Lauma Dalanai Tahua Gaudia Oi Atoa
1 Ita ese Iehova do ita hanamoa ela bona hanaihanai be hahenamo badana! Unai tahua gauna do ita hagugurua totona, hari tahua gaudia ma haida ita atoa diba bona do ita gaukara goada idia ita hagugurua totona. Unai amo aonega dalanai eda goada ita gaukaralaia. (1 Kor. 9:26) Edena tahua gaudia oi hagugurua diba?
2 Baibel Stadi: Kongregesen heboudia ibounai totona oi hegaegae, a? Bema oibe, oi stadi lalonai nega oi atoa tahua karana oi karaia bona oi laloa dobu totona, a? Hegeregere, pura iboudiai Gima Kohorona Stadi bona Kongregesen Buka Stadi totona oi hegaegae neganai, haere oi makaia sibona eiava idia gwauraia siridia oi duahia bona idia gwauraia herevadia edia badina oi laloa danu, a? Pura ta ta ai Tiokratik Haroro Sikuli totona idia makaia Baibel duahiduahi kahana amo hereva haida dekenai diba ma haida oi tahua be emu tahua gauna ai oi atoa diba, a? Lauma dalanai unai bamona oi geia totona nega do oi atoa bona do oi hekwarahi, to unai gaukara amo namo bada do oi abia.—Aon. 2:4, 5.
3 Kongregesen Heboudia: Tahua gauna ma ta be kongregesen hebou iboudiai faiv do oi lao henia hanaihanai. Emu tadikaka ida oi herevahereva bona ane bona guriguri ginigunana lalonai oi vareai totona oi mai haraga karana amo kongregesen ena namo oi habadaia. Reana hebou iboudiai dekenai ita haere toho bona eda haere ita hanamodia be namo. Reana paragraf lalonai ia noho siri ese umui herevalaia gauna ia durua dalana eiava umui herevalaia gauna ena anina dina ta ta maurina dekenai oi gwauraia diba.—Heb. 10:24, 25.
4 Haroro Gaukara: Tahua gaudia atoa karana ese iseda hesiai gaukara ia hanamoa bada. Hua ta ta lalonai haroro gaukara oi karaia horadia dekenai tahua gauna ta oi atoa vadaeni, a? Unai ese haida ia durua. Eiava emu hesiai gaukara ena kahana ta oi hanamoa diba, reana ruma-ta-ruma-ta gaukarana lalonai Baibel oi gaukaralaia toho, anina namona idia havaraia lou henia oi karaia toho, Baibel stadi oi hamatamaia toho, eiava stadi lalonai emu hadibaia gaukarana oi hanamoa toho, a?
5 Tama sina e, emui natudia umui hagoadaia Iehova ena hesiai gaukara lalonai tahua gaudia do idia atoa, a? Namona be idia umui durua bena idia itaia, regula painia gaukara be Iehova laloa bada karana ena dobu idia hahedinaraia dalana namona.—Had. 12:1.
6 Sibona eda gaukara ita laloa, lauma dalanai tahua gaudia ita atoa, bona idia ita hagugurua totona ita hekwarahi neganai, iseda hesiai gaukara lalonai moale bada do ita davaria bona ma haida ita hagoadaia diba.—Roma 1:12.