Hari be Haroro Negana!
1 “Dirava do umui gari henia, ia do umui hanamoa bada.” Aneru edia hakaua henunai, unai hereva be “bese ibounai, iduhu ibounai, gado ibounai bona kopina idauidau ibounai taudia” dekenai idia harorolaia. Dahaka dainai? “Badina be Dirava ese taunimanima ibounai do ia kota henia ena nega ia ginidae vadaeni.” Hari, ita be “kota henia ena nega” lalonai ita noho, bona ena dokonai inai tanobada oromana dikana be Dirava ese do ia hadikaia ore. Gau badana be taunimanima ese ‘guba bona tanobada, bona davara, bona ranu guridia ibounai ia karaia Diravana do idia tomadiho henia.’ “Noho hanaihanai Sivarai Namona” ita harorolaia be mai anina bada bona ita karaia haraga, ia be hari taunimanima ese idia karaia gaukaradia ibounai ia hereaia. Oibe, hari be haroro negana!—Apok. 14:6, 7.
2 Idia hanaia lagani ten lalodiai, Iehova ena hesiai taudia ese hora 12 bilioni bamona be haroro bona hahediba taudia halaoa gaukarana lalonai idia gaukaralaia. Momo be edia noho dalana idia haidaua, unai amo lauma dalanai haboua gaukarana idia habadaia diba. (Mat. 9:37, 38) Hegeregere, lagani 2008 ai, hua ta ta ai, pablisa taudia 1,000,000 mai kahana be painia gaukara idia karaia. Bona regula painia taudia be hua ta ta ai haroro gaukara ai hora 70 idia gaukaralaia. Heduru painia be hora 50 idia gaukaralaia.
3 Painia Gaukara Karaia Dalana: Painia taudia idia diba “nega be kwadogi” dainai, edia mauri lalonai gau momo idia tahua lasi. (1 Kor. 7:29, 31) Dala idia tahua gau momo idia hoia lasi totona, unai amo edia nega bada idia halusia kava lasi moni gaukara idia karaia totona. Hegeregere, haida be ruma maragidia dekenai idia noho. Ma haida be anina lasi kohudia idia kokia. (Mat. 6:19-21) Nega momo, idia be sibona edia tahua gaudia haida idia dadaraia danu. Unai ibounai idia karaia, badina idia ura bada haroro gaukara dekenai edia nega bada do idia gaukaralaia. (Efe. 5:15, 16) Pablisa momo be idia haheauka, sibona edia ura idia dadaraia, bona Iehova dekenai idia guriguri dainai, sediual namona ta idia karaia bona idia painia diba.
4 Painia gaukara oi karaia diba, a? Painia taudia goadadia oi noia, painia gaukara oi karaia dalana be oi dekenai idia hadibaia totona. Haroro gaukara dekenai idia oi bamoa, bona edia moale oi mamia. Iseda buka lalodiai painia gaukara idia herevalaia kahana oi duahia be namo. Tahua gaudia namodia oi atoa, unai ese oi ia durua diba painia gaukara oi karaia totona. Bema gau haida be oiemu painia gaukara idia koua toho, vadaeni guriguri amo Iehova dekenai unai oi gwauraia hedinarai be namo, bona oi noia oi ia durua unai oi hamaoromaoroa totona.—Aon. 16:3.
5 Hahenamo Bona Moale: Painia gaukara be Baibel ita gaukaralaia namonamo dalana ia hanamoa, bona unai be moale bada ia mailaia. Painia taihu matamata ta ia gwau: “Dirava ena Hereva momokani ia hadibaia maoromaoro diba be hahenamo badana ta. Oi be painia gaukara oi karaia neganai, Baibel oi gaukaralaia momo. Hari ruma-ta-ruma-ta gaukara lau karaia neganai, ruma taudia ta ta totona siri maorodia lau laloatao diba.”—2 Tim. 2:15.
6 Painia gaukara ese danu ita ia hadibaia eda mauri ita hanamoa daladia ita diba totona. Unai gaukara ese matamata taudia ia durua diba edena bamona edia nega idia haria namonamo, moni idia gaukaralaia, bona taunimanima ida idia noho namonamo totona. Momo be painia gaukarana dainai edia mauri lalonai lauma gaudia idia laloa bada. (Efe. 4:13) Ma danu, painia taudia be nega momo Iehova ese idia ia durua dalana idia itaia.—Kara 11:21; Fili. 4:11-13.
7 Painia gaukara ena hahenamo hereadaena ta be inai: Ita ia durua Iehova kahirakahira ita lao totona. Hahetoho lalonai ita ia hagoadaia diba. Taihu ta be nega daudau lalonai metau bada ia haheaukalaia bona ia gwau: “Painia gaukara lalonai Iehova lau tura henia karana ese lau ia durua unai ibounai lau haheaukalaia totona.” Ma ia gwau: “Lau moale bada badina egu mauri lau gaukaralaia Iehova lau hesiai henia hanaihanai totona. Unai ese lau ia durua sibona lau henia totona, ena be lau laloa lau hegeregere lasi negadia ai danu.” (Kara 20:35) Ita danu be hahenamo momo ita abia bema mai anina bada haroro gaukarana ita karaia.—Aon. 10:22.
[Study Questions]
1. Dahaka dainai hari be haroro negana?
2. Edena dala ai Iehova ena hesiai taudia ese idia hahedinaraia hari be karaharaga negana?
3. Nega momo pablisa haida be dahaka idia karaia idia painia totona?
4. Bema oi ura painia gaukara oi karaia, dahaka dala namodia oi abia hidi be namo?
5. Edena dala ai painia gaukara ese ita ia durua iseda haroro gaukara ita hanamoa totona?
6. Edena dala ai painia gaukara ese ita ia durua?
7. Edena dala ai painia gaukara ese ita ia durua Iehova kahirakahira ita lao totona?
This is a repeat of article in km 8/05 taken from km-E 8/05 “Now Is the Time to Preach!”