Iesu Ena “Aena Gabudia Dekenai Do Umui Raka”
1 Iesu be Iuda ena diba bada taudia edia sikuli ta dekenai ia lao lasi, to ia be Haroro Tauna hereadaena. Ita moale badina Iesu ena haroro sivaraidia be Baibel lalonai idia noho, bona unai sivarai amo heduru ita abia diba. Haroro taudia namodia ai ita lao totona, Iesu ena ‘aena gabudia dekenai do ita raka’ be namo.—1 Pet. 2:21.
2 Taunimanima Lalokau Henidia: Iesu be taunimanima ia lalokau henia bada. (Mar. 6:30-34) Eda teritori ai momo be idia “hisihisi noho” bona hereva momokani idia kamonai be namo. (Roma 8:22) Bema edia metau bona Iehova ese idia ia lalokau henia karana ita laloa, unai ese ita do ia doria haroro gaukara ita karaia noho totona. (2 Pet. 3:9) Ma danu, bema taunimanima idia itaia ita be edia namo ita laloa bada, vadaeni idia be iseda haroro herevana do idia kamonai.
3 Nega Bona Gabu Idauidau ai Haroro: Iesu be nega bona gabu idauidau ai sivarai namona be haida dekenai ia harorolaia. (Mat. 4:23; 9:9; Ioa. 4:7-10) Unai hegeregerena, ita ura ita hegaegae dina ta ta ai iseda gaukara idauidau ita karaia neganai, ma haida dekenai hereva momokani ita herevalaia. Haida be Baibel, buka, magasin o pepapepa idia abia loaloa danu, unai amo gaukara gabunai, sikuli gabunai, bona idia loaloa neganai, ma haida dekenai idia haroro diba.
4 Basileia Harorolaia Momo: Iesu be Basileia ena sivarai namona ia harorolaia momo. (Luka 4:43) Herevana iseda hamatamaia herevana lalonai maoromaoro Basileia ita herevalaia lasi, to ita laloatao ita ura ruma tauna ita durua ia itaia Basileia do ia mai be gau badana. Ena be ruma tauna dekenai tanobada ai idia vara gau dikadia, nega dokona ena toana unai, ita gwauraia, to gau badana be Basileia ena “Sivarai Namona” ita herevalaia badabada.—Roma 10:15.
5 Baibel Gaukaralaia Momo: Iesu be ena haroro gaukara lalonai Dirava ena Hereva ia gaukaralaia momo. Ia sibona ena ura herevadia ia gwauraia lasi. (Ioa. 7:16, 18) Iesu be Dirava ena Hereva ia duahia, bona ia be siri ia gaukaralaia Satani ena hedibagani ia hanaia totona. (Mat. 4:1-4) Bema ita ura taunimanima ita hadibaia namonamo, namona be dina ta ta ai Baibel ita duahia bona ita badinaia. (Roma 2:21) Haroro gaukara ai haida edia henanadai ita haerelaia neganai, namona be Baibel siridia amo iseda haere ita hamomokania, bona bema mai dalana, Baibel amo siri ita duahia hedinarai. Ita ura ruma tauna ia itaia ita be eda lalohadai ita herevalaia lasi, to Dirava ena lalohadai ita hahedinaraia.
6 Oi Hadibaia Taudia Edia Kudouna Oi Veria: Hahelaga taudia bona Farisea taudia be hesiai taudia idia nanadaia dahaka dainai Iesu idia hakaua mai lasi neganai, hesiai taudia idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” (Ioa. 7:46) Iesu be taunimanima ia hadibaia neganai, kamonai taudia edia kudouna ia hamarerea. (Luka 24:32) Iesu be ena parabole o haheitalai lalonai taunimanima idia diba gaudia ia herevalaia, taunimanima ese ena hereva ena anina idia lalopararalaia totona. (Mat. 13:34) Iesu be kamonai taudia dekenai gau momo herea ia herevalaia lasi. (Ioa. 16:12) Iesu be ena ladana ia abia isi lasi, to Iehova ena ladana ia abia isi. Iesu bamona, hadibaia taudia namodia ai ita lao diba bema eda “hadibaia hereva” dalana ita naria namonamo.—1 Tim. 4:16.
7 Dagedage Bona Kamonai Lasi Taudia Huanai Oi Haheauka: Ena be Iesu be hoa karadia momo ia karaia, to momo be Iesu ena hereva idia kamonai lasi. (Luka 10:13) Danu, Iesu ena famili taudia idia gwau Iesu be “ia kavakava.” (Mar. 3:21) To, Iesu ia haheauka. Ia abia dae ia hadibaia hereva momokanidia ese taunimanima ia durua diba dainai, ia ese ena haroro gaukara ia hadokoa lasi. (Ioa. 8:32) Iehova ena heduru dainai, ita danu be do ita hesiku lasi.—2 Kor. 4:1.
8 Haroro Gaukara Totona, Gau Haida Oi Dadaraia: Iesu be haroro gaukara totona, gau namodia ia dadaraia. (Mat. 8:20) Ia hesiku lasi, bona nega haida ia haroro ela bona dina ia diho. (Mar. 6:35, 36) Iesu ia diba ena gaukara be mai ena dokona. “Nega be kwadogi” dainai, Iesu ia karaia bamona, namona be gau haida ita dadaraia, to eda nega, goada, kohu bona moni ita gaukaralaia sivarai namona ita harorolaia totona.—1 Kor. 7:29-31.
9 Aposetolo taudia edia negai idia noho taudia be Iesu idia tohotohoa dainai, idia be haroro taudia namodia ai idia lao. (Kara 4:13) Ita danu be haroro gaukara ita karaia namonamo diba bema iseda Haroro Tauna hereadaena ita tohotohoa.—2 Tim. 4:5.
[Study Questions]
1. Edena dala ai haroro taudia namodia ai ita lao diba?
2. Dahaka ese ita do ia durua Iesu bamona taunimanima ita lalokau henia totona?
3. Edena negai Iesu be ma haida ia haroro henia?
4. Edena dala ai Basileia ena sivarai namona ita harorolaia momo?
5. Haroro gaukara ai anina namona ita havaraia totona, Baibel be edena bamona do ita gaukaralaia?
6. Edena dala ai Iesu be kamonai taudia edia kudouna ia veria?
7. Dahaka dainai Iesu be haroro lalonai ia haheauka?
8, 9. Edena dala ai Iesu bamona sivarai namona totona gau haida ita dadaraia?