Emu Haroro Dalana Oi Hanamoa Noho
1 Iseda guba Tamana ia moale bema ena hesiai taudia be hereva momokani lalonai idia goada idia lao. Anina be, idia ese sivarai namona harorolaia gaukarana idia manadalaia danu. Paulo be elda tauna Timoteo ia hagoadaia gaukara namona ia karaia noho totona, unai amo taunimanima ibounai ese iena goada do idia itaia, ia bada lao noho. (1 Tim. 4:13-15) Herevana pablisa ta be haroro gaukara ia manadalaia, to namona be ita ibounai ita hekwarahi iseda haroro dalana ita hanamoa totona.
2 Tahua Gaudia Ita Atoa: Haroro dalana ita hanamoa totona, tahua gaudia ita atoa be namo. Dahaka tahua gaudia ita atoa diba? Reana lauma helaga ena tuari kaia, Baibel unai, ita gaukaralaia namonamo be namo. (Efe. 6:17) Eiava haroro gaukara ena kahana ta ita hanamoa be namo—hegeregere dala haroro, telefon haroro, o bisinesi teritori dekenai haroro karana. Eiava lou henia karaia namonamo dalana ita hanamoa diba. Dala namona ma ta be, ita ura Baibel stadi ta ita hamatamaia o karaia dalana do ita hanamoa.
3 Heduru Ita Abia Dalana: Kongrigeisen heboudia, hegeregere Tiokratik Haroro Sikuli bona Hesiai Hebou be ita do idia durua iseda haroro dalana ita hanamoa totona. Bema ita gaukara goada unai hebou totona ita hegaegae, hebou ita lao bona ita kamonai herevadia ita badinaia, vadaeni namo bada do ita davaria.—2 Kor. 9:6.
4 Danu, namona be ita ta ta ita durua, iseda haroro dalana ita hanamoa totona. (Aon. 27:17) Ita bamoa tauna ena haroro herevana ita kamonai namonamo karana ese ita do ia durua eda haroro gaukara ita hanamoa totona. Ma danu, iseda Kongrigeisen Buka Stadi naria tauna ese dala ia karaia diba heduru ita abia totona. Haroro ia manadalaia painia tauna o pablisa tauna ma ta ese ita ia durua eda haroro dalana ita hanamoa bona haroro gaukara ita moalelaia be hahenamo badana! Iseda buka stadi grup lalonai pablisa matamata ta ia noho, a? Namona be ia ita noia haroro gaukara lalonai ita gaukara hebou totona.
5 Hari inai negai, Keristani haroro gaukarana be mai anina bada. Unai gaukara amo Iehova ita hanamoa neganai, ita ura eda kudouna ibounai ida unai gaukara ita karaia. (Heb. 13:15) Bema ita hekwarahi iseda haroro dalana ita hanamoa totona, ‘vadaeni ita ese hereva momokani do ita hadibaia maoromaoro, bona Dirava ena vairanai do ita hemarai lasi.’—2 Tim. 2:15.