Bapatiso ese Ita Ia Hamauria Diba Dalana

“Bapatiso ena anina be, . . . umui dekenai mauri ia henia.”​—1 PETERO 3:21.

1, 2. Ta ese dahaka dahaka ia karaia guna be namo, bena ia hegeregere bapatiso be ranu lalonai do ia abia?

HAHEMAURI idia tahua noho taudia be Iehova ese ia haganidia, dahaka dahaka do idia karaia be namo. Namona be diba maoro idia abia, abidadama idia hahedinaraia, edia kara dikadia idia rakatania, idia helalo-kerehai, Dirava idia gwauhamata henia, bona kamonai taudia hegeregeredia bapatiso idia abia be namo. (Ioane 3:16; 17:3; Kara 3:19; 18:8) Namona be bapatiso idia abia gwauraia taudia be taunimanima vairadiai idia hereva hedinarai, idia gwau Keriso ena boubou karana dainai edia kara dikadia idia rakatania vadaeni, bona sibodia edia mauri be Iehova dekenai idia gwauhamatalaia vadaeni. Namona be idia ese danu idia lalo-parara, edia gwauhamata bona bapatiso ese idia hahedinaraia idia be Iehova ena Witness taudia.

² Hahemauri idia abia totona, namona be bapatiso dalana ibounai idia badinaia; anina be edia abidadama be taunimanima vairadiai inai bamona idia gwauraia hedinarai danu. (Roma 10:10) Aposetolo Petro ese unai ia hamomokania, inai hereva ia torea neganai: “Bapatiso ena anina be, . . . umui dekenai mauri ia henia.” (1 Petero 3:21) To inai hereva edia anina korikori be dahaka? Petro ena hereva ma haida inai karoa lalonai ia torea ese dahaka idia hahedinaraia?

Bapatiso ese Ita Ia Hamauria Dalana

³ Petro ese ia hahedinaraia Iesu be lauma tauanina ai ia toreisi lou murinai, Dirava ia koudia laumadia dikadia dekediai ia lao, Dirava ese edia dika davana do ia henidia sivaraina be idia dekenai ia harorolaia; unai demoni be Dirava ese ia koudia ela bona iena dina badana ena hahemaoro negana do ia ginidae. Idia be guna idia gwau-edeede, Noa ese lagatoi ia karaia neganai; tauanina idia karaia sibodia edia bena hahine ida idia mahuta hebou. “Dirava ese ia naridia mai ena haheauka ida; unai lagatoi lalonai taunimanima momo lasi, 8 sibodia [Noa mai ena adavana, bona iena natuna memerodia mai edia adavadia ida] ranu amo ia hamauridia. Unai hegeregerena be bapatiso, harihari umui ia hamauria noho, tauanina ena miro huria oho karana lasi, to badina be Dirava umui noia emui lalona do ia hagoevaia, Iesu Keriso be mase amo ia toreisi lou dainai.”​—1 Petero 3:​18-21, NW; Genese 6:​1, 2; 2 Petero 2:4; 2 Korinto 7:1.

4. Petro ia gwau dahaka be Noa bona ena famili hamauridia karana hegeregerena?

⁴ Petro ena hereva, “unai hegeregerena be bapatiso,” ena anina be dahaka? Anina be, abidadama amo ia vara bapatisona be Noa bona ena ruma taudia hamauridia karana hegeregerena. Dirava ese abata ranuna amo ia hamauridia, unai ranu ese lagatoi murimurinai idia noho taudia ia hamasedia ore neganai. Lagatoi ia karaia totona, Noa be mai ena abidadama be namo; unai hegeregerena, bapatiso amo Iesu Keriso ena hahediba taudia ai bona Iehova ena witness taudia ai idia lao taudia iboudiai be mai edia abidadama be namo; unai amo idia ese inai abidadama lasi tanobadana bona ena dirava, Satana Diabolo, edia dibagani iboudiai do idia dadaraia diba.​—Heberu 11:​6, 7; 1 Ioane 5:19.

5. Edena bamona hahemauri ita abia “Iesu Keriso be mase amo ia toreisi lou dainai”?

⁵ Bapatiso sibona ese ita ia hamauria lasi. Bona ena be “iseda tauanina ena miro” ita negea be namo, to unai sibona ese ita ia hamauria lasi. Hahemauri ita abia, badina be “Iesu Keriso be mase amo ia toreisi lou dainai.” Namona be bapatiso idia abia gwauraia taudia idia abia dae, hahemauri idia abia diba ena badina tamona be, Dirava ena Natuna be boubou gauna ta bamona ia mase bena ia toreisi lou. Namona be idia ese danu idia abia dae, Iesu be edia Lohiabada, bona ia be siahu ia abia, mauri taudia bona mase taudia do ia hahemaoro henidia totona. Petro ia gwau: “Keriso ese guba dekenai ia vareai vadaeni, Dirava ena idiba kahanai ia helai noho. Aneru bona lohia bona siahu taudia ibounai be Keriso henunai idia noho.”​—1 Petero 3:22.

6 Petro ese danu ia gwau, bapatiso ena anina be ‘Dirava ita noia iseda lalona do ia hagoevaia.’ Dirava ese bapatiso ia abia gwauraia tauna ena lalona do ia hagoevaia totona, namona be ia ese ena kara dikadia ia rakatania, dala kererena amo ia helalo-kerehai, bona guriguri lalonai Iehova Dirava ia gwauhamata henia Iesu Keriso ena amo. Bema bapatiso tauna ese Dirava ena taravatu ia badinaia, ena lalona do ia goeva noho; inai dala amo ia be hahemauri lalonai do ia noho bona Iehova ese do ia panisia lasi.

Idia Hegeregere Bapatiso Do Idia Abia

⁷ Iesu ese ia murinai idia raka taudia ia oda henidia hahediba taudia do idia bapatisodia; ia hamaorodia lasi ranu sisina be kamonai lasi taudia tausen momo edia kopina dekenai do idia negea lao. To Kerisendom ena misinari taudia ese dahaka idia karaia? Lagani 1545 lalonai Jesuit tauna ladana Francis Xavier ese India ena sivarai ia torea, ia gwau: “Travancore basileiana lalonai . . . hua haida lalodiai lau ese taunimanima 10,000 bona ma haida, tatau, hahine, bona natudia, be lau bapatisodia vadaeni. . . . Hanua ta ta dekenai lau lao bona Keristen taudia ai lau halaodia.” Iesu ese taunimanima na ‘Keristen taudia ai ia halaodia’ dalana be unai bamona lasi. Namona be taunimanima idia hegeregerege bapatiso do idia abia.

8. Taravatu gunadia haida, Paulo ena taravatu idia gwauraidia, ese bapatiso idia abia gwauraia taudia edena bamona idia herevalaidia?

⁸ Sibodia be Keristen idia gwauraidia taudia haida, aposetolo edia nega murinai idia noho taudia unai, idia laloa bapatiso idia abia gwauraia taudia ese taravatu haida do idia badinaia namonamo guna be namo. Idia laloa unai taravatu be aposetolo Paulo ia torea, to unai be kerere, badina be ia ese ia torea lasi bona idia be Bible ena hereva korikoridia lasi. Unai taravatu ese bapatiso idia abia gwauraia taudia inai bamona idia gwauraidia: “Namona be edia kara bona edia mauri umui tahua namonamo . . . Bema idia headava lasi, namona be heudahanai karadia idia rakatania, bona dala maorona ai idia headava. . . . Bema ariara hahinena ta ia mai, namona be ariara karadia ia rakatania; bema lasi, umui dadaraia be namo. Bema kaivakuku karaia tauna ta ia mai, namona be ena gaukara ia rakatania; bema lasi, namona be umui dadaraia. . . . Ita gwauraia lasi karadia dikadia ia karaia tauna, . . . babalau tauna, meamea tauna, . . . unai taudia edia kara be nega taina daudau lalonai do umui tahua namonamo . . . bona bema unai kara idia rakatania, umui abidia dae; to bema edia lalona idia hegeregere lasi, namona be umui dadaraidia.”

9. Dahaka dainai kongregesen ena elda taudia be bapatiso ia abia gwauraia tauna ida idia herevahereva?

⁹ Iehova ena Witness taudia ese unai revarevadia idaudia, Bible lalonai idia torea lasi herevadia unai bamodia, be idia badinaia lasi, to elda taudia be bapatiso idia abia gwauraia taudia ida idia herevahereva. Badina be dahaka? Badina be idia ura do idia diba momokani idia be kamonai taudia, Dirava ena taravatu idia badinaia bona Iehova idia gwauhamata henia taudia unai. (Kara 4:4; 18:8; 2 Tesalonika 3:2) Buka ta ladana Elda Taudia bona Bapatiso Abia Gwauraia Taudia Idia Herevalaia Hebou Gaudia edia henanadai be idia ida idia herevalaia hebou, unai amo idia diba idia hegeregere bapatiso do idia abia eiava lasi. Bema ta ese hereva haida ia do lalo-pararalaia lasi, eiava Dirava ena taravatu haida ia do badinaia lasi, elda taudia ese lauma dalanai idia durua mai edia moale ida.

10. Bema ita ura baptiso do ita abia, edena bamona ita laloa be namo?

¹⁰ Dirava ese ena palani ita ia hadibalaia mai ena hebogahisi ida; bema unai ita laloa namonamo, ita be idau negai taudia haida hegeregeredia ai do ita lao; unai taudia be Paulo ese Antioka dekenai ia haroro henidia, Asia Maragina lalonai. Ena be Iuda taudia ese idia koudia toho, to “idau bese taudia inai hereva idia kamonai neganai idia moale bada, bona Lohiabada ena hereva idia hanamoa. Bona Dirava ia abia hidi, mauri hanaihanai abia totona taudia ibounai ese abidadama taudia idia halaoa.” (Kara 13:48) Unai bamona kamonai taudia be bapatiso idia abia.

Memero bona Kekeni ese Bapatiso Idia Abia

¹¹ “Dirava ia abia hidi, mauri hanaihanai abia totona taudia” haida be memero bona kekeni. Mani inai ita laloa, ena be Samuel bona Ioane idia do vara lasi neganai Dirava dekenai idia hahelagadia, to tama bona sina ese edia natudia edia ladanai Dirava idia gwauhamata henia diba lasi. (1 Samuel 1:​11, 24-28; 2:​11, 18, 19; Luka 1:​15, 66) To edia tamadia bona sinadia ese Bible idia hadibalaidia namonamo dainai, memero bona kekeni momo idia goada idia lao ela bona bapatiso idia abia. Misinari hahinena ta, ia kekeni neganai bapatiso ia abia, be ia gwau: “Lau lalo-parara Dirava ia mauri noho negana amo egu lalona lau hadaia iena hesiai gaukarana do lau karaia, to ia bona ena palani lau diba maoromaoro neganai, lau ura bapatiso do lau abia, unai do lau hahedinaraia totona. To, egu sinana ia laloa lau karaia gwauraia karana ena anina be reana lau diba namonamo lasi, unai dainai ia gwau namona be do lau naria ela bona ma ta do ia hegaegae bapatiso abia totona.” Vadaeni, ia ura bapatiso do ia abia hahinena ta idia davaria. Hari misinari taihuna be ma ia gwau: “Unai neganai bapatiso abia gwauraia taudia be kalasi lalodiai idia hadibadia guna lasi, to Haroro Gaukara Naria Tauna, Society ese idia abia hidi tauna, . . . ese lau ia hereva henia mai ena hebogahisi ida, lau karaia gwauraia karana ena anina bada ia gwauraia. Ena hereva iboudiai lau abia dae, bena May 1921 lalonai Sunday daba ta ai, [unai hahine] bona lau be bapatiso ai abia.”

12. Mero ta ese Dirava ia gwauhamata henia karana be Tadikaka Russell ese edena bamona ia laloa?

¹² Lagani 1914 lalonai, C. T. Russell (unai neganai ia be Watch Tower Society ena president) be Keristen tauna ta ese ia tore henia, ia nanadaia, ena natuna, mauri lagani 12 merona, ena lalona do ia ania goadagoada Dirava do ia gwauhamata henia totona be maoro eiava. Russell ese ia haere henia, ia gwau: “Bema lau be unai mero ena tamana, do lau doria lasi Dirava do ia gwauhamata henia totona, to unai dala be do lau hadibalaia, do lau gwau lalo-parara taudia iboudiai, Dirava bona ena palani namodia idia diba taudia, edia dala korikorina tamona be unai . . . Dirava idia gwauhamata henia lasi taudia iboudiai ese mauri hanaihanai do idia abia lasi . . . Emu natuna be unai bamona do ia gwauhamata neganai, unai gwauhamata ese do ia hadikaia lasi, to reana do ia durua bada. . . . Daika do ia gwau lagani 10 ia abia merona o kekenina ia hegeregere lasi, ena lalohadai bona ena hereva bona ena kara amo Dirava gwauhamata henia karana do ia lalo-pararalaia? Sibona egu kara lau laloa lou neganai, lau diba lau be lagani 12 lau hanaia sisina neganai, Dirava lau gwauhamata henia.”

13. Lagani 94 idia lao vadaeni, inai magasin be dahaka ia gwau memero bona kekeni dekediai?

¹³ Zion’s Watch Tower, July 1, 1894 ena, be ia gwau: “Memero kekeni bona taunimanima matamatadia iboudiai, emai lalokau, edia kudoudia be Dirava idia henia vadaeni bona dina dina iboudiai Iesu murinai idia raka toho taudia, be WATCH TOWER ese ia hahenamo henidia inai. Ai be memero kekeni maragidia haida ai diba, Iesu idia lalokau henia, bona ia idia lalokau henia lasi bona idia hamoalea toho lasi memerodia bona kekenidia bogaragidiai Iesu badinaia karana idia hemarailaia lasi. Basileia ena sivarai namona be edia bamodia sikuli dekenai idia herevalai henidia, bona idia kirikirilaidia neganai, Dirava idia badinaia mai edia boga-auka ida. Bona ai moale, badina be uhau bona ulato haida ai itadia, tanobada bona ena ura bona ena moale karadia idia dadaraia mai edia boga-auka ida, edia mauri be Lohiabada dekenai idia gwauhamatalaia, bena idia badinaia mai edia kamonai bada ida. Aiemai opesi ena heduru taudia haida, bona buka momo idia hoihoilaia taudia haida, be do matamata.” Ena be oi do matamata, to Iehova Dirava gwauhamata henia karana be emu tamana bona sinana dekediai oi kikilaia be namo, ani?

Tama Sina edia Heduru

¹⁴ Bema tama sina ese edia natudia idia hakaudia lao ela bona bapatiso, unai memero bona kekeni ese hahenamo idauidau idia abia. (Efeso 6:4) Unai hahenamo haida be inai: Lauma gaudia idia laloa loulou dainai, tanobada ena idoa bona hedibagani amo idia roho mauri. (1 Ioane 2:​15-17) ‘Tauanina ena ura idia hadoa’ taudia edia kara edia anina iditana be idia ese idia abia lasi. (Galatia 6:​7, 8) Tamadia sinadia ese Dirava badinaia karana idia hadibalaidia dainai, Dirava ena lauma ena huahua idia hahedinaraia. (Galatia 5:​22, 23) Dirava idia gwauhamata henia dainai, iena lalo-namo bona hetura idia moalelaia. Bona idia be Dirava abidadama henia dalana idia dibalaia vadaeni dainai, guba amo ia mai aonegana ese ia hakaudia, bona idia be moale bona maino daladia dekenai idia raka.​—Hereva Lada-isidia 3:​5, 6, 13, 17.

15. Keristen taudia ese dahaka idia karaia diba, edia natudia edia mauri dalana hamaoromaoroa totona?

¹⁵ Memero bona kekeni ese Iehova idia gwauhamata henia neganai, unai ese ia hanamodia bada. Unai dainai namona be edia tamadia bona sinadia, Keristen taudia, ese mauri dalana maorona idia hamanadalaidia toho mai edia goada ibounai ida. Timoteo hegeregerena, edia natudia idia do maragi negana amo Buka Helaga ena hereva idia hadibalaidia diba, bena idia ese ‘idia abia dae bona idia abidadama henia hereva momokani do idia badinaia namonamo noho.’ (2 Timoteo 3:​14, 15) Dirava idia badinaia taudia ese sibodia edia mauri daladia namodia be edia natudia idia haheitalaidia hanaihanai diba, bona sibodia edia abidadama bona diba bona aonega hegeregeredia idia hadibadia diba. Edia natudia memerodia bona kekenidia unai bamona idia kara henidia namonamo neganai, edia hekwarahi idia hekwarahilaia kava lasi.​—Hereva Lada-isidia 22:6.

16. Emu haheitalai bona emu hahediba herevadia dainai emu natudia ese dahaka idia lalo-pararalaia be namo?

¹⁶ Emu kara bona emu hahediba herevadia amo, emu natudia oi hadibadia, Iehova ena orea bona Satana ena be idia idau vaitani. Oi hadibadia, Keristen taudia ese inai tanobada ena kara idia abia dae diba lasi, to ena hemarai karadia hehunidia, ena kohu bona moni bona ladana badana ura henia karadia, bona ena hebamo danu idia dadaraia be namo. (1 Korinto 15:33; 2 Korinto 4:2) Emu laloa bona emu hahediba herevadia bona emu kara amo, emu natudia oi hadibadia, tanobada ena moale karadia be anina lasi bona tanobada taudia ese sibodia idia koia, to Iehova ena Witness taudia be unai bamona lasi. Sibomu emu sivarai, Dirava ese ena lauma helaga amo oi ia hakaua dainai, lalohisihisi idia lao henia daladia ai oi raka vareai kava lasi sivaraidia, bona hisihisi negadiai bona lalohisihisi negadiai oi ia hagoadaia sivaraidia, be oi hamaorolaidia. Nega ta emu lalona dekenai oi gwau lasi, ena be emu natudia oi kahudia nege tanobada taudia hegeregeredia do idia hekokoroku, bona kohu bona moni bona ladana badana do idia tahua, bona anina lasi moale karadia bona kavakava karadia do idia karaia totona, to idia be Keristen taudia ai do idia lao. Inai tanobada ese emu natudia ia do idoadia lasi neganai, ena siahu dikana oi koua do ia hakareredia garina, bona oi durudia, Dirava idia lalokau henia bona idia naria totona.

Bapatiso Murinai

¹⁷ Momokani, herevana bapatiso ia abia gwauraia tauna ta ia matamata eiava ia buruka, to ia ura Iehova do ia badinaia noho. Vadaeni, dahaka dainai idia bapatiso vadaeni Keristen taudia haida be lauma dalanai idia manoka idia lao? Ena be reana badina be idauidau, to badina badana ta be inai​—idia be Dirava gwauhamata henia karana ena anina ibounai idia lalo-pararalaia lasi. Ita gwauhamata neganai, ita be sibona ita henia lasi gaukara ta karaia totona. Bema unai bamona, ena be do ita bisi hanaihanai, to lauma abidadama henia taudia ai do ita lao lasi. Namona be inai ita laloatao, gaukara ta ita gwauhamatalaia lasi, to Iehova Dirava ita gwauhamata henia. Unai ese ita ia durua, lalohadai kererena ta ita abia lasi totona; unai lalohadai kererena be inai: Iseda gwauhamata be anina maragi karana ta; hahegani dainai ita abia bena gaukara ita karaia matamaia. Namona be inai ita laloa: Iseda gwauhamata amo ita ese Iehova ita tura henia matamaia, bona inai hetura be nega ibounai ita gimaia bona ita naria be namo. Iesu Keriso ese lalohadai maorona inai dekenai ia hahedinaraia ita dekenai. Ia be Iehova vairanai ia hedinarai neganai, iena lalohadai korikorina be inai peroveta herevadia amo ia hahedinaraia: “Lau mai vadaeni . . . Egu Dirava e, oiemu ura karaia karana lau moalelaia, bona oiemu taravatu be lauegu lalona dekenai ia noho.”​—Salamo 40:​6-8; Heberu 10:​5-10.

18. Edena bamona Dirava ena taravatu be Iesu ena “lalona” dekenai ia noho?

¹⁸ Edena bamona Iehova ena taravatu be Iesu ena “lalona” dekenai ia noho? Ia ese Iuda taravatu hadibaia tauna ta ia hamaoroa, Iehova iseda Dirava be tamona bona idauna be lasi, unai hereva amo ia hahedinaraia Iehova be gau iboudiai edia kwarana. Bena Iesu ese ia hahedinaraia Dirava ena taravatu ena anina korikori be, Iehova ita lalokau henia mai iseda lalona ibounai, mai iseda mauri ibounai, mai iseda aonega ibounai, mai iseda goada ibounai, bona iseda dekena tauna ita lalokau henia, sibona ita lalokau henia bamona. (Mareko 12:​28-34) Unai dainai Iesu ia hereva diba, ia gwau: ‘Dirava ena ura karaia karana lau moalelaia.’ Ena be hahetoho bona hisihisi bada hereadia ia davaria, to ena dala ia badinaia noho diba, unai gaukara ia laloa bada dainai sibona lasi, to badina be Iehova Dirava ia badinaia momokani dainai. Bema unai hegeregerena ita abia dae Iehova be gau iboudiai edia kwarana, bona bema ita lalokau henia bona ita badinaia momokani, iseda gwauhamata bona bapatiso do ita hamomokania.

19. Badina be dahaka Basileia harorolaia gaukarana ita karaia?

¹⁹ To, momokani, Dirava ita lalokau henia dainai Basileia harorolaia gaukarana ita karaia. Unai hegeregerena, vanegai ia mase tauna, ladana Grant Suiter, guna ia be Iehova ena Witness taudia edia Hakaua Oreana tauna ta, ese inai hereva ia torea: “Nega ta [sekit naria tauna ta] ena hereva lau kamonai, ia ese Iehova ena hesiai gaukara ena hahenamo ia herevalaia, ma ia gwau unai be iseda maduna korikorina. Ena haroro lau kamonai neganai, lau lalo-parara dahaka do lau karaia be namo, bona lau ura do lau karaia. Unai dainai Iehova lau gwauhamata henia, bona unai nega lalonai lauegu tamana sinana bona lauegu taihuna danu ese Iehova idia gwauhamata henia. October 10, 1926 lalonai, San Jose, California dekenai, ai ibounai be ranu lalonai bapatiso ai abia, aiemai gwauhamata ena toana bamona. . . . Bapatiso murinai . . . egu tamana ese bapatiso naria elda tauna ia hereva henia, ia gwau: ‘Umui be buka umui loaloalaidia, ani? Ai ura harihari ai danu be unai gaukara do ai karaia.’ Vadaeni emai famili be haroro gaukara ai karaia matamaia.” Hari inai nega lalonai, idia hegeregere vadaeni taudia ese haroro gaukara momokanina idia karaia guna, bena gabeai bapatiso idia abia.

Bapatiso ese Ita Ia Hamauria Diba

²⁰ Iseda kara amo ita hahedinaraia diba “ita be Iehova ena.” Hahemauri ita abia totona, namona be iena gwauhamata hesiai taudia hegeregeredia ita gaukara noho mai eda kamonai ida! (Roma 6:​20-23; 14:​7, 8, NW ) Idau negai, idia ese hesiai taudia edia baguna dekenai toa idia karaia. Hari inai nega lalonai, ‘dabua aukana ia hahedokilaia tauna’ ese ia laulaulaia oreana​—Iesu ena horoa hahediba taudia oredia unai​—ese haroro gaukarana amo, inai nega ena dokona amo do idia roho mauri taudia dekenai toa idia karaia. Hari gaukara lalonai horoa taudia edia bamodia, “mamoe idaudia,” ese idia durudia. (Esekiel 9:​1-7; Ioane 10:16) Vadaeni, unai “toa” be dahaka? Ia be iseda kara namodia edia toana; unai kara be inai: Iehova ita gwauhamata henia vadaeni bona ia ita badinaia noho; ita be Iesu ena hahediba taudia, bona bapatiso ita abia vadaeni; bona iseda kara be Keriso ena kara hegeregerena.

20, 21. (a) Edena dala amo Iehova ena hesiai taudia dekenai ‘toa idia karaia’? (b) Hari “toa” be dahaka, bona idia abia taudia dekenai ena anina be dahaka?

²¹ Hari inai nega lalonai “toa” ita abia bena ita haboioa lasi be namo, badina be nega daudau ita be “dokona negana” lalonai ita noho. (Daniel 12:4) Dirava ese ita do ia hamauria totona, namona be ‘do ita goada noho ela bona dokona,’ iseda mauri ena dokona eiava inai nega ena dokona unai. (Mataio 24:13) Bema Iehova ena witness taudia hegeregeredia ia ita badinaia noho, bapatiso ese ita do ia hamauria.

Henanadai Haida

◻ Dirava ese ita do ia hamauria totona, dahaka ita karaia be namo?

◻ Dahaka dainai elda taudia be bapatiso idia abia gwauraia taudia ida idia herevahereva?

◻ Tama sina ese edia natudia na lauma dalanai edena bamona idia hakaudia lao bapatiso dekenai?

◻ Gaukara ta ita gwauhamatalaia bena bapatiso ita abia a?

◻ Bapatiso ese ita edena bamona ia hamauria?

3. Petero Ginigunana 3:​18-21 ena anina be sibomu emu hereva amo oi gwauraia hedinarai.

6. Ena lalona do ia goeva totona, bapatiso ia abia gwauraia tauna ese dahaka ia karaia guna be namo?

7. Kerisendom ena misinari taudia ese bapatiso be edena bamona idia karaia vadaeni?

11. Mero ta o kekeni ta ese Dirava ia gwauhamata henia be maoro a, bona dahaka dainai unai bamona oi haere?

14. Iehova idia gwauhamata henia memerodia bona kekenidia ese dahaka hahenamo idia davaridia?

17. (a) Dahaka dainai idia bapatiso vadaeni Keristen taudia haida be lauma dalanai idia manoka idia lao? (b) Iseda gwauhamata be edena bamona ita laloa be namo?

[Picture on page 18]

Bapatiso be Noa bona ena famili hamauridia karana ida ita hahegeregerea dalana be oi diba a?

[Picture on page 20]

Gwauhamata bona bapatiso ese memero bona kekeni ia hanamodia dalana be oi diba a?