Sabskripsen Bona Magasin Abia Lao Hanaihanai Karana amo “Basileia Ena Uhe Hadoa”
1 Ane amo Iehova Hanamoa bukana lalonai, ane namba 133 ena ladana be “Basileia Ena Uhe Hadoa.” Ena hereva be Iesu ena haheitalai ta amo idia abia, ia ese hahediba taudia halaoa gaukarana be uhe hadoa gaukarana ida ia hahegeregerea. (Mat. 13:4-8, 19-23) Unai ane ena hereva idia gwau: “Emu gaukara karaia./Hereva momokani ena uhe tano namonai hadoa.” Edena bamona iseda haroro gaukara ena anina ita habadaia diba? Sabskripsen ita hariharilaia gaukarana amo, bona magasin idia ura idia abia hanaihanai taudia ita tahua bona hanaihanai idia dekenai ita lao.
2 Sabskripsen Oi Hariharilaia mai Lalo-Goada Ida. Oi hegaegae nega idauidau ai sabskripsen oi hahedinaraia totona. Andaman Islands dekenai, kongregesen ta lalonai, pablisa ta ta ibounai be mai edia tahua gauna, pura ta ta ai sabskripsen tamona idia henia totona. Hebou dekenai sabskripsen idia henia pablisa taudia idia henanadai henia. Hua tamona lalonai, unai kongregesen maragina ese sabskripsen 150 idia henia, guna unai namba idia abia lagani rua mai kahana ta lalonai!
3 Edena bamona unai ita karaia diba? Japan dekenai taihu ta be ena lalona ia hadaia iena ruma ai idia mai taudia ibounai dekenai, sitoa ai idia gaukara to idia bisi lasi taudia dekenai, bona ena turadia ia vadivadi henia neganai, sabskripsen do ia hariharilaia. Unai ia karaia dainai, ia ese sabskripsen 72 ia hariharilaia. Ruma ta ruma ta gaukara oi karaia neganai, reana taunimanima ta do oi davaria bona do ia gwau: “Hanaihanai umui emui magasin lau duahia.” Oi hahedinaraia edena dala ai magasin ta ta ibounai ia abia diba ena pos opesi mauana dekenai. Oi giroa lou neganai, sabskripsen dalana amo magasin ia abia hanaihanai ena namo ia dekenai oi hahedinaraia. Taunimanima momo idia diba lasi unai dala namona amo magasin idia abia diba. Magasin do ia abia lasi ena pos opesi mauana dekenai ela bona hua toi murinai dainai, oi hamaoroa bema ia hegeregere do oi giroa lou magasin matamatadia oi henia totona ela bona sabskripsen ia mai.
4 Nega haida taunimanima idia ura lasi sabskripsen idia abia, to mai moale ida magasin matamatadia do idia abia. Magasin abia lao hanaihanai karana amo, inai gau namodia do oi karaia diba. (1) Pura rua ibounai kamonai tauna oi vadivadi henia neganai ia ida turana karana namona oi havaraia. (2) Kamonai tauna be hanaihanai Gima Kohorona bona Awake! magasin lalonai taunimanima hamauria sivaraina do ia abia. (3) Emui herevahereva amo unai tauna oi durua diba Baibel ena hereva momokani ia ura henia totona, bena do ia ura Baibel stadi ia abia.—1 Pet. 2:2.
5 Magasin Abia Lao Hanaihanai Karana Hamatamaia Dalana: Taunimanima be magasin idia ura neganai, oi hamaorodia magasin ta ta ibounai lalonai hereva namodia idia noho bona pura rua rua ibounai mai moale ida idia dekenai do oi abia lao. Kamonai tauna oi rakatania murinai, ena ladana bona adres, deit, magasin edia deit, edena hereva oi hahedinaraia, bona kamonai tauna ese edena hereva ia ura henia, oi torea.
6 Unai bamona oi karaia matamaia diba ena be taunimanima haida sibona dekenai magasin oi abia lao loulou. Bena gabeai oi amo magasin idia abia loulou taudia ma haida do oi davaria. Edena magasin bona edena negai oi hariharilaia oi torea namonamo. Emui herevahereva bona kamonai tauna oi vadivadi henia lou neganai edena dala ai ena kamonai urana hereva momokani dekenai oi habadaia diba oi torea danu.
7 Bisinesi Bona Gaukara Taudia Danu: Sitoa idia naria taudia bona gaukara taudia ma haida be reana magasin do idia abia hanaihanai. Elda ta be kaunsolo gunalaia tauna ta dekenai hanaihanai magasin ia abia lao. Pablisa ta be ruma haginia gaudia hoihoilaia kampani ena biaguna, ena mauri lagani be 80 tauna, ida stadi ia hamatamaia. Unai be lagani 10 ia dekenai magasin ia abia lao loulou murinai!
8 Lou Henia Oi Karaia: Magasin matamata oi abia neganai, ena hereva ibounai oi duahia. Oi amo magasin idia abia hanaihanai taudia ta ta idia laloa bada herevadia oi tahua. Oi giroa lou neganai, inai bamona oi hereva diba: “Inai hereva lau duahia neganai, lau laloa reana do oi ura duahia.” Natuna maragina ta be inai bamona ia hereva diba: “Lau moale oi lau itaia lou dainai. Emu Gima Kohorona bona Awake! magasin idia noho. Lau laloa inai hereva ena ladana be . . . do oi ura duahia.” Magasin matamata do idia ura duahia totona unai maua ladana “Gabeai Gauna” oi hahedinaraia. Nega ta ta ibounai taunimanima ta dekenai magasin oi abia lao neganai, lou henia ta oi torea diba. Laloaboio lasi iseda tahua gauna be unai lou henia dekenai Baibel stadi do ita hamatamaia.
9 Magasin Idia Abia Hanaihanai Taudia Oi Vadivadi Henia Hanaihanai: Magasin idia abia hanaihanai taudia oi vadivadi henia nega namodia ai—dabai, adorahi ai, hanuaboi ai, eiava Saturday o Sunday ai ruma ta ruma ta gaukara oi karaia murinai. Bema unai taudia oi vadivadi henia diba lasi, badina oi gorere eiava gabu ta dekenai oi lao laga-ani oi abia totona, ma pablisa ta oi nanadaia bema magasin ia abia lao diba. Bena nega korikori ai unai taudia be edia magasin do idia abia.
10 Basileia uhe oi hadoa daladia rua be Gima Kohorona bona Awake! sabskripsen oi hariharilaia bona magasin idia ura idia abia hanaihanai taudia oi tahua bona hanaihanai idia dekenai oi lao. Baibel ena hereva momokani idia dekenai oi hadibaia neganai, reana idia be Basileia ena hereva do idia lalo-pararalaia bena oi ida Basileia ena anina do idia havaraia.—Mat. 13:8, 23.