Inai Dina Ita Laloatao

“Inai hereva lau hamaoroa vadaeni umui dekenai, egu lalona dekenai maino do umui abia totona. Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.”​—IOANE 16:33.

1, 2. Tanobada ena sivarai ibounai dekenai edena dina be dina badana, bona badina be dahaka?

HARI inai negai taunimanima be mai edia hereva momo maino dekenai. Tanobada Ibounai Tuarina Iharuana ia doko neganai, taunimanima idia laloa maino be V-E Day bona V-J Day dekenai idia abia.a Lagani ta ta iboudiai, Christmas negana ai taunimanima be ‘maino tanobada dekenai idia laloa.’ (Luka 2:14) To tanobada ena sivarai ibounai dekenai dina tamona be idau momokani. Unai dina be Iesu Keriso ese atai dekenai ai torea herevana ia gwauraia dinana. Taunimanima be iniseniai, tanobada dekenai, idia noho negana be dina milion rua bona kahana, to unai dina iboudiai amo dina tamona sibona ese taunimanima edia dala ia haidaua ia namo ela bona hanaihanai totona.

² Unai dina badana be Nisan 14 Iuda taudia edia kalenda dekenai bona unai dina dekenai idia vara gaudia be mai anina bada. Lagani 33 C.E. negana ai, Nisan 14 be April 1, bona ia matamaia dina ia diho neganai. Namona be unai anina-bada-dinana dekenai idia vara gaudia ita laloa.

Nisan 14!

3. Iesu be ena mauri ena hora dokodia dekenai dahaka ia karaia?

³ Dina ia diho murinai, hua badana ta be reana ia diari noho bona taunimanima idia laloatao Iehova ese keru bona siahu edia nega ia gwauraia. (Kara 1:7) Iesu bona iena aposetolo taudia 12 idia hebou unai atai daiutuna dekenai lagani ta ta iboudiai Iuda taudia ese idia karaia Paseka idia moalelaia totona, bona dahaka ia vara? Iesu ia hegaegae ‘inai tanobada ia rakatania bona ena Tamana dekenai ia lao totona bona sibona ena lalokau taudia dekenai ia lalokau henidia.’ (Ioane 13:1) Edena dala ai unai ia karaia? Hereva amo bona iena haheitalai amo, Iesu be iena hahediba taudia dekenai kara ia hadibaia noho idia be tanobada dekenai idia kwalimu totona.

Manau bona Lalokau Idia Karaia

4. (a) Iesu be edena dala ai iena hahediba taudia dekenai kara badana ta ia hahedinaraia? (b) Edena dala ai ita diba Petro be manau ena anina badana dekenai diba ia abia?

⁴ Aposetolo taudia be dagi tahua ena mama karana bona hekokoroku karana idia negea be namo. Unai dainai Iesu be digu dabua ia hahedokilaia bona edia aena ia huridia hamatamaia. Unai be manau koikoi karana lasi, lagani ta ta iboudiai Rome dekenai Kerisendom ena pope ese ia karaia bamona. Lasi momokani! Manau korikori be haida ia durudia badina ia ‘lalo-manau bona ia laloa haida idia bada.’ (Filipi 2:​2-5) Petro be anina ia abia haraga lasi, bona Iesu ese iena aena ia huridia neganai ia koua toho. To Iesu ese iena lalohadai ia hamaoromaoroa neganai, ia be Iesu ia noia iena tauanina ibounai ia huria totona. (Ioane 13:​1-10) To, Petro be unai neganai diba ia abia. Lagani momo murinai, ia be ma haida ia sisiba henidia dala maorona ai. (1 Petero 3:​8, 9; 5:5) Hari inai negai ita ibounai be manau dekenai Keriso ita hesiai henia be gau badana!​—Hereva Lada-isidia 22:4; Mataio 23:​8-12 itaia danu.

5. Iesu ese dahaka hahegani ia henia bona unai amo ma kara badana ta be gau badana ia hahedinaraia?

⁵ Unai hahediba taudia 12 amo tamona be Iesu ena sisiba ena namo ia abia lasi. Unai be Iuda Iskariote. Paseka ariana idia karaia noho lalonai, Iesu ia lalohisihisi, ia hahedinaraia Iuda be iena mase dala karaia tauna, bena ia siaia lao. Unai murinai sibona Iesu be iena abidadama hahediba taudia 11 ia hamaorodia, ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:​34, 35) Unai be momokani taravatu matamatana ta, bona Iesu be sibona ena haheitalai hereadaena amo ia haheitalaia! Boubou bamona do ia mase negana ia mai kahirakahira neganai, Iesu be lalokau hereadaena ia hahedinaraia. Ia be ia do noho negana ia gaukaralaia namonamo unai hahediba taudia ia hadibaia bona ia hagoadaia totona. Gabeai, ia hahedinaraia lalokau be gau badana, ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.”​—Ioane 15:​12, 13.

“Dala be Lau, Hereva Momokani be Lau, Mauri Danu Lau”

6. Idia diba momokani hahediba taudia vairanai Iesu be dahaka tahua gauna ia atoa?

⁶ Iesu be abidadama taudia 11 ia hamaorodia, ia gwau: “Umui laloa hekwarahi lasi, Dirava dekenai umui abidadama henia, lau dekenai danu umui abidadama henia. Egu Tamana ena ruma dekenai noho gabudia be momo herea, bema inai be lasi be do lau hamaoroa umui dekenai. Badina lau be do lau lao, gabu ta do lau karaia hegaegae umui emui.” (Ioane 14:​1, 2) Unai gabu be “Guba Basileia lalonai” do ia vara. (Mataio 7:21) Iesu ia hereva edena dala ai, ia lalokau henidia bada abidadama hahediba taudia, be edia tahua gauna do idia abia diba. Ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6) Unai be mai ena anina tanobada dekenai mauri hanaihanai do idia abia taudia dekenai danu.​—Apokalupo 7:​9, 10; 21:​1-4.

7-9. Badina be dahaka Iesu ese sibona ia gwauraia ‘dala bona hereva momokani bona mauri’?

⁷ Iesu be “dala.” Guriguri dekenai, Dirava lao henia dalana tamona sibona be Iesu Keriso amo. Iesu be iena hahediba taudia ia hamaorodia bema iena ladanai idia guriguri Tamana ese idia noinoilaia gaudia ibounai do ia henidia. (Ioane 15:16) Bema kaivakuku gaudia amo eiava idia “hahelagaia taudia” amo idia karaia guriguridia eiava Maria hanamoa anedia bona idia gwauraia loulou herevadia amo idia karaia​—Tamana ese unai guriguri iboudiai ia kamonai henia lasi bona ia abia dae lasi. (Mataio 6:​5-8) Ma danu, Kara 4:12 dekenai Iesu ia herevalaia inai bamona: “Tanobada ibounai lalonai ladana idauna ta Dirava ese ia henia lasi, ita do ia hamauria totona.”

⁸ Iesu be “hereva momokani.” Aposetolo Ioane ese ia herevalaia, ia gwau: “Hereva be taunimanima ena tauanina dekenai ia halaoa, iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona. Bogahisihisi kara bona hereva momokani dekenai ia honu momokani.” (Ioane 1:14) Iesu be Heberu Revarevadia lalonai idia noho peroveta herevadia sinahu momo ia hagugurudia neganai edia hereva momokani ai ia lao. (2 Korinto 1:20; Apokalupo 19:10) Hereva momokani ia gwauraia hedinarai iena hahediba taudia bona taunimanima hutuma momo idia kamonaia neganai; danu koikoi dubu gunalaia taudia ida ia hepapahuahu neganai, bona iena haheitalai maurina ia karaia neganai hereva momokani ia gwauraia hedinarai.

⁹ Iesu be “mauri.” Ia be Dirava ena Natuna dainai, Iesu ia gwau: “Natuna ia abidadama henia tauna ese mauri hanaihanai do ia abia, to ena Natuna ia kamonai henia lasi tauna be mauri do ia itaia lasi, to Dirava ena badu be iena latanai do ia noho.” (Ioane 3:36) Iesu ena mauri ia bouboulaia karana dekenai idia abidadama taudia be mauri hanaihanai do idia abia diba​—horoa Keristen “seri maragi” taudia be guba dekenai mase diba lasi maurina do idia abia bona “mamoe idaudia haida” edia hutuma bada be paradaiso tanobadana dekenai mauri hanaihanai do idia abia.​—Luka 12:​32, NW; 23:43; Ioane 10:16.

Dagedage Haheaukalaia

10. Badina be dahaka ‘tanobada dekenai ita kwalimu’ be gau badana, bona unai dekenai Iesu ese dahaka hagoadaia hereva ia henia?

¹⁰ Iehova ena nega matamatana lalonai idia ura idia noho taudia be Satana Diabolo ena tanobada dekenai idia hekwarahi, badina ‘tau dikana ese tanobada taudia ibounai ia gunalaia noho.’ (1 Ioane 5:19) Unai dainai Iesu ena hereva Ioane 15:​17-19 dekenai be ita idia hagoadaia! Ia gwau: “Lauegu taravatu be inai: umui ta ta do umui lalokau henia. Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni. Bema umui be tanobada ena taudia momokani neganai tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” Taunimanima ese Keristen korikoridia idia inai henia ema bona hari lagani 1992, bona ita moale bada badina idia gini goada noho taudia edia haheitalai namona dainai, idia be manau dekenai Dirava ena siahu imana amo goada idia abia! (1 Petero 5:​6-10) Ita ibounai be hetoho ita haheaukalaia diba Iesu ita abidadama henia neganai, iena hereva be inai kudou hanamoa herevadia amo ia hadokoa, ia gwau: “Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.”​—Ioane 16:33.

Gwauhamata Matamatana Ia Karaia

11. Ieremia be gwauhamata matamatana dekenai dahaka ia perovetalaia?

¹¹ Unai hanuaboi lalonai, Paseka ariana ia ore neganai, Iesu be gwauhamata matamatana ta ia herevalaia. Peroveta tauna Ieremia be lagani sinahu momo gunanai unai ia perovetalaia, ia gwau: “ ‘Itaia! Dina dohore idia mai,’ Iehova ia gwau, ‘bona lau ese gwauhamata matamatana ta do lau karaia Israel ena bese taudia dekenai bona Iuda ena bese taudia dekenai; . . . Lau ese egu taravatu idia lalonai do lau atoa, bona edia kudouna lalonai do lau torea. Bona edia Dirava ai lau lao, bona idia be lauegu taunimanima ai idia lao. . . . Edia kerere dohore lau gwauatao bona edia kara dika dohore lau laloatao lasi.’ ” (Ieremia 31:​31-34) Nisan 14, 33 C.E. ai, unai gwauhamata matamatana ia hamomokania boubou karana do ia karaia!

12. Iesu be edena dala ai gwauhamata matamatana ia haginia, bona dahaka ia karaia?

¹² Iesu ese abidadama taudia 11 ia hamaorodia ia ura bada unai Paseka be idia danu ia ania hebou. Bena ia ese paraoa ia abia, ia guriguri, ia makohia, bona ia henidia, ia gwau: “Lauegu tauanina be inai, umui totona ia henia vadaeni. Inai bamona do umui karaia, lau dekenai do umui laloa totona.” Unai ia karaia dalana hegeregerena, ia ese uaina kapusi ta idia ia henia, ia gwau: “Inai kapusi be maino karaia gwauhamata matamatana lauegu rarana dekenai, umui totona do ia bubua.” (Luka 22:​15, 19, 20) Iesu ena ‘davana bada rarana’ dainai gwauhamata matamatana ena anina ia vara, bona unai rara ena davana ese Israel ena Taravatu gwauhamatana dainai idia bubua animal rarana ena davana ia hanaia! (1 Petero 1:19; Heberu 9:​13, 14) Gwauhamata matamatana dekenai idia vareai taudia edia kara dika ia gwauatao momokani. Unai dainai, idia hegeregere 144,000 taudia edia dagi idia abia totona, idia be lauma Israel taudia dainai ia noho hanaihanai ahuna do idia abia.​—Galatia 6:16; Heberu 9:​15-18; 13:20; Apokalupo 14:1.

“Lau Dekenai Do Umui Laloa Totona”

13. (a) Anibou neganai dahaka ita laloa be namo? (b) Daidia sibona be paraoa idia ania bona uaina idia inua be namo, bona badina be dahaka?

¹³ Iesu ena mase ita laloa totona Anibou dinana ena lagani namba 1,960 be April 17, 1992 dinanai do ia vara. Unai dina ia mai kahirakahira neganai, namona be ita laloa Iesu ena boubou goevadaena ese dahaka do ia karaia. Unai bamona ia karaia dainai Iehova ena aonega bona iena lalokau bada taunimanima dekenai ia hahedinaraia bada. Iesu be kerere lasi dalana ai ia abidadama noho ela bona mai hisihisi danu ia mase, bona unai ese Iehova ena maoro ia hamomokania; Satana ese ia samania ia gwau Dirava ese ia havaraia tanobada taudia idia kerere bona hetoho negana ai do idia moru. (Iobu 1:​8-11; Hereva Lada-isidia 27:11) Iena boubou rarana dainai, Iesu ese gwauhamata matamatana ia haginia, Iehova ese ia gaukaralaia “iena bese, [idia] be King ena boubou helaga karaia taudia, bese helagana, bona Dirava ena orea korikori taudia” ia abia hidi totona. Idia be tanobada ai idia do noho neganai, idia be edia Dirava, Iehova, ena “hoa kara badadia do [idia] gwauraia hedinarai”; bona Iehova ese ‘dibura amo ia boiridia iena diari namona dekenai.’ (1 Petero 2:9; Esodo 19:​5, 6 itaia danu.) Idia sibona be lagani ta ta iboudiai Anibou ena paraoa idia ania bona uaina ranuna idia inua be ia maoro.

14. Edena dala ai unai hebou idia karaia taudia milion momo be namo momo idia davaria?

¹⁴ Lagani gunanai ena Anibou dekenai, tanobada hegegemadai taunimanima 10,650,158 idia mai, to unai taudia amo taunimanima 8,850 sibona ese paraoa idia ania bona uaina idia inua​—unai be tadikaka iboudiai edia kahana 10 amo kahana tamona ena 1 pesen ia abia lasi. Unai dainai, unai Anibou ariana idia laloa bada taunimanima milion momo be edena dala ai ia durudia? Ia durudia bada! Ena be paraoa idia ania lasi bona uaina idia inua lasi, to lauma dalana dekenai gau namodia momo idia abia badina unai tanobada ibounai tadikaka oreana ida idia hebamo, bona idia be Iehova ena Natuna ia henia boubou karana amo ia ese ia karaia gaudia momo idia diba dainai.

15. Horoa taudia sibona lasi to ma haida be edena dala ai Iesu ia henia boubou karana amo namo idia abia diba?

¹⁵ Ma danu, aposetolo be 1 Ioane 2:​1, 2 dekenai ita ia hamaoroa, ia gwau: “Ita be mai iseda durua tauna, iseda Tamana vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” Oibe, ena be Iesu ia henia boubou gauna ese Ioane bamona orea taudia, gwauhamata matamatana idia vareai taudia, ia durudia guna, to ia be “taunimanima ibounai” edia dika gwauatao dalana. Ia be Iesu ese ia bubua rarana dekenai idia abidadama henia tanobada taudia iboudiai edia “kara dika gwauatao dalana,” unai be paradaiso tanobada dekenai mauri hanaihanai ena helaro namona ia kehoa.​—Mataio 20:28.

“Dirava Ena Basileia Lalonai”

16. (a) Iesu bona ia ida ahuna idia abia taudia be dahaka idia karaia hebou? (b) Hari inai nega ai horoa orena taudia bona hutuma bada herea taudia be dahaka idia karaia be namo?

¹⁶ Iena aposetolo taudia ia hagoadaia noho neganai, Iesu be iena Tamana ena Basileia dekenai iena hahediba taudia ida lauma dalana dekenai uaina do ia inua dinana ia gwauraia. (Mataio 26:29) Ia hamaorodia, ia gwau: “Umui be lau idia hedibagani henia neganai lau dekenai umui noho auka masemase taudia. Unai dainai, egu Tamana ena Basileia ta ia henia lau dekenai hegeregerena, lau danu Basileia ta lau henia umui dekenai. Vadaeni lauegu Basileia lalonai lauegu pata dekenai do umui aniani bona do umui inuinu, bona terona ena latanai do umui helai, vadaeni [Israel] iduhu 12 dekenai do umui kota henia.” (Luka 22:​28-30) Iesu be 1914 neganai guba dekenai Basileia siahuna ia abia dainai, ita laloa diba Iesu ida Basileia idia abia taudia momo, idia hanai lagani daha momo lalodiai idia gogodia taudia unai, be idia toreisi lou vadaeni, bona ia ida ‘terona dekenai idia helai.’ (1 Tesalonika 4:​15, 16) Dina ia mai haraga aneru be ‘hisihisi badana’ ena “lai 4” idia halasia totona! Unai negana ai, lauma Israel edia 144,000 taudia edia horoa negana bona hutuma bada herea taudia milion momo gogodia negana do ia ore. Idia iboudiai idia abidadama noho be namo, Iesu ese ia karaia bamona, bena idia be mauri hanaihanai ena davana do idia abia diba.​—Apokalupo 2:10; 7:​1-4, 9.

17 bona maua ena hereva. (a) Bema horoa tauna ta ia abidadama lasi dainai idia dadaraia, namona be ita laloa daidia be iena gabu do idia abia? (b) Lagani 1938 lalonai Watchtower magasin edia sivarai ese dahaka diari idia hahedinaraia tanobada dekenai tiokratik orea haginia bona habadaia gaukarana dekenai?

¹⁷ To edena bamona bema horoa taudia haida idia abidadama lasi? Inai dokona negana lalonai, unai bamona abidadama lasi taudia be haida sibona reana. Bona, ma haida ese edia gabu do idia abia. Unai taudia be bapatiso matamata taudia edia amo idia mai lasi, to mai abidadama danu lagani momo lalodiai Iesu ida idia haheauka taudia edia amo idia mai. Lagani 1920 ia lao 1939 huanai The Watchtower magasin lalonai idia hedinarai lauma diarina be bada, unai ese ia hahedinaraia horoa orena taudia be unai neganai idia abia hidi kahirakahira ia ore bamona. Unai nega murinai ‘edia dabua be Mamoe Natuna ena rara dekenai idia huria’ taudia edia helaro moalena be idau. Keriso dainai, Iehova ena lauma helaga ese ia hakaudia lao “mauri ranuna, ia lohilohi gauna” dekenai, unai be tanobada Paradaisona lalonai.​—Apokalupo 7:​10, 14, 17.

Guriguri Mai Goadana Ta

18. Ioane karoa 17 lalonai Iesu ena guriguri amo dahaka diba bada ita abia?

¹⁸ Iesu be iena hahediba taudia ida Anibou ariana ia hadokoa guriguri mai goadana ta amo, unai be Ioane 17:​1-26 dekenai idia torea. Ia guriguri guna iena Tamana ese ia do ia hanamoa ia be abidadama ia karaia noho ela bona dokona neganai. Unai dala dekenai Iehova be sibona do ia hanamoa danu, iena ladana do ia hahelagaia​—samania hereva ibounai do ia kokia. Goevadae tauna Iesu ia hamomokania Dirava ese ia havaraia tanobada taudia be hetoho dika idia abia neganai idia kara maoro diba. (Deuteronomi 32:​4, 5; Heberu 4:15) Ma danu, Iesu be boubou bamona ia mase karana ese dala namona ta Adam ena natudia dekenai ia kehoa. Iesu ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.” Iehova Dirava bona iena Natuna, Dirava ena Mamoe ena Natuna, dekenai diba maoromaoro ita abia be gau badana; unai natuna be iena mauri ia henia Iehova ena ladana hamomokania bona taunimanima hamauridia totona! (Ioane 1:29; 1 Petero 2:​22-25) Mai lalokau danu ena mauri ia bouboulaia karana ena namo oi laloa bada dainai Iehova dekenai bona iena hesiai gaukara karaia karana dekenai oiemu mauri bona kohu ibounai do oi gwauhamatalaia, a?

19. Edena dala ai orena taudia bona hutuma bada herea taudia be lalo-tamona namo hereana idia moalelaia?

¹⁹ Ma danu, Iesu ia guriguri iena Tamana Helagana dekenai ia be iena hahediba taudia Ia naridia totona badina idia hahedinaraia idia be tanobada ena lasi, idia be Iena hereva idia badinaia ia be hereva momokani dainai, bona Tamana bona Natuna ida edia tamona karana idia karaia noho. Ema bona hari unai guriguri ena haere namona ia henia, ani? Horoa orena taudia bona hutuma bada herea taudia be lalokau dekenai idia gaukara tamona, bona tanobada ena hepapahuahu, ena dagedage, bona ena kara dikana dekenai idia vareai lasi, ani? Bona Iesu ena hereva dokodia iena Tamana, Iehova, dekenai be namo herea! Iesu ia gwau: “Oiemu ladana danu lau hadibaia vadaeni idia dekenai, bona do lau hadibaia noho, vadaeni lau dekenai oi henia lalokau badana be idia edia lalona dekenai do ia noho. Bona lau danu idia edia lalona dekenai do lau noho.”​—Ioane 17:​14, 16, 26.

20. Badina be dahaka ia namo Nisan 14, 33 C.E. dinana ita laloatao?

²⁰ Getesemane umana dekenai ia lao neganai Iesu be iena hahediba taudia ida nega sisina idia ia bamodia bona idia ia hagoadaia. Bena iena inai taudia ese idia dogoatao! Hereva ta amo Iesu ena tauanina dekenai ia abia hisihisina ita gwauraia diba lasi, Iehova hadikaia hereva dainai iena lalohisihisi ena bada ita gwauraia diba lasi, bona unai ibounai lalonai iena abidadama noho haheitalaina ita gwauraia diba lasi. Hanuaboi lalonai bona unai dina ena hora momo lalodiai Iesu ia haheauka ela bona ia mase. Ia hahedinaraia namonamo iena Basileia be tanobada ena gauna lasi. Bona iena laga dokona amo ia boiboi, ia gwau: “Ia ore vadaeni.” (Ioane 18:​36, 37; 19:30) Tanobada dekenai ena gaukara ibounai ia karaia guguru. Momokani, namona be Nisan 14, 33 C.E. dinana ita laloatao!

[Footnotes]

Edena Bamona Do Oi Haere?

◻ Iesu be manau bona lalokau dekenai dahaka ia hadibalaia?

◻ Edena dala ai Iesu be ‘dala bona hereva momokani bona mauri’?

◻ Gwauhamata matamatana ena badina be dahaka?

◻ Horoa orena taudia bona hutuma bada herea taudia be dahaka lalo-tamona bona dahaka lalokau idia karaia hebou?

[Box on page 20]

Solomon Badana Ena Aonega

The Watchtower magasin ena June 1 bona June 15, 1938 gaudia lalonai idia noho sivaraidia, ladana “Orea,” ese hari inai nega ai Iehova ena Witness taudia ese idia badinaia tiokratik daladia ia gwauraia. Hahediba hereva bona orea hakaua dalana idia hamaoromaoroa karadia idia karaia lagani 1919 negana amo ia lao 1938, unai magasin idia printaia neganai. (Isaia 60:17) Unai lagani 20 negana be Ierusalem dekenai Solomon ese dubu bona king ena ruma ia haginia lagani 20 negana ida idia hahegeregerea, bona The Watchtower ia gwau: “Revareva helagadia idia hahedinaraia Solomon be lagani 20 ruma haginia gaukarana ia karaia murinai . . . , ia ese unai tano ena gabu ibounai dekenai haginia gaukara ia karaia. (1 Pav. 9:​10, 17-23; 2 Sis. 8:​1-10) Bena Sieba ena hahine pavapavana be ‘tanobada ena dokona amo ia mai Solomon ena aonega ia kamonai totona’. (Mat. 12:42; 1 Pav. 10:​1-10; 2 Sis. 9:​1-9, 12) Unai kara dainai inai bamona ita henanadai diba: Tanobada dekenai nega kahirakahira dahaka do ia vara Iehova ena taunimanima dekenai? Mai lalo-goada ida do ita naria, bona do ita itaia.” Unai lalo-goada be kerere lasi. Tiokratik orea dalana dainai tanobada ibounai dekenai lauma dalana dekenai haginia gaukarana amo hutuma bada herea ena taunimanima 4 milion idia haboudia. Sieba ena hahine pavapavana bamona, idia be tanobada ena daudau gabudia amo idia mai Solomon Badana, Keriso Iesu, ena aonega idia kamonai henia totona​—unai aonega be “hesiai tauna mai ena abidadama bona mai ena kara maoromaoro” oreana amo idia abia.​—Mataio 24:​45-47.