi dekenai ia henia noho, bona . . . lalohisihisi sisina oi dekenai do ia henia lasi.”—AONEGA HEREVADIA 10:22.
1, 2. (a) Painia tauna ta ese ena hemami ful-taim hesiai gaukarana dekenai be edena bamona ia gwauraia? (b) Dahaka dainai painia taudia be hahediba taudia halaoa gaukarana lalonai moale bada idia abia diba?
“OI STADI henia tauna be Iehova hanamoa karana ia goadalaia oi itaia neganai oi moale bada, moale ma ta ese unai moale ia hanaia diba lasi, ani? Dirava ena Hereva ena siahu dainai taunimanima ia ha-uraia edia mauri idia haidaua Iehova idia hamoalea totona oi itaia neganai, oi moale bona oiemu abidadama ia hagoadaia.” Canada dekenai lagani 32 mai kahana lalonai ful-taim hesiai gaukara ia karaia painia tauna ese unai ia torea. Iena painia gaukara ia herevalaia neganai, ia gwau: “Lau laloa lasi gaukara ma ta do lau karaia. Ma gau ta ese lau abia moalena ia havaraia diba lasi.”
2 Oi abia dae tau ta oi durua mauri ia abia totona be moale bada gaukarana, ani? Momokani, painia taudia sibodia be unai moale idia mamia lasi. Iehova ena hesiai taudia iboudiai be “diba tahua taudia” halaoa gaukarana ena oda idia abia, bona idia hekwarahi unai idia karaia totona. (Mataio 28:19) To, painia taudia be haroro gaukara lalonai hora momo idia atoa diba dainai, idia be hahediba taudia halaoa gaukara amo moale bada idia abia diba. To painia gaukara be mai ena hahenamo ma haida danu. Painia taudia oi hereva henia bona oi do idia hamaoroa painia gaukara be dala namona ‘Iehova ena hahenamo bada abia’ karana oi mamia totona.—Aonega Herevadia 10:22.
3. Dahaka ese ita ia hagoadaia Iehova ita hesiai henia noho lalonai?
3 Vanegai, tanobada ena kahana idauna amo painia taudia idia noia ful-taim hesiai gaukara lalonai idia davaria hahenamo do idia gwauraidia. Namona be edia hereva ita laloa. To, oi lalohisihisi lasi bema oi gorere, oi buruka, eiava ma gau ta dainai oi karaia diba lasi. Namona be oi laloatao, dahaka dahaka gaukara oi karaia, gau badana be mai emu kudouna ibounai ida Iehova oi hesiai henia. To, painia taudia edia hereva ese reana oiemu ura do ia habadaia, bema mai dalana, unai ahuna namona gaukara oi karaia totona.
Edia Lalona Ia Hegeregere Bona Idia Moale Momokani
4, 5. (a) Dahaka dainai sivarai namona be ma haida dekenai ita harorolaia ese ita ia hamoalea? (b) Painia taudia be ful-taim hesiai gaukara idia karaia dainai edia hemami be edena bamona?
4 Iesu ia gwau: “Henia kara ena moale be bada, abia kara ena moale be maragi.” (Kara 20:35) Oibe, sibona ita laloa bada lasi bona haida ita durua be mai ena ahuna. (Aonega Herevadia 11:25) Unai be momokani ma haida dekenai sivarai namona ita herevalaia neganai. Momokani, tau ta ita durua Dirava ena diba ia abia, bona unai amo mauri hanaihanai ia abia diba be harihari gauna namo hereana, ani?—Ioane 17:3.
5 Unai dainai ita hoa lasi, ful-taim haroro gaukara idia karaia taudia be nega momo haroro gaukara amo idia abia moale bona gaukara idia hagugurua mamina idia kikilaia. Britain amo painia tauna ta, ena mauri lagani be 64, ia gwau: “Lau diba hereva momokani be ma haida dekenai lau harorolaia gaukarana amo lau abia moalena be gaukara ma ta amo lau abia diba lasi.” Zaire amo vabu ta ese painia gaukara ena anina ia dekenai be inai bamona ia gwauraia: “Egu adavana lalokauna ena mase murinai painia gaukara ese lau ia hagoadaia bada. Haroro gaukara lalonai ma haida durua totona lau lao momo neganai, egu adavana ena mase lau lalohisihisilaia bada lasi. Iehova ena gwauhamata lau abidadama henidia bona lau stadi henia taudia be edena bamona lau durua diba edia mauri idia haidaua totona lau laloa momo. Dina ta ta ibounai edia dokona ai, lau mahuta namonamo diba, bona egu kudouna be moale amo ia honu.”
6. Painia taudia haida ese moale bada herea be edena bamona idia davaria?
6 Lagani momo herea lalodiai painia gaukara idia karaia taudia haida idia moale bada herea badina gabu daudaudia dekenai idia gaukara diba, kongregesen idia haginidia, bona idia tubu ela bona sekit gabudia ai idia lao. Hegeregere, Abashiri, Hokkaido (Japan ena not kahana momokani motumotuna) dekenai, taihu ta be lagani 33 lalodiai painia gaukara ia karaia. Ia laloatao ena sekit hebouhebou ginigunana dekenai—Hokkaido motumotu ibounai totona—taunimanima 70 sibona idia lao. Bona hari? Unai motumotu dekenai sekit 12 idia noho, bona pablisa taudia be 12,000. Mani oi laloa, ia ese unai motumotu dekenai hebouhebou maragidia bona badadia dekenai Basileia idia harorolaia tadikaka bona taihu hutuma ida ia hebou neganai, unai taihu ena kudouna be moale amo ia honu dae!
7, 8. Nega daudau lalonai painia gaukara idia karaia taudia momo ese moale be edena bamona idia davaria?
7 Nega daudau painia gaukara idia karaia taudia ma haida idia moale badina edia Baibel stiuden idia bapatiso bena unai murinai hesiai gaukara ma haida idia tahua. Japan dekenai, taihu ta be lagani 1957 amo, gabu idauidau 9 dekenai painia gaukara ia karaia, bona ia laloatao banika dekenai ia gaukara hahine matamata ta dekenai Awake! magasin ta ia henia. Hua 9 idia do ore lasi neganai unai hahine matamata ia bapatiso. Gabeai ia headava, bona ia bona ena adavana be spesel painia taudia ai idia lao. Unai painia taihu ia moale bada badina iena painia gabuna ihatoina ai ia noho neganai, ena kongregesen be sekit naria tauna matamatana bona iena adavana—iena Baibel stiuden hahinena gunana—ese idia vadivadi henia!
8 Unai dainai ita hoa lasi, idia abia hidi painia gaukara do idia karaia noho taudia idia laloa unai gaukara be, lagani 22 lalonai painia gaukara ia karaia tauna ta ia hereva bamona, do “idia naria namonamo mai anina bada hahenamo ta”!
Iehova ese Ia Naridia Ena Toana
9. Iehova, Henia Tauna Badana, ese dahaka gwauhamata ia henia ena hesiai taudia dekenai, bona ena anina be dahaka ita dekenai?
9 Iehova, Henia Tauna Badana, ia gwauhamata iena hesiai taudia do ia naria, lauma dalanai bona tauanina dalanai. Unai dainai idaunegai King Davida ia gwau diba: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Salamo 37:25) Momokani, Dirava ena gwauhamata be dala ia kehoa lasi iseda ruma bese ubua maduna ita dadaraia, bona iseda Keristani tadikaka edia hebogahisi ita gaukaralaia kerere totona. (1 Tesalonika 4:11, 12; 1 Timoteo 5:8) To, Iehova ita hesiai henia totona iseda mauri lalonai gau haida ita dadaraia neganai, ita do ia rakatania lasi.—Mataio 6:33.
10, 11. Painia taudia momo ese idia davaria hegeregerena, Iehova ena siahu naria bona ubua karana dekenai be edena bamona?
10 Tanobada hegegemadai painia taudia idia davaria hegeregerena, Iehova idia tabekau henia neganai, ia naridia bona ia ubudia. Painia tauna bona ena adavana edia sivarai mani ita laloa. Idia be Basileia harorolaia taudia momo lasi taoni maragina ta dekenai idia lao. Hua haida murinai, moni gaukara be lasi, bona edia moni ia ore. Motuka ena insurens ena davana be 109.00 kina. Tadikaka ia gwau: “Ai be dala lasi ena davana ai karaia totona. Unai hanuaboi ai guriguri goadagoada.” Kerukeru, ruma bese ta amo kadi ta idia abia, idia danu be moni dalanai idia hekwarahi. Kadi ia gwau unai ruma bese be takisi moni haida idia abia lou, bona ia be idia laloa do idia abia gauna ia hanaia dainai, idia ura unai painia tauna bona ena adavana dekenai moni sisina idia henia. Kadi lalonai 109.00 kina ena seke ta idia udaia! Painia tadikaka ia gwau: “Unai dina do lau laloaboio lasi—lau hoa bada herea! Unai ruma bese ena harihari bada karana ai laloa bada.” Iehova ese unai hebogahisi karana ia laloa danu, bona ena hesiai taudia ia hagoadaia unai bamona harihari bada lalohadai do idia hahedinaraia.—Aonega Herevadia 19:17; Heberu 13:16.
11 Painia taudia momo ese unai bamona sivarai idia gwauraia. Oi nanadaidia, bona oi do idia hamaoroa ‘Dirava ese ia rakatanidia lasi.’ Ena mauri lagani be 72 painia tauna ta be lagani 55 lalonai ia karaia ful-taim haroro gaukara ia laloa lou neganai, ia gwau: “Nega ta Iehova ese lau ia rakatania lasi.”—Heberu 13:5, 6.
“Iehova Kahirakahira Dekenai Lao Dalana Hereadaena”
12. Dahaka dainai sivarai namona harorolaia gaukarana be hahenamo badana ta?
12 Iehova ese ita ia noia iena Basileia ena sivarai namona ita harorolaia totona be hahenamo ta. Ena be ita be kara dika taudia to Iehova ia laloa—ita be inai hamauria gaukarana lalonai ‘ia ida ita gaukara hebou.’ (1 Korinto 3:9; 1 Timoteo 4:16) Ma haida dekenai Dirava ena Basileia ita harorolaia, kara dika ena dokona ita herevalaia, taunimanima ita hamaorodia iena lalokau dainai mauri davana ia karaia, bona iena Hereva siahuna ita kehoa bona ena hereva namodia be kudou-maoro taudia dekenai ita hadibaia neganai, ita be Havaraia Tauna, Iehova, kahirakahira dekenai ita lao.—Salamo 145:11; Ioane 3:16; Heberu 4:12.
13. Haida idia gwau edia painia gaukara ese edia hetura karana Iehova ida be edena bamona ia durua?
13 Painia taudia be hua ta ta lalonai Iehova ena kara idia dibaia bona ma haida dekenai idia hadibaia totona nega bada idia gaukaralaia diba. Idia laloa unai ese edia hetura karana Iehova ida be edena bamona ia durua? France dekenai, lagani 10 lalonai painia gaukara ia karaia elda tauna ta ia gwau: “Painia gaukara be Iehova kahirakahira dekenai lao dalana hereadaena.” Unai tano dekenai painia tauna ma ta, lagani 18 ful-taim hesiai gaukara ia karaia tauna, ia gwau: “Painia gaukara ese dala ia kehoa ‘Iehova ena kara ai mamia toho, bena ai diba, Iehova be namo,’ dina ta ta ai emai hetura karana iseda Havaraia Tauna ida ia hagoadaia.” (Salamo 34:8) Britain dekenai, lagani 30 lalonai painia gaukara ia karaia taihu ta be unai bamona ia laloa danu. Ia gwau: “Egu haroro gaukara lalonai Iehova ena lauma ena hakaua lau tahua ese lau ia durua ia kahirakahira dekenai lau lao. Nega momo lau mamia Iehova ena lauma ese nega maorona ai ruma ta dekenai lau ia hakaua lao.”—Kara 16:6-10 itaia.
14. Painia taudia be dina ta ta ai ma haida idia hadibaia totona, Baibel bona Baibel bukadia bona magasin idia gaukaralaia dainai dahaka namo idia davaria?
14 Painia momo idia davaria, dina ta ta ai Baibel bona Baibel bukadia bona magasin idia gaukaralaia, Baibel ena hereva momokani idia gwauraia hedinaraia bona idia hadibaia dainai, unai ese ia durudia Dirava ena Hereva dekenai edia diba ia bada ia lao totona. Spain dekenai, ena mauri lagani be 85 tadikaka, lagani 31 lalonai painia gaukara ia karaia tauna, ia gwau: “Painia gaukara ese lau ia durua Baibel ena hereva dobudia lau diba totona, unai diba lau gaukaralaia taunimanima momo lau durua Iehova bona iena ura idia dibaia totona.” Britain dekenai, lagani 23 lalonai painia gaukara ia karaia taihu ta ia gwau: “Ful-taim haroro gaukara ese lau ia durua lauma aniani lau ura henia bada totona.” Ma haida dekenai “emu abidadama bona lalona namo” edia badina gwauraia hedinarai karana ese oi abia dae vaitani herevadia dekenai oiemu abidadama ia hagoadaia. (1 Petero 3:15) Australia amo painia tauna ta ia gwau: “Painia gaukara lalonai ma haida dekenai egu helaro lau gwauraia hedinaraia neganai, unai ese egu abidadama ia hagoadaia.”
15. Haida be mai edia ura ida painia gaukara idia hamatamaia bona do idia karaia noho totona dahaka idia karaia, bona dahaka dainai?
15 Ia hedinarai goevagoeva, unai painia haroro taudia idia abia dae momokani idia ese Iehova amo hahenamo momo ia mailaia gaukarana idia karaia. Unai dainai ita hoa lasi momo be mai edia ura ida edia mauri idia haidaua, haida be edia moni gaukara bona kohu idia dadaraia, painia gaukara idia hamatamaia bona idia karaia noho totona!—Aonega Herevadia 28:20.
Oiemu Kudouna Ia Ura Ma Gaukara Haida Oi Karaia, A?
16, 17. (a) Bema oi daradara, painia gaukara oi karaia diba eiava lasi, dahaka oi karaia diba? (b) Haida idia painia diba lasi dainai dahaka idia laloa?
16 Painia taudia ese edia painia gaukara ena hahenamo idia kikilaia oi laloa murinai, reana hari oi laloa gauna be, painia gaukara oi karaia diba eiava lasi. Bema oi daradara, namona be ful-taim haroro gaukara dekenai ia kwalimu painia tauna ta oi hereva henia. Reana oi ia durua bada gauna be kongregesen elda tauna ta—oiemu tauanina ena goada, oi idia koua gaudia, bona oiemu ruma bese maduna—ia diba tauna ida oi herevahereva. (Aonega Herevadia 15:22) Ma haida edia lalohadai maorodia ese oi do idia durua diba painia gaukara oi karaia diba eiava lasi oi lalohadailaia namonamo totona. (Luka 14:28 itaia.) Bema painia gaukara oi karaia diba, hahenamo momo herea do oi abia.—Malaki 3:10.
17 To, mai edia abidadama ida Basileia ena sivarai idia harorolaia pablisa taudia momo, ena be painia gaukara idia karaia diba lasi, to idia ura edia haroro gaukara idia habadaia taudia, be edena bamona? Mani taihu ta ena hemami oi laloa, ia be sibona ena natudia hani ia naria, ia gwau: “Egu mamina ia dika, badina guna lau be regula painia hahinena ta, to egu noho dalana dainai, guna lau haroro diba bamona be hari lau karaia diba lasi.” Unai taihu be ena natudia ia lalokau henia bada bona ia ura ia naridia bona ia ubudia. To nega tamona ai, ia ura haroro gaukara lalonai ena gaukara ia habadaia. Ia gwau: “Haroro gaukara lau ura henia bada.” Dirava idia badinaia Keristani taudia ma haida be unai bamona hemami idia abia danu, edia lalokau Dirava dekenai ese ia doridia mai ‘edia kudouna ibounai ida’ Iehova idia hesiai henia totona.—Salamo 86:12.
18. (a) Iehova be ita amo dahaka ia ura? (b) Dahaka dainai ita lalohisihisi lasi be namo bema gau ta dainai ita ura karaia gauna ita karaia diba lasi?
18 Namona be unai ita laloatao, Iehova ese ita amo ia ura gauna be mai iseda kudouna ibounai ida ita karaia gaukarana. Taunimanima ta ta edia kudouna ibounai ida idia karaia gaukara ena bada be idauidau. Haida be edia mauri idia haidaua diba, regula painia taudia ai idia lao totona. Momo be nega ta ta ai heduru painia gaukara idia karaia, eiava hanaihanai hua ta ta ai haroro gaukara lalonai hora 60 idia atoa. To, Iehova ena taunimanima momo herea be haroro bona hadibaia gaukarana lalonai mai edia kudouna ibounai ida kongregesen pablisa gaukara idia karaia. Unai dainai bema oi gorere, oi buruka, oi be mai emu ruma bese maduna, eiava ma gau ta dainai painia gaukara oi karaia diba lasi, oi lalohisihisi lasi. Bema mai emu goada ibounai ida oi gaukara, Dirava ena matana ai oiemu gaukara be mai anina bada, ful-taim haroro gaukara idia karaia taudia edia hegeregerena!
Ibounai be Painia Urana Idia Hahedinaraia Diba
19. Painia urana be dahaka?
19 Ena be painia gaukara oi hamatamaia diba lasi, to painia urana oi hahedinaraia diba. Unai painia urana be dahaka? Iseda Basileia Gaukara pepana, July 1988 gauna, ia gwau: “Unai anina be Iesu ena hahegani haroro bona hahediba gaukarana dekenai oi ura badinaia, bona oi ura taunimanima dekenai lalokau bona kara namo oi hahedinaraia, oi sibona emu ura oi tahua lasi, bona moale oi ura davaria Iesu murinai raka karana amo, bona lauma durua gaudia oi moalelaidia bada, tauanina durua gaudia oi moalelaidia maragi.” Painia lalohadaina be edena bamona oi hahedinaraia diba?
20. Tama sina ese painia urana be edena bamona idia hahedinaraia diba?
20 Bema oi be tama sina ta mai emu natudia maragidia danu, mai emu kudouna ibounai ida idia oi hagoadaia diba painia gaukara idia karaia totona. Bena haroro gaukara oi karaia mai emu moale ida, reana do idia itaia edia mauri lalonai Iehova ena hesiai gaukara idia atoa guna be gau badana. Reana painia taudia, sekit bona distrik naria taudia bona edia adavadia oi boiria diba emu ruma dekenai, unai amo emu natudia ese ful-taim hesiai gaukara idia moalelaia taudia edia haheitalai amo namo do idia davaria. (Heberu 13:7 itaia.) Tomadiho dalanai idia parara ruma bese lalodiai danu, orea lalonai ia noho tama eiava sina be ena hereva bona ena haheitalai amo ena natudia ia durua, edia mauri lalonai ful-taim hesiai gaukarana be edia tahua gauna ai idia atoa totona.—2 Timoteo 1:5; 3:15.
21. (a) Ita ibounai ese painia taudia be edena bamona ita durua diba? (b) Elda taudia be dahaka idia karaia diba painia taudia idia hagoadaia totona?
21 Kongregesen lalonai, mai iseda kudouna ibounai ida painia gaukara idia karaia diba taudia ita durua diba. Hegeregere, painia tauna ida oi gaukara diba, ia be bamona lasi neganai ia oi durua diba, a? Reana do oi davaria ‘oiemu abidadama ese ia durua, bona iena abidadama ese oi ia durua.’ (Roma 1:11, 12) Bema oi be elda tauna, painia taudia oi durua bada diba. Elda oreana ia hebou neganai, namona be painia taudia durua daladia idia herevalaia danu. Painia ta be ia lalohisihisi eiava hekwakwanai haida ia davaria neganai, oi hamaoroa haraga lasi painia gaukara do ia rakatania. Reana hekwakwanai haida dainai unai bamona oi hereva be maoro, to oi laloaboio lasi, ful-taim hesiai gaukarana be painia tauna ese ia ura henia hahenamo badana ta. Reana oi hagoadaia eiava sisiba namona eiava heduru oi henia sibona be namo. Society ena brens opesi Spain dekenai ia gwau: “Elda taudia ese painia taudia idia hagoadaia, haroro gaukara lalonai idia durudia, bona idia naridia hanaihanai neganai, painia taudia idia moale, idia laloa gaukara namona idia karaia, bona ena be hekwakwanai idia vara to idia ura idia gaukara noho.”
22. Taunimanima edia histori lalonai inai be nega dikana dainai, namona be iseda lalona ita hadaia dahaka ita karaia totona?
22 Taunimanima edia histori lalonai ita be nega dikana lalonai ita noho. Iehova ese hahemauri gaukarana ita dekenai ia henia, do ita karaia guguru totona. (Roma 10:13, 14) Herevana unai gaukara lalonai ful-taim painia gaukara ita karaia eiava lasi, to namona be painia urana ita hahedinaraia. Namona be karaharaga lalohadaina ita abia bona siboda eda ura dadaraia karana ita hahedinaraia. Namona be iseda lalona ita hadaia Iehova ia ura gauna do ita henia—mai iseda kudouna ibounai ida gaukarana. Bona namona be ita laloatao, ita karaia diba gaukarana ibounai ita karaia neganai, herevana ia be vabu ena moni maragidia rua bamona eiava Maria ena dava bada dehoro bamona, ita henia gauna be mai iseda kudouna ibounai ida ita karaia, bona Iehova ese unai bamona gaukara ia laloa bada!
Oi Laloatao, A?
◻ Dahaka dainai ful-taim hesiai gaukarana ese moale bona lalona ia hegeregere mamina ia havaraia?
◻ Painia taudia momo idia davaria hegeregerena, Iehova ena naria bona ubua karana be edena bamona?
◻ Painia taudia idia laloa, edia hesiai gaukara ese edia hetura karana Iehova ida be edena bamona ia durua?
◻ Painia urana be edena bamona oi hahedinaraia diba?
[Picture on page 23]
Painia taudia be hahediba taudia halaoa gaukarana amo moale bada idia davaria
[Picture on page 23]
Emu natudia be ful-taim Basileia harorolaia gaukarana idia karaia taudia idia bamodia karana amo, namo idia davaria diba
[Picture on page 23]
Haroro gaukara lalonai, elda taudia ese painia taudia idia hagoadaia diba