Elia Bamona Oi Abidadama, A?

HARI inai negai, tanobada taudia be abidadama idia laloa maragi. Tanobada aonega taudia be Dirava ia noho herevana idia kirikirilaia. Tomadiho koikoi taudia be edia kara amo Dirava idia hevasehalaia bamona. Bona tanobada taudia edia kara momo be hegeregere idia laloa Dirava be anina lasi bamona. Herevana unai lalohadai ese tau ta idia hagaria, eiava unai lalohadai dainai ia lalo-goada lasi, eiava ia lalo-hesiku, dokona be hegeregere: Iena abidadama ia boio. Ita hoa lasi aposetolo Paulo ia gwau abidadama lasi karana be “ita [ia] guia noho kara [dikana]”!​—⁠Heberu 12⁠:⁠1.

Reana unai dainai Paulo be abidadama bada tatau bona hahine haida edia mauri dalana ia gwauraia bada. (Heberu, karoa 11) Unai bamona haheitalai be ita idia durua diba bona iseda abidadama idia hagoadaia. Hegeregere, namona be peroveta tauna Elia ita laloa, bona iena peroveta gaukara momo ena mauri daudauna ena matamana negana ita laloa. Ia be King Ahab bona iena dirava koikoi tomadiho henia hahinena, Kwini Iesebel, idia lohia negana ai ia noho. Unai neganai, hari inai negai bamona, Dirava momokanina abidadama henia karana be ia maragi momokani.

Iduhu-Ten Basileiana Dikana

Unai taudia rua be idau momokani! Ahab be iduhu-ten Israel Basileiana ena king namba 7. Ena be ia do lohia lasi neganai idia lohia taudia 6 idia dika, to Ahab ena kara dika ese edia kara dika ia hanaia. Ia be tano lalonai boromakau tomadiho henia karana ia karaia noho; unai sibona lasi, to ia be idau bese lohia natuna hahine Iesebel ia adavaia danu, unai amo tomadiho koikoi diravana Baal tomadiho henia karana ia habadaia, guna unai tano dekenai unai bamona idia karaia lasi.​—⁠1 Hanua Pavapavadia 16⁠:​30-33.

Iesebel be ia beibi negana amo Baal tomadiho karana ia karaia. Iena tamana Etebaal, Astaroto (Baal ena hahine) ena hahelaga tauna ta unai, be Sidono ena terona ia abia totona taunimanima haida ia alaia. Unai basileia be Israel ena amo north kahanai ia noho. Iesebel ese iena kara manoka adavana ena lalona ia ania Israel dekenai Baal tomadiho karana ia haginia totona. Nega daudau lasi, unai tano dekenai unai tomadiho koikoi diravana ena peroveta taudia 450 bona tomadiho koikoi dirava hahinena Asera ena peroveta taudia 400 idia noho, idia iboudiai be pavapava ena pata dekenai idia aniani hebou. Dirava momokanina, Iehova, ena matana dekenai edia tomadiho kara be ia dika momokani! Tatau edia natuna havaraia gaudia edia kaivakuku laulaudia, natuna havaraia totona kastom karadia, dubu lalonai ariara taudia (tatau bona hahine), bona boubou totona natudia idia alaia karadia​—⁠unai dika rohorohona be edia tomadiho kara badadia. Ahab ena heduru amo, unai basileia dekenai unai tomadiho ia bada ia lao karana be ta ese ia koua diba lasi.

Israel taudia milion momo be Iehova idia laloaboio, ia be tanobada bona ena medu ia diho bona ia daekau dalana ia Havaraia Tauna. Idia laloa Baal ese edia tano ia hanamoa dainai, medu lasi negana ia ore murinai medu ia henia. Lagani ta ta iboudiai idia be ‘Ori Dekenai Ia Gui Kau Tauna’ idia naria, idia gwauraia natuna havaraia karana ia biagua bona medu ia havaraia diravana; ia be siahu negana ia haorea totona idia naria. Lagani ta ta iboudiai medu ia mai. Lagani ta ta iboudiai medu dainai idia be Baal idia hanamoa.

Elia ese Medu Lasi Nega Daudauna Ia Gwauraia

Reana medu lasi, siahu nega daudauna, ena dokona ai​—⁠taunimanima be Baal idia naria mauri havaraia meduna ia henia totona ena nega lalonai​—⁠Elia ia ginidae.a Ia be Bible ena sivarai dekenai idia gwauraia hamatamaia haraga, guba ena regena ta ia vara haraga bamona. Iena sivarai momo ita idia hadibaia lasi, iena tamana bona sinana edia sivarai ia torea lasi. To, Elia be guba regena ese medu negana ia gwauraia bamona ia karaia lasi. Ia be Ahab dekenai ia gwau: “Iehova, Israel taudia edia Dirava, ia mauri noho, bona ia vairanai lau gini; unai hegeregerena, bema oda herevana lau gwauraia lasi, inai lagani lalodiai medu eiava daba ena paripari do idia vara lasi.”​—⁠1 Hanua Pavapavadia 17⁠:⁠1.

Unai tau ena toana oi laloa, ia be hanua tauna ena dabua, animal ena huina amo idia karaia gauna, ia hahedokilaia. Ia be Gilead ororo badadia ena hanua tauna ta, reana ia be mamoe naria manau taudia ida ia tubu daekau. Ia be pavapava goadana Ahab vairanai ia gini, reana unai king ena lohia ruma badana lalonai. Taunimanima momo idia diba unai ruma be elefan isena (ivory) amo idia karaia, bona ia be mai ena davana bada bona idau momokani hairai gaudia bona mai ena kaivakuku badadia danu. Unuseniai, mai magu goadadia hanuana Samaria dekenai, taunimanima idia haragaharaga bona Iehova tomadiho henia karana idia laloaboio bamona. Unuseniai, ia ese Ahab ia hamaoroa iena dirava, unai Baal, be siahu lasi bona anina lasi gauna ta. Elia ia gwau unai lagani ai bona gabeai laganidia ai danu medu be do ia diho lasi bona daba pariparina be do ia noho lasi!

Unai bamona abidadama be edeseni amo ia abia? Unai hekokoroku, tomadiho momokani dadaraia pavapavana vairanai ia gini dainai ia gari, a? Reana ia gari. Lagani tausen bona ma haida murinai, Iesu ena tadina Iakobo ese ita ia hamaoroa Elia be “taunimanima sibona, ita bamona.” (Iakobo 5⁠:17) To Elia ena hereva oi laloa, ia gwau: “Iehova, Israel taudia edia Dirava, ia mauri noho bona ia vairanai lau gini.” Elia ia laloatao ia be Iehova ena hesiai tauna dainai ia be Ahab ena terona ia hereaia terona vairanai ia gini​—⁠Gau Ibounai Ia Lohiaia Tauna ena terona unai! Ia be unai terona amo ia mai tauna, unai terona dainai ia hereva tauna. Unai bamona ia laloa neganai, unai tauna Ahab be tanobada lohia tauna maragina sibona bona Iehova ena hahenamo be iena amo ia boio dainai, dahaka dainai do ia gari henia?

Elia ia laloa Iehova ia noho momokani be lalohadai kavakavana ta lasi. Ita diba, guna unai peroveta tauna ese Dirava ena kara Iena bese taudia dekenai edia sivarai ia stadilaia. Iehova ese Iuda taudia ia sisiba henidia, ia gwau medu lasi negana amo bona aniani lasi negana amo do ia panisi henidia bema dirava koikoidia idia tomadiho henia. (Deuteronomi 11⁠:​16, 17) Elia ia diba momokani nega ibounai Iehova ese iena hereva ia hagugurua, unai dainai “ia guriguri goadagoada, medu do ia diho lasi.”​—⁠Iakobo 5⁠:⁠17.

Abidadama be Kamonai Karana Amo Ia Hahedinaraia

To Elia be unai bamona ia hereva neganai idia hamasea diba. Ia ese abidadama ena kara ma ta ia hahedinaraia negana ia ginidae. Ia mauri noho totona, namona be Iehova ena sisiba hereva ia badinaia namonamo, Iehova ia gwau: “Iniseni gabu amo oi raka oho, east kahana dekenai oi lao bona Keriti sinavai maragina dekenai oi lao, unai be Ioridane east kahana ai. Sinavai ranuna do oi inua, bona hahegani do lau karaia galo be oiemu aniani do idia mailaia totona.”​—⁠1 Hanua Pavapavadia 17⁠:​3, 4.

Elia be maoromaoro unai hereva ia badinaia. Bema ia ura unai tano ena medu lasi bona aniani lasi negana amo ia roho mauri, namona be ia totona Iehova ese ia karaia daladia iboudiai do ia badinaia. Unai be mai hekwarahi. Anina be do ia hehuni, bona hua momo lalonai ia sibona do ia noho. Anina be galo ese idia mailaia vamu bona paraoa do ia ania​—⁠unai manu be mase tauanidia idia ania bona Mose ena Taravatu ese ia gwauraidia idia miro​—⁠bona anina be Iehova dekenai ia abidadama bona ia diba idia mailaia vamu be mase kava lasi tauanidia to Taravatu hegeregerena idia be rara bubua vadaeni gaudia. Bible idia torea taudia momo idia laloa unai hoa karana ia vara diba lasi, unai dainai idia gwau reana unai hereva be guna idia torea “Arab taudia,” “galo” lasi. To galo be abia hidi gaudia namodia. Reana taunimanima ta lasi do ia laloa unai manu maragidia mai mirodia be tano gagaena dekenai idia loaloa neganai Elia dekenai aniani idia abia lao; Idia noho kahirakahira basileia tanodia iboudiai dekenai Ahab bona Iesebel ese ia idia tahua!​—⁠1 Hanua Pavapavadia 18⁠:​3, 4, 10.

Unai aniani lasi negana ia lao noho lalonai, reana Elia be iena ranu ia lalo-hekwarahilaia Keriti sinavaina dekenai. Israel ena sinavai momo be medu lasi neganai idia kakoro, bona “dina momo murinai” unai sinavai danu ia kakoro. Oi laloa, Elia ena mamina be edena bamona unai ranu be ia boio lao neganai bona dina idia lao lalonai ranu guri ena ranu ia diho lao, diho lao? Sedira ia laloa dahaka do ia vara ranu ia ore momokani neganai. To, herevana, mai abidadama danu Elia ia noho unuseniai. Sinavai ia kaukau neganai Iehova ese ma hahegani haida ia henia. Unai peroveta tauna ia hamaoroa Sarefata dekenai ia lao. Unuseniai ia be vabu ta ena ruma dekenai aniani do ia davaria.​—⁠1 Hanua Pavapavadia 17⁠:​7-9.

Sarefata! Unai be Sidono hanua ena taoni ta, unai be Iesebel ia vara hanuana bona guna ena tamana be unuseniai ia lohia! Do ia hegeregere? Elia be reana ia lalo-hekwarahi. To “ia toreisi bona ia lao.”​—⁠1 Hanua Pavapavadia 17⁠:⁠10.

Iehova ese Aniani bona Mauri Ia Henia

Daudau lasi murinai, iena kamonai kara ena davana namona ia abia. Guna herevana hegeregerena unai vabu ia davaria, bona ia dekenai iena tano taudia bogaraginai ia davaria diba lasi abidadama ia davaria. Unai ogogami vabuna dekenai ia noho paraoa bona oela be ia bona ena natuna mero ena aniani negana tamona sibona totona ia hegeregere. To, ena be ia dabu, to ia ura Elia totona paraoa ia gabua guna, badina Elia ena gwauhamata dekenai ia tabekau, ia gwau Iehova ese iena dabu negana lalonai ena oela bona paraoa do ia henia noho. Unai dainai ita hoa lasi Iesu Keriso be unai vabu ena abidadama haheitalaina ia gwauraia lou, iena nega lalonai abidadama lasi Israel taudia ia gwau henidia neganai!​—⁠1 Hanua Pavapavadia 17⁠:​13-16; Luka 4⁠:​25, 26.

To, ena be unai hoa karana ia vara, unai vabu ena abidadama bona Elia ena abidadama be hetoho idia abia. Unai vabu ena natuna ia mase haraga. Iena lalohisihisi bada lalonai, unai vabu ia laloa unai gau dikana ia vara Elia “Dirava momokanina ena tau” dainai. Ia laloa unai ia vara reana badina ia be guna kara dika ta ia karaia dainai. To Elia ese vabu ena mase natuna ia abia iena imana amo bona atai daiutuna dekenai ia abia daekau. Ia diba Iehova be aniani sibona ia henia lasi. Iehova be mauri ena badina! Unai dainai Elia ia guriguri goadagoada bona ia guriguri loulou unai natuna ia mauri lou totona.

Elia be toreisi lou ia abidadama henia tauna ginigunana lasi, to Bible lalonai, ia be toreisi lou ia karaia tauna ginigunana. Unai mero “ia mauri lou”! Unai mero ena sinana ena moale be bada herea Elia be ia dekenai iena natuna mero ia henia lou neganai, ia gwau: “Itaia! Oiemu natuna mero ia mauri.” Sedira mai tai danu, ia gwau: “Hari lau diba momokani, oi be Dirava ena tauna bona Iehova ena hereva oiemu uduna amo ia momokani.”​—⁠1 Hanua Pavapavadia 17⁠:​17-24.

“Lauegu Dirava be Iehova”

Kudouna ia hamarerea gauna bona ia maoro gauna be Elia ladana, anina be “Lauegu Dirava be Iehova”! Medu lasi bona aniani lasi negana lalonai, Iehova ese aniani bona inuinu gaudia ia henia; taunimanima edia kara ia dika negana lalonai, Iehova ese hakaua hereva namodia ia henia; mase negana ai, Iehova ese Elia ia gaukaralaia mauri ia henia lou totona. Bona toana be iena Dirava dekenai iena abidadama hahedinaraia totona Elia be hetoho ia abia neganai, ia abia davana namona be, Iehova dekenai ia abidadama henia ena badina ma haida ia abia. Unai abidadama be Ia ese ena dabu gaudia do ia henia, Iena hakaua hereva do ia badinaia, ia dekenai ia tabekau Iena ladana Ia hahelagaia totona. Unai bamona ia karaia noho ia be iena Dirava, Iehova, ena amo gaukara aukadia bona mai garidia ia abia neganai; momokani, gabeai hoa kara badadia do ia karaia.​—⁠1 Hanua Pavapavadia, karoa 18 itaia.

Hari inai nega lalonai Iehova ena hesiai taudia dekenai danu unai ia momokani. Reana hoa karana amo iseda aniani idia henia lasi eiava ita idia gaukaralaia lasi toreisi lou ta ita karaia totona; hari be hoa kara karaia negana lasi. To, Elia ena negana amo ema bona hari, Iehova be ia idau lasi.​—⁠1 Korinto 13⁠:8; Iakobo 1⁠:⁠17.

Ita danu be reana gari gaukaradia haida ita idia henia, reana idia auka bona ita gari henia teritori ita idia henia Dirava ese ia henia sivaraina ita haroro henidia totona. Reana dagedage do ita abia. Reana do ita hitolo. To abidadama taudia dekenai bona iena orea ibounai dekenai, nega momo Iehova ia hamomokania ia be iena hesiai taudia ia do hakaudia noho bona ia do naridia noho. Ia be siahu ia do henidia noho ia henia gaukara iboudiai idia karaia haorea totona. Bona ia do durudia noho inai tanobada dikana lalonai idia abia hetohodia idia haheaukalaia totona.​—⁠Salamo 55⁠:⁠22.

[Footnotes]

[Picture on page 18]

Elia bamona, oi abidadama Iehova ese iena hesiai taudia edia dabu gaudia do ia henia, a?