Iseda Abidadama Dainai Kara Namodia Ita Karaia

¹ Abidadama dainai Noa, Mose, bona Rahaba ese kara ta idia karaia. Noa ese lagatoi ia karaia. Mose ese Farao ena ruma dekenai ia abia diba gau namodia, idia noho daudau lasi gaudia, ia dadaraia. Rahaba ese spai taudia ia hunia bena edia hereva ia badinaia, unai amo ena ruma bese ia hamauria. (Heb. 11:​7, 24-26, 31) Hari inai negai, iseda abidadama dainai ita karaia kara namodia be dahaka?

² Ita Haroro: Abidadama dainai iseda Dirava namona bona mauri hanaihanai totona ia karaia gaudia ita herevalaia. (2 Kor. 4:13) Reana nega haida ita haroro momo lasi. To bema nega ibounai ita laloatao ‘Lohiabada be ita dekenai ia noho,’ goada ita abia bona gari ia ore. (Sal. 16:8) Bena iseda abidadama ese ita ia hagoadaia, bona dala ia kehoa negadiai, varavara, dekena taudia, gaukara turadia, sikuli turadia, bona ma haida dekenai sivarai namona ita harorolaia.​—Roma 1:​14-16.

³ Ita Hebou: Hanaihanai hebou dekenai ita lao be abidadama dainai ita karaia kara namona ma ta. Edena dala ai? Unai amo ita hahedinaraia ita abia dae momokani Keristani heboudia dekenai ita noho neganai, Iesu be Dirava ena lauma helaga amo ita danu ia noho. (Mat. 18:20) Ia hahedinaraia ita ura ‘lauma helaga ena hereva ekalesia oreadia dekenai do ita kamonai.’ (Apok. 3:6) Ita dekenai idia hadibaia herevadia ita laloa bada, badina abidadama dainai ita diba ita ia hadibaia tauna be iseda Hadibaia Tauna Hereadaena, Iehova.​—Isa. 30:20.

⁴ Ita Abia Hidi Gaudia: Ita diba momokani ita itaia diba lasi gaudia idia noho, unai dainai iseda mauri lalonai lauma gaudia ita atoa guna. (Heb. 11:1) Unai dainai, nega momo moni eiava kohu haida ita dadaraia. Hegeregere, elda ta ese pei bada moni gaukarana ia dadaraia, badina bema ia abia dae anina be hebou haida do ia reaia, ena ruma bese ida do ia noho momo lasi, bona ena painia gaukara do ia hadokoa. Namona be ita danu ese Baibel ena gwauhamata ita abia dae momokani, ia gwau Iehova ese ‘basileia bona iena kara maoromaoro idia tahua guna’ taudia do ia naria.​—Mat. 6:33.

⁵ Abidadama ena siahu bada iseda mauri dekenai be ma haida ese idia itaia. Momokani, tanobada ibounai dekenai iseda abidadama ena sivarai be bada. (Roma 1:8) Unai dainai, namona be ita ibounai ese iseda kara namodia amo ita hahedinaraia iseda abidadama ia mauri noho.​—Iam. 2:26.

Dahaka Ita Karaia? Buklet amo Stadi Oi Hamatamaia Toho, A?

¹ Oi diba, bema kamonai tauna ta ida Baibel oi herevalaia loulou, herevana nega sisina sibona, bona idia gwauraia buka ta oi gaukaralaia, oi ese Baibel stadi oi karaia, a? Oibe, unai be momokani, herevana iduara dekenai eiava telefon amo stadi oi karaia. Namona be May bona June lalonai do oi hekwarahi, Dahaka Ita Karaia? buklet amo stadi ta oi hamatamaia totona, ani?

² Kwalimu Totona Oi Hegaegae: Dahaka Ita Karaia? buklet oi hariharilaia neganai, oi laloa namonamo dahaka oi ura herevalaia. Bema lou henia oi karaia, nega ginigunana lalonai umui herevalaia gaudia oi laloa. Oi sibona oi nanadaia: ‘Edena paragraf buklet lalonai be namo, unai herevahereva ginigunana habadaia bona Baibel stadi hamatamaia totona? Bema ruma-ta-ruma-ta gaukara oi karaia, oi laloa edena bamona hereva ese matamata taudia, tau o hahine burukana, tau ta, eiava hahine ta ena lalona do ia veria diba. Buklet ia herevalaia gaudia oi itaia lou, bona kahana namona ta oi abia hidi. Kiki herevana oi abia hidi murinai, oi gwauraia dalana oi tohoa loulou. Unai be kwalimu dalana badana ta.

³ January 2002 Iseda Basileia Gaukara lalonai idia udaia pepana ese “Dahaka Ita Karaia? Buklet Hariharilaia Daladia” 8 ia hahedinaraia. “Maoromaoro Stadi Hamatamaia Dalana” mauana ese ia hahedinaraia edena dala ai buklet amo stadi oi hamatamaia diba. Reana unai dala ginigunana oi haidaua sisina bona oi gwau:

◼ “Oi diba miniti haida sibona lalonai, Baibel ena mai anina bada henanadai ta ena haere oi davaria diba, a? Hegeregere, dahaka dainai sibona idia gwauraia Keristani tomadiho be momo herea? Nega ta unai oi