Ruma Bese ida Dirava Ena Hereva Umui Stadilaia Hanaihanai
“Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.”—MATAIO 4:4.
1. Baibel be dahaka ia gwau ruma bese kwaradia be edia natudia dekenai Iehova ena dala idia hadibaia karana dekenai?
IEHOVA DIRAVA ese hanaihanai ruma bese kwaradia dekenai natudia do idia hadibaia ena maduna ia gwauraia. Idia hadibaia gaudia ese natudia idia durua hari bona danu vaira negana totona. Dirava ena aneru ta ese Aberahamo ia hamaoroa ena maduna be ena ruma bese do ia hadibadia Iehova ena “taravatu do idia kamonai henia” totona. (Genese 18:19) Israela tama sina idia hamaoroa edia natudia dekenai Dirava ese Aigupito amo Israela besena ia ruhaia bona Sinai Ororona, Horeb dekenai, iena Taravatu ia henidia do idia gwauraia hedinarai. (Esodo 13:8, 9; Deuteronomi 4:9, 10; 11:18-21) Baibel ese Keristani ruma bese kwaradia ia sisiba henia edia natudia be “Iehova ena matahakani bona lalona biagua karana” ai do idia naridia. (Efeso 6:4, NW ) Herevana tama eiava sina sibona ese Iehova ia hesiai henia, to ia hekwarahi be namo ena natudia dekenai Iehova ena dala ia hadibaia totona.—2 Timoteo 1:5; 3:14, 15.
2. Bema natudia be lasi, tau bona ena adavana ese ruma bese stadi idia karaia be namo, a? Gwauraia hedinarai.
2 To unai ia hahedinaraia lasi, natudia idia noho ruma bese sibodia ese Dirava ena Hereva idia stadilaia be namo. Ena be natudia idia noho lasi, to tau bona ena adavana be ruma bese stadi idia karaia ese ia hahedinaraia idia be lauma gaudia idia laloa bada.—Efeso 5:25, 26.
3. Badina be dahaka ruma bese stadi karaia hanaihanai karana be mai anina bada?
3 Namo bada ia havaraia totona, hadibaia karana be hanaihanai idia karaia be namo, tano gagaena ai Iehova ese Israela taudia ia hadibaia hegeregerena, ia gwau: “Taunimanima be aniani sibona dekena amo do idia mauri lasi. Lasi momokani, to Dirava ena hereva ibounai do idia badinaia danu, vadaeni mauri idia abia.” (Deuteronomi 8:3) Ruma bese ta ta be edia noho dala hegeregerena ai, haida be pura ta ta ai edia stadi idia karaia; ma haida be reana dina ta ta ai nega kwadogina lalonai edia stadi idia karaia. Herevana, edena sediual umui abia hidi, gau badana be umui badinaia. Stadi totona nega do umui hoia. Unai nega ita hoia totona, gau haida ita reaia be aonega karana. Oiemu ruma bese taudia edia mauri be mai anina bada.—Efeso 5:15-17; Filipi 3:16.
Tahua Gaudia
4, 5. (a) Mose amo, Iehova ese ia hahedinaraia dahaka mai anina bada gauna be tama sina ese edia natudia dekenai do idia hadibaia? (b) Hari inai negai unai ia vara totona dahaka ita karaia be namo?
4 Ruma bese stadi umui karaia neganai, namo bada ia havaraia diba bema emui tahua gaudia umui abia hidi vadaeni. Mani haida oi laloa.
5 Stadi ta ta ai, Iehova Dirava lalokau henia karana habadaia. Israela besena be Gwauhamata Tanona dekenai kahirakahira do idia vareai, bona Moaba ena palaka gabuna ai idia hebou neganai, Mose ese idia dekenai, gabeai Iesu Keriso ese ia gwauraia taravatu ena ‘hereva bada herea,’ ia gwauraia. Unai be dahaka? “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu.” (Mataio 22:36, 37; Deuteronomi 6:5) Mose ese Israela taudia ia hagoadadia sibodia edia kudouna dekenai unai hereva do idia atoa bona edia natudia dekenai do idia hadibaia. Unai idia karaia totona do idia hadibaia loulou, Iehova lalokau henia ena badina idauidau do idia gwauraia, unai lalokau idia koua lalohadai bona karadia idia herevalaia, bona sibodia edia mauri lalonai Iehova lalokau henia karana do idia hahedinaraia. Iseda natudia be unai bamona ita hadibaia danu be namo, a? Oibe! Bona idia ita durua edia ‘kudouna ena kopina’ do idia utua totona, anina be, Iehova idia lalokau henia karana idia koua diba gaudia do idia kokia. (Deuteronomi 10:12, 16; Ieremia 4:4) Reana, unai koua gaudia haida be tanobada ena kohu ura henia karana bona tanobada ena kara tahua goadagoada karadia. (1 Ioane 2:15, 16) Iehova lalokau henia karana ia mauri noho bona ia goada be namo, bona ita ia hasiahua iseda guba Tamana idia hamoalea gaudia ita karaia totona. (1 Ioane 5:3) Emu ruma bese stadi ese nega daudau lalonai emu ruma bese ia durua totona, stadi negadia ibounai lalonai oi hakaua dalana ese unai lalokau karana ia hagoadaia be namo.
6. (a) Natudia dekenai diba maorona idia hadibaia totona, tama sina be dahaka idia karaia be namo? (b) Baibel siridia be edena dala ai idia hahedinaraia diba maorona be mai anina bada?
6 Dirava ena taravatu ena diba maorona umui hadibaia. Unai ena anina be dahaka? Magasin o buka amo haere umui duahia sibona be hegeregere lasi, to kara ma haida umui karaia be namo. Gau badana be idia lalo-parara goevagoeva totona, mai anina bada herevadia bona lalohadai umui kikilaia bona umui gwauraia hedinarai. Diba maorona be mai anina bada, mauri matamata atoa totona, bona mauri lalonai hekwakwanai idia vara neganai mai anina bada gaudia atoa guna totona, unai amo Dirava idia hamoalea momokani karadia idia karaia diba.—Filipi 1:9-11; Kolose 1:9, 10; 3:10.
7. (a) Edena henanadai haida ese ruma bese taudia do idia durua idia stadilaia gauna idia gaukaralaia totona? (b) Baibel siridia be edena dala ai idia hahedinaraia unai tahua gauna be mai anina bada?
7 Durudia idia dibaia gaudia idia gaukaralaia totona. Unai umui karaia totona, ruma bese stadi ta ta ai, umui henanadai: ‘Ita stadilaia gauna ese edena dala ai iseda mauri ia haidaua be namo? Iseda mauri lalonai kara ta ita haidaua be namo, a? Dahaka dainai ita ura kara haida ita haidaua?’ (Aonega Herevadia 2:10-15; 9:10; Isaia 48:17, 18) Nega umui atoa idia dibaia gaudia idia gaukaralaia diba daladia idauidau umui kikilaia neganai, ruma bese taudia ia durua diba lauma dalanai idia goada idia lao totona.
Hadibaia Kohudia Gaukaralaia mai Aonega Ida
8. Hesiai tauna oreana ese dahaka Baibel stadilaia kohudia idia halasia?
8 “Hesiai tauna mai ena kamonai, bona mai ena kara maoromaoro” be iseda stadi lalonai ita gaukaralaia diba kohu momo idia henia. Baibel ida ita stadilaia Gima Kohorona magasin be gado 131 ai idia halasia. Baibel stadi dekenai ita gaukaralaia diba bukadia be gado 153 ai idia halasia, buklet be gado 284 ai, kaset teipi be gado 61 ai, vidio kaset be gado 41 ai, bona Baibel tahua kompiuta program danu be gado 9 ai idia halasia!—Mataio 24:45-47.
9. Inai paragraf lalonai idia torea hanai lasi siridia edia sisiba be edena bamona umui gaukaralaia diba, emui ruma bese ida Gima Kohorona umui stadilaia neganai?
9 Ruma bese momo be ruma bese stadi ai kongregesen ena Gima Kohorona Stadi totona idia hegaegae. Unai ese idia ia durua bada diba! Tanobada hegegemadai Iehova ena taunimanima hagoadaia totona Gima Kohorona ese mai anina bada lauma aniani ia halasia. Emu ruma bese ida Gima Kohorona umui stadilaia neganai, paragraf bona henanadai umui duahia sibona lasi. Lalo-parara umui tahua goadagoada. Nega umui atoa idia gwauraia to idia torea hanai lasi siridia umui duahia totona. Ruma bese taudia oi noia unai siri edia anina paragraf lalonai ia noho herevana dekenai idia kikilaia totona. Unai gaudia ese edia kudouna idia hamarerea be namo.—Aonega Herevadia 4:7, 23; Kara 17:11.
10. Natudia be stadi lalonai idia vareai bona idia moalelaia totona, dahaka umui karaia diba?
10 Bema umui be mai emui natudia, dahaka umui karaia diba ruma bese stadi be kara ta sibona lasi, to goada idia abia negana, idia ura henia, bona idia moalelaia negana ta? Dala namona ta ai idia ta ta umui durua umui stadilaia gauna do idia hesikulaia lasi totona. Bema mai dalana, natudia ta ta be mai ena Baibel bona stadi magasin be namo. Iesu ese ia hahedinaraia lalokau hegeregerena, tama eiava sina be natuna maragina ta badinai ia helai diba, bona reana idia rosia danu. (Mareko 10:13-16 itaia.) Ruma bese kwarana ese natuna maragina ta ia noia diba magasin lalonai ia noho laulau do ia herevalaia totona. Stadi idia do matamaia lasi neganai, tamana ese natuna maragina ta dekenai siri ta ia henia diba stadi lalonai ia duahia totona. Natuna badana do ia noia diba idia stadilaia gaudia be edena bamona idia gaukaralaia diba do ia gwauraia totona.
11. Edena hadibaia kohudia ma haida idia noho, bona ruma bese stadi lalonai edena bamona umui gaukaralaia diba?
11 Ena be emui stadi lalonai Gima Kohorona umui gaukaralaia, gado momo dekenai idia halasia stadi kohu ma haida umui laloaboio lasi. Bema hereva haida eiava Baibel ena hereva ta ena anina umui tahua, Insight on the Scriptures bukana amo diba umui abia diba. Henanadai haida edia haere be Watch Tower Publications Index eiava Society ese ia halasia kompiuta program amo umui davaria diba. Bema unai gaudia be emui gado dekenai idia noho, gaukaralaia dalana umui dibaia ese emui ruma bese stadi do ia durua bada. Matamata taudia edia lalona umui veria totona, reana stadi negana ena kahana ta ai Society ena vidio ena kahana ta umui itaia eiava drama teipi ena kahana ta umui kamonai henia bena umui herevalaia diba. Unai stadi kohudia umui gaukaralaia namonamo neganai, ruma bese stadi amo namo do umui davaria bona ibounai ese do idia moalelaia.
Emui Ruma Bese Idia Durua Gaudia Umui Stadilaia
12. Ruma bese stadi lalonai ruma bese ena mai anina bada hekwakwanai gaudia be edena bamona umui hamaoromaoroa diba?
12 Reana emui ruma bese ese pura ena Gima Kohorona stadi ia stadilaia. To emui ruma bese lalonai idia vara hekwakwanai bona lalohadai idauidau umui diba danu be namo. Bema sina be moni gaukara ia karaia lasi, dina ta ta ai natudia be sikuli amo idia giroa mai neganai, nega ia atoa idia ida unai gaudia ia kikilaia totona. Hekwakwanai haida be unai negai idia hamaoromaoroa diba; haida dekenai nega bada idia henia be namo. Bema ruma bese be mai ena anina bada hekwakwanai ta, unai umui dadaraia lasi. (Aonega Herevadia 27:12) Reana, unai be sikuli dekenai idia vara hekwakwanai sibona lasi to hekwakwanai ma haida danu. Stadi gauna namona umui abia hidi, bona nega ia do noho lalonai ruma bese taudia umui hadibaia dahaka do umui stadilaia.
13. Ruma bese stadi lalonai ogogami haheaukalaia karana umui kikilaia neganai, unai ese edena bamona umui do ia durua diba?
13 Haheitalai ta be inai, tanobada ena kahana badana ai taunimanima momo be idia ogogami; unai dainai, gabu momo ai, unai hekwakwanai be edena bamona do idia haheaukalaia idia herevalaia be namo. Bema mauri lalonai idia vara gaudia bona Baibel ena hakaua herevadia umui stadilaidia, unai ese emui ruma bese taudia do ia durua bada.—Aonega Herevadia 21:5; Hadibaia Tauna 9:11; Heberu 13:5, 6, 18.
14. Dahaka hekwakwanai idia vara dainai, inai be nega namona Iehova ena lalohadai dagedage, tuari, bona Keristani gini siri karadia kikilaia totona?
14 Dagedage karana ita herevalaia danu be namo. Ita ibounai iseda lalona bona kudouna dekenai Iehova ena lalohadai ita abia dae momokani be namo. (Genese 6:13; Salamo 11:5) Dagedage karana umui stadilaia neganai, sikuli dekenai dagedage natudia idia kara henia daladia, heatu gadaradia dibaia be maoro eiava, bona moale karadia maorodia abia hidi dalana umui kikilaia diba. Hari inai negai dagedage karadia idia vara momo; kahirakahira tano ibounai lalonai tano taudia idia tuari heheni, politikol oreadia eiava iduhu idia tuari heheni, eiava raskol oreadia idia tuari heheni. Unai dainai, emui ruma bese taudia ida tuari taudia huanai Keristani kara badinaia dalana umui kikilaia hebou be namo.—Isaia 2:2-4; Ioane 17:16.
15. Natudia be edena bamona umui hadibaia diba mahuta hebou karana bona headava dekenai?
15 Natudia idia tubu neganai, edia mauri lagani hegeregerena ai, mahuta hebou karana bona headava dekenai diba idia abia be namo. Kastom haida lalonai tama sina momo be edia natudia ida mahuta hebou karana idia kikilaia lasi. Diba maorona idia abia lasi natudia be edia turadia haida amo diba kererena idia abia diba, bona unai ese dika bada ia havaraia diba. Iehova be Baibel lalonai unai gaudia totona sisiba ia henia neganai, mai hemataurai ida ia gwauraia hedinarai, ita ese ena kara ita tohotohoa be namo, ani? Dirava ena sisiba ese iseda natudia do idia durua sibodia do idia matauraia bona mero bona kekeni be mai hemataurai ida idia kara henidia totona. (Aonega Herevadia 5:18-20; Kolose 3:5; 1 Tesalonika 4:3-8) Ena be umui ese unai gaudia umui kikilaia vadaeni, umui kikilaia lou be namo. Gau matamatadia idia vara neganai, hadibaia loulou karana be mai anina bada.
16. (a) Ruma bese idauidau lalonai, ruma bese stadi be edena negai idia karaia? (b) Hanaihanai emui ruma bese stadi umui karaia totona, edena dala ai koua gaudia umui hanaia?
16 Ruma bese stadi be edena negai umui karaia diba? Tanobada hegegemadai Betele famili idia tohotohoa dainai, ruma bese momo edia ruma bese stadi be Monday hanuaboi ai idia karaia. To haida be idau. Argentina ai ruma bese taudia 11, idia 9 be natudia, be hanaihanai 5 okaloka ai idia noga ruma bese stadi idia karaia totona. Edia gaukara negadia be idauidau dainai, nega ma ta be ia hegeregere lasi. Ena be ia auka sisina, to unai dainai natudia be mai edia lalona bona kudouna ida idia diba ruma bese stadi be mai anina bada. Philippines dekenai elda ta be iena adavana bona edia natudia toi ida ruma bese stadi ia karaia hanaihanai. Pura lalonai danu tama sina ese natudia ta ta idia stadi henia, unai amo idia ta ta be hereva momokani idia abia dae diba. United States ai, taihu ta ena adavana be Witness tauna lasi, to daba ibounai ena natudia ida ia raka lao sikuli basi idia naria totona. Basi idia naria noho lalonai, miniti 10 lalonai Baibel stadi buka namona ta idia duahia bona idia kikilaia hebou, bena edia sinana ese guriguri kwadogina ia gwauraia bona natudia be basi dekenai idia guia. Democratic Republic of Congo dekenai, ena Witness lasi adavana ese ia rakatania hahine ta be stadi karaia totona ia hekwarahi bada badina edukeisen sisina sibona ia abia. Pura ta ta ai ena natuna mero badana ese ia vadivadi henidia bona ena sinana bona ena tadidia ida idia stadi hebou. Sinana be haheitalai namona ia hahedinaraia ena hegaegae namonamo karana amo. Emui ruma bese lalonai hekwakwanai ta ese ruma bese stadi karaia hanaihanai dalana ia koua, a? Umui hesiku lasi. Iehova umui noia Baibel stadi umui karaia hanaihanai totona emui hekwarahi karana do ia hanamoa.—Mareko 11:23, 24.
Hesiku Lasi Karana Ena Ahuna
17. (a) Ruma bese stadi umui karaia hanaihanai totona, dahaka be mai anina bada? (b) Edena ekspiriens ese ia hahedinaraia ruma bese dekenai Iehova ena dala hadibaia hanaihanai karana be mai anina bada?
17 Palani umui karaia be gau badana. Umui hesiku lasi. To ruma bese stadi umui karaia hanaihanai karana ese namo bada do ia havaraia. (Aonega Herevadia 22:6; 3 Ioane 4) Germany dekenai, Franz bona Hilda be natudia 11 idia naria. Lagani momo murinai, edia natuna kekeni Magdalena ia gwau: “Hari lau laloa mai anina bada gauna be dina ta ta ibounai idia ese lauma dalanai ai idia hadibaia.” Adolf Hitler ena lohia henunai bese abia isi karana ia bada neganai, Magdalena ena tamana ia itaia hetoho do idia vara, bona ia ese Baibel ia gaukaralaia ena ruma bese ia hahegaegaea totona. Gabeai, natudia maragidia be ruma bese amo idia abia bona panisi idia henia sikulina ta dekenai idia atoa; ruma bese taudia ma haida be idia dogoatao bona dibura rumadia bona dibura kamepadia dekenai idia atoa. Haida idia alaia mase. Idia ibounai be edia abidadama dekenai idia gini goada—unai dagedage bada negana lalonai sibona lasi, to lagani momo murinai, idia roho mauri taudia idia gini goada danu.
18. Iehova ese adavana lasi tama eiava sina edia hekwarahi be edena bamona ia hanamoa?
18 Adavana lasi tama eiava sina momo bona ma haida, edia adavadia be tomadiho tamona lasi taudia, be natudia dekenai Baibel idia hadibaia hanaihanai. India dekenai vabu ta ia hekwarahi bada ena natudia rua dekenai Iehova lalokau henia karana ia hadibaia totona. To, ena natuna mero be Iehova ena orea ia rakatania neganai, ia lalohisihisi bada herea. Bema ena natuna ia hadibaia namonamo lasi dainai unai ia vara, Iehova ia noia ena kara ia gwauatao totona. To ena natuna mero be ia dibaia gaudia ia laloaboio momokani lasi. Lagani 10 mai kahana murinai, ia giroa mai, lauma dalanai ia goada ia lao, bona kongregesen ena elda tauna ai ia lao. Hari ia bona ena adavana be ful-taim painia gaukara idia karaia. Iehova bona ena orea edia sisiba idia badinaia bona edia ruma bese ida Baibel stadi idia karaia hanaihanai tama sina idia moale bada! Emu ruma bese lalonai unai sisiba oi badinaia noho, a?
Anina Oi Gwauraia Diba, A?
◻ Dahaka dainai ruma bese stadi karaia hanaihanai karana be mai anina bada?
◻ Namona be iseda tahua gaudia be dahaka dahaka ruma bese stadi lalonai?
◻ Ita dekenai dahaka hadibaia kohudia idia noho?
◻ Ruma bese stadi be edena bamona ita haidaua diba ruma bese durua gaudia ita stadilaia totona?
[Picture on page 15]
Tahua gaudia umui abia hidi karana ese emui ruma bese stadi do ia hanamoa