Oiemu Ladana be Edena Bamona Ladana?

BAIBEL lalonai, inai hereva “ladana” be nega haida ta ena kara ia herevalaia. Hegeregere, aonega King Solomona ia gwau: “Tau ta ena ladana namona ese davana bada muramura mai bonana namo ia hereaia noho. Bona tau ena mase dinana ese iena vara dinana ia hereaia noho.” (Hadibaia Tauna 7:1; Aonega Herevadia 22:1 itaia.) Solomona ena hereva ena anina be tau ta be ladana namona ida ia vara lasi. To, ia mauri noho lalonai ia karaia karadia ese ena ladana dekenai anina ia henia. Iena ladana ese iena kara ia hahedinaraia, ia be hariharibada o mataganigani tauna, ia be hebogahisi o dagedage tauna, manau o hekokoroku tauna, kara goeva o kara gageva tauna.

Mani Davida oi laloa. Ia lohia negana lalonai, ia hahedinaraia ia goada bona ia marere lasi. To unai nega tamona ai, Davida ese mai manau ida iena kerere ia abia dae bona ena kara dika badadia amo ia helalo-kerehai. Badina namona dainai, Iehova ena peroveta tauna ia hahedinaraia Davida be Dirava “ese ia ura henia tauna.” (1 Samuela 13:14) Mero matamatana Davida be mai ena ladana namona Dirava vairanai.

To, Iuda ena King Iehorama be sibona ena ladana ia hadikaia. Iehova tomadiho henia karana amo iena taunimanima ia hakaua siri bona ena tadina 6 bona Iuda ena lohia taudia haida ia hamasedia danu. Gabeai, Iehova ese Iehorama dekenai hisihisi bada herea gorerena ia henia bena ia mase. Baibel ia gwau Iehorama “ia mase neganai tau ta ese ia totona ia lalohisihisi lasi.”​—⁠2 Sivarai 21:⁠20.

Davida bona Iehorama edia mauri dalana ese Baibel ena aonega herevana ia hamomokania, ia gwau: “Kara maoromaoro tauna ta ia mase murinai, taunimanima ese ia idia laloatao neganai, moale bona hanamoa idia davaria noho, to kara dika tauna ena ladana, be taunimanima do idia laloaboio.” (Aonega Herevadia 10:⁠7) Unai dainai namona be ita ta ta ese inai henanadai ita laloa namonamo, ‘Lauegu ladana be edena bamona Dirava bona taunimanima vairadiai?’