Taunimanima ta ese Dirava Ia Itaia A?

LAGANI 1,900 bamona Iesu Keriso be tanobada ai ia do vara lasi neganai, Abraham ia noho. Ita ia Havaraia Diravana ese ia lalo-namo henia dainai, idia gwauraia “Dirava ena turana.” (Iakobo 2:23) Bema Dirava ese ta do ia abia hidi, ia do ia itaia totona, momokani ia ese Abraham do ia abia hidi. Nega ta ai, vadivadi taudia toi ese Dirava ena hereva ta idia mailaia Abraham dekenai. Abraham ese idia ta ia hereva henia neganai, ena ladana Iehova ia hatoa. Abraham ese Iehova ia itaia momokani a?

Inai sivarai be Genese 18:​1-3 ai ia noho. Ia gwau: “Iehova ese Aberahamo dekenai ma ia hedinarai lou, Mamare ena au helagadia gabu dekenai. Dina tubua neganai Aberahamo ese ena palai ruma ena iduara dekenai ia helai noho. Vadaeni iena matana ia negea, tatau toi ia itaia unuseni idia gini. Ia itaia neganai ena palai ruma iduara amo ia heau, ia tui diho tano dekenai, ia gwau, [Iehova] e, lau ura oiemu ura lau karaia, mani emu kara lauegu ruma oi hanaia lasi, oi noho iniseni. Lau be oiemu hesiai tauna.”

Gabeai, Abraham bona ena vadivadi taudia toiosi be atai gabuna ta amo Sodom hanuana idia raraia neganai, ena vadivadi taudia rua ese idia rakatania, hanua dekenai idia lao. Siri 22 ia gwau: “To Iehova be Aberahamo danu ia noho.” Taunimanima haida idia laloa Dirava bona Iesu Keriso be Dirava tamona, unai dainai idia gwau unai hereva ena anina be Dirava be tauanina dekenai Abraham vairanai ia hedinarai.

Bible ia stadilaia tauna ta, ladana Melancthon W. Jacobus, ese Genese 18:3 ena hereva inai bamona ia gwauraia: “Inai be nega ginigunana Bible ia gwau, Dirava be taunimanima ta bamona na taunimanima vairadiai ia hedinarai. Unai bamona ia karaia badina unai dala amo ia hahedinaraia Ia noho momokani, bona ia ese taunimanima ia lalodia bona ia tura henidia, bona [Abraham] dekenai ia hamomokania ia ida idia hereva diba bona ia ida idia raka hebou diba.” Unai lalohadai idia abia dae taudia be reana idia laloa Abraham be ena matana korikoridia amo Iehova ia itaia bona Iesu Keriso idia itaia taudia ese Dirava danu idia itaia. To unai lalohadai be Bible ena hereva hegeregerena, a?

Iesu ena Hereva

Iesu ia gwau lasi, ia be Dirava, tauanina dekenai ia hedinarai. To idau, ia gwau: “Lau be Dirava ena Natuna.” (Ioane 10:36) Ia be Iehova Dirava ena Gwaukau Tauna goevadaena bona ia gwau: “Lau be sibona gau ta do lau karaia kava lasi. Dirava ese lau ia hamaoroa hegeregerena kota henia gaukara lau karaia, bona egu kota henia gaukara be maoromaoro, badina lau sibona egu ura lau karaia lasi, to Dirava ena ura sibona lau karaia. Ia ese lau ia siaia.” (Ioane 5:30) Iesu be hisihisi sataurona ai ia noho neganai, gau ibounai ia havaraia Diravana badana guba lalonai ia guriguri henia, ia gwau: “Egu Dirava e, Egu Dirava e.” (Mataio 27:46) Mase amo ia toreisi lou murinai, Iesu ese Maria, Magadala hahinena ia hereva henia, ia gwau: “Egu Tamana bona emui Tamana, egu Dirava bona emui Dirava dekenai do lau daekau.” (Ioane 20:​1, 17) Iesu Keriso be tauanina dekenai ia hedinarai Diravana lasi, unai dainai Iesu ia itaia tauna ia gwau diba lasi ia ese unai dala amo Dirava ia itaia vadaeni.

Ioane, Iesu ese ia lalokau henia bada aposetolona, ese ia hamomokania aposetolo ese Iesu idia itaia neganai Dirava idia itaia lasi. Dirava ena lauma siahuna amo inai hereva ia torea: “Matamana neganai ia mai bona harihari tau ta ese Dirava ia itaia lasi.” (Ioane 1:18) Vadaeni, Abraham ese daika ia itaia? Mose dekenai ia vara gauna ena sivarai ese ita do ia durua unai haere do ita davaria totona.

Mose ese Dirava Ia Itaia Dalana

Nega ta ai Mose ia gwau ia ura Dirava do ia itaia. Esodo 33:​18-20 ai ia gwau: “ ‘Oiemu hairai oi hahedinaraia lau [Mose] dekenai.’ To ia [Dirava] ia gwau: ‘Lau ese lauegu namo ibounai do lau hahedinaraia oi dekenai, bona lauegu ladana Iehova do lau gwauraia oi dekenai; lau gwau do lau harihari henia tauna do lau harihari henia, bona lau gwau do lau bogaia hisi tauna do lau bogaia hisi.’ Ma ia gwau: ‘Lauegu vairana oi itaia diba lasi, badina be bema tau ta ese lau ia itaia, do ia mauri noho diba lasi.’ ”

Dirava ese dala ia kehoa Mose ese ena hairai do ia itaia totona. Siri 21-23 idia gwau: “Bona Iehova be ma ia gwau: ‘Iniseniai be gabu ta lau badinai, bona inai nadi latanai oi helai. Bona lauegu hairaina ia hanai neganai lau ese oi na nadi ena matu ta lalonai lau atoa, bona lauegu imana amo lau koua oi ela bona lau hanai. Murinai, lauegu imana lau kokia, bona oi ese lauegu doruna oi itaia. To lauegu vairana oi itaia diba lasi.’ ”

Iehova ena hereva Mose dekenai bona Ioane ena hereva danu hegeregeredia, Mose ese Dirava na tauanina dekenai ia itaia lasi. Dirava ese Mose ia hanaia murinai, Mose ese ia murinai ia hedinarai diarina badana sibona ia itaia. Unai neganai danu Dirava ese kara ta ia karaia ena hairai ese Mose do ia hadikaia garina. Momokani, Mose ese Dirava ia itaia lasi.

Esodo 33:11 ai ia gwau: “Iehova bona Mose idia hevaira heheni bona idia hereva heheni.” Unai neganai Mose be ena matana amo Iehova ia itaia lasi. Unai siri ese Mose be Dirava ida idia herevahereva dalana ia gwauraia, ia itaia gauna ia gwauraia lasi. “Idia hevaira heheni” idia herevahereva neganai ena anina be idia ruaosi idia herevahereva hebou. Unai hegeregerena, taunimanima rua be telefon amo idia herevahereva hebou diba, herevana idia heita heheni diba lasi.

Mose be Dirava ida idia herevahereva bona Dirava ese hadibaia herevadia ia henia neganai, matahanai amo ia hereva henia lasi, to Dirava ese peroveta taudia momo ia hereva henidia neganai, matahanai amo ia hereva henidia. Numera 12:​6-8 lalonai ia gwau: “Ma ia gwau: ‘Mani emui kara, lauegu hereva umui kamonai henidia. Bema emui peroveta tauna ta be Iehova ena peroveta tauna ai ia lao, matahanai amo lau sibona ia dekenai do lau hahedinaraia. Nihi lalonai do lau hereva henia. Lauegu hesiai tauna Mose be unai bamona lasi! Lauegu ruma ibounai naria gaukara ia dekenai lau henia. Ia ida do ai herevahereva hedinarai, lauegu uduna amo, iena uduna amo; do ai hereva hehuni lasi. Bona Iehova ena oromana ia itaia.” Mose ese “Iehova ena oromana ia itaia” ena anina be dahaka?

Mose ese “Iehova ena oromana ia itaia,” ia bona Aaron bona ma tatau haida be Sinai Ororona ai idia noho neganai. Esodo 24:10 dekenai ia gwau: “Israela ena Dirava idia itaia. Ena aena henunai be nadi namo herea, mai diari-diaridia idia noho, edia toana be guba bamona, ori ese idia koua lasi neganai.” To Dirava ia gwau vadaeni, “Bema tau ta ese lau ia itaia, do ia mauri noho diba lasi.” Vadaeni, Mose bona unai tatau be edena dala amo “Israela ena Dirava idia itaia”? Siri 11 (NW ) ia gwau: “Iena imana na Israel tau badadia latadiai ia atoa kau lasi, to matahanai amo Dirava idia itaia, bena idia aniani bona idia inuinu.” Unai dainai Mose bona unai tatau ma haida be matahanai amo Dirava ena oromana idia itaia.

Dirava ese Ia Siaia Anerudia

Gau iboudiai ia havaraia Diravana be ena atai herea noho gabuna guba lalonai ia rakatania bona tanobada dekenai ia mai, hereva haida ia henia taunimanima haida dekenai, be anina lasi. Dirava ena Natuna be tanobada ai ia noho neganai, Bible ia gwau nega toi taunimanima ese Dirava ena gadona idia kamonai, to nega oredia iboudiai Iehova be aneru ia gaukaralaidia Iena hereva be taunimanima idia henidia totona. (Mataio 3:17; 17:5; Ioane 12:28) Israel taudia be Sinai Ororona dekenai idia noho neganai, aneru amo Dirava ese Taravatu ia henidia, Bible ese unai ia gwauraia neganai, ia gwau Mose be Dirava ida idia herevahereva. Aposetolo Paulo ese unai na inai bamona ia gwauraia: “Vadaeni, Taravatu ena badina be dahaka? Ena badina be inai bamona: Dirava ia ura kara dika ena anina ia hedinaraia, unai dainai gwauhamata ia henia murinai Dirava ese Taravatu ma ia atoa. Bona inai Taravatu do ia noho ela bona Keriso, Aberahamo ena natuna do ia ginidae. Unai Natuna dekenai be Dirava ese iena gwauhamata ia henia vadaeni. Inai Taravatu be aneru edia durua dekena amo Dirava ese huanai ia gini tauna Mose dekenai ia henia. Vadaeni Mose ese unai Taravatu ia mailaia.”​—Galatia 3:19.

Kara 7:38 danu ese ia hahedinaraia Mose be aneru ta, Dirava ese ia siaia aneruna, ida idia herevahereva; ia gwau: “Israela taudia be taunimanima lasi gabuna dekenai idia haboua be Mose danu ia noho. Oibe, iseda sene taudia danu Mose ia noho. Bona unai neganai danu, Sinai Ororo dekenai aneru ta ese Mose ia hereva henia.” Unai aneru be Iehova ena gwaukau aneruna dainai, Mose ia hereva henia neganai, unai be hegeregere Iehova ese ia hereva henia.

Lahi na au ginigini ai ia noho neganai, Mose be unai au kahirakahira dekenai ia gini. Unai neganai Dirava ena hereva be Mose ia henia aneruna na gwaukau tauna ta. Esodo 3:2 ai ia gwau ia be Iehova ena aneru; ia gwau: “Iehova ena aneru ese ia dekenai ia hedinaraia, lahi ia araia dekena amo. Lahi be au ginigini dekenai.” Siri 4 ia gwau: “Dirava ese Mose ia itaia, ia mai kahira-kahira. Vadaeni Dirava ese au ginigini dekena amo ia boiboi Mose dekenai.” Siri 6 lalonai, hari aneru, Dirava ena gwaukau aneruna, ia gwau: “Lau be oiemu tamana ena Dirava, Aberahamo ena Dirava, Isako ena Dirava, Iakobo ena Dirava.” Mose be Dirava ese ia siaia aneruna ida idia herevahereva neganai, ia hereva hegeregere Iehova ia hereva henia bamona.​—Esodo 4:10.

Hahemaoro Taudia karoa 6 lalonai ma haheitalai ta ia noho. Dirava ese ia siaia aneruna ta dekena amo ia ese tau ta ia hereva henia. Siri 11 ese ia hahedinaraia unai hereva henia tauna be “Iehova ena aneru.” Ia gwau: “Iehova ena aneru be ia lao, au badana ta henunai, Ofra ai, ia helai. Unai au be Ioasa, Abiesere tauna, ena. Unai neganai iena natuna Gideon be uit ia hamakohia, vain ena huahua moia gabuna ai, Midian taudia edia amo do ia hunia gwauraia.” Hari gwaukau tauna, “Iehova ena aneru,” be siri 14 bona 15 lalonai idia gwauraia, hegeregere ia be Iehova Dirava bamona. Idia gwau: “Bena Iehova ese [Gideon] ia vaira henia, ia gwau: ‘Mai emu goada ida oi lao, Israel na Midian taudia edia imadia amo do oi harohodia mauri. Lau ese oi lau siaia ani?’ Gideon na ia haere ia gwau: ‘Iehova e, Israel na edena bamona do lau harohodia mauri?’ ” Unai dainai Gideon ese ia itaia aneruna bona ia ida idia hereva aneruna, be Bible lalonai ia gwauraia, hegeregere ia be Dirava bamona. Siri 22 lalonai, Gideon ia gwau: “Lau be Iehova ena aneru ida ai hevaira heheni!” Aneru be Iehova ese ia hadibaia herevadia mo ia gwauraidia. Unai dainai, Gideon be hari gwaukau aneruna amo Dirava ida idia herevahereva.

Samson ena tamana Manoa mai ena adavana danu edia sivarai mani oi laloa. Bible ese edia sivarai ia gwauraia neganai, “Iehova ena aneru” bona “Dirava ena aneru” ia gwauraia danu. (Hahemaoro Taudia 13:​2-18) Siri 22 lalonai, Manoa ese ena adavana ia hamaoroa, ia gwau: “Momokani, do ita mase, badina be Dirava ita itaia vadaeni.” Ena be Manoa ese Iehova Dirava ia itaia momokani lasi, to Dirava ena gwaukau aneruna be tauanina ai ia hedinarai dainai ia laloa ia be hegeregere Iehova ia itaia bamona.

“Tau ta ese Dirava Ia Itaia Lasi”

Hari ita diba dahaka dainai Abraham ese tauanina ai ia hedinarai aneruna, Dirava ena gwaukau aneruna, ia hereva henia hegeregere ia be Iehova Dirava ia hereva henia bamona. Unai aneru ese Dirava ia ura Abraham dekenai do ia gwauraia herevadia sibodia ia gwauraia. Ia be Dirava ese ia siaia aneruna dainai, Bible ia gwau: “Iehova ese Aberahamo dekenai ma ia hedinarai lou.”​—Genese 18:1.

Mani oi laloatao, Dirava ena gwaukau aneruna ese Ena hereva ia henia hanai goevagoeva diba, telefon o reidio ese iseda hereva ia henia hanai goevagoeva diba hegeregerena. Unai dainai, Abraham, Mose, Manoa, bona ma haida be tauanina dekenai ia hedinarai aneruna ta ida idia herevahereva neganai, unai be hegeregere Dirava ida idia herevahereva bamona. Ena be unai taudia ese unai aneru idia itadia diba bona Iehova ena hairai, idia ese idia hahedinaraia hairaina, idia itaia diba, to Dirava idia itaia diba lasi. Unai dainai unai taudia dekenai ia vara gauna ese Ioane ena hereva ia hakoikoia lasi; Ioane ia gwau: “Tau ta ese Dirava ia itaia lasi.” (Ioane 1:18) Unai taudia ese Dirava ese ia siaia anerudia idia itadia, Dirava idia itaia lasi.