Hahemauri

Anina: Dika eiava mase amo ruhaia eiava hamauria karana; taunimanima be idia hahisidia taudia eiava idia dagedage henidia taudia edia imadia amo hamauridia karana unai. Iena Natuna ena amo Iehova ese Keristen korikori taudia iboudiai inai tanobada oromana dikana amo ia hamauridia, bona dika bona mase amo danu. Iehova ena hesiai taudia hutuma bada mai edia kamonai, “nega dokonai” idia noho taudia, be hisihisi bada hereana amo danu do ia hamauridia.

Ena hebogahisi bada dainai, Dirava ese taunimanima iboudiai do ia hamauridia, a?

Petero Iharuana 3⁠:9 ese ia hahedinaraia Dirava ese taunimanima iboudiai do ia hamauridia, a? Unai siri ia gwau: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” Hebogahisi Diravana ena ura be Adam ena bese taudia iboudiai do idia helalo-kerehai, bona dala ia karaia vadaeni, idia helalo-kerehai taudia edia dika do ia gwauatao totona. To taunimanima ta ia doria lasi unai heduru do ia abia totona. (Deuteronomi 30⁠:​15-20 itaia.) Taunimanima momo ese idia dadaraia. Idia be ia maloa mase gwauraia tauna hegeregerena, unai tau ia durua toho tauna ese do ia hamauria diba gauna ia henia toho neganai ia dadaraia. To idia helalo-kerehai lasi taudia be lahi lalonai hisihisi do idia ania hanaihanai lasi. Petero Iharuana 3⁠:9 ena hereva hegeregerena do idia “mase.” 2Pe 3 Siri 7 ia gwau, “Dirava idia negea taudia be do idia boio.” Unai siri ia hahedinaraia lasi Dirava ese taunimanima iboudiai do ia hamauridia.​—⁠Inai sinado badana “Hel” itaia danu.

Korinto Ginigunana 15⁠:22 ese ia hamomokania Dirava ese taunimanima iboudiai do ia hamauridia, a? Unai siri ia gwau: “Taunimanima ibounai Adam dainai idia mase vadaeni, unai bamona danu Keriso idia abidadama henia dainai ibounai do idia mauri.” Karoa 15 ese ia hahedinaraia toreisi-lou sivaraina ia gwauraia unai. Daidia do idia toreisi lou? Adam ena kara dika dainai idia mase taudia ese (1Kor 15 siri 21 itaia), Heberu 10⁠:​26-29 ia gwauraia karadia be mai edia ura ida idia karaia lasi taudia unai. Iesu be Hades amo ia toreisi lou hegeregerena (Kara 2⁠:31), Hades lalonai idia noho taudia oredia iboudiai be toreisi-lou amo “do idia mauri” lou. (Apok. 1⁠:18; 20⁠:13) Bena idia iboudiai ese mauri hanaihanai do idia abia a? Dirava ese mauri hanaihanai abia dalana do ia kehoa idia edia, to Ioane 5⁠:​28, 29 ese ia hahedinaraia, idia haida ese unai dala do idia abia dae lasi dainai “kota” do idia davaria.

Tito 2⁠:11 ia gwau: “Taunimanima ibounai do ia hamauria”; unai siri ena anina be dahaka? Ioane 12⁠:​32, Roma 5⁠:​18, bona 1 Timoteo 2⁠:​3, 4 edia hereva be unai siri ena hereva hegeregerena. Unai siri lalodiai, inai hereva “ibounai” be Greek gado herevana pas amo idia hahanaia. Vine’s Expository Dictionary of New Testament Words (London, 1962, Vol. I, p. 46) ia gwau, pas ena anina ma ta be “toa idauidau iboudiai.” Unai dainai unai siri lalodiai inai hereva, “taunimanima toadia idauidau iboudiai,” idia torea be maoro danu. To edena hereva be maoro​—⁠“ibounai” eiava “toadia idauidau iboudiai”? Edena hereva be Baibel ena hereva oredia hegeregeredia? Hereva iharuana be maoro. Kara 10⁠:​34, 35; Apokalupo 7⁠:​9, 10; 2 Tesalonika 1⁠:9 itaia.

Baibel ena siri haida ese idia hahedinaraia goevagoeva Dirava ese taunimanima haida do ia hamauridia lasi, a?

2 Tes. 1:9: “Edia davana be inai: idia be Lohiabada ena vairana bona iena hairai siahuna dekena amo daudau do idia noho. Inai anina be, idia do ia haorea momokani, bona inai bamona do idia noho hanaihanai.”

Apok. 21:⁠8: “Gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salifa idia araia noho gabunai do idia lao. Inai be mase iharuana.”

Mat. 7:13, 14: “Iduara maragina dekenai do umui raka vareai. Badina be lahi gabuna ia lao dalana ena iduara ia bada bona ena dala danu bada herea. Bona taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”

Dirava ese ia hamauridia vadaeni taudia idia boio diba lasi, a?

Iuda 5: “Inai sivarai gunana umui diba vadaeni, to mani do umui laloa lou. Lohiabada ese Israela taudia Aigupito dekena amo ia hamauria. To gabeai Dirava ese ia idia abidadama henia lasi taudia ia alaia mase.”

Mat. 24:⁠13: “Ena lalona do ia goada noho ela bona dokona, unai tauna be do ia mauri.” (Anina be, ta ese Iesu ia abidadama henia matamaia neganai hahemauri ia abia vaitani lasi.)

Fil. 2:⁠12: “Umui dekenai lau noho neganai lau umui kamonai henia. Vadaeni harihari umui dekenai lau noho lasi neganai danu lau do umui kamonai henia, inai be gau badana. Mai gari bona mai heudeheude danu emui hahemauri do umui tahua noho.” (Filipi 1⁠:1 ese ia hahedinaraia Paulo ese unai hereva be “Dirava ena taudia Filipi dekenai” ia gwauraia. Paulo ese ia hamaorodia, namona be do idia naria namonamo badina hahemauri idia do abia vaitani lasi.)

Heb. 10:26, 27: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba. To iseda dokona be unai, mai gari bada danu Kota Badana do ita naria noho. Badina lahi siahu bada herea ese Dirava idia negea taudia ibounai do ia aradia ore.” (Taunimanima haida idia gwau Dirava ese ta ia “hamauria” murinai, herevana edena kara dika ia karaia to ena hahemauri do ia haboioa lasi. Baibel ese unai hereva ia hamomokania lasi. Ita ia hagoadaia, nega ibounai Dirava do ita badinaia totona. Heberu 6⁠:​4-6 danu oi itaia, unai siri ese idia hahedinaraia ena be ta ese Dirava ena lauma helaga ia abia vadaeni, to iena hahemauri helarona ia haboioa diba.)

Abidadama sibona dainai mauri do ita davaria diba a?

Ef. 2:8, 9: “Dirava ena hariharibada ese umui ia hamauria vadaeni abidadama dainai, umui sibona ese lasi, to Dirava ena hariharibada, davana lasi ese. Bona gaukara dekena amo lasi, tau ta do ia heagi garina.” (Iena hariharibada dainai Dirava ese hahemauri dalana ia karaia. Ena be Adam ena bese tauna ta ese kara namo hereadia ia karaia, to sibona ena goada amo mauri do ia davaria diba lasi. Mauri be Dirava ena harihari gauna, iena Natuna ena boubou gauna idia abidadama henia taudia do ia henidia gauna.)

Heb. 5:⁠9: “Ia [Iesu] be hegeregere vadaeni ia dekenai idia kamonai henia taudia ibounai mauri hanaihanai do ia henidia.” (Unai hereva ese inai hereva, “umui ia hamauria vadaeni abidadama dainai,” ia hakoikoia, a? Lasi momokani. Edia kamonai karana ese ia hahedinaraia edia abidadama be momokani.)

Iak. 2:14, 26: “Lauegu varavara e, tau ta bema ia gwau ia be abidadama tauna, to kara namona ta ia karaia lasi, iena namo be dahaka, a? Abidadama ese ia do ia hamauria diba, a? Ita diba, tauanina bema mai ena lauma lasi, ia be mase gauna, ani? Vadaeni unai bamona danu abidadama mai ena kara namodia lasi, be mase gauna.” (Hahemauri be taunimanima ta ena kara ena davana lasi. To abidadama momokani tauna be mai ena kara danu​—⁠Dirava bona Keriso edia hahegani badinaia karadia unai; unai kara amo iena abidadama bona iena lalokau ia hahedinaraia. Bema ia be mai ena kara lasi, ena abidadama ia mase.)

Kara 16⁠:​30, 31: “ ‘Lohia taudia e, dahaka lau karaia mauri abia totona?’ Idia ruaosi [Paulo bona Sila] idia gwau, ‘Lohiabada Iesu oi abidadama henia, bona hahemauri do oi abia, oi bona oiemu ruma taudia danu.’ ” (Bema unai tau bona ena ruma bese taudia ese Iesu idia abidadama henia momokani, idia be edia abidadama hegeregerena do idia kara, ani?)

Bema Ta Ia Gwau​—⁠

‘Hahemauri lau abia vadaeni’

Reana inai bamona oi haere henia diba: ‘Lau moale badina unai ese ia hahedinaraia Iesu Keriso oi abidadama henia. Hari lau karaia gaukarana be Iesu ese iena hahediba taudia ia henidia gaukarana, Basileia ena sivarai harorolaia gaukarana inai. (Mat. 24⁠:14)’ Bena reana ma oi gwau: (1) ‘Unai Basileia be dahaka? Basileia ena mai ena anina be dahaka tanobada dekenai? (Dan. 2⁠:44)’ (2) ‘Unai guba gavamanina ena lohia siahuna henunai, dahaka do ia vara tanobada dekenai? (Sal. 37⁠:11; Apok. 21⁠:​3, 4)’

Eiava inai bamona oi hereva diba: ‘Unai dainai oi ese aposetolo Petro ena hereva Kara 4⁠:12 lalonai oi laloa bada ani? . . . Daika ese Iesu ena ladana ia henia do ita abidadama henia totona?’ Bena reana ma oi gwau: (1) ‘Unai siri ia gwau, Dirava ese.’ (2) ‘Mani inai oi laloa, Iesu ia gwau ia ese ena Tamana ena ladana ia hadibaia taunimanima dekenai. (Ioane 17⁠:⁠6) Iena ladana be daika? Iena ladana oi kamonai neganai oi laloa ia be edena bamona Diravana? (Eso. 3⁠:15; 34⁠:​5-7)’

‘Dirava ese oi ia hamauria vadaeni a?’

Reana inai bamona oi haere henia diba: ‘Ema bona hari lau ia hamauria noho. Unai bamona lau hereva badina Baibel ena sisiba lau laloa, ia gwau bema ita laloa ita gini goada, namona be ita naria namonamo, do ita moru garina. Unai siri oi diba, a? (1 Kor. 10⁠:12)’ Bena reana ma oi gwau: ‘Dahaka dainai unai bamona ia vara diba? Idia vara lou taudia, Dirava ese ia abidia hidi guba lalonai do idia mauri totona taudia (Heb. 3⁠:⁠1), be aposetolo Paulo ese ia tore henidia, ia gwau . . . (Heb. 3⁠:​12-14) Iseda diba Dirava ena Hereva dekenai habadaia karana amo iseda abidadama ita hagoadaia diba.’

Eiava inai bamona oi hereva diba: ‘Oibe. To oi diba Baibel ese hahemauri tamona sibona ia gwauraia lasi, a? Oi ese Apokalupo 7⁠:​9, 10, 14 ena anina oi laloa vadaeni, a? . . . Unai ena anina be, taunimanima be do ia vara hisihisina badana amo do idia roho mauri, bena tanobada dekenai do idia noho. (Mat. 5⁠:⁠5)’

‘Iesu oi abia dae oiemu Hahemauri Tauna a?’

Rau 219 itaia, inai sinado “Iesu Keriso” henunai.

‘Umui gwau taunimanima 144,000 sibodia ese mauri do idia abia’

Reana inai bamona oi haere henia diba: ‘Lau moale unai hereva oi gwauraia dainai, badina lau ura ai abia dae herevana korikorina be oi do lau hamaoroa. Dirava ese Iesu ena amo ia karaia dalana idia abidadama henia momokani taudia iboudiai ese hahemauri idia davaria diba. To Baibel ia gwau taunimanima 144,000 sibodia be guba dekenai do idia lao bona Keriso ida do idia noho. Unai hereva be Baibel lalonai oi itaia vadaeni, a? . . . Ia be iniseniai, Apokalupo 14⁠:​1, 3 lalonai.’ Bena reana ma oi gwau: (1) ‘Guba lalonai dahaka do idia karaia? (Apok. 20⁠:⁠6)’ (2) ‘Idia ese daidia do idia lohiadia? . . . (Mat. 5⁠:5; 6⁠:10)’