Iehova Hesiai Henia mai Kudou Moalena Ida

“Inai hadikaia herevadia iboudiai be umui latanai do idia diho . . . badina Iehova emui Dirava hesiai henia gaukarana be mai emui kudou moalena ida umui karaia lasi dainai.”​—DEUTERONOMI 28:​45-47.

1. Herevana idia be edeseniai, dahaka ese ia hahedinaraia Iehova ena hesiai gaukara idia karaia taudia idia moale?

HEREVANA guba dekenai eiava tanobada dekenai iena ura idia karaia, Iehova ena hesiai taudia idia moale. “Daba hisiudia,” aneru unai, be tanobada havaraia negana ai mai moale ida idia boiboi, bona ita daradara lasi, guba anerudia milion tausen momo ese ‘Dirava ena hereva idia badinaia’ mai edia moale ida. (Iobu 38:​4-7; Salamo 103:20) Guba dekenai Iehova ena Natuna tamona be mai moale ida ia be ‘gaukara diba momo tauna,’ bona tanobada dekenai ia mai neganai Iesu Keriso be tau ta bona Dirava ena ura ia karaia neganai ia moale. Ma danu, “ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai.”​—Hereva Lada-isidia 8:​30, 31; Heberu 10:​5-10; 12:2.

2. Israel taudia ese hahenamo eiava dika idia davaria ena badina be dahaka?

² Israel taudia ese Dirava idia hamoalea neganai, idia danu idia moale. To bema idia gwau-edeede neganai edena bamona? Ia sisiba henidia, ia gwau: “[Inai hahedika] be toa bona hoa gaudia ai do idia lao umui dekenai bona emui garana dekenai ela bona hanaihanai. Iehova emui Dirava umui hesiai henia neganai mai kudou moalena ida umui karaia lasi bona umui davaria gaudia dainai umui moale lasi; unai dainai, Iehova ese inai taudia do ia siaidia, umui do idia tuari henia totona. Edia hesiai gaukara do umui karaia, do umui hitolo bona ranu mase, dabua ai do umui dabu, gau iboudiai dekenai do umui dabu; auri gaudia be emui aiona dekenai do ia atoa ela bona umui do ia alaia ore.” (Deuteronomi 28:​45-48) Hahenamo eiava dika idia davaria ese ia hahedinaria daika be Iehova ena hesiai taudia bona daika be iena hesiai taudia lasi. Unai dika idia davaria ese danu idia hahedinaraia Dirava ia gwauraia mauri taravatudia bona ena ura ita lalodia maragi diba lasi, eiava ita gwauraidia dika diba lasi danu. Israel taudia ese Iehova ena sisiba, edia hanua do idia dika bona idau gabu ai idia abidia lao herevana unai, be idia dadaraia dainai, Ierusalem be ‘tanobada besedia iboudiai vairanai, dika gauna’ ai do ia lao. (Ieremia 26:6) Unai dainai Dirava ita kamonai henia bona ena lalo-namo henia karana ita moalelaia. Dirava badinaia taudia ese idia abia hahenamodia momo amo moale be hahenamo ta.

‘Mai Kudou Moalena’ ida Hesiai Dalana

³ Israel taudia ese Iehova ena hesiai gaukara idia karaia ‘mai edia moale ida bona mai kudou moalena ida danu’ be namo. Hari inai negai Dirava ena hesiai taudia be unai bamona idia karaia danu be namo. Ita moale ena anina be “ita lalo-namo momokani; moale amo iseda lalona ia honu.” Ena be Revareva Helagadia ese iseda kudou korikorina ia gwauraia, to unai kudou be ia lalohadai eiava ia laloa namonamo diba lasi. (Esodo 28:30) Iena gaukara badana be rara ia siaia tauanina ena sel iboudiai ubudia totona. To nega momo Baibel lalonai unai hereva “kudou” be gau ta ia laulaulaia kudouna; ia be lalokau, ura, bona aonega edia badina, to unai sibona lasi. Taunimanima haida idia gwau ia be “taunimanima edia lalona, bona taunimanima ia doria urana ena kara idauidau dekenai, ena ura badadia, ena lalokau, ena mamina gau haida dekenai, ena ura dikadika, ena lalohadai, ena lalo-parara, do idia vara gaudia ia lalodia neganai, ena aonega, ena diba, ena aonega karadia, ena abidadama, bona gau haida edia anina ia tahua, gau haida ia laloa tao, bona ena mauri ena hemami.” (Journal of the Society of Biblical Literature and Exegesis, 1882, rau 67) Iseda laulau kudouna dekenai iseda hemami bona ura idia noho, iseda moale danu.​—Ioane 16:22.

4. Mai iseda kudou moalena ida Iehova ena hesiai gaukara karaia totona, dahaka ese ita ia durua?

⁴ Dahaka ese ita ia durua Iehova ita hesiai henia mai kudou moalena ida totona? Bema Dirava ese ita ia henia hahenamo bona gaukara be mai moale ida ita lalodia bona ita goadalaia, unai ese ita ia durua. Hegeregerena, ita ese Dirava momokanina ‘ena hesiai gaukara helagana’ ita karaia ena hahenamo be mai moale ida ita laloa lou. (Luka 1:74) Bona danu, Iehova ena ladana ita huaia badina iena Witness taudia ai ita lao be hahenamo ta. (Isaia 43:​10-12) Unai dekenai ma gau ta ita atoa, unai be ita moale badina ita diba Dirava ena hereva ita badinaia neganai, ia ita hamoalea. Lauma diarina ita hahedinaraia be moale bada gauna, badina taunimanima momo ita durudia dibura amo idia raka lasi dainai!​—Mataio 5:​14-16; 1 Petero 2:9 itaia danu.

5. Dirava amo ia mai moalena ia havaraia gauna be dahaka?

⁵ To, ita gwau lasi ita lalo-goada dainai ita be mai kudou moalena ida Iehova ena hesiai gaukara ita karaia. Momokani, iseda lalona ia goada be mai ena namo. To, Dirava amo ia mai moalena be iseda kara ita hanamoa toho karana amo ia vara lasi. Unai moale be Iehova ena lauma huahuana ta. (Galatia 5:​22, 23) Bema unai moale ita abia lasi, reana namona be iseda mauri ita haidaua bona Baibel ese ia taravatua lalohadai eiava kara ita dadaraia, badina unai gaudia ese Dirava ena lauma ia hahisia. (Efeso 4:30) To, namona be ita Iehova badinaia taudia, ita laloa lasi bema nega haida kudou dekenai ita moale lasi unai ese ia hahedinaraia Dirava ese ita ia moale henia lasi. Ita be goevadae lasi taudia bona hisihisi, lalohisihisi, bona lalo-metau nega haida ita davaria, to Iehova be iseda manoka ia diba. (Salamo 103:​10-14) Unai dainai ita guriguri lauma helaga ita abia totona, bona ita laloatao ena huahua, moale, be Dirava ena amo. Iseda lalokau guba Tamana ese unai guriguri do ia haere henidia bona unai amo iena hesiai gaukara do ita karaia mai iseda kudou moalena ida.​—Luka 11:13.

Moale Ia Noho Lasi Neganai

⁶ Bema iseda hesiai gaukara dekenai moale ia noho lasi, Iehova hesiai henia karana dekenai reana iseda goada do ia maragi ia lao eiava do ita badinaia lasi. Unai dainai, aonega dalana be mai iseda manau bona mai iseda guriguri ida ita karaia gaudia edia badina ita tahua, bona iseda kara ita hamaoromaoroa. Bema ita ura Dirava amo moale ita abia, namona be Iehova ena hesiai gaukara ita karaia lalokau dainai bona mai iseda kudou, souli, bona darana iboudiai ida. (Mataio 22:37) Namo lasi ita ese hesiai gaukara ita karaia ma tadikaka ta ita hanaia totona, badina Paulo ia gwau: “Lauma Helaga ese ita dekenai mauri ia henia vadaeni, unai dainai ia ese iseda mauri ia biagua be namo. Ita hekokoroku lasi, ita ta ta ita habadua lasi, bona ita ta ta dekenai kohu totona ita mama henia lasi.” (Galatia 5:​25, 26) Bema hesiai gaukara ita karaia haida ita hanaidia totona eiava ita ura idia ese ita idia hanamoa totona, moale momokani do ita davaria lasi.

7. Kudou moalena be edena bamona ita havaraia lou?

⁷ Iseda gwauhamata Iehova dekenai ita hagugurua neganai ita moale. Dirava dekenai ita gwauhamata negana ai, Keristen ena mauri dalanai ita gaukara goada. Ita ese Baibel ita stadilaia bona hebou dekenai hanaihanai ita haere. (Heberu 10:​24, 25) Haroro dekenai ita lao neganai ita moale. To, bema hari iseda moale ia maragi sisina dahaka ita karaia? Baibel stadi, hebou lao henia, haroro gaukara karaia​—io, Keristen ena mauri ena kahana ibounai dekenai ita vareai​—ese iseda mauri lalonai lauma goadana do ia havaraia bona guna ita abia lalokauna bona kudou moalena do ia havaraia lou danu. (Apokalupo 2:4) Unai neganai ita be moale momokani lasi bona hanaihanai lauma dalanai ma haida ese idia durua taudia bamona lasi. Elda taudia be hanaihanai ita idia durua, to ita ta ta ibounai ese iseda gwauhamata Dirava dekenai ita hagugurua be namo. Ma ta be iseda gaukara ia karaia diba lasi. Unai dainai, namona be ita ura Keristen taudia iboudiai edia mauri dalana dekenai ita raka iseda gwauhamata Iehova dekenai ita hagugurua bona moale momokanina ita davaria totona.

8. Bema ita ura ita moale noho, dahaka dainai iseda lalona ena mamina ia goeva be gau badana?

⁸ Dirava ena lauma helaga ena huahua, moale, ita abia totona, namona be iseda lalona ena hemami ia goeva. Israel ena Pavapava David ese ena kara dika ia hunia toho ena nega ibounai lalonai, ia lalohisihisi. Io, ena mauri ena ranu ia ore bamona, bona reana ena tauanina ia gorere danu. Ia helalo-kerehai bona ena dika ia gwauraia hedinarai neganai, ia namo momokani lou! (Salamo 32:​1-5) Bema kara dika badana ta ita hunia do ita moale diba lasi. Unai ese iseda mauri ena hekwarahi ia habadaia. Momokani, unai be moale abia dalana lasi. To kara dika gwauraia hedinarai bona helalo-kerehai karana ese namo bona iseda lauma moalena ia havaraia lou.​—Hereva Lada-isidia 28:13.

Mai Moale ida Naria Noho

⁹ Guna, Dirava ena ura ita diba matamaia neganai ita moale, to lagani momo idia hanai murinai ita do moale noho be sisina ia auka. Unai ia hahedinaraia tauna be abidadama tauna Abraham. Dirava ese ia hagania dainai ia ese ena natuna Isako ia bouboulaia gwauraia neganai, aneru ta ese inai hereva ia henia: “Iehova ia hereva, lau sibona egu ladana dekenai gwauhamata lau karaia inai. Lau be umui do lau hanamoa bada herea, badina be inai kara oi karaia, oiemu natuna merona korikori lau ura abia neganai oi dogoatao lasi. Lau gwauhamata inai, tubudia momo oi dekenai do lau henia, guba dekenai noho hisiu, bona kone dekenai noho miri bamona. Oiemu tubuna ese idia do dagedage henia taudia dekena amo do idia kwalimu. Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi badina be oi ese lauegu oda oi kamonai henia dainai.” (Genese 22:​15-18) Ita daradara lasi, Abraham be unai gwauhamata dekenai ia moale bada.

9, 10. (a) Abraham ese dahaka gwauhamata ia abia, to reana edena bamona ena abidadama bona moale dekenai hetoho ia davaria? (b) Abraham, Isako, bona Iakobo edia haheitalai ese ita edena bamona ia durua?

¹⁰ Reana Abraham ia laloa Isako be gwauhamata ena namo ia mailaia ‘garana’ tauna. To lagani momo idia hanai lalonai, Isako ena amo hoa gaudia haida idia vara lasi, reana unai ese Abraham bona ena bese taudia edia abidadama bona moale ia tohoa. Isako dekenai bona murinai iena natuna Iakobo dekenai, Dirava ese unai gwauhamata ia gwauraia lou, bena idia diba unai Garana be nega vaira ai do ia mai, bona unai ese ia durudia edia abidadama bona moale idia dogoatao noho totona. Abraham, Isako, bona Iakobo idia mase bona Dirava ena gwauhamata idia dekenai ena hagugurua negana idia itaia lasi, to ita gwau lasi idia be Iehova ena moale lasi hesiai taudia. (Heberu 11:13) Ita danu ese Iehova ena hesiai gaukara ita karaia noho diba mai iseda abidadama bona moale ida, ena gwauhamata ena guguru negana ita do naria noho lalonai.

Dagedage Lalonai Do Ita Moale

¹¹ Ita Iehova ena hesiai taudia, be iena hesiai gaukara ita karaia diba mai kudou moalena ida, ena be dagedage dainai ita hisihisi. Iesu ese ia dainai dagedage idia davaria taudia ia gwauraidia moale taudia, bona aposetolo Petero ia gwau: “Keriso danu umui hisihisi hebou dainai do umui moale. Badina be gabeai, Keriso ena hairai ia hedinaraia neganai do umui moale bada herea. Umui be Keriso ena taudia dainai, do umui moale bema haida ese umui idia hereva dika henia. Badina inai anina be, Dirava ena Lauma, hairai Laumana, be umui dekenai ia noho vadaeni.” (1 Petero 4:​13, 14; Mataio 5:​11, 12) Bema oi be dagedage oi haheaukalaia bona kara maoromaoro dainai hisihisi oi ania, oi ese Iehova ena lauma bona ena lalo-namo oi abia vadaeni, bona momokani unai ese moale ia havaraia.

12. (a) Iseda abidadama dekenai hetoho ita davaria neganai, edena bamona ita moale noho diba? (b) Ena noho gabuna korikori ia rakatania Levi tauna ena kara amo dahaka ita diba?

¹² Iseda abidadama ia tohoa gaudia be mai moale ida ita tuari henidia diba badina Dirava be iseda Hahemauri Gabuna. Unai ia hedinarai Salamo 42 bona 43 dekenai. Gau ta dainai, Levi tauna ta be ena noho gabuna korikorina dekenai ia noho lasi. Dirava ena dubu ena tomadiho ia reaia dainai, ia lalohisihisi, bona ia be ranu mase dia hahinena ta ai ia lao bamona, ranu ia tahua tano kaukauna bona gagaena lalonai. Ia “ranu mase,” eiava ia ura bada, Iehova dekenai bona Iena dubu dekenai ia tomadiho totona. (Salamo 42:​1, 2) Namona be unai Levi tauna ena sivarai ese ita ia doria Iehova ena taunimanima ida ita noho hebou ena namo ita moalelaia totona. Bema gau ta ia vara bena dagedage dainai ita be idia ida ita noho hebou diba lasi, namona be ita ese idia ida ita karaia hebou helaga hesiai gaukara ena moale ita laloatao; haheauka totona ita guriguri, “Dirava ita naria,” dala do ia kehoa bena iena tomadiho taudia ida do ita gaukara hebou lou negana ita naria noho lalonai.​—Salamo 42:​4, 5, 11; 43:​3-5.

‘Mai Moale Danu Iehova Ena Hesiai Gaukara Karaia’

¹³ Iseda hesiai gaukara Iehova dekenai ena kahana badana be moale. Unai be Salamo torea tauna ese ia abia hanamoa anena dekenai inai bamona ia hahedinaria: “Tanobada taudia iboudiai e, Iehova dekenai umui moale bada. Iehova ena hesiai umui lao henia mai emui moale ida. Ia vairanai umui mai, mai emui moale boiboina ida.” (Salamo 100:​1, 2) Iehova be “moale Diravana” bona ia ura ena hesiai taudia be edia gwauhamata ia dekenai idia haguguru noho lalonai moale idia davaria. (1 Timoteo 1:​11, NW) Bese idauidau iboudiai taudia ese Iehova idia moalelaia be namo, bona iseda hanamoa herevadia idia goada be namo, ia kwalimu tuari oreana ena ‘kwalimu boiboina’ hegeregerena. Dirava ena hesiai gaukara ese ita ia hagoadaia dainai, moale ia havaraia danu. Unai dainai, salamo tauna ese taunimanima ia hamaorodia Dirava vairanai idia mai ‘mai moale boiboina ida.’

14, 15. Hari inai nega lalonai, Salamo 100:​3-5 ena anina be dahaka Iehova ena moale taudia dekenai?

¹⁴ Salamo torea tauna ia gwau: “Umui diba [lalo-parara] Iehova be Dirava. Ia ese ita ia karaia, ita be sibona ita karaia lasi. Ita be iena bese, bona ena heubu mamoedia.” (Salamo 100:3) Badina Iehova be iseda Havaraia Tauna, ia ese ita ia biagua mamoe tauna ese ena mamoe ia biagudia hegeregerena. Dirava ese ita ia naria namo herea dainai, mai lalo-moale ida ia ita hanamoa. (Salamo 23) Iehova ia herevalaia neganai, salamo torea tauna be inai ane ia abia: “Ena ikoukou ai do ita raka vareai mai iseda hanamoa herevana ida, ena dubu ai danu mai iseda ane ida; ia ita tanikiu henia, ena ladana ita hanamoa. Iehova be namo; ena hebogahisi be ia hesiriu hanaihanai, bona ena heabidadama ela bona uru iboudiai.”​—Salamo 100:​4, 5.

¹⁵ Hari inai negai, moale taudia tanobada besedia iboudiai amo be Iehova ena dubu ena ariara dekenai idia vareai, tanikiu bona hanamoa herevadia idia henia totona. Ita be mai moale danu Iehova ena ladana ita hanamoa, bema hanaihanai Iehova ita gwauraia namo neganai, bona iena kara namo hereadia ese ita idia doria ita hanamoa totona. Ia be namo herea vaitani, bona ena harihari-bada eiava ena hebogahisi ena hesiai taudia dekenai ita daradaralaia lasi, badina do idia noho ela bona hanaihanai. Iehova ese iena ura idia karaia taudia ia lalokau henidia noho “ela bona uru iboudiai.” (Roma 8:​38, 39) Vadaeni, mai badina namona dainai ita ese ‘mai kudou moalena ida Iehova ena hesiai gaukara ita karaia.’

Umui Naria Noho mai Moale Danu

¹⁶ Paulo ia toretore, ia gwau: “Umui naria noho mai moale danu.” (Roma 12:12) Iesu Keriso murinai idia raka horoa taudia be guba dekenai mase diba lasi maurina ena helaro namo hereana idia abia, Dirava ese ena Natuna amo idia dekenai ia kehoa dalana unai. (Roma 8:​16, 17; Filipi 3:​20, 21) Tanobada dekenai Paradaiso ai mauri hanaihanai helarona idia abia Keristen taudia danu be mai edia dala idia moale totona. (Luka 23:43) Iehova ena abidadama hesiai taudia iboudiai be Basileia ena helaro idia moalelaia diba, badina idia haida be guba gavamani lalonai idia gaukara bona ma haida be ia henunai tanobada ai do idia mauri. Unai be moale havaraia hahenamona!​—Mataio 6:​9, 10; Roma 8:​18-21.

17, 18. (a) Isaia 25:​6-8 ese dahaka ia perovetalaia? (b) Hari inai negai, bona gabeai danu peroveta herevana Isaia lalonai be edena bamona ia guguru?

¹⁷ Isaia danu ese taravatu idia badinaia taudia edia vaira negana mai ena moale ia perovetalaia. Ia toretore ia gwau: “Inai ororo ai tuari oreadia edia Dirava, Iehova, ese aria namo herea do ia karaia, bese iboudiai edia; aniani mai digarana, uaina negarina. Inai ororo ai danu ia ese bese iboudiai ia koudia ahu, bona basileia iboudiai ia koua hegege gauna do ia kokia. Ia ese mase do ia haorea ela bona hanaihanai, bona Siahu Ibounai Lohiabadana, Iehova ese mata ranuna edia vairadia amo do ia dahua oho. Bona ena bese taudia edia hemarai be tanobada ibounai amo do ia abia oho; badina Iehova ia hereva vadaeni.”​—Isaia 25:​6-8.

¹⁸ Hari inai negai ita be Iehova ita tomadiho henia dainai lauma ariana dekenai ita aniani, unai be aria mai ena moale momokani. (2 Petero 3:13) Iesu ena boubou karana amo, Iehova ese “basileia iboudiai ia koua hegege gauna” do ia kokia, Adam ena kara dika dainai taunimanima ibounai ia koudia gauna unai. Kara dika bona mase ia haoredia neganai, moale bada do ia vara! Unai neganai, idia mase vadaeni lalokau taudia idia toreisi lou neganai do ita hedavari, do ita itaia mata ranudia iboudiai idia ore, bona paradaiso tanobadana dekenai do ita noho, unuseniai ta ese Iehova ena taunimanima do idia gwauraidia dika lasi, to Dirava ese gwau henia tauna badana, Satana Diabolo be ia haere henia vadaeni. Unai be moale gaudia hereadaedia!​—Hereva Lada-isidia 27:11.

19. Iehova ese ita, iena Witness taudia, dekenai gabeai do ia henia gaudia dainai dahaka ita laloa?

¹⁹ Iehova ese ena hesiai taudia totona do ia karaia karadia oi diba ese oi idia hamoalea bona oi ura tanikiu henia ani? Momokani, ita vairanai unai gau namodia ese iseda moale idia habadaia! Ma danu, iseda helaro namona ese ita ia durua, bena iseda moale, lalokau, bona gau momo ita ia henia Diravana ita laloa inai bamona: “Itaia! Inai be iseda Dirava. Ia naria, bona ita do ia hamauria. Inai be Iehova. Ia naria. Do ita moale, ena hahemauri do ita moalelaia.” (Isaia 25:9) Lalona dekenai iseda helaro namo hereana ia auka masemase neganai, mai goada bada ida Iehova ena hesiai gaukara ita karaia mai iseda kudou moalena ida.

Edena Bamona Do Oi Haere?

◻ Iehova ena hesiai gaukara edena bamona “mai kudou moalena” ida ita karaia diba?

◻ Bema Dirava ita hesiai henia gaukarana dekenai moale be lasi, dahaka do ita karaia?

◻ Ena be dagedage idia davaria, to dahaka dainai Iehova ena taunimanima do idia moale diba?

◻ Iseda helaro ita moalelaia ena badina haida be dahaka?

3. Kudouna be dahaka ia laulaulaia?

6. Bema ita moale lasi Dirava ena hesiai gaukara dekenai, dahaka ita karaia be namo?

11. Ena be dagedage ita davaria to edena bamona ita moale noho diba?

13. Salamo 100:​1, 2 be edena bamona ia hahedinaraia iseda hesiai gaukarana Dirava dekenai be mai ena moale?

16. Keristen taudia ese dahaka helaro haida bona gabeai do idia vara gaudia idia moalelaidia?

[Picture on page 17]

Bema Keristen ena mauri ena gaukara ibounai lalonai ita vareai, iseda moale do ia bada