Matamata Taudia E—Lauma Dalanai Umui Goada Umui Lao, A?

HIDEO ese ena haisikuli negadia ia laloa lou neganai, ia gwau “Ena be Keristani heboudia dekenai lau lao, to Iehova hesiai henia urana ia noho lasi. Nega momo lau laloa, lau sibona be egu klas turadia ese idia ura henia bada bona egu turana kekeni ta ida dala dekenai ai raka loaloa. Lau tahua gaudia lau diba namonamo lasi, bona lauma dalanai lau goada totona lau ura lasi kara haida lau karaia.” Hideo bamona, matamata taudia momo be gau idauidau idia karaia kava karaia kava, mai anina bada tahua gaudia idia hagugurua eiava idia goada idia lao urana idia abia lasi.

Bema oi be matamata tauna, spot eiava oi moalelaia karana ta oi karaia neganai, reana oi moale. To, lauma gaukaradia oi karaia neganai, unai bamona moale mamina oi abia lasi. Lauma dalanai tahua gaudia ita atoa neganai, ita moalelaidia diba, a? Salamo torea tauna ena hereva mani oi laloa: “Lohiabada ena hadibaia hereva be momokani vadaeni. Idia ese aonega lasi tauna dekenai, aonega idia henia. . . . Lohiabada ena oda be diari hegeregerena. Idia ese taunimanima edia laloa idia hadiaria.” (Salamo 19:​7, 8) Dirava ena Hereva ese “aonega lasi taudia” ia hakaudia diba bena do idia aonega bona “edia laloa idia hadiaria.” Oibe, lauma gaudia dainai oi moale bada diba. To unai bamona moale mamina ita abia totona, dahaka be gau badana? Dahaka oi karaia guna be namo?

Iseda Lalona Ita Hagoadaia Dirava Ita Hesiai Henia Totona

Gau ginigunana be, iseda lalona ita hagoadaia be namo. Iuda ena king merona Iosaia mani oi laloa. Iehova ena dubu lalonai taravatu bukana idia davaria neganai, Iosaia ena hereva dainai idia duahia bona ia kamonaia gaudia ese ena kudouna idia hamarerea bada. Unai dainai, “Iosaia ese kaivakuku ibounai bona dirava koikoi edia laulau gaudia ibounai, dika rohoroho gaudia, Israela taudia edia tano dekenai idia noho gaudia, ia hadikaia ore.” (2 Sivarai 34:​14-21, 33) Dirava ena Hereva duahia karana ese Iosaia ena kudouna ia hamarerea bada dainai, tomadiho momokanina ia habadaia.

Oi danu ese Iehova hesiai henia urana oi habadaia diba, bema hanaihanai Baibel oi duahia bona oi duahia gaudia oi lalodia dobu. Unai kara ese Hideo ena lalona ia hagoadaia. Bena, Iehova ena Witnes taudia edia ful-taim haroro gaukara ia karaia painia burukana ta ia bamoa matamaia. Unai painia tadikaka be Baibel ia stadilaia momo tauna bona ia hekwarahi Baibel ena hadibaia herevadia be iena mauri lalonai ia badinaia totona. Unai painia tadikakana ena haheitalai ese Hideo ia hagoadaia bada dainai, Hideo be unai bamona ia karaia matamaia bona Iehova bona taunimanima ma haida hesiai henidia urana ia habadaia. Lauma dalanai ia goada ia lao dainai ena mauri be badina namona ai ia lao.

Dina ta ta iboudiai Baibel duahia karana ese matamata taudia edia lalona ia hagoadaia diba. Takahiro ia gwau: “Lau mahuta gwauraia negadiai bema lau lalo-parara unai dina ena Baibel duahiduahi lau do karaia lasi, vadaeni lau toreisi bona egu Baibel duahiduahi lau karaia. Unai amo Iehova ena hakaua dalana lau mamia. Dina ta ta ai Baibel duahia karana ese lau ia durua, lauma dalanai lau goada lau lao totona. Haisikuli amo lau raka-lasi murinai, maoromaoro egu lalona lau hadaia Iehova ena hesiai gaukarana lau habadaia totona, bena regula painia gaukarana lau hamatamaia. Bona lau moalelaia bada noho.”

Baibel duahia karana sibona lasi, to dahaka ese danu emui lalona ia hagoadaia diba Iehova oi hanamoa totona? Tomohiro be ena sinana ese Baibel ena hereva momokani ia hadibaia. Ia gwau: “Ela bona egu mauri lagani be 19 neganai, Life Does Have a Purpose bukana lau stadilaia namonamo murinai, Iehova ena lalokau bona Iesu ena mauri davalaia boubouna ese egu kudouna idia hamarerea. Dirava ena lalokau lau laloa bada dainai, unai ese egu lalona ia hagoadaia Iehova hesiai henia karana lau habadaia totona.” (2 Korinto 5:14, 15) Tomohiro bamona, matamata taudia momo ese sibona edia Baibel stadi idia karaia namonamo neganai, unai ese idia ia hagoadaia lauma dalanai idia goada idia lao totona.

To, bema Iehova hesiai henia urana dekenai oi dabu noho be edena bamona? Oi ia durua diba tauna ta ia noho, a? Aposetolo Paulo ia gwau: “Dirava ese . . . ura namodia bona goada umui dekenai ia henia noho, vadaeni iena ura karadia do umui karaia.” (Filipi 2:13) Bema Iehova oi guriguri henia oi ia durua totona, ia ese ena lauma helaga do ia henia haraga, unai ese oi do ia hagoadaia iena ura karadia “oi karaia” sibona lasi to danu do oi “ura” oi karaia totona. Inai ena anina be Dirava ena lauma helaga ese emu ura do ia habadaia Iehova ena hesiai gaukara dekenai oi goada totona, bona oi do ia durua lauma dalanai oi tubu totona. Gau badana be, Iehova ena siahu oi abidadama henia bona emu kudouna oi gimaia!

Oi Sibona Emu Tahua Gaudia Atoa

Bema emu lalona ibounai oi hadaia Iehova do oi hesiai henia be namo, gau badana be oi sibona emu tahua gaudia oi atoa, unai amo lauma dalanai oi goada oi lao diba. Mana, Keristani kekeni matamata ta, ia gwau: “Tahua gaudia atoa karana ese lau ia durua bada. Lau manoka lau lao lasi, to mai boga-auka ida lau goada lau lao. Lauegu tahua gaudia lau laloa noho lalonai, mai momokani ida Iehova lau guriguri henia lau ia hakaua totona, bona gau ta ese egu lalona ia koua lasi, to lau goada lau lao.”

Namona be oi karaia diba tahua gaudia namodia oi atoa. Dina ta ta lalonai Baibel ena karoa ta duahia karana be tahua gauna namona ta. Danu, hereva edia anina tahua karana oi hamatamaia diba. Haheitalai ta be inai: Iehova ena kara badadia oi stadilaia neganai, lista ta be English gado ai idia halasia Watch Tower Publications Index bukana ai ia noho, unai be inai hereva “Jehovah” bona hereva kwarana maragina “Qualities by Name” henunai oi itaia diba. Hereva idauidau 40 do oi davaria, bona oi daradara lasi, unai tahua karana ese Iehova kahirakahira dekenai oi do ia hakaua lao bona oi do ia doria iena hesiai gaukara oi habadaia totona. Oi karaia diba tahua gaudia haida be inai, Keristani heboudia ta ta lalonai haere ta oi henia bema unai kahana be helai taudia ida kikilaia hebou ena kahana, kongregesen ena hebou ta ta lalonai tadikaka ta eiava taihu ta oi dibaia, bona dina ta lalonai Iehova oi guriguri henia bona ma haida dekenai Ia oi herevalaia karana oi reaia lasi.

Bema Tiokratik Haroro Sikuli lalonai oi do vareai lasi, unai be tahua gauna namona ta oi totona. Haroro gaukara oi karaia, a? Bema lasi, reana oi ura bapatiso lasi pablisa ta ai oi lao. Dala iharuana be inai, Iehova ida emu hetura karana oi laloa namonamo bona emu mauri be Ia dekenai oi gwauhamatalaia. Matamata taudia momo idia gaukara goada edia gwauhamata idia hamomokania totona, ful-taim hesiai gaukaradia idia karaia.

Ena be mauri lalonai tahua gaudia oi atoa be namo, to kara helulu lalohadaina oi abia garina oi naria namonamo. Bema emu goada be ma haida edia danu oi hahegeregerea lasi, moale bada do oi davaria.​​—⁠Galatia 5:​26; 6:⁠4.

Reana oi laloa oiemu diba be bada lasi bona tahua gaudia oi atoa be auka. Vadaeni Baibel ena sisiba herevana oi badinaia: “Oiemu taiana do oi kehoa, aonega taudia edia hereva do oi kamonai.” (Aonega Herevadia 22:17) Oiemu tama sina eiava lo Keristani taudia ma haida edia heduru oi tahua. Momokani, tama sina bona ma haida idia laloa namonamo bona unai gauna dekenai hagoadaia hereva idia henia be namo. Ma haida ese matamata taudia totona tahua gauna idia atoa bona matamata taudia idia doria unai gauna idia tahua neganai, unai ese matamata taudia edia moale idia kokia bona danu reana tahua gaudia idia atoa ena badina be anina lasi. Unai be kekeni ta dekenai ia vara, ia gwau: “Lauegu tama sina ese lau totona tahua gaudia momo idia atoa, hegeregere Tiokratik Haroro Sikuli ai lau vareai, haroro gaukara lau karaia, bapatiso lau abia, bona painia tauna ai lau lao be namo. Lau hekwarahi bada unai tahua gaudia ta ta lau hagugurua totona. Unai tahua gauna ta lau hagugurua neganai, egu tama sina ese lau idia hanamoa lasi to tahua gauna ma ta idia gwauraia do lau hekwarahilaia totona. Unai dainai, nega momo lau mamia lau idia doria tahua gaudia lau hagugurua totona. Lau hesiku bona lau hagugurua gaudia lau moalelaia lasi.” Dahaka dainai unai hemami kererena ia vara? Unai tahua gaudia ibounai be idia namo, to ia sibona ese unai tahua gaudia ia atoa lasi. Oi kwalimu totona, namona be oi sibona emu lalona oi hagoadaia bona oi sibona totona tahua gauna ta oi atoa!

Iesu Keriso oi laloa. Tanobada ai Iesu ia mai neganai, ia diba iena Tamana Iehova be mai ena ura ia dekenai. Iesu ese Iehova ena ura be tahua gauna ta dainai ia karaia lasi, to gaukara ta ia hagugurua totona. Iesu ese ena gaukara be edena bamona ia laloa? Ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Iesu ia moale Iehova ena ura ia karaia bona iena Tamana ena ura ia hagugurudia. Ia be aniani bamona Iesu dekenai​​—⁠Iehova ena ura gaukarana ia haorea mai moale ida. (Heberu 10:​5-10) Oiemu tama sina ese oi idia hagoadaia gau ta oi karaia bona emu lalona oi hagoadaia namonamo unai do oi karaia be namo neganai, moale do oi davaria diba danu.

Kara Namona Karaia Totona, Oi Hesiku Lasi

Tahua gauna ta oi laloa neganai, oi gaukara goada unai gauna oi hagugurua totona. Galatia 6:9 ia gwau: “Kara namodia ita karaia be namo, ita hesiku lasi. Bema ita manoka lasi, nega do ia gini dae huahua do ita abia.” Oi sibona emu goada bona diba dekenai oi tabekau lasi. Koua gaudia haida do idia vara bona nega haida do oi laloa oi be hegeregere lasi. To Baibel ese ita ia hadibaia: “Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” (Aonega Herevadia 3:⁠6) Iehova ese oi do ia durua bena oi gaukara goada lauma dalanai emu tahua gaudia oi hagugurua totona.

Oibe, Iehova hesiai henia urana oi habadaia bona lauma dalanai tahua gaudia oi atoa neganai, “taunimanima ibounai ese oiemu goada do idia itaia, ia bada ia lao.” (1 Timoteo 4:15) Unai neganai Dirava hesiai henia bona mauri mai ena anina namona do oi moalelaia.

[Picture on page 4]

Iesu ese Tamana ena ura gaudia ibounai ia hagugurua

[Picture on page 5]

Baibel oi duahia bona laloa dobu karana ese oi do ia hagoadaia Iehova oi hesiai henia totona