Ane amo Iehova Hanamoa
“Lau be ane do lau abia, Iehova ena, badina be ia kwalimu herea vadaeni.”—ESODO 15:1.
1. Iehova be edena bamona Diravana dainai ita hanamoa be maoro?
SALAMO 150 ese Iehova hanamoa karana be nega 13 ia haheganilaia. Ena siri ginigabena ia gwau: “Mai lagadia gaudia iboudiai—Iehova idia hanamoa. Iehova umui hanamoa!” Ita be Iehova ena Witness taudia, unai dainai ita diba Iehova ita hanamoa be maoro. Ia be guba bona tanobada edia Lohia Badana, Atai Herea Diravana, noho hanaihanai Pavapavana, ita ia havaraia bona ia kara namo henia Diravana. Ia be idau, ta be ia ida idia hegeregere lasi. Gau ibounai ia diba, ia be mai ena siahu ibounai, ena hahemaoro be goevagoeva, ia be lalokau, ia be namo, bona ia be helaga. (Luka 18:19; Apokalupo 15:3, 4) Momokani, ia ita hanamoa be maoro!
2. Dahaka gau dainai Iehova ita tanikiu henia be maoro?
2 Iehova ita tomadiho henia bona ita hanamoa be maoro, to namona be ita tanikiu henia danu, ita ia durua daladia idauidau dainai. Ia be “gau namodia ibounai, bona harihari gaudia namodia momokani ibounai” henia Diravana. (Iakobo 1:17) Ia be mauri ibounai ena Badina. (Salamo 36:9) Ita abidia gaudia iboudiai be ia ena amo ita abidia, badina be ia be ita ia havaraia Diravana Badana. (Isaia 42:5) Lauma hahenamodia iboudiai be ena lauma, ena orea, bona ena Hereva amo ita ia henia. Iseda dika ia gwauatao, badina be ena Natuna ia henia, ita ia davalaia totona. (Ioane 3:16) Basileia dainai ‘guba matamata bona tanobada matamata mai edia kara maoromaoro’ ita helaro henidia diba. (2 Petero 3:13) Keristen taudia edia hebamo ita moalelaia noho. (Roma 1:11, 12) Ita be iena Witness taudia be hahenamo ta ita dekenai. (Isaia 43:10-12) Hahenamo ma ta be ia ita guriguri henia diba. (Mataio 6:9-13) Momokani, badina idauidau momo dainai Iehova ita tanikiu henia be maoro!
Iehova Ita Hanamoa Diba Daladia
3 Ita Iehova ena hesiai taudia be edena dala ai ita hanamoa diba bona ita tanikiu henia diba? Dalana be Keristen hesiai gaukarana amo—ruma ta ruma ta ai ita haroro, kamonai taudia ita lou henidia, Baibel stadi ita karadia, bona dala ai ita haroro. Nega idaudia ai, dala ia hekeho negadiai, ita haroro diba Dirava hanamoa totona. Inai danu, iseda kara namo amo, bona eda dabua bona eda huina edia toana namona amo, Iehova ita hanamoa diba. Taunimanima momo ese Iehova ena Witness taudia idia hanamodia, edia kara bona edia toana namona dainai. Iehova ita hanamoa bona ita tanikiu henia dalana ma ta be guriguri amo.—Sisiga Ginigunana 29:10-13 itaia.
4. Iseda Tamana lalokauna guba ai be ita hanamoa dalana ta mai hairaina bada be dahaka?
4 Unai dala sibodia amo lasi, to iseda Tamana lalokauna guba ai ia noho hanamoa dalana ma ta be, Basileia anedia amo ia bona ena kara namodia ita heatolaidia. Miusik karaia taudia bona torea taudia momo idia gwau miusik karaia gauna hereadaena be taunimanima ena gadona. Klasikal miusik torea taudia mai dibadia ese opera anedia idia toredia, badina be taunimanima ese ane idia abidia negadiai, edia gadodia kamonaidia ese moale bada ia havaraia.
5. Dahaka dainai Basileia anedia abidia karana ita laloa bada be namo?
5 Taunimanima ese hahenamo bona tanikiu anedia idia abidia negadiai, Iehova ese edia ane ia moalelaidia bada! Unai dainai, namona be kongregesen heboudia ai, sekit hebouheboudia ai, dina-tamona hebouheboudia ai, distrik hebouheboudia ai, bona intenesenel hebouheboudia ai, Basileia anedia abidia karana ita laloa namonamo. Iseda ane bukana be mai ena ane namodia momo herea, bona nega haida murimuri taudia ese edia hairai idia gwauraia. Basileia anedia bema ita abidia mai eda goada ibounai ida, taunimanima ma haida ita hamoaledia bona ita be siboda ita hanamoa danu.
Baibel Negadia ai Iehova Hanamolaia Anedia Idia Abidia
6 Dirava ena Hereva ese ita ia hadibaia, Davara Kakakakana ai Mose bona Israel taudia oredia be Farao ena tuari oreana amo ia hamauridia murinai, kwalimu anena idia abia. Edia ane ena hereva ginigunadia be inai: “Lau be ane do lau abia, Iehova ena, badina be ia kwalimu herea vadaeni, hosi bona idia guia taudia be davara dekenai ia negea diho vadaeni. Iehova ese ena goada, bona ena siahu ia henigu, ia ese lau ia hamauria vadaeni.” (Esodo 15:1, 2) Mani oi laloa, Dirava ese hoa dalanai ia hamauridia murinai, dahaka goada bona moale ida unai ane idia abia!
7. Heberu Revarevadia edia sivarai hegeregeredia, edena nega badadia ai Israel taudia be ane amo Iehova idia hanamoa?
7 David ese Maua Helagana be Ierusalem ia laohaia neganai, taunimanima ese ane idia abidia bona miusik gaudia idia hataidia Iehova hanamoa totona. (1 Sisiga 16:1, 4-36) Unai be moale negana korikorina. Ierusalem ai King Solomon ese dubu helagana ia hahelagaia neganai, taunimanima ese ane amo Iehova idia hanamoa. “Kibi hiriria taudia bona ane abia taudia be nega tamona Iehova idia hanamoa bona idia tanikiu henia neganai, bona kibi bona botabota auridia bona hatai-hatai gaudia idauidau regedia amo Iehova idia hanamoa ‘badina be ia be namo, badina be ena hebogahisi be ia hesiriu hanaihanai’ neganai, hari dubu, Iehova ena dubu, be ori ta ese ia hahonua, bena hahelaga taudia be hesiai karadia karaia totona idia gini diba lasi, ori dainai; badina be Iehova ena hairai ese Dirava momokanina ena dubu ia hahonua.” (2 Sisiga 5:13, 14) Unai ese ia hahedinaraia Iehova ese unai hahenamo anena ia kamonaia bona ia moalelaia, unai dainai hoa dalanai ori ese dubu ia hahonua. Gabeai, Nehemia ena negai Ierusalem ena magu idia hahelagaia neganai, orea rua ese ane idia abia.—Nehemia 12:27-42.
8. Dahaka ese ia hahedinaraia Israel taudia ese ane abia karana idia laloa bada?
8 Dubu helagana ai ane abia karana be tomadiho karana mai anina bada, unai dainai Levi taudia 4,000 idia abidia hidi, miusik do idia karaia, ane abia taudia edia. (1 Sisiga 23:4, 5) Unai neganai miusik bona ane abia taudia be mai anina bada tomadiho lalonai; idia edia amo Taravatu ena anina idia hahedibalaia lasi, to Israel taudia idia durudia, Iehova do idia tomadiho henia mai edia lalohadai maoromaorodia bona mai edia goada ida. Baibel ia gwau: “Idia bona edia tadikaka Iehova hanamolaia anedia abidia karana idia hadibalaidia taudia, iboudiai mai edia diba momo, be 288.” (1 Sisiga 25:7) Iehova hanamolaia anedia abidia karana idia laloa bada. Ane abia dalana idia dibaia vadaeni bona ane idia abidia goevagoeva diba!
9. Keristen Greek Revarevadia ese ane abia karana be edena bamona idia gwauraia?
9 Iesu bona aposetolo edia negai, dahaka ia vara? Iesu idia samania hanuaboina ai, ena be metau gaudia momo ia lalodia, to Paseka ia karaia bona sibona ena mase do idia laloa lou dalana ia haheitalaia murinai, mamina ia abia Iehova hanamolaia anena do idia abia be namo. (Mataio 26:30) Baibel be ma ia gwau, Paulo bona Sila idia dadabadia bena dibura rumana ai idia koudia murinai, “hanuaboi momokani neganai Paulo bona Sila idia guriguri noho bona ane dekenai Dirava idia hanamoa, dibura taudia danu idia kamonai.”—Kara 16:25.
Hahenamo Anedia Ita Abidia be Eda Tomadiho Karana mai Anina Bada
10 Reana oi laloa Basileia anedia abidia karana be mai anina bada lasi, unai dainai mai emu lalona ibounai ida oi abidia lasi a? Bema oibe, emu lalohadai do oi haidaua be namo ani, badina be Iehova Dirava bona Iesu Keriso ese hahenamo anedia abidia karana idia laloa bada. Dirava ena Hereva lalonai haida idia haganidia loulou Iehova do idia hanamoa bona hanamolaia anedia do idia abidia! Isaia 42:10 ia gwau: “Ane matamatana umui abia, Iehova ena; tanobada dokona amo ia umui hanamoa, davara umui lao henia taudia . . . umui motumotu bona umui noholaidia taudia danu.”—Salamo 96:1; 98:1 itadia.
11. Aposetolo Paulo ese ane abia karana edena bamona ia sisibalaia?
11 Aposetolo Paulo ia diba ane abia karana ese iseda lalona ia hamoalea diba, unai dainai nega rua ita ia sisibalai henia. Efeso 5:18, 19 ai ia gwau: “Lauma Helaga dekena amo do umui honu. Ekalesia varavara danu do umui herevahereva, salamo dekena amo, ane dekena amo, bona lauma anedia dekena amo. Ane do umui abia, bona Lohiabada do umui hanamoa emui kudouna lalonai.” Bona Kolose 3:16 (NW) ai ia gwau: “Salamo ai, ane ai, lauma anedia ai, umui hahediba heheni bona umui sisiba heheni noho. Iehova hanamolaia anedia umui abidia emui lalona ai.”
12. Edena Basileia anedia ese ita idia durua, do ita hahediba heheni bona do ita heduru heheni totona?
12 Mani oi laloa, inai siri ruaosi ai Paulo ese ane abia karana ia gwauraia loulou; ena hereva haida be inai: ‘salamo amo, ane amo, lauma anedia amo, bona ane do umui abia emui kudouna lalonai.’ Bona Kolose ai ia gwau, inai kara amo ‘ita hahediba heheni bona ita sisiba heheni’ diba. Momokani, iseda ane edia ladadia ese idia hahedinaraia unai bamona ita karaia; ladadia haida be inai: “Gau Iboudiai e, Iehova Hanamoa!” (namba 5), “Gini Goada, Marere Lasi!” (namba 10), “Basileia Helarona Moalelaia!” (namba 16), “Umui Gari Henidia Lasi!” (namba 27), bona “Iseda Dirava Iehova Hanamoa!” (namba 100).
13 Unai hahegani hegeregeredia, “hesiai tauna mai ena kamonai bona mai ena kara maoromaoro” ese dala ia karaia, iseda kongregesen heboudia, sekit hebouheboudia, dina-tamona hebouheboudia, distrik hebouheboudia, bona intenesenel hebouheboudia be Basileia anedia abidia karana amo do ita kehodia bona ita koudia. (Mataio 24:45) Bona dala ia karaia, inai hebouhebou lalodiai nega ma haida ane do ita abidia totona. Iseda kongregesen heboudia be Basileia anena ta abia karana amo ita hamatamaia dainai, namona be nega korikori ai ita ginidae, bena inai eda tomadiho karana ta ita karaia diba, ani? Bona iseda hebou be ane abia karana bona guriguri amo ita hadokodia, unai dainai namona be ita rakatanidia lasi ela bona unai ita karaia guna, ani?
14. Iseda program hegeregeredia idia abidia hidi anedia haida be dahaka dahaka?
14 Iseda hebou edia ane idia abidia hidi namonamo, program ida do idia hegeregere totona. Unai hegeregerena, lagani 1993 ai, “Dirava Ena Hahediba” Distrik Hebouheboudia ai, Satana, tanobada bona tauanina idia herevalaidia murinai, ane namba 191, ladana “Hereva Momokani Oi Abia Dae Vaitani,” ese ita Keristen taudia ia hagoadaia, unai iseda inaidia toiosi do ita tuari henidia totona. Bona tama sina edia maduna edia natudia hadibadia karadia ai be idia herevalaidia murinai, ane namba 164, ladana “Memero Kekeni be Dirava ena Harihari Gaudia,” ita abia; ia lalonai be tama sina sisiba henidia herevadia momo. Bona ane namba 70, ladana “Ieremia Bamona Oi Karaia,” ita abia murinai, hereva toi, Ieremia ena peroveta herevadia gwauraidia herevadia, idia harorolaidia. Iseda Basileia gaukarana herevadia toi murinai, ane namba 156 ladana “Lau Ura” ita abia, unai gaukara ia gwauraia anena unai. Unai hegeregerena, Gima Kohorona Stadi, Hesiai Hebou, bona Haroro Sikuli edia ane idia abidia hidi namonamo danu. Unai dainai, elda tauna ta ese pablik haroro ia karaia gwauraia neganai, namona be ena hereva ena sinado hegeregerena anena ta ia abia hidi.
15. Edena dala amo hebou ena seamani ese hebou taudia ia durudia diba, do idia abia anena do idia laloa bada totona?
15 Seamani ese hebou taudia do idia abia anena ena namba do ia gwauraia neganai, namona be ane ena ladana danu do ia gwauraia, unai amo do ia ha-uradia, unai ane do idia laloa bada totona. Ane ena sinado henunai ia noho Baibel sirina danu bema ia gwauraia, unai ese kongregesen taudia do ia durudia, ane do idia laloa bada totona. Bona reana hereva ma haida do ia gwauraidia be namo, hegeregere, do ia hamaorodia ane ena mamina hegeregerena ane do idia abia be namo.
Ane Ita Abia, Iehova Ena Kara Namo Ita Moalelaia Dainai
16 Iseda Basileia anedia edia hereva be mai anina bada dainai, ita abidia negadiai edia hereva ita lalodia namonamo be namo. Namona be ane edia hereva edia mamina hegeregeredia ita abidia. Ane haida ese lalokau, lauma huahuana ta, be idia gwauraia, unai dainai mai eda lalo-namo ida ita abidia be namo. (Galatia 5:22) Haida be moale anedia, unai dainai mai eda moale ida ita abidia be namo. Ma haida be masi anedia, unai dainai mai eda goada bona eda lalo-siahu ida ita abidia be namo. Haroro Sikuli ai ita idia sisiba henia, hereva ena mamina hegeregerena do ita hereva mai eda lalo-namo o mai eda goada o mai eda siahu ida. Bona ane ita abidia negadiai, unai bamona ita abidia be mai anina bada.
17. (a) Ita ura lasi eda ane abia karana dainai Iehova ese ita be edena bamona do ia gwauraia, gwau-edeede Israel taudia ia gwauraidia bamona? (b) Eda ane edia sisiba ita laloa namonamo neganai, dahaka ia vara?
17 Basileia anedia ita abidia negadiai, bema idau gaudia ita lalodia bona ita anelaidia herevadia edia anina ita laloa lasi, ita be gwau-edeede Israel taudia bamona, ani? Dirava ese ia gwauraidia dika, badina be edia bibinadia ai idia hanamoa, to edia lalodia be daudau masemase. (Mataio 15:8) Ita ura lasi do ia gwau Basileia anedia ita abidia negadiai iseda kara be unai bamona, ani? Bema Basileia anedia be dala maorona ai ita abidia, ita be siboda do ita hagoadaia, bona ita kahirakahira dekenai idia gini taudia, memero bona kekeni danu, do ita hagoadadia. Oibe, Kingdom Hall ai ane ita abidia tauda iboudai ese ane edia sisiba bema ita laloa namonamo, unai ese ita do ia durua bada, haroro gaukarana do ita goadalaia bona kara dika ena hedibagani do ita dadaraia totona.
18. Basileia anedia abidia ia kamonai neganai, hahine ta ena lalona be edena bamona?
18 Murimuri taudia momo ese iseda Basileia anedia ita abidia karana idia laloa bada. Gima Kohorona ta ese inai sivarai ia halasia: “Lagani 1973 ai, ‘Dirava Ia Kwalimu’ Hebouhebouna ai, Yankee Stadium, New York siti ai, bapatiso ia abia hahinena ta ena sivarai ese ia hahedinaraia iseda ane abia karana ese taunimanima ia durudia Iehova do idia diba totona. Sibona ena ura hegeregerena Kingdom Hall ia lao henia negana ginigunana ai, ia noho ela bona hebou rua idia doko. Kongregesen taudia ese ane . . . ladana ‘Hanaihanai Davana Oi Tahua!’ idia abia neganai, ane ena hereva bona idia abia dalana ia lalodia bada dainai, ena lalona ia hadaia inai orea lalonai do ia noho. Unai dainai Witness hahinena ta ia noia Baibel amo do ia stadi henia, bena ia goada ia lao bona Iehova ena Keristen witness hahinena ta ai ia lao.”
19. Dahaka dainai iseda Basileia anedia ita abidia mai eda lalona ibounai ida be namo?
19 Iseda hebou momo ai, hebou taudia be mai edia dala momo lasi edia lalodia edia mamina do idia hahedinaraia bona edia tanikiu herevadia do idia gwauraidia. To ita ibounai be iseda lalona edia mamina, Iehova ena kara namo dainai ita abia mamina, be Basileia anedia abidia karana amo ita hahedinaraia diba. Ita hebou negadiai, ita moale, ani? Unai dainai namona be ita ura ane do ita abia! (Iakobo 5:13) Momokani, bema Iehova ena kara namo bona ena hebogahisi ita lalodia bada, hanamolaia anedia do ita abidia mai eda lalona ibounai ida.
Edena Bamona Do Oi Haere?
◻ Dahaka badina rua dainai Iehova ita hanamoa be maoro?
◻ Edena dala idauidau ai Iehova ita hanamoa diba?
◻ Iehova ita hanamoa dalana ta mai hairaina bada be dahaka?
◻ Baibel ese daidia edia sivarai ia gwauraia, Iehova hanamolaia anedia idia abidia?
◻ Basileia anedia ita abidia dalana maorona be dahaka?
3. Edena dala idauidau ai Iehova ita hanamoa diba bona ita tanikiu henia diba?
6. Davara Kakakakana ai Dirava ese Israel taudia ia hamauridia murinai, edena dala amo idia hanamoa?
10. Dirava ena Hereva ese Ia hanamolaia anedia abidia karana be edena bamona ia haheganilaia?
13. “Hesiai tauna mai ena kamonai bona mai ena kara maoromaoro” ese edena bamona ia hahedinaraia ane abia karana be iseda tomadiho karana badana ta?
16. Iseda ane edia mamina be edena bamona ita hahedinaraia diba?
[Box on page 11]
Unai Ane Oi Moalelaidia!
Toana be haida ese ane matamatadia momo abidia dalana idia dibaia be auka. To kongregesen haida ese inai ane momo idia abidia, hekwarahi bada lasi. Dala namona be, kongregesen ese idia manadalaidia lasi anedia idia abidia loulou. Bema unai bamona idia karaia do idia manadalaidia, bena edia hekwarahi ena anina namona do idia abia dainai, unai ane do idia lalodia bada, idia manadalaidia haraga anedia do idia lalodia maragi. Bena kongregesen taudia iboudiai ese do idia abidia goadagoada diba. Oibe, unai ane do idia moalelaidia diba!
[Box on page 12]
Pati ai Basileia Anedia Umui Abidia
Basileia anedia abidia karana be Kingdom Hall lalonai ita karaia karana sibona lasi. Dibura rumana ai idia noho neganai, Paulo bona Sila ese Iehova hanamolaia anedia idia abidia. (Kara 16:25) Iakobo ia gwau: “Tau ta ia moale, a? Dirava hanamoa ane do ia abia be namo.” (Iakobo 5:13) Pati ai taunimanima iboudiai idia moale, unai dainai Basileia anedia idia abidia be namo, ani? Bema ta ese gita o miusik gauna ma ta ia hataia bona taunimanima oredia ese ane idia abia, do idia moale bada. Bema miusik gauna ta be lasi, Basileia anedia kaset teipi ai idia gadaralaidia diba, ane do idia abia hebou totona eiava miusik regena namona kamonaia totona.
[Picture on page 8]
Dirava ese Davara Kakakakana ai ia hamauridia murinai, Israel taudia be ane amo edia moale idia hahedinaraia
[Picture on page 10]
Mai moale ida ane ita abia be iseda Keristen tomadiho karana ta