Ruma Bese Taudia E, Kongregesen Lalonai Dirava Umui Hanamoa
“Lohiabada e, oiemu bese taudia, edia hebou badana lalonai, lau ese oi do lau hanamoa bada.”—SALAMO 26:12.
1. Ruma dekenai ita guriguri bona ita stadi sibona lasi to dahaka danu be tomadiho momokanina ena kara badana ta?
IEHOVA tomadiho henia karana be ruma dekenai ita guriguri bona Baibel ita stadilaia sibona lasi to Dirava ena kongregesen lalonai ita gaukara danu. Mose ese idaunegai Israela taudia ia oda henia “taunimanima ibounai do [idia] haboua, tau bona hahine, memero bona kekeni,” Dirava ena taravatu do idia dibaia bena ena dala dekenai do idia raka totona. (Deuteronomi 31:12; Iosua 8:35) Buruka taudia bona “ulato bona uhau” idia hagoadaia Iehova ena ladana hanamoa karana lalonai do idia vareai. (Salamo 148:12, 13) Keristani kongregesen lalonai unai bamona idia karaia danu. Tanobada hegegemadai Kingdom Hall lalodiai, helai taudia idia haere diba negadia ai, tatau, hahine, bona natudia idia haere, bona momo be unai kara idia moalelaia bada.—Heberu 10:23-25.
2. (a) Natudia be hebou idia moalelaia totona, dahaka dainai hegaegae karana be gau badana? (b) Daidia edia haheitalai be mai anina bada?
2 Momokani, matamata taudia oi durua kongregesen ena gaukara namodia lalonai do idia vareai totona be mai ena hekwarahi. Bema edia tama sina danu hebou dekenai idia lao natudia haida be hebou idia moalelaia lasi, edia hekwakwanai be dahaka? Oibe, natudia momo edia helai bona kamonai karana be daudau lasi bona idia hesiku haraga. Hegaegae karana ese unai hekwakwanai ia hamaoromaoroa diba. Umui hegaegae lasi neganai, natudia be hebou dekenai haere namodia idia henia diba lasi. (Aonega Herevadia 15:23) Umui hegaegae lasi neganai, lauma dalanai idia goada idia lao karana amo ia mai moalena idia davaria be do ia auka. (1 Timoteo 4:12, 15) Dahaka umui karaia diba idia umui durua totona? Gau ginigunana be, tama sina be sibodia do idia henanadai bema idia be hebou totona idia hegaegae eiava lasi. Edia haheitalai be mai ena siahu bada. (Luka 6:40) Ruma bese stadi palanilaia namonamo karana be mai anina bada danu.
Kudouna Hagoadaia
3. Dahaka dainai ruma bese stadi lalonai ita hekwarahi bada be namo kudouna ita hagoadaia totona, bona edena dala ai unai ita karaia?
3 Namona be ruma bese ena stadi negana be kudouna hagoadaia negana, bona ia be harana dekenai diba atoa negana sibona lasi. Unai idia karaia totona tama sina ese mai lalokau ida ruma bese taudia ta ta idia laloa bada be namo bona edia hekwakwanai idia diba danu. Iehova be ‘kudouna ia tahua tauna.’—1 Sivarai 29:17.
4 Iehova ese iseda natudia edia kudouna ia tahua neganai dahaka ia davaria? Idia momo idia gwau Dirava idia lalokau henia, bona unai be namo herea. To, matamata tauna ta eiava Iehova ia dibaia matamaia tauna ta be Iehova ena dala ia do manadalaia namonamo lasi. Ia diba namonamo lasi dainai, Baibel ia hereva bamona reana ia be “kavakava” tauna. Reana ena ura ibounai be dika lasi, to nega do ia lao bena Iehova ese do ia moalelaia kudouna do ia abia. Anina be, goevadae lasi taudia idia karaia diba hegeregerena, ta ese ena lalohadai, ena ura, ena hemami, bona ena mauri lalonai ia tahua gaudia ia haidaua be namo Dirava ese ia lalo-namo henia totona. Bema tau ta ena lalona korikori be Dirava ena dala ai unai bamona ia haidaua, ia be “aonega ia abia” noho.—Aonega Herevadia 9:4; 19:8.
5, 6. Tama sina ese natudia be edena bamona idia durua diba ‘aonega idia abia’ totona?
5 Tama sina ese edia natudia idia durua diba ‘aonega idia abia’ totona, a? Momokani, taunimanima ta ese kudouna namona be ma ta ena lalonai ia atoa diba lasi. Ita ta ta be mai iseda ura-kwalimu, bona ita laloa gaudia ese iseda kudouna idia biagua. To, mai lalo-parara ida tama sina ese edia natuna ena lalohadai idia dibaia diba, ena kudouna lalonai idia noho gaudia idia dibaia bona idia durua. Inai bamona henanadai oi henia, ‘Oiemu lalohadai be dahaka unai dekenai?’ bona ‘Oi ura momokani dahaka do oi karaia?’ Bena, mai haheauka ida oi kamonai. Oi badu lasi. (Aonega Herevadia 20:5) Hebogahisi, lalo-parara, bona lalokau be mai anina bada bema oi ura natuna ena kudouna oi hamarerea.
6 Kara namodia goadalaia totona, lauma ena huahua—ena kahana idauidau—umui kikilaia momo bona umui ibounai umui gaukara hebou unai kara umui havaraia totona. (Galatia 5:22, 23) Edia lalokau Iehova bona Iesu Keriso totona oi habadaia. Iehova bona Iesu do idia lalokau henia oi gwauraia sibona be hegeregere lasi, to dahaka dainai ita lalokau henidia bona edena dala ai lalokau ita hahedinaraia diba oi herevalaia be gau badana. (2 Korinto 5:14, 15) Kara maoromaoro idia badinaia neganai do idia davaria hahenamo umui herevalaia, bona unai amo edia ura kara namo idia karaia totona do umui habadaia. Lalohadai, hereva, bona kara mirodia idia dadaraia urana hagoadaia totona unai kara ese idia havaraia dika umui herevalaia. (Amosa 5:15; 3 Ioane 11) Oi hahedinaraia ta ena lalohadai, hereva, bona kara—namo eiava dika—ese Iehova ida ta ena hetura karana ia hanamoa eiava hadikaia diba.
7. Natudia be hekwakwanai idia davaria neganai bona abia hidi ta idia karaia gwauraia neganai, edena bamona idia ita durua diba Iehova kahirakahira ai idia noho totona?
7 Natuna ta be mai ena hekwakwanai eiava abia hidi ta ia karaia gwauraia neganai, inai bamona ita nanadaia diba: ‘Dahaka oi laloa, Iehova ena lalohadai unai gauna dekenai be dahaka? Iehova ena kara ta dainai unai bamona oi hereva, a? Ia dekenai unai gauna oi gurigurilaia vadaeni, a?’ Idia do maragi negana amo, emui natudia umui durua edia mauri lalonai Iehova ena ura do idia tahua totona idia hekwarahi bona idia badinaia hanaihanai. Iehova kahirakahira dekenai idia lao bona idia tura henia neganai, do idia ura ena dala idia badinaia. (Salamo 119:34, 35) Unai amo Dirava momokanina ena kongregesen ida idia raka ena hahenamo do idia laloa bada.
Kongregesen Heboudia Totona Hegaegae
8. (a) Ruma bese stadi lalonai ita ura ita karaia gaudia ibounai ita karaia totona, dahaka ese ita ia durua diba? (b) Edena dala ai unai stadi be mai anina bada?
8 Ruma bese stadi lalonai do umui karaia gaudia be momo. Edena bamona idia ibounai umui karaia diba? Gau ibounai be nega tamona lalonai umui karaia diba lasi. To, reana umui ia durua gauna ta be lista ta dekenai unai gaudia umui torea. (Aonega Herevadia 21:5) Nega ta ta ai, umui sekea bona itaia dahaka be hari do umui laloa be gau badana. Ruma bese taudia ta ta edia tubu dalana umui laloa bada. Ruma bese stadi karana be mai anina bada Keristani hadibaia gaukara lalonai, unai kara ese inai nega maurina lalonai ita ia durua bona ita ia durua vaira negana ai do ita abia mauri hanaihanai totona ita hegaegae.—1 Timoteo 4:8.
9. Iseda ruma bese stadi lalonai hebou hegaegaelaia karana dekenai dahaka tahua gaudia ita laloa be namo?
9 Emui ruma bese stadi lalonai kongregesen heboudia totona umui hegaegae danu, a? Emui stadi lalonai, sisina sisina gau haida umui karaia diba. Idia haida be reana pura, hua, eiava lagani haida lalonai umui hagugurua gaudia. Mani inai tahua gaudia umui laloa: (1) ruma bese taudia ta ta idia hegaegae kongregesen heboudia dekenai do idia haere totona; (2) ta ta idia hekwarahi sibodia edia hereva amo do idia haere totona; (3) edia haere lalonai siri idia gaukaralaia totona; bona (4) idia tahua edena bamona idia sibodia edia mauri lalonai umui stadilaia gaudia idia badinaia diba. Unai gaudia ibounai ese ta do idia durua mai ena lalona ibounai ida hereva momokani ia abia dae totona.—Salamo 25:4, 5.
10. (a) Iseda kongregesen heboudia ta ta totona, dahaka ita karaia diba? (b) Dahaka dainai unai ita karaia be mai anina bada?
10 Ena be emui ruma bese stadi lalonai pura ena Gima Kohorona stadi umui karaia, to gau badana be umui ta ta eiava ruma bese ida Kongregesen ena Buka Stadi, Haroro Sikuli, bona Hesiai Hebou totona umui hegaegae karana umui laloaboio lasi. Idia be mai anina bada danu, badina Iehova ena dala dekenai ita raka dalana be ita dekenai idia hadibaia. Reana nega ta ta ai ruma bese ida hebou totona umui hegaegae diba. Dahaka dainai? Umui gaukara hebou neganai, emui stadi karana umui hanamoa diba. Unai amo, unai hebou idauidau amo namo bada umui abia diba. Danu, unai hebou idauidau totona umui hegaegae hanaihanai bona unai umui karaia totona nega atoa karana ena namo umui herevalaia.—Efeso 5:15-17.
11, 12. Kongregesen dekenai ita abia ane ita hegaegaelaia karana ese edena bamona ita ia durua, bona edena dala ai ita hegaegaelaia diba?
11 “Dirava Ia Gwauraia Mauri Dalana” Distrik Hebouheboudia ai, ita idia hagoadaia iseda hebou edia kahana ma ta ita hegaegaelaia totona—ane abia karana unai. Oi be unai oi karaia noho, a? Unai ita karaia neganai, Baibel ena hereva momokanidia be iseda lalona bona kudouna lalonai idia vareai momokani, bona kongregesen heboudia do ita moalelaia bada danu.
12 Ita hegaegae neganai, idia abia hidi anedia haida edia hereva duahia bona edia anina ita kikilaia ese ita do ia durua mai eda lalonai ibounai ida ane ita abia totona. Idaunega Israela ai, miusiki gaudia be mai edia anina bada tomadiho karana lalonai. (1 Sivarai 25:1; Salamo 28:7) Emui ruma bese lalonai ta be miusiki gauna ta ia gadaralaia diba, a? Unai gauna dekenai unai pura ena Basileia anena ta umui gadaralaia bona emui ruma bese ida unai ane umui abia hebou diba, ani? Dala ma ta be miusiki teipi umui gadaralaia diba. Tano haida dekenai ena be miusiki idia gadaralaia lasi, to iseda tadikaka be ane idia abia namo herea. Dala dekenai idia raka eiava uma gabu dekenai idia gaukara neganai, nega momo unai pura lalonai hebou dekenai do idia abia anedia be mai moale ida idia abia.—Efeso 5:19.
Ruma Bese Ia Hegaegae Haroro Gaukara Totona
13, 14. Dahaka dainai haroro gaukara totona iseda kudouna idia hegaegaelaia herevahereva karana ruma bese lalonai be mai anina bada?
13 Iseda mauri lalonai ma haida dekenai Iehova bona ena ura ita harorolaia be gau badana. (Isaia 43:10-12; Mataio 24:14) Herevana ita be matamata eiava buruka, bema ita hegaegae unai gaukara do ita moalelaia bona ita karaia namonamo diba. Edena bamona unai ita karaia diba ruma bese lalonai?
14 Vaia, iseda tomadiho karadia ibounai lalonai, iseda kudouna do ita hegaegaelaia be gau badana. Do ita karaia gaudia sibona ita kikilaia lasi to ita karaia ena badina ita herevalaia danu be namo. King Iehosapata ena nega ai, Dirava ena taravatu amo taunimanima idia hadibaia, to Baibel ese ita ia hamaoroa idia be ‘mai edia kudouna ibounai danu Dirava idia tomadiho henia lasi.’ Unai dainai tomadiho momokanina amo ia veridia oho gaudia ese idia hamorudia diba. (2 Sivarai 20:33; 21:11) Namo lasi haroro gaukara horadia ita ripotilaia, eiava buka bona magasin ita hariharilaia sibona ita laloa bada. Namona be iseda haroro gaukarana amo ita hahedinaraia ita be Iehova ita lalokau henia bona mauri idia abia hidi be namo taudia ita lalokau henia. (Heberu 13:15) Unai gaukara lalonai ita be Dirava ida ita gaukara hebou taudia. (1 Korinto 3:9, NW ) Unai be hahenamo badana! Ita haroro neganai, ita be aneru helagadia ida ita gaukara hebou. (Apokalupo 14:6, 7) Ruma bese ida ita kiki hebou negadia hegeregere, pura ta ta ai ruma bese stadi ita karaia negana, eiava Dina Iboudiai Buka Helaga Tahua bukana amo siri ta ita kikilaia negana be nega namodia haroro gaukara laloa bada karana ita hagoadaia totona!
15. Edena negai haroro gaukara totona ruma bese ida ita hegaegae diba?
15 Nega haida emui ruma bese stadi negana ai unai pura lalonai do idia haroro totona ruma bese taudia umui durua, a? Unai be namo bada ia havaraia diba. (2 Timoteo 2:15) Unai ese ia durudia haroro gaukara do idia karaia namonamo bona anina namona idia havaraia totona. Nega haida, stadi negana ta umui abia hidi diba unai sibona umui karaia totona. Nega momo, reana ruma bese stadi dokonai eiava dina ma ta ai nega kwadogina lalonai haroro gaukara ena kahana idauidau umui kikilaia diba.
16. Paragraf lalonai idia noho dala idauidau edia namo oi gwauraia.
16 Ruma bese ida umui hegaegae neganai reana inai dala umui badinaia: (1) Kiki herevana namona ta umui hegaegaelaia, bona dala ia kehoa neganai do umui duahia Baibel siri namona ta umui abia hidi danu. (2) Namona be iboudiai be mai edia haroro baege, Baibel, noutbuk, peni o pensolo, pepapepa, bona edia toana be namo buka bona magasin ma haida. Herevana baege be davana maragi gauna, to namona be ena toana be ia goeva. (3) Gabu bona nega idauidau haroro gaukarana be edeseniai bona edena bamona do umui karaia umui kikilaia. Unai bamona umui hadibadia murinai namona be kahana ta ta murinai emui ruma bese taudia ida haroro gaukara lalonai umui gaukara hebou. Heduru herevadia oi gwauraia, to gau momo dekenai idia oi sisiba henia lasi.
17, 18. (a) Ruma bese ida edena bamona ita hegaegae neganai, haroro gaukara lalonai anina namona ita havaraia diba? (b) Unai hegaegae karana dekenai, dahaka kara be pura ta ta lalonai ita karaia diba?
17 Iesu Keriso ese ia murinai idia raka taudia dekenai ia henia gaukarana ena kahana badana be taunimanima be diba tahua taudia ai do idia halaoa. (Mataio 28:19, 20) Taunimanima be diba tahua taudia ai ita halaoa gaukarana be haroro gaukara sibona lasi. Anina be hadibaia gaukara do ita karaia. Emui ruma bese stadi ese edena bamona umui ia durua diba unai umui karaia namonamo totona?
18 Daika do umui lou henia be namo be ruma bese ida umui kikilaia hebou. Haida be reana buka o magasin idia abia; haida be idia kamonai sibona. Ruma-ta-ruma-ta haroro gaukarana ai o gabu bona nega idauidau haroro negana ai maketi o sikuli dekenai umui davaridia. Namona be Dirava ena Hereva ese umui do ia hakaua. (Salamo 25:9; Esekiela 9:4) Umui ta ta be unai pura lalonai daika do umui lou henia umui abia hidi. Dahaka do umui herevalaia? Ruma bese ida unai umui herevalaia hebou ese umui ta ta do ia durua umui hegaegae totona. Kamonai taudia dekenai do umui duahia siridia umui torea bona Dirava Ia Ura Dahaka Ita Karaia? buklet bona Diba ese Mauri Dekenai Ita ia Hakaua Lao bukana amo hereva haida umui abia danu. Umui lou henia neganai, namo lasi gau momo herea umui herevalaia. Ruma tauna dekenai henanadai ta umui henia bona gabeai umui lou henia neganai ena haere do umui herevalaia. Ruma bese taudia ta ta be daika do idia lou henia, edena negai do idia karaia, bona dahaka idia ura idia hagugurua be pura ta ta ai umui herevalaia be namo. Unai umui karaia neganai, ruma bese taudia iboudiai be haroro gaukara dekenai huahua namona do idia havaraia.
Idia Dekenai Iehova Ena Dala Oi Hadibaia Noho
19. Ruma bese taudia be Iehova ena dala dekenai do idia raka noho totona, dahaka hemami idia abia be namo, bona dahaka ese unai ia havaraia?
19 Inai tanobada dikana lalonai ruma bese kwarana ena maduna be auka momokani. Satani bona ena demoni idia ura Iehova ena hesiai taudia edia goada lauma dalanai idia hadikaia. (1 Petero 5:8) Danu, hari inai negai, umui tama sina be hekwakwanai momo umui davaria noho, bona umui adavana lasi tama eiava sina be unai umui mamia badabada. Nega be lasi umui ura do umui karaia gaudia ibounai umui karaia totona. To umui hekwarahi be namo, herevana metairametaira hari ita stadilaia heduru herevadia tamona tamona umui badinaia, emui ruma bese stadi dalana do ia namo ia lao. Umui itaia emui lalokau taudia be Iehova ena dala idia badinaia be hahenamo badana. Iehova ena dala dekenai idia raka namonamo totona, ruma bese taudia be kongregesen heboudia lao henia karana bona haroro gaukara idia moalelaia be namo. Unai ia vara totona, hegaegae be gau badana—unai hegaegae karana ese edia kudouna ia hagoadaia bona ta ta ia durua gaukara namona idia karaia totona.
20. Dahaka ese tama sina ia durua diba 3 Ioane 4 ese ia herevalaia moalena idia davaria totona?
20 Lauma dalanai ia durua taudia ia herevalaia neganai, aposetolo Ioane ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Ruma bese stadi lalonai umui tahua gaudia umui abia hidi bona mai hebogahisi ida ruma bese kwaradia be ruma bese taudia ta ta edia manoka gaudia idia durua neganai, ruma bese ibounai ese unai bamona moale idia davaria diba. Dirava ia gwauraia mauri dalana laloa bada karana idia habadaia neganai, tama sina ese edia ruma bese idia durua mauri dalana hereadaena idia moalelaia totona.—Salamo 19:7-11.
Anina Oi Gwauraia Diba, A?
◻ Dahaka dainai hebou hegaegaelaia karana be mai anina bada iseda natudia totona?
◻ Tama sina ese edena bamona edia natudia idia durua diba ‘aonega idia abia’ totona?
◻ Iseda ruma bese stadi ese edena bamona ita ia durua diba hebou ibounai ita hegaegaelaia totona?
◻ Ruma bese ida haroro gaukara totona ita hegaegae karana ese edena bamona ita ia durua diba?
4. (a) Ta be “kavakava” tauna ena anina be dahaka? (b) “Aonega ia abia” ena anina be dahaka?
[Picture on page 20]
Emui ruma bese stadi lalonai kongregesen heboudia umui hegaegaelaia diba
[Picture on page 21]
Hebou dekenai do ita abia anedia ita hegaegaelaia karana ese ita ia durua bada