Dahaka Ita Karaia? Buklet amo Stadi Oi Hamatamaia Toho, A?
1 Oi diba, bema kamonai tauna ta ida Baibel oi herevalaia loulou, herevana nega sisina sibona, bona idia gwauraia buka ta oi gaukaralaia, oi ese Baibel stadi oi karaia, a? Oibe, unai be momokani, herevana iduara dekenai eiava telefon amo stadi oi karaia. Namona be May bona June lalonai do oi hekwarahi, Dahaka Ita Karaia? buklet amo stadi ta oi hamatamaia totona, ani?
2 Kwalimu Totona Oi Hegaegae: Dahaka Ita Karaia? buklet oi hariharilaia neganai, oi laloa namonamo dahaka oi ura herevalaia. Bema lou henia oi karaia, nega ginigunana lalonai umui herevalaia gaudia oi laloa. Oi sibona oi nanadaia: ‘Edena paragraf buklet lalonai be namo, unai herevahereva ginigunana habadaia bona Baibel stadi hamatamaia totona? Bema ruma-ta-ruma-ta gaukara oi karaia, oi laloa edena bamona hereva ese matamata taudia, tau o hahine burukana, tau ta, eiava hahine ta ena lalona do ia veria diba. Buklet ia herevalaia gaudia oi itaia lou, bona kahana namona ta oi abia hidi. Kiki herevana oi abia hidi murinai, oi gwauraia dalana oi tohoa loulou. Unai be kwalimu dalana badana ta.
3 January 2002 Iseda Basileia Gaukara lalonai idia udaia pepana ese “Dahaka Ita Karaia? Buklet Hariharilaia Daladia” 8 ia hahedinaraia. “Maoromaoro Stadi Hamatamaia Dalana” mauana ese ia hahedinaraia edena dala ai buklet amo stadi oi hamatamaia diba. Reana unai dala ginigunana oi haidaua sisina bona oi gwau:
◼ “Oi diba miniti haida sibona lalonai, Baibel ena mai anina bada henanadai ta ena haere oi davaria diba, a? Hegeregere, dahaka dainai sibona idia gwauraia Keristani tomadiho be momo herea? Nega ta unai oi laloa, a?” Ruma tauna ia haere murinai, kahana 13 oi kehoa bona paragraf ginigunadia rua oi herevalaia. Bema nega ia hegeregere, siri ta eiava rua oi duahia bona herevalaia. Bena rau ena atai kahana dekenai ia noho henanadai ginigabena oi duahia, bona oi gwau: “Inai kahana ena orena ese tomadiho momokanina ena toana 5 ia herevalaia. Lau moale bema do lau giroa diba bona unai do ita herevalaia hebou.”
4 Oi Hekwarahi Noho: Dala ia kehoa negadia ibounai oi gaukaralaia, Dahaka Ita Karaia? buklet amo Baibel stadi oi hahedinaraia totona. Iehova oi noia, oi ia hanamoa totona. (Mat. 21:22) Oi hekwarahi noho neganai, reana sivarai namona abia dae totona ta do oi durua bena unai amo moale bada oi abia!