Gwau-Edeede Kara Dikana (Wickedness)
Anina: Kara dika rohoroho. Nega momo anina be hadikaia karadia, haida be mai edia lalo-dika ida idia karaia karadia.
Dahaka dainai gwau-edeede kara dikana ia bada?
Dirava ena kerere dainai lasi. Taunimanima ginigunadia ia havaradia neganai idia goevadae, to Dirava ena taravatu idia utua bona dahaka be namo bona dahaka be dika be sibodia edia lalohadai hegeregerena idia gwauraia. (Deut. 32:4, 5; Koh. 7:29; Gen. 3:5, 6) Unai idia karaia dainai, idia be lauma dikadia edia siahu henunai idia noho.—Ef. 6:11, 12.
1 Ioane 5:19: “Satani ese tanobada taudia ibounai ia gunalaia noho.”
Apok. 12:7-12: “Guba dekenai tuari ia vara. . . . To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho. . . . ‘Guba e, bona gubai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.’ ” (Basileia ia vara murinai, Satana be guba amo idia negea diho; unai nega amo ema bona harihari hisihisi ia bada ia lao tanobada dekenai. Re 12 Siri 10 itaia.)
2 Tim. 3:1-5: “Namona be oi diba, nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea.” (Unai kara idia vara, badina lagani handred momo lalodiai taunimanima be tomadiho korikori amo idia siri dainai. Idia gwau idia be mai edia tomadiho, to Dirava ena Hereva momokani idia dadaraia. Dirava badinaia momokani karana ese taunimanima edia mauri ia hanamoa diba, to idia badinaia lasi dainai unai hahenamo idia abia lasi.)
Dahaka dainai Dirava ese ia koua lasi?
Reana nega haida ita laloa namona be Dirava ese kara dika taudia iboudiai do ia hamasedia ore. Ena be ita be lagani momo lasi lalodiai kara dika ita hisihisilaia vadaeni, to ita ura dikadika do ia ore. To kara dika be lagani 6,000 bamona lalodiai idia karaia noho dainai, Iehova Dirava ena lalona ena mamina be edena bamona? Lagani tausen momo lalodiai taunimanima ese ia idia gwauraia dika, idia gwau iena kerere dainai kara dika idia hisihisilaia. To gau be ia ese ia havaraia lasi, to Satana bona taunimanima dikadia ese. Iehova ena siahu be hegeregere kara dika taudia do ia hamasedia ore. Momokani, badina namodia dainai ia haheauka noho. Bema Iehova ese unai kara dika taudia ia kara henidia dalana be iseda lalohadai hegeregerena lasi, unai ita hoalaia lasi be namo, ani? Dirava ena diba ese taunimanima edia diba ia hanaia, bona idia lalohadailaia lasi gaudia momo be ia ese ia lalohadailaia.—Isaia 55:8, 9; Esekiel 33:17 itaia danu.
Bema Dirava ese ura-kwalimu taunimanima ia henidia lasi, gwau-edeede kara dika ia vara lasi. To Dirava ese ura-kwalimu ita ia henia dainai iseda lalona ita hadaia diba, do ita kamonai henia badina be ita lalokau henia dainai, eiava do ita gwau-edeede henia. (Deut. 30:19, 20; Ios. 24:15) Ita ura lasi unai ura-kwalimu do ita haboioa, ani? Bema ita be mai eda natudia, dahaka ita moalelaia—ita idia kamonai henia ita idia lalokau henia dainai, eiava ita fosidia dainai? Namona be Dirava ese Adam ia fosia ia kamonai henia totona, a? Bema Dirava ese ita ia fosia ita kamonai henia totona, do ita moale bada, a? Dirava ese inai tanobada oromana dikana ia do haorea lasi neganai, dala ia kehoa taunimanima edia, edia ura korikori idia hahedinaraia diba totona. Edia kara amo idia hahedinaraia idia ura momokani Dirava ena taravatu maoromaorodia idia badinadia eiava lasi. Ia gwauraia hidi vadaeni dinana do ia ginidae neganai, kara dika taudia do ia hamasedia ore.—2 Tes. 1:9, 10.
Mai ena aonega ida ia naria ela bona do ia hahedinaraia goevagoeva Satana ena samani herevadia be anina lasi. Unai samani herevadia be inai: (1) Eden dekenai Iehova ena lohia siahuna bona Iena lohia dalana ia gwauraia dika. (Gen. 2:16, 17; 3:1-5) (2) Dirava ena hesiai taudia iboudiai guba ai bona tanobada ai edia kara maoromaoro ia gwauraia dika. (Iobu 1:6-11; 2:1-5; Luka 22:31) Dirava ese gwau-edeede taudia toiosi (Satana, Adam, bona Eva) ia hamasedia ore haraga diba, to unai dala amo unai samani herevadia ia hakoikoia diba lasi. Ena be ta be mai ena siahu ida ia kwalimu diba, to unai ese ia hamomokania lasi iena kara be maoromaoro. Satana ese kara maoromaoro ia hepapahuahulaia. Dirava ia naria noho, aneru bona taunimanima ese Iena lohia dalana dadaraia karana ena huahua dikadia idia itaia diba totona, bona idia hahedinaraia diba idia be daika ena kahanai idia gini, Dirava ena o Satana ena. Dirava ese unai hepapahuahu do ia hadokoa murinai, bema aneru ta eiava taunimanima ta ese maino ia hadikaia lou gwauraia, do ia koua haraga. Guba ai bona tanobada ai, gau iboudiai do idia heau namonamo bona aneru bona taunimanima be mai edia lalo-tamona ida do idia noho totona, gau badana be Iehova ena ladana do idia hahelagaia, bona mai edia lalona ibounai ida ia do idia matauraia. (Rau 354-6 itaia danu, inai sinado badana “Satana Diabolo” henunai.)
Hereva hegeregerena: Bema hanua taudia iboudiai vairadiai tau ta ese oi ia samania koikoi, ia gwau oi ese oiemu ruma bese kwarana dagina oi gaukaralaia namonamo lasi dainai, namona be oiemu natudia ese sibodia edia lalona idia hadaia dahaka do idia karaia, ma ia gwau idia ese oi idia badinaia, lalokau dainai lasi, to edia tauanina durua gaudia oi henidia dainai, vadaeni, unai samani herevana hakoikoia dalana namona be dahaka? Oi ia samania koikoi tauna bema oi alaia mase, unai dainai hanua taudia do idia diba ia hereva koikoi, a? Lasi, ani? To, namona be dala oi kehoa oiemu natudia edia, do idia hahedinaraia oi be ruma bese kwarana namona mai emu lalokau bona mai emu kara maoromaoro, bona do idia hahedinaraia idia be oi ida idia noho badina oi idia lalokau henia dainai! Oiemu natudia haida ese oi ia samania tauna ena hereva bema idia abia dae dainai oi idia rakatania bena mauri daladia idaudia idia badinaia dainai edia mauri bema idia hadikaia, lalo-maoromaoro taudia ese unai do idia itaia neganai, do idia diba bema guna unai natu ese oiemu hereva idia badinaia unai dika idia davaria lasi.
Dirava ese gwau-edeede kara dikana ia haheaukalaia ema bona hari, unai dainai dala haida amo namo ita davaria, a?
2 Pet. 3:9: “[Iehova] ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (Iehova ia haheauka ema bona hari, unai dainai ita be mai eda dala inai do ita hahedinaraia: Iseda kara dika amo ita helalo-kerehai bona ita ura lasi sibona eda lalona ita hadaia dahaka be namo bona dahaka be dika, to ita ura iena lohia dalana maorona ita badinaia.)
Roma 9:14-24: “Dahaka do ita gwau? Dirava ena kara be maoromaoro lasi, a? Lasi momokani. . . . Dirava be inai bamona ia karaia vadaeni. Ia ura be iena badu bona iena siahu do ia hedinaraia. Unai dainai ia ese ia badu henia gaudia [kara dika taudia] dekenai ia haheauka henia ela bona do idia mase ore. Bona ia ura danu iena hairai badana do ia hedinaraia. Ia ese inai hairai haida ia henia vadaeni ita dekenai. Oibe, mai bogahisihisi danu ia ese ita ia karaia hegaegae vadaeni, iena hairai do ita abia totona. [Anina be, kara dika ia haheaukalaia noho lalonai, iena palani hegeregerena taunimanima haida ia bogadia hisi.] Badina be ia ese ita ia boiria, inai Iuda taudia sibona lasi, to umui Iuda lasi taudia danu.” (Unai hegeregerena, Dirava ese kara dika taudia ia hamasedia ore haraga lasi, to nega ia atoa, taunimanima haida do ia abidia hidi guna, guba Basileiana taudia ai do idia lao bona Keriso ida do ia hahairaidia totona. Dirava be unai bamona ia karaia neganai, taunimanima ta ia kara dika henia, a? Lasi; unai dala amo Iehova ese ena palani do ia hagugurua. Iena palani be inai: Taunimanima idauidau do ia hanamodia, bona dala do ia karaia mauri hanaihanai tanobada ena Paradaiso lalonai do idia abia totona. Salamo 37:10, 11 itaia.)
Bema Ta Ia Gwau—
‘Dahaka dainai Dirava ese gwau-edeede kara dikana ia koua lasi?’
Reana inai bamona oi haere henia diba: ‘Unai be henanadai namona. Dirava ena hesiai taudia momo mai edia kamonai be idia lalohisihisi kara dika dainai. (Hab. 1:3, 13)’ Bena reana ma oi gwau: (1) ‘To namona be ita gwau lasi Dirava ese ia koua haraga lasi badina be taunimanima ia lalodia lasi dainai. Ita ia hamaoroa vadaeni nega ia abia hidi vadaeni kara dika taudia edia davana do ia henidia totona. (Hab. 2:3)’ (2) ‘To unai nega amo do ita roho mauri totona, dahaka ita karaia be namo? (Hab. 2:4b; Sef. 2:3)’
Eiava inai bamona oi hereva diba: ‘Lau moale unai henanadai oi gwauraia dainai. Lalo-namo taudia momo be unai gau dainai idia lalohisihisi. Inai buka lalonai heduru herevadia haida idia noho; oiemu henanadai idia haerelaia. (Rau 158-61 dekenai idia noho herevadia haida umui duahia hebou.)’
‘Lagani momo herea idia ore vadaeni, unai dainai lau laloa Dirava ese kara ta do ia karaia lasi kara dika koua totona’
Reana inai bamona oi haere henia diba: ‘Lau moale badina oi laloa Dirava ia noho. Momokani, kara dika be bada herea, bona idaunegai ia matamaia. Inai oi laloa vadaeni a . . . ? (Rau 158, paragraf 2 ena hereva amo, Dirava ese kara dika ia haheaukalaia negana ena daudau oi herevalaia.)’
Eiava inai bamona oi hereva diba: ‘Lau laloa inai hereva oi abia dae diba: Bema ta ia hegeregere ruma ta do ia haginia, unai ruma ia hagoevaia diba danu, ani? . . . Dirava ese tanobada ia karaia dainai, ia hagoevaia be auka lasi. Vadaeni, dahaka dainai ia kara haraga lasi? Mani unai henanadai ena haere namona oi kamonaia, bena lau oi hamaoroa emu lalohadai be dahaka. (Rau 158-61 dekenai idia noho herevadia umui duahia hebou.)’