‘Do Umui Lao, Bona Diba Tahua Taudia Umui Halaoa’

“Siahu ibounai guba dekenai bona tanobada dekenai be lau dekenai ia henia vadaeni. Unai dainai do umui lao, bese ibounai be diba tahua taudia do umui halaoa.”​—⁠MATAIO 28:​18, 19.

1, 2. (a) Dahaka gaukara be Iesu ese ia murinai idia raka taudia dekenai ia henia? (b) Iesu ena hahegani dainai, dahaka henanadai do ita herevalaia?

UNAI be lagani 33 C.E. ena siahu matamaia negana ta Israela dekenai, bona Iesu ena hahediba taudia be Galilea ororona ta ai idia haboua. Edia toreisi lou Lohiabadana be kahirakahira guba dekenai do ia daekau, to ia ura idia dekenai gau badana ta ia gwauraia guna. Iesu ia ura gaukara ta ia henia idia dekenai. Unai be dahaka gaukara? Iena hahediba taudia ese unai gaukara do idia abia dae, eiava? Bona hari unai gaukara ena anina ita dekenai be dahaka?

² Iesu ia gwauraia herevana be Mataio 28:​18-20 dekenai: “Siahu ibounai guba dekenai bona tanobada dekenai be lau dekenai ia henia vadaeni. Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.” Iesu ese “siahu ibounai,” “bese ibounai,” “umui dekenai lau henia hereva ibounai” bona “hanaihanai” ia herevalaia. Iena hahegani lalonai unai hereva foa idia noho dainai henanadai badadia haida idia vara, hegeregere: dahaka dainai? edeseniai? dahaka? bona edena negai? Namona be unai henanadai ta ta ita herevalaia.a

“Siahu Ibounai . . . be Lau Dekenai Ia Henia Vadaeni”

3. Dahaka dainai hahediba taudia halaoa gaukarana ena hahegani ita badinaia be namo?

³ Ginigunana be, dahaka dainai hahediba taudia halaoa gaukarana ena hahegani ita badinaia be namo? Iesu ia gwau: “Siahu ibounai guba dekenai bona tanobada dekenai be lau dekenai ia henia vadaeni. Unai dainai do umui lao, bese ibounai be diba tahua taudia do umui halaoa.” Inai hereva “unai dainai” ese ia hahedinaraia dahaka dainai unai hahegani ita badinaia be gau badana. Unai ena badina be Iesu, unai hahegani ia henia tauna be “siahu ibounai” ia abia. Iena siahu ena bada be edena bamona?

4. (a) Iesu ena siahu ena bada be edena bamona? (b) Iesu ena siahu lalo-pararalaia karana ese ita edena bamona do ia durua, hahediba taudia halaoa gaukarana ena hahegani ita laloa bada totona?

⁴ Iesu be mai ena siahu ena kongregesen dekenai, bona lagani 1914 murinai siahu ia abia vadaeni, Dirava ena Basileia matamatana lohiaia totona. (Kolose 1:13; Apokalupo 11:15) Ia be aneru badana dainai, guba ai idia noho aneru milioni momo herea be ena siahu henunai idia noho. (1 Tesalonika 4:16; 1 Petero 3:22; Apokalupo 19:​14-16) Iena Tamana ese ia hasiahua dainai, Iesu ese hakaua hereva maorodia idia dadaraia “gunalaia taudia ibounai, lohia taudia ibounai, bona siahu taudia ibounai do ia haorea.” (1 Korinto 15:​24-26; Efeso 1:​20-23) Iesu be mauri taudia biagua siahuna sibona ia abia lasi. To ia be “mauri taudia bona mase taudia edia kota biaguna gaukara do ia karaia” danu, bona Dirava ese ia henia siahuna amo mase lalonai idia mahuta taudia do ia hatoredia isi lou. (Kara 10:42; Ioane 5:​26-28) Momokani, Dirava amo siahu bada ia abia Tauna ena hahegani ita laloa bada be namo. Unai dainai, mai hemataurai bona ura ida Keriso ena hahegani, “do umui lao . . . diba tahua taudia do umui halaoa” ena hahegani ita badinaia be namo.

5. (a) Petero ese Iesu ena hereva be edena bamona ia badinaia? (b) Petero ese Iesu ena hereva ia badinaia dainai, dahaka hahenamo ia abia?

⁵ Tanobada ai, Iesu be ena haroro ia hamatamaia neganai, dala hereadaena amo ena hahediba taudia ia hadibaia, idia ese iena siahu idia abia dae bona ena hahegani idia badinaia neganai, hahenamo momo do idia abia. Nega ta, ia ese haoda tauna Petero ia hamaoroa: “Dobu kahana dekenai ita lao, emui reke do umui atoa diho, gwarume do umui abia totona.” Petero ia diba gwarume be lasi dainai, Iesu ia hamaoroa: “Egu biaguna e, ai be hanuaboi lalonai ai hekwarahi mase ia mai daba ia rere, gwarume ta ai abia lasi.” To, Petero be mai manau ida ma ia gwau: “To oiemu hereva dainai reke be do ai atoa diho.” Petero ese Keriso ena hahegani ia badinaia murinai, ‘gwarume momo herea ia abia.’ Petero ia hoa bada bona “Iesu ena aena badinai ia tui diho, ia gwau, ‘Lohiabada e, lau dekena amo do oi raka siri, badina lau be dika tauna.’ ” To Iesu ia gwau: “Oi gari lasi, inai murinai be do oi haoda, taunimanima do oi abia.” (Luka 5:​1-10; Mataio 4:18) Unai sivarai amo dahaka ita dibaia?

6. (a) Hoa dalanai gwarume momo abia sivaraina ese ia hahedinaraia Iesu be edena badinaia karana ia ura henia? (b) Edena bamona Iesu ita tohotohoa diba?

⁶ Petero, Andrea bona aposetolo ma haida be hoa dalanai gwarume momo idia abia murinai, Iesu ese idia dekenai taunimanima haoda henia gaukarana ia henia. (Mareko 1:​16, 17) Ia hedinarai goevagoeva, Iesu ia ura lasi haida ese iena hereva idia badinaia kava. Ia ese badina namona ta amo Petero bona Andrea ia hadibaia dahaka dainai ia idia badinaia be namo. Idia ese Iesu ena hahegani idia badinaia bena edia reke idia atoa diho bona hahenamo idia abia hegeregerena, bema Iesu ena hahegani idia badinaia bona taunimanima haoda henia gaukarana idia karaia, hahenamo momo do idia abia. Aposetolo taudia be mai edia abidadama danu Iesu ena hereva idia badinaia. Unai sivarai dokona ia gwau: “Unai haoda taudia ese vanagi ruaosi be kone badinai idia atoa, vadaeni gau ibounai idia rakatania, Iesu ena murina dekenai idia raka.” (Luka 5:11) Hari, ita ese ma haida ita hagoadaia hahediba taudia halaoa gaukarana idia karaia neganai, Iesu ita tohotohoa unai. Ita ura lasi taunimanima be iseda hereva idia badinaia kava, to eda hereva ena badina namodia ita gwauraia, Keriso ena hahegani idia badinaia totona.

Badina Namodia Bona Maorodia

7, 8. (a) Basileia harorolaia bona hahediba taudia halaoa gaukarana ita karaia ena badina ia herevalaia siridia haida be dahaka? (b) Edena siri be oi ia hagoadaia haroro gaukara oi karaia noho totona? (Futnout itaia danu.)

⁷ Iesu ena siahu ita abia dae dainai, namona be Basileia harorolaia bona hahediba taudia halaoa gaukarana ita karaia. Unai gaukara ita karaia ena badina ia herevalaia Baibel siridia ma haida be dahaka, bona ita ura unai siri amo ma haida ita hagoadaia unai gaukara namodia idia karaia totona? Tanobada idauidau ai idia noho kamonai Witnes taudia haida edia hereva bona Baibel siridia ese edia hereva ia hamomokania dalana mani oi laloa.

⁸ Roy, lagani 1951 ai ia bapatiso tadikakana ia gwau: “Iehova dekenai egu mauri lau gwauhamatalaia neganai, lau gwauhamata Ia do lau hesiai henia hanaihanai totona. Lau ura egu hereva lau badinaia noho.” (Salamo 50:14; Mataio 5:37) Heather, lagani 1962 ai ia bapatiso taihuna ia gwau: “Iehova ese lau totona ia karaia gaudia ibounai lau laloa neganai, lau ura Ia lau hesiai henia karana amo Ia lau tanikiu henia.” (Salamo 9:​1, 9-11; Kolose 3:15) Hannelore, lagani 1954 ai ia bapatiso taihuna ia gwau: “Nega ta ta iboudiai, haroro gaukara ita karaia neganai, aneru ese ita idia durua​​—⁠unai be hahenamo badana ta!” (Kara 10:​30-33; Apokalupo 14:​6, 7) Honor, lagani 1969 ai ia bapatiso taihuna ia gwau: “Iehova ena hahemaoro negana ia ginidae neganai, lau ura lasi egu dekena taudia idia gwau Iehova bona ena Witnes taudia be lau idia laloa lasi bona idia gwau, ‘Lau dekenai hadibaia herevana idia henia lasi!’ ” (Esekiela 2:5; 3:​17-19; Roma 10:​16, 18) Claudio, lagani 1974 ai ia bapatiso tadikakana ia gwau: “Ita haroro neganai, ita be ‘Keriso ena hesiai taudia dainai, Dirava ena vairana dekenai’ iseda hesiai gaukara ita karaia noho. Unai be hoa gauna! Haroro gaukara ita karaia neganai, iseda Turadia namodia edia hebamo ita moalelaia.”​—⁠2 Korinto 2:17.b

9. (a) Petero bona aposetolo taudia ma haida edia haoda sivaraina ese Keriso badinaia karana dekenai dahaka badina maorona ia hahedinaraia? (b) Hari, dahaka badina maorona dainai Dirava bona Keriso ita badinaia?

⁹ Danu, gwarume momo abia sivaraina ese ia hahedinaraia, gau badana be badina maorona​​—⁠lalokau​​—⁠dainai Keriso ita badinaia. Petero ia gwau, “Lau dekena amo do oi raka siri, badina lau be dika tauna” neganai, Iesu be ia raka siri lasi eiava Petero ena kara dikana ta dainai ia gwau henia lasi. (Luka 5:⁠8) Bona Iesu be Petero ia maumauraia lasi, herevana Iesu ia noia ia raka siri totona. To, Iesu be mai hebogahisi ida ia gwau: “Oi gari lasi.” Keriso badinaia karana dekenai gari be badina kererena. To, Iesu ese Petero ia hamaoroa, ia bona ena turadia be taunimanima haoda henia taudia ai do idia lao. Hari inai negai, ita danu ita ura lasi gari eiava unai bamona hemami dikana, hegeregere kerere eiava hemarai mamina ita gaukaralaia ma haida ita doria Keriso idia badinaia totona. Bema Dirava bona Keriso lalokau henia karana dainai mai lalona ibounai ida idia ita badinaia, Iehova ena kudouna ita hamoalea.​—⁠Mataio 22:⁠37.

“Bese Ibounai be Diba Tahua Taudia Do Umui Halaoa”

10. (a) Iesu ena hahegani, hahediba taudia halaoa gaukarana ena hahegani amo, edena hereva ese ia hahedinaraia iena hahediba taudia be gaukara badana do idia karaia? (b) Hahediba taudia ese Iesu ena hahegani be edena bamona idia badinaia?

¹⁰ Keriso ena hahegani dainai ia vara henanadai iharuana be inai: Edeseniai inai hahediba taudia halaoa gaukarana ita karaia be namo? Iesu be ia murinai idia raka taudia ia hamaoroa: “Bese ibounai be diba tahua taudia do umui halaoa.” Iesu be haroro gaukarana ia do hamatamaia lasi negana lalonai, bema idau bese taudia be Iehova tomadiho henia totona Israela dekenai idia mai, Israela taudia ese idia abidia dae. (1 King Taudia 8:​41-43) Iesu be Iuda taudia sibona ia haroro henia, to hari ia ese ia murinai idia raka taudia ia hamaoroa, namona be do idia lao bona bese ibounai idia haroro henia. Momokani, iena hahediba taudia edia haoda gabuna, eiava haroro teritori, be “gohu” maragina ta bamona dekenai​​—⁠Iuda taudia korikoridia unai​​—⁠to kahirakahira “davara” ibounai​​—⁠taunimanima ibounai unai⁠—​do idia haoda henia. Ena be hahediba taudia dekenai unai be gaukara badana, to mai edia ura ida Iesu ena hadibaia herevana idia badinaia. Iesu ia mase bena lagani 30 bamona murinai, aposetolo Paulo ia gwau diba sivarai namona be Iuda taudia sibona lasi to “tanobada ibounai dekenai ai harorolaia vadaeni.”​—⁠Kolose 1:⁠23.

11. Lagani 1900 murinai, taunimanima ‘haoda henia gabudia’ be edena bamona ia bada ia lao?

¹¹ Idia hanaia laganidia lalonai, haroro teritori be unai bamona ia bada daekau be ita itaia vadaeni. Lagani 1900 ia matamaia neganai, taunimanima ‘haoda henia gabudia’ be tano haida sibona dekenai. To unai neganai, Keriso ena murinai idia raka taudia be Keristani taudia ginigunadia edia haheitalai idia tohotohoa, bona mai edia ura ida edia haroro teritori idia habadaia. (Roma 15:20) Lagani 1930 bamona ai, idia ese hahediba taudia halaoa gaukarana be tano handred ta bamona dekenai idia karaia. Hari, taunimanima ‘haoda henia gabudia’ be ia bada daekau tano 235 dekenai.​—⁠Mareko 13:⁠10.

‘Gado Idauidau Ibounai Dekena Amo’

12. Sekaraia 8:23 ena peroveta herevana ese dahaka gaukara badana ia herevalaia?

¹² Taunimanima be hahediba taudia halaoa gaukarana be gaukara badana, teritori ena bada dainai sibona lasi to gado danu. Iehova be peroveta tauna Sekaraia amo ia gwau: “Unai dinadia lalonai tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.’ ” (Sekaraia 8:23) Unai peroveta herevana ia guguru negana badana ai, “Iuda tauna ta” be horoa Keristani orena taudia ia laulaulaidia, bona “tau ibounai 10” be “hutuma bada herea” idia laulaulaia.c (Apokalupo 7:​9, 10; Taravatu Matamatana; Galatia 6:16) Keriso ena hahediba taudia hutuma bada herea be bese idauidau amo, bona Sekaraia ia gwau bamona, idia be gado idauidau ai idia hereva taudia. Hari inai negai, Dirava ena orea taudia be unai bamona toana idia hahedinaraia, a? Oibe.

13. (a) Dahaka ia vara Iehova ena orea taudia edia gado dekenai? (b) Gado idauidau taudia be lauma aniani idia ura henia dainai, hesiai tauna mai ena kamonai oreana be dahaka ia karaia? (“Matakepulu Taudia Edia Buka” mauana herevalaia danu.)

¹³ Lagani 1950 ai, tanobada hegegemadai Iehova ena Witnes taudia faiv faiv amo toi toi edia gado korikorina be English gado. Lagani 1980 ai unai namba ia idau, hegeregere Witnes taudia faiv faiv amo rua rua edia gado korikorina be English gado, bona hari Witnes taudia faiv faiv amo ta ta sibona ena gado korikorina be English gado. Unai kara dainai, hesiai tauna mai ena kamonai bona mai ena kara maoromaoro oreana be dahaka ia karaia? Lauma aniani be gado idauidau ai idia halasia. (Mataio 24:45) Hegeregere, lagani 1950 ai, iseda buka be gado 90 ai idia halasia, to hari unai namba ia bada daekau gado 400 bamona dekenai. Unai gado idauidau taudia laloa bada karana ese anina namona ia havaraia, a? Oibe! Pura ta ta lalonai “gado idauidau” taudia 5,000 bamona be Keriso ena hahediba taudia ai idia lao! (Apokalupo 7:⁠9) Bona unai namba ia bada noho. Tano haida ai, “reke” dekenai be gwarume momo herea idia abia noho bamona!​—⁠Luka 5:6; Ioane 21:⁠6.

Moale Ia Havaraia Haroro Gaukarana ​—⁠Oi Karaia Diba, A?

14. Iseda teritori dekenai, gado ma ta idia herevalaia taudia be edena bamona ita durudia diba? (“Taia Kudima Gado Bona Hahediba Taudia Halaoa Gaukarana” ena maua herevalaia danu.)

¹⁴ West tanodia momo dekenai, idau tano amo idia mai “gado idauidau” taudia dainai, hahediba taudia halaoa gaukarana ia bada. (Apokalupo 14:⁠6) Iseda teritori dekenai, gado ma ta idia herevalaia taudia be edena bamona ita durua diba? (1 Timoteo 2:⁠4) Laulau dalanai, haoda gaukarana dekenai tulu maorona ita gaukaralaia diba be namo. Unai bamona taudia dekenai edia gado ai idia halasia bukana ta ita henia. Bema dala ia noho, namona be edia gado ia diba Witnes tauna ta ita hadibaia bona idia ia vadivadi henia. (Kara 22:⁠2) Hari unai bamona dala ita karaia be auka lasi, badina Witnes taudia momo be edia gado sibona lasi to gado ma haida idia dibaia, unai amo idau tano taudia idia durua Keriso ena hahediba taudia ai idia lao totona. Ripoti haida ese idia hahedinaraia, unai bamona dala amo heduru henia karana ese anina namona ia havaraia.

15, 16. (a) Edena ekspiriens ese idia hahedinaraia gado idauidau taudia durua gaukarana be moale gauna? (b) Idau gado taudia ita haroro henidia totona, edena henanadai ita laloa be namo?

¹⁵ Netherlands amo haheitalai rua mani ita laloa, unai gabu ai Basileia harorolaia gaukarana be gado 34 dekenai idia karaia. Witnes tadikaka ta bona ena adavana be idia ura do idia lao bona idau tano amo idia mai Polish gado herevalaia taudia be hahediba taudia ai idia halaoa. Kamonai taudia momo idia davaria dainai, tadikaka ia laloa ena moni gaukara ia hamaragia be namo, unai amo pura ta ta lalonai, dina haida ia atoa diba kamonai taudia ida Baibel ia stadilaia totona. Daudau lasi murinai, idia ese Baibel stadi 20 mai kahana be pura ta ta lalonai idia karaia. Idia gwau: “Aiemai haroro gaukara ai moalelaia bada.” Kamonai taudia ese Baibel ena hereva momokani be edia gado ai idia kamonaia bona idia tanikiu neganai, hahediba taudia halaoa gaukarana idia karaia taudia idia moale. Hegeregere, Vietnam gado ai idia karaia hebouna ta lalonai, tau buruka ta ia toreisi bona ia noinoi bema namo hereva ta ia gwauraia. Mai ena matana ranu ida Witnes taudia dekenai ia gwau: “Tanikiu bada herea, badina umui hekwarahi egu gado auka hereana umui dibaia totona. Lauegu buruka negana lalonai, Baibel amo gau namodia momo lau dibaia dainai lau moale bada.”

¹⁶ Unai dainai ita daradara lasi, idau gado idia herevalaia kongregesen ai hesiai gaukara idia karaia taudia idia moale. Britain ai, tadikaka ta bona ena adavana idia gwau: “Lagani 40 lalonai Basileia hesiai gaukara ai karaia, to emai gaukara inai gado idauidau teritori dekenai ai moalelaia bada herea.” Emu noho dalana oi haidaua diba, unai amo inai haroro gaukara namona oi karaia diba, a? Bema oi do sikuli noho, gado ma ta oi dibaia diba, unai amo do oi hegaegae unai bamona haroro gaukarana oi durua totona, a? Unai bamona oi karaia neganai, reana dala do ia kehoa hahenamo amo ia honu mauri dalana oi badinaia totona. (Aonega Herevadia 10:22) Emu tama sina ida unai umui herevalaia be namo, ani?

Iseda Haroro Daladia Ita Haidaua

17. Edena bamona eda kongregesen teritori ai taunimanima momo ita davaria diba?

¹⁷ Momokani, eda noho dalana dainai, reana ita momo be hegeregere lasi idau gado taudia edia teritori ai eda “reke” ita atoa totona. To, reana hari iseda kongregesen ena teritori ai idia noho taudia ma haida ita haroro henia diba. Edena dala ai? Iseda hereva lasi to eda haroro daladia ita haidaua. Gabu haida ai, taunimanima momo be hari magu badadia lalonai idia noho. Ma haida be iseda ruma-ta-ruma-ta haroro gaukara ita karaia neganai idia noho lasi. Unai dainai, iseda “reke” be nega bona gabu idauidau ai ita atoa be namo. Unai amo Iesu ita tohotohoa. Ia ese dala ia tahua, gabu idauidau dekenai taunimanima ia haroro henia totona.​—⁠Mataio 9:9; Luka 19:​1-10; Ioane 4:​6-15.

18. Edena dala ai gabu idauidau ai haroro gaukarana ese anina namona ia havaraia? (“Bisinesi Taudia be Hahediba Taudia ai Halaoa” mauana herevalaia danu.)

¹⁸ Tanobada ena kahana haida ai, taunimanima idia davaria diba gabudiai haroro gaukara karaia karana be hahediba taudia halaoa gaukarana ena dala badana ta. Hahediba taudia halaoa gaukarana idia manadalaia taudia be gabu idauidau ai idia haroro. Pablisa taudia be ruma-ta-ruma-ta sibona lasi to peleini gabudia, opesi, sitoa gabudia, motuka atoa gabudia, PMV abia gabudia, dala, loaloa gabudia, kone bona gabu ma haida dekenai haroro gaukarana idia karaia. Hawaii ai, idia bapatiso matamata taudia momo be guna unai bamona gabudia dekenai idia haroro henia taudia. Iseda haroro daladia haidaua karana ese ita do ia durua Iesu ena hahegani, hahediba taudia halaoa gaukarana ena hahegani ita badinaia momokani totona.​—⁠1 Korinto 9:​22, 23.

19. Iesu ena hahegani dainai idia vara henanadai ma rua be stadi gabena ai do ita herevalaia, idia be dahaka?

¹⁹ Iesu ena hahegani, hahediba taudia halaoa gaukarana ena hahegani lalonai inai henanadai, dahaka dainai bona edeseniai ita haroro sibona lasi, to danu, dahaka ita harorolaia bona unai bamona ita karaia noho ela bona edena negai be namo, idia noho danu. Iesu ena hahegani dainai idia vara henanadai ma rua be stadi gabena dekenai do ita herevalaia.

[Footnotes]

Oi Laloatao, A?

• Dahaka badina namodia bona ura maorodia dainai Basileia harorolaia bona hahediba taudia halaoa gaukarana ita karaia?

• Hari, Iehova ena hesiai taudia ese edena bamona Iesu ena hahegani, taunimanima ibounai be hahediba taudia halaoa gaukarana ena hahegani idia badinaia?

• Edena bamona iseda ‘haoda daladia’ ita haidaua diba, bona dahaka dainai unai bamona ita karaia be namo?

[Box/Pictures on page 20]

Matakepulu Taudia Edia Buka

Albert be Keristani elda ta bona ful-taim hesiai tauna ta United States dekenai. Ia be matakepulu tauna. Ia ese Baibel idia herevalaia Braille bukadia ia gaukaralaia dainai, unai ese ia durua ena hesiai gaukara bona haroro naria tauna ena maduna ia huaia namonamo diba. Iena kongregesen maduna be edena bamona ia huaia?

James, kongregesen ena hakaua naria tauna, ia gwau: “Emai kongregesen ai Albert be haroro naria tauna namona.” United States ai, matakepulu taudia 5,000 bamona amo Albert be idia ta, bona idia hanaia laganidia lalonai, ia ese Baibel idia herevalaia Braille bukadia be English gado bona Spanish gado ai ia abia. Momokani, lagani 1912 amo, hesiai tauna mai ena kamonai oreana be Braille bukadia idauidau handred mai kahana idia halasia vadaeni. Hari Iehova ena Witnes taudia be printa masini matamatadia idia gaukaralaia dainai, lagani ta ta ai, idia ese Braille bukadia milioni momo be gado 10 mai kahana ai idia karaia bona tano 70 mai kahana dekenai idia siaia lao. Matakepulu taudia totona idia hegaegaelaia Baibel bukadia amo namo ia abia tauna ta oi diba, a?

[Box/Picture on page 21]

Taia Kudima Gado Bona Hahediba Taudia Halaoa Gaukarana

Tanobada hegegemadai Witnes taudia tausen momo, memero kekeni goadadia danu, be taia kudima gado idia dibaia, unai amo taia kudima taudia idia durua Keriso ena hahediba taudia ai idia lao totona. Unai dainai, vanegai Brazil sibona dekenai, taia kudima taudia 63 be bapatiso idia abia bona unuseniai taia kudima Witnes taudia 35 be hari ful-taim haroro gaukara idia karaia. Tanobada hegegemadai, taia kudima gado kongregesen bona grup ibounai 1,200 mai kahana idia noho. To, tanobada ibounai amo Russia sibona ena taia kudima gado sekit be sekit badana!

[Box on page 22]

Bisinesi Taudia be Hahediba Taudia ai Halaoa

Hawaii dekenai, Witnes taihu ta be bisinesi taudia edia gaukara ena opesi ai ia vadivadi neganai, trenspot kampani ta ena biaguna ia davaria. Ena be ia bisi, to ia ura ena opesi ai Baibel stadi be pura tamona lalonai miniti 30 idia abia. Wednesday daba ta ta ai, ena gaukara tauna ia hadibaia do ia rini lasi, bona ia be ia stadi namonamo diba. Hawaii dekenai, Witnes taihu ma ta be pura tamona lalonai nega tamona tamaka karaia sitoa ena biaguna ida Baibel idia stadilaia. Edia stadi be sitoa dekenai idia karaia. Kastoma ia mai neganai, Witnes taihu ia gini siri sisina. Kastoma ia lao neganai, edia stadi idia karaia lou.

Unai trenspot kampani biaguna bona sitoa biaguna idia davaria, badina Witnes taudia ese dala idia karaia “reke” be gabu idaudia ai idia atoa totona. Emu kongregesen teritori ai gabu haida oi laloa, bona ruma ai oi davaria lasi taudia be unuseniai oi haroro henia diba, a?

[Picture on page 22]

Idau gado taudia edia teritori dekenai oi haroro diba, a?