Kara Namo Taudia Tahua
1. Edena dala ai ita hahedinaraia haroro gaukara ita laloa bada?
1 Iesu be haroro gaukara ia karaia neganai, mai ena ura bada ida manau taudia dekenai sivarai namona ia harorolaia. (Isa. 61:1, 2) Hari inai negai, ita be Keriso ena hereva gwauraia hedinarai taudia dainai, namona be ita hesiku lasi bona kara namo taudia ita tahua noho.—Mat. 10:11; 2 Kor. 5:20.
2. Edena dala ai Paulo be ena haroro daladia ia haidaua, bona dahaka ia vara?
2 Haroro Daladia Haidaua: Aposetolo Paulo be Iuda taudia edia dubu dekenai ia lao bona Iuda bona idau bese taudia ia haroro henia. (Kara 14:1) Filipi ai, Paulo bona Sila be ‘guriguri gabuna’ dekenai taunimanima idia tahua idia haroro henidia totona. Hahine oreana ta idia haroro henia matamaia, bona idia amo hahine ta be hereva momokani ia abia dae, unai be Lidia.—Kara 16:12-15.
3. Edena bamona gabudia ai ita haroro danu?
3 Ruma-ta-ruma-ta gaukara sibona lasi, to PMV naria gabudia, peleini gabudia, wof, maketi, loaloa gabudia, gaukara taudia edia opesi, taunimanima idia lao bona idia mai gabudia, bisinesi gabudia bona sitoa ai oi davaria taudia oi haroro henidia, a? Reana magu aukadia eiava sekiuriti ese idia gimaia namonamo gabudia ai idia noho taudia be revareva eiava telefon amo oi haroro henia diba. Emu teritori ai taunimanima edia noho daladia hegeregerena ai emu haroro daladia oi haidaua neganai, unai ese dala ia kehoa ‘nega ibounai Lohiabada ena gaukara do oi karaia goadagoada’ totona.—1 Kor. 15:58.
4. Bema iseda teritori be bada lasi, edena dala ma haida amo eda haroro gaukara ita habadaia diba?
4 Pablisa taudia momo be dala idia karaia kongrigeisen ma ta dekenai idia lao, unai amo edia haroro gaukara idia habadaia diba. Nega haida gado ma ta idia dibaia be namo. Haida be gado ma ta idia dibaia, unai amo tano ma ta amo idia mai taudia idia haroro henia diba.
5. Hari ita noholaia negana be edena bamona ita laloa, bona iseda lalona ita hadaia dahaka ita karaia totona?
5 Namona be ita laloatao, “uma be tanobada.” (Mat. 9:37; 13:38) Inai tanobada ena dokona be ia kahirakahira dainai, ita ta ta ese ita karaia gaudia ita laloa namonamo, haroro gaukara totona eda diba ita habadaia, bona dala ia kehoa neganai iseda haroro gaukara ita habadaia be namo. Bema ita ese Basileia ita atoa guna, Iehova be iseda haroro gaukara do ia hanamoa.—Mat. 6:33.