Witi Uma Idia Kurokuro Vadaeni Gogoa Totona

1. Dahaka gaukara badana ia hamatamaia vadaeni?

¹ Iesu ese Samaria hahinena ia haroro henia murinai, aposetolo taudia ia hamaoroa: “Emui kwarana umui abia isi bona witi uma umui itaia, idia kurokuro vadaeni gogoa totona.” (Ioa. 4:​35, 36, NW ) Dirava ena Hereva idia kamonai taudia gogoa gaukarana ia matamaia unai, bona Iesu ia itaia diba tanobada ibounai dekenai unai gaukara do ia bada ia lao. Ena be hari Iesu be guba dekenai ia noho, to ia be unai gogoa gaukarana ia durua danu. (Mat. 28:​19, 20) Dahaka ese ia hahedinaraia unai gaukara be ia bada ia lao haraga noho bona kahirakahira do ia ore?

2. Dahaka ese ia hahedinaraia tanobada hegegemadai gogoa gaukarana be ia bada ia lao haraga?

² Tanobada Hegegemadai Gogoa Gaukarana: Hesiai laganina 2009 lalonai, tanobada ibounai dekenai pablisa taudia edia namba be 3.2 pesen amo ia bada daekau. Gavamani ese haroro gaukara idia taravatua tanodia dekenai pablisa ena namba be 14 pesen amo ia bada daekau. Hua ta ta ai idia ripotilaia Baibel stadi ena namba be 7,619,000 ia hanaia​—unai ese Iehova ena Witnes taudia edia namba bona Baibel stadi ena namba gunana ia hanaia. Tano momo ai gaukara ia bada ia lao haraga dainai, tadikaka idia ura Gilead sikuli idia abia misinari taudia be unai tanodia dekenai idia siaia lao. Tano momo ai, idau gado taudia haroro henia gaukara ia bada ia lao. Toana be inai nega dokonai, Iehova ese gogoa gaukarana ia haharagaia. (Isa. 60:22) Emu “uma” o haroro teritori oi itaia neganai, lalohadai maorona oi abia, a?

3. Haida ese edia teritori ai gogoa gaukarana be edena bamona idia laloa?

³ Emu Teritori ai Gogoa Gaukarana: Reana haida idia gwau: “Egu teritori ai taunimanima idia kamonai lasi.” Momokani, teritori haida ai taunimanima idia kamonai lasi, eiava haida be guna idia kamonai to hari idia kamonai lasi. Unai dainai, reana Witnes taudia haida do idia gwau, ‘Inai gabu dekenai idia noho taudia momo be sivarai namona idia kamonai vadaeni, unai dainai reana haida sibona ese sivarai namona do idia kamonai.’ Unai be momokani, a?

4. Haroro gaukara dekenai dahaka lalohadai maorona ita abia be namo, bona dahaka dainai?

⁴ Haroro gaukara ia matamaia negana amo, gogoa negana be gaukara badana karaia negana. Iesu ena hereva be mai anina bada, ia gwau: “Uma aniani gogoa gaukarana be bada, to gaukara taudia be momo lasi. Unai dainai gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.” (Mat. 9:​37, 38, NW ) Gogoa gaukara ena Biaguna be Iehova​—ia ese uma ena anina do idia vara negana bona gabuna ia abia hidi be maoro. (Ioa. 6:44; 1 Kor. 3:​6-8) Iseda gaukara be dahaka? Baibel ia gwau: “Daba ai emu uhe oi hadoa, bona adorahi ai danu oi hesiku lasi.” (Had. 11:​4-6, BHğ) Oibe, gogoa negana ena dokona ia kahirakahira dainai, hari be haroro gaukara ita karaia negana, hesiku negana lasi!

5. Dahaka dainai ita haroro goadagoada, herevana eda teritori ai ita haroro loulou bona toana be taunimanima idia kamonai lasi?

⁵ Gogoa Gaukarana Karaia Noho: Herevana eda teritori ai ita haroro loulou bona toana be taunimanima idia kamonai lasi, to badina namona ia noho dainai mai eda ura ida haroro gaukara ita karaia goadagoada be mai anina bada. (2 Tim. 4:2) Inai tanobada ai idia vara gaudia ese taunimanima edia lalohadai bona kara ia haidaua dainai, idia ese nega vairai do idia vara gaudia idia laloa momo. Matamata taudia idia tubu daekau lalonai, reana idia ura idia noho namonamo mai lalomaino ida. Reana eda haroro goadagoada karana ese ma haida edia lalona do ia hamarerea. Oibe, reana guna idia kamonai lasi taudia be hari do idia kamonai. Danu, mai edia ura ida eda haroro herevana idia dadaraia taudia ita sisiba henia, edia kara dika idia rakatania haraga totona.​—Ese. 2:​4, 5; 3:19.

6. Ena be eda teritori ai momo idia kamonai lasi, to dahaka ese ita do ia durua ita haroro goadagoada totona?

⁶ Ena be eda teritori ai momo idia kamonai lasi, to dahaka ese ita do ia durua ita haroro goadagoada totona? Vadaeni ruma-ta-ruma-ta haroro gaukara sibona ita karaia lasi, to haroro daladia ma haida ita tohoa, hegeregere bisinesi haroro o telefon haroro. Eiava haroro ena hamatamaia hereva matamatadia ita gaukaralaia. Eiava dabai ita haroro lasi to adorahi eiava ruma ai taunimanima do ita davaria negana ma ta ai ita haroro be namo. Taunimanima edia lalona ita veria sivarai namona idia abia dae totona, gado idauidau ai idia hahanaia pepapepadia ita gaukaralaia, badina reana teritori ai idia noho taudia be unai gado idia diba. Eiava haroro habadaia totona regula painia gaukara ita karaia. Eiava pablisa be momo lasi gabudia dekenai ita lao haroro. Oibe, gogoa gaukarana dekenai lalohadai maorona idia abia taudia be idia gaukara goada unai gaukara badana idia durua totona.

7. Gogoa gaukarana do ita karaia ela bona edena negai do ita hadokoa?

⁷ Biru taudia edia nega be hegeregere lasi uma aniani ibounai idia gogoa totona, unai dainai edia gaukara idia karaia haraga bona goadagoada ela bona idia hagugurua​—idia laga-ani lasi o idia metairametaira lasi. Dirava ena Hereva idia kamonai taudia gogoa gaukarana ita karaia neganai, unai biru taudia bamona ita karaia be namo. To, unai gaukara do ita karaia ela bona edena negai do ita hadokoa? Baibel ia gwau, unai gaukara do ita karaia “ela bona inai nega oromana ena dokona” eiava ela bona “dokona be do ia ginidae.” (Mat. 24:14; 28:​20, NW ) Iehova ena Haroro Tauna badana bamona, ita ura Iehova ese ita dekenai ia henia gaukarana ita karaia haorea. (Ioa. 4:34; 17:4) Unai dainai, mai eda moale bona lalohadai maorona ida haroro gaukara ita karaia goadagoada ela bona dokona. (Mat. 24:13) Momokani, gogoa gaukarana ia do ore lasi!

[Blurb on page 2]

Haroro gaukara ia matamaia negana amo, gogoa negana be gaukara badana karaia negana