Tama Sina E, Emui Haheitalai be Dahaka Ia Hadibaia?
“Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo. Lalokau ena dala dekenai do umui mauri noho.”—EFESO 5:1, 2.
1. Iehova ese tau bona hahine ginigunadia dekenai dahaka hadibaia herevadia ia henia?
IEHOVA be ruma bese ia Havaraia Tauna. Ia dainai ruma bese ibounai idia noho badina ia ese ruma bese ginigunana ia havaraia bona headava tau bona ena hahine ginigunadia dekenai natuna havaraia siahuna ia henia. (Efeso 3:14, 15) Adamu bona Heva dekenai ia henia maduna ia hadibaia bona dala ia kehoa sibona edia ura hegeregerena unai idia karaia totona. (Genese 1:28-30; 2:6, 15-22) Adamu bona Heva idia kara dika murinai, ruma bese ese idia davaria hekwakwanai idia auka idia lao. To, ena hesiai taudia ese unai hekwakwanai idia hanaia diba totona, Iehova be mai lalokau ida hakaua herevadia ia henia.
2. (a) Edena dala ai Iehova ese idia torea hakaua herevadia be hadibaia herevadia amo ia hagoadaia? (b) Tama sina be sibodia dekenai edena henanadai idia henia be namo?
2 Iehova be iseda Hadibaia Tauna Badana dainai, dahaka do ita karaia bona dahaka do ita karaia lasi totona, idia torea hakaua herevadia sibona ia henia lasi, to kara ma haida ia karaia danu. Idaunegai, ia ese torea hakaua herevadia ia henia bona hahelaga taudia, peroveta taudia, bona ruma bese kwaradia edia amo hadibaia herevadia ia henia danu. Iseda nega ai, daidia ia gaukaralaia unai bamona hadibaia herevadia idia henia totona? Keristani elda taudia bona tama sina. Bema oi be tama o sina, emu ruma bese be Iehova ena dala ai oi hadibaia noho, a?—Aonega Herevadia 6:20-23.
3. Iehova ena hadibaia dalana namona amo ruma bese kwaradia be dahaka idia dibaia diba?
3 Ruma bese lalonai unai hadibaia herevadia be edena bamona ita henia be namo? Iehova ese hadibaia dalana ia hahedinaraia. Ia ese dahaka be namo bona dahaka be dika ia gwauraia hedinarai goevagoeva, bona hereva gwauraia lou gwauraia lou karana ia gaukaralaia. (Esodo 20:4, 5; Deuteronomi 4:23, 24; 5:8, 9; 6:14, 15; Iosua 24:19, 20) Ia ese lalona veria henanadai ia gaukaralaidia. (Iobu 38:4, 8, 31) Parabole bona idia vara momokani gaudia edia sivarai amo, ia ese iseda kudouna ia hamarerea bona ia hadibaia. (Genese 15:5; Daniela 3:1-29) Tama sina e, emui natudia umui hadibaia neganai, unai dala umui tohotohoa, a?
4. Matahakani henia dalana ai Iehova amo dahaka ita dibaia, bona dahaka dainai matahakani be gau badana?
4 Iehova be kara maoromaoro totona ia gini goada, to goevadae lasi dainai idia vara gaudia ia lalo-pararalaia. Unai dainai panisi ia do henia lasi neganai, goevadae lasi taudia ia hadibaia bona ia sisiba henidia loulou. (Genese 19:15, 16; Ieremia 7:23-26) Matahakani ia henia neganai, kerere ena bada hegeregerena ia henia, ia kara auka lasi. (Salamo 103:10, 11; Isaia 28:26-29) Bema iseda natudia be unai bamona ita kara henidia, ia hedinarai ita be Iehova ita diba, bona do ia auka lasi natudia danu ese Iehova idia dibaia totona.—Ieremia 22:16; 1 Ioane 4:8.
5. Kamonai karana dekenai, tama sina be Iehova amo dahaka idia dibaia diba?
5 Iehova be mai lalokau ida ia kamonai guba Tamana. Ia be oda herevadia ia henia sibona lasi. Ita ia hagoadaia iseda lalona dekenai idia noho gaudia be ia dekenai do ita gwauraia totona. (Salamo 62:8) Bona, bema ita gwauraia gaudia be idia maoro momokani lasi, gado badana ida guba amo ita ia gwau henia lasi. Mai haheauka ida ita ia hadibaia. Unai dainai, aposetolo Paulo ena sisiba be namo herea, ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui kara be namo”! (Efeso 4:31–5:1) Tama sina ese edia natudia idia hadibaia dalana dekenai, Iehova ese haheitalai namona ia hahedinaraia! Ena haheitalai ese iseda kudouna ia hamarerea bona ita ura ena mauri dalana ai ita raka totona.
Haheitalai Ena Hadibaia Siahuna
6. Edena dala ai, tama sina edia lalohadai bona haheitalai ese natudia idia hadibaia?
6 Matamata taudia dekenai hadibaia herevadia sibona lasi, to haheitalai be mai anina bada. Herevana, tama sina idia ura eiava lasi, to edia natudia ese edia kara do idia tohotohoa. Bema tama sina idia kamonai natudia be idia ese idia gwauraia gauna ta idia gwauraia, reana tama sina idia moale, to reana nega haida idia gari danu. Bema tama sina edia kara bona lalohadai idia hahedinaraia idia be lauma gaudia idia laloa bada, unai ese natudia do ia durua bada.—Aonega Herevadia 20:7.
7. Iepeta ese edena bamona haheitalai ia hahedinaraia ena natuna kekeni dekenai, bona dahaka ia vara?
7 Tama sina edia haheitalai ese dahaka ia havaraia diba be Baibel ese ia hahedinaraia goevagoeva. Israela taudia ese Amono taudia idia halusia totona Iehova ese Iepeta ia gaukaralaia bona Iepeta be mai ena natuna kekeni danu. Iepeta ese Amono ena king ia haere henia sivaraina ese ia hahedinaraia Iepeta be Iehova ese Israela besena ia kara henia sivaraidia ia duahia momo. Unai sivarai ia gwauraia haraga diba, bona ia hahedinaraia Iehova ia abidadama henia bada. Ita daradara lasi, iena haheitalai ese iena natuna kekeni ia durua abidadama bona sibona ena ura dadaraia karana ia hahedinaraia totona, ia ese headava lasi maurina ia abia dae bona ena mauri ibounai ia gaukaralaia Iehova ena hesiai gaukara do ia karaia totona.—Gunalaia Taudia 11:14-27, 34-40; mani Iosua 1:8 itaia.
8 Samuela ia maragi neganai, ia be haheitalai namona bona ena mauri ibounai lalonai ia be Dirava ia badinaia peroveta tauna. Oi ura emu natudia be ia bamona do idia lao, a? Samuela ena tama sina, Elikana bona Hana, ese idia hahedinaraia haheitalaina mani oi laloa. Ena be edia ruma bese ena mauri be ia namo momokani lasi, to hanaihanai dubu helaga ia noho gabuna, Silo, dekenai idia lao tomadiho totona. (1 Samuela 1:3-8, 21) Hana ia guriguri neganai ena hemami mani oi laloa. (1 Samuela 1:9-13) Mani oi itaia idia ruaosi idia laloa Dirava dekenai idia karaia gwauhamatana do idia hagugurua karana be mai anina bada. (1 Samuela 1:22-28) Edia haheitalai namona ese Samuela ia durua kara maoromaoro ia badinaia totona—ena be ia badinai idia noho Iehova ena hesiai taudia be Dirava ena dala idia matauraia lasi. Gabeai, Iehova ese Samuela dekenai Iena peroveta tauna ena maduna ia henia.—1 Samuela 2:11, 12; 3:1-21.
9. (a) Timoteo ena ruma bese lalonai daika ese ia idia durua? (b) Timoteo be edena bamona tauna ai ia lao?
9 Oi ura emu natuna mero be Timoteo bamona, a? Timoteo be do tau matamata neganai aposetolo Paulo ia bamoa matamaia. Timoteo ena tamana be Keristani lasi tauna, to iena sinana bona tubuna hahine ese lauma gaudia laloa bada haheitalaina idia hahedinaraia. Momokani, unai ese Timoteo ena Keristani maurina totona badina namona ia haginia. Baibel ese ita ia hamaoroa iena sinana, Euniko, bona iena tubuna hahine Loi be mai edia “abidadama momokani.” Edia Keristani maurina be koikoi gauna lasi; edia mauri lalonai idia abidadama henia gaudia idia badinaia, bona mero matamatana Timoteo idia hadibaia unai bamona do ia karaia danu. Timoteo ia hamomokania ia be maduna ia huaia namonamo diba bona ma haida edia namo ia laloa bada.—2 Timoteo 1:5; Filipi 2:20-22.
10. (a) Ruma bese murimurina ai, edena haheitalai ese iseda natudia edia lalona idia veria diba? (b) Bema iseda natudia edia hereva o kara lalonai be idia itaia gaudia idia hedinarai, edena bamona ita kara be namo?
10 Iseda natudia ese idia itaia haheitalai ibounai be ruma bese lalonai lasi. Idia danu sikuli tamona dekenai idia lao natudia, matamata taudia edia lalona idia hadibaia tisa taudia, iduhu bona gabu ena kastom karadia badinaia auka karana idia goadalaia taudia, momo ese idia abia isi spot gadara dekenai idia kwalimu taudia, bona niusi dekenai edia kara idia kikilaia gavamani taudia idia noho. Natudia milioni momo danu be tuari ena hisihisi idia mamia. Iseda natudia idia itaia gaudia be edia hereva o kara lalonai idia hedinarai neganai, ita hoa, a? Unai ia vara neganai edena bamona ita kara? Mai badu ida ita hereva auka henidia ese unai hekwakwanai do ia hamaoromaoroa, a? Namo lasi iseda natudia ita hereva henidia haraga, to ita sibona ita nanadaia be namo, ‘Iehova ese ita ia kara henia dalana ai kara ta ese lau ia durua diba unai hekwakwanai lau hamaoromaoroa totona, a?’—Roma 2:4 itaia.
11. Tama sina idia kerere neganai, natudia edia lalohadai be edena bamona ia idau diba?
11 Momokani, goevadae lasi tama sina be hanaihanai dala maorona ai hekwakwanai idia hamaoromaoroa lasi. Kerere do idia karaia danu. Natudia be unai idia diba neganai, unai ese edia tama sina matauraia karana do ia hadikaia, a? Ia hadikaia diba, bema tama sina be edia siahu idia gaukaralaia kerere bona mai goada ida edia kerere idia hunia toho. To, kara idauna do ia vara diba bema tama sina be idia manau bona edia kerere idia gwauraia hedinarai. Unai amo edia natudia dekenai mai anina bada karana ta idia hadibaia diba, bona natudia ese unai kara idia dibaia bona idia badinaia be namo.—Iamesi 4:6.
Iseda Haheitalai ese Ia Hadibaia Diba Gauna
12, 13. (a) Lalokau karana dekenai, natudia be dahaka idia dibaia be namo, bona edena dala ai ita hadibadia namonamo diba? (b) Dahaka dainai natudia ese lalokau karana idia dibaia be gau badana?
12 Hadibaia hereva ita henia bona haheitalai namona ita hahedinaraia neganai, mai anina bada gaudia momo ita hadibaia namonamo diba. Mani haida oi itaia.
13 Sibona ena namo tahua lasi lalokauna hahedinaraia: Haheitalai ese ia hadibaia namonamo gau badana ta be lalokau ena anina. “Ita be mai iseda lalokau, bona ena badina korikori be inai: Dirava ese ita ia lalokau henia guna.” (1 Ioane 4:19) Dirava be lalokau ena Badina bona ia be lalokau ia hahedinaraia tauna hereadaena. Lalohadai maoromaoro dainai ia vara lalokauna, a·gaʹpe, be Baibel ese nega 100 mai kahana ia gaukaralaia. Unai bamona lalokau be Keristani taudia korikoridia edia toana. (Ioane 13:35) Unai bamona lalokau be Dirava bona Iesu Keriso dekenai do idia hahedinaraia bona taunimanima ese ma taunimanima dekenai do idia hahedinaraia danu—ena be taunimanima haida idia ura henia bada lasi. (Mataio 5:44, 45; 1 Ioane 5:3) Unai lalokau be iseda kudouna dekenai ia noho bona iseda mauri lalonai do ita badinaia momokani bena, gabeai, iseda natudia dekenai ita hadibaia namonamo diba. Hereva lasi to kara be mai anina bada. Ruma bese lalonai, natudia ese lalokau bona kara namodia ma haida, hegeregere ura heheni karana, idia itaia bona idia mamia danu be namo. Unai gaudia idia noho lasi neganai, natuna be tauanina, lalona, bona hemami dalanai do ia tubu namonamo lasi. Natudia ese ruma bese murimurina ai Keristani turadia dekenai lalokau bona ura henia karana maorona hahedinaraia dalana idia itaia danu be namo.—Roma 12:10; 1 Petero 3:8.
14. (a) Tama sina ese natudia dekenai moale ia havaraia gaukara karaia namonamo dalana be edena bamona idia hadibaia diba? (b) Emui ruma bese lalonai edena bamona unai umui karaia diba?
14 Gaukara dalana do idia dibaia: Mauri lalonai gaukara be gau badana. Tau ta be sibona ia matauraia diba totona, ia ese gaukara karaia namonamo dalana ia dibaia be namo. (Hadibaia Tauna 2:24; 2 Tesalonika 3:10) Bema natuna dekenai gaukara ta ita henia, to ita hadibaia namonamo lasi, bena ia karaia namonamo lasi dainai ita gwau henia, reana ia be gaukara karaia namonamo dalana do ia dibaia lasi. To bema natudia be edia tama sina ida idia gaukara hebou bona hanamoa herevadia idia abia, idia ese moale do ia havaraia gaukara karaia namonamo dalana do idia dibaia. Bema tama sina ese edia haheitalai ena badina idia gwauraia hedinarai danu, natudia ese gaukara haorea dalana sibona idia dibaia lasi to hekwakwanai hanaia dalana, gaukara karaia ela bona idia haorea dalana, bona laloa namonamo bona abia hidi dalana idia dibaia danu. Idia gaukara hebou neganai, idia hadibadia diba Iehova be gaukara ia karaia danu, gaukara ia karaia namonamo, bona Iesu be ena Tamana ena kara ia tohotohoa. (Genese 1:31; Aonega Herevadia 8:27-31; Ioane 5:17) Bema ruma bese ta be mai ena uma gabu eiava mai ena bisinesi ta, reana ruma bese taudia haida idia gaukara hebou diba. Eiava sinana ese iena natuna mero eiava kekeni dekenai nadunadu bona mereki huria dalana ia hadibaia diba. Ruma dekenai ia gaukara lasi tamana ese ruma dekenai ena natudia ida idia karaia hebou gaukarana ta ia palanilaia be namo. Bema tama sina be hari idia noho gaukara idauidau haorea karana idia laloa sibona lasi to edia natudia dekenai mauri durua daladia idia hadibaia karana idia laloa danu, namo bada idia havaraia!
15. Edena dala idauidau ai tama sina ese natudia dekenai abidadama karana idia hadibaia diba? Gwauraia hedinarai.
15 Hisihisi idia vara neganai abidadama dogoatao noho: Iseda mauri lalonai abidadama be mai anina bada danu. Ruma bese stadi lalonai abidadama umui herevalaia neganai, natudia ese abidadama ena anina idia gwauraia dalana idia dibaia. Natudia ese abidadama idia hahedinaraia karadia idia itaia neganai edia kudouna dekenai abidadama ia tubu matamaia. To bema idia itaia hisihisi badadia lalonai edia tama sina be edia abidadama idia dogoatao auka, natudia ese edia mauri lalonai unai kara do idia laloaboio lasi. Panama dekenai Baibel stiuden ta be ena adavana ese ia hamaoroa ruma amo do ia lulua bema Iehova tomadiho henia karana do ia hadokoa lasi. To herevana, hanaihanai ia be ena natudia maragidia hani danu kilomita 16 idia raka bena basi idia abia bona kilomita 30 idia lao Kingdom Hall dekenai. Unai haheitalai ese ena ruma bese taudia ia hagoadaia dainai, idia ibounai 20 ese hereva momokani dalana idia abia dae.
Dina Ta Ta ai Baibel Duahia Karana Haheitalaia
16. Dahaka dainai ruma bese ese dina ta ta ai Baibel idia duahia hebou be namo?
16 Ruma bese ese ia haginia diba mai anina bada karana ta—tama sina do ia durua bona natudia ese idia tohotohoa diba gauna—be Baibel duahia hanaihanai karana. Bema mai dalana, dina ta ta ai Baibel oi duahia toho be gau badana. Oi duahia kahana ena bada be gau badana lasi. Mai anina bada gauna be dina ibounai oi duahia bona oi karaia dalana. Baibel umui duahia murinai, natudia totona Lau Egu Bible Sivarai Buka ena kaset teipi umui kamonai diba. Dina ibounai Dirava ena Hereva ita duahia karana ese ita ia durua Dirava ena lalohadai ita atoa guna totona. Bona bema unai bamona Baibel duahia karana be taunimanima ta ta sibona lasi to ruma bese taudia ese idia karaia hebou, unai ese ruma bese ibounai do ia durua Iehova ena dala dekenai idia raka totona. Vanegai “Dirava Ia Gwauraia Mauri Dalana” Hebouhebouna dekenai, drama ladana Ruma Bese Taudia e—Emui Mauri Lalonai Dina Ta Ta Baibel Umui Duahia! ese unai ia hadibaia goadagoada.—Salamo 1:1-3.
17 Ruma bese taudia ese Baibel idia duahia hebou karana be lauma helaga ena siahu amo aposetolo Paulo ese Efeso Keristani taudia ia tore henia herevana ida ia hegeregere, ia gwau: “Tama e, emui natudia do umui habadua kava lasi, to Iehova ena matahakani bona lalona biagua karana ai do umui naridia.” (Efeso 6:4, NW ) Unai ena anina be dahaka? “Lalona biagua karana” ena anina korikori be “lalona atoa”; Keristani tamadia ia hagania idia ese Iehova Dirava ena lalohadai be edia natudia edia lalona dekenai do idia atoa—natudia do idia durua Dirava ena lalohadai idia diba totona. Natudia oi hagoadaia hereva badadia idia gwauraia siridia be edia kwarana amo idia gwauraia totona ese unai ia havaraia diba. Tama sina idia tahua gauna be Iehova ena lalohadai ese natudia edia lalohadai do idia hakaua, bena unai amo edia ura bona kara ese Dirava ena taravatu do idia hahedinaraia, herevana edia tama sina idia noho eiava lasi. Baibel be unai bamona laloa karana ena badina.—Deuteronomi 6:6, 7.
18. Baibel umui duahia neganai, dahaka umui karaia be namo (a) umui lalo-pararalaia goevagoeva totona? (b) ena sisiba amo namo umui abia totona? (c) Iehova ena ura badinaia totona? (d) ia herevalaia taudia edia lalohadai bona kara amo diba umui abia totona?
18 Momokani, bema ita ura Baibel ese iseda mauri ia haidaua, ena hereva ita lalo-pararalaia be namo. Momo be unai idia karaia totona, reana kahana ta do idia duahia lou duahia lou. Hereva haida ita lalo-pararalaia namonamo totona, reana diksenari eiava Insight on the Scriptures bukana amo anina do ita tahua. Bema siri ta be sisiba eiava oda herevana ta ia gwauraia, nega umui atoa bona hari inai nega lalonai idia vara hekwakwanai lalonai unai hereva be edena bamona ita badinaia diba karana umui kikilaia. Bena umui henanadai diba, ‘Unai sisiba ita badinaia ese edena bamona ita ia durua diba?’ (Isaia 48:17, 18) Bema siri ta ese Iehova ena ura ia herevalaia, umui henanadai, ‘Unai ese iseda mauri be edena bamona do ia haidaua?’ Reana umui duahia sivaraina ese taunimanima edia lalohadai bona kara ia herevalaia. Dahaka hekwakwanai idia davaria? Edena bamona idia hanaidia? Edia haheitalai ese edena bamona ita idia durua? Hanaihanai nega oi atoa hari inai negai iseda mauri lalonai unai sivarai ena anina be dahaka umui kikilaia totona.—Roma 15:4; 1 Korinto 10:11.
19. Dirava ena kara ita tohotohoa neganai, iseda natudia dekenai dahaka ita hahedinaraia?
19 Unai be dala hereadaena iseda lalona bona kudouna dekenai Dirava ena lalohadai ita atoa totona! Unai ese ita ia durua momokani natuna bamona ‘Dirava ena kara bamona do ita karaia’ totona. (Efeso 5:1) Bona iseda natudia ese do idia tohotohoa haheitalai namona ita hahedinaraia diba.
Oi Laloatao, A?
◻ Tama sina ese Iehova ena haheitalai amo dahaka heduru idia abia diba?
◻ Dahaka dainai tama sina be hadibaia herevadia idia henia bona haheitalai namona idia hahedinaraia danu be namo?
◻ Dahaka kara haida be tama sina edia haheitalai ese idia hadibaia namonamo?
◻ Ruma bese ida Baibel ita duahia hebou karana amo, dahaka namo ita davaria diba?
8. (a) Samuela ena tama sina ese dahaka lalohadai namona idia hahedinaraia? (b) Unai ese Samuela be edena bamona ia durua?
17. Baibel idia duahia hebou bona mai anina bada siri be kwarana amo idia gwauraia neganai, ruma bese taudia be edena dala ai Efeso 6:4 (NW ) idia badinaia?
[Pictures on page 10]
Ruma bese momo be dina ta ta ai Baibel duahia hebou karana idia moalelaia