Dahaka ese Oiemu Bapatiso Ia Koua?
“Oi itaia, ranu be inai. Dahaka ese egu bapatiso ia koua?”—KARA 8:36.
1. Ierusalem ia lao bona Gasa dalana dekenai dahaka ia vara?
IEHOVA ena aneru ia hereva vadaeni, bena mai anina bada gauna be Ierusalem ia lao bona Gasa dalana dekenai ia vara. Etiopia tauna ta be ena kariota dekenai ia helai, Buka Helaga ia duahia noho. Bena tau ta be kariota badinai ia heau. Ia nanadaia, ia gwau: “Oi diba dahaka oi duahia, a?” Etiopia tauna ese ia haere henia, ia gwau: “Bema hadibaia tauna lasi, edena bamona lau diba?” Vadaeni, haroro tauna Filipo, aneru ese ia siaia tauna, ese ia hadibaia. Kariota dekenai ia gui, bena Isaia ena peroveta herevana amo “Iesu ena Sivarai Namona” ia hadibalaia matamaia.
2, 3. (a) Sivarai namona ia kamonai neganai, Etiopia tauna ese dahaka ia karaia? (b) Etiopia tauna ena sivarai dainai dahaka henanadai idia vara?
2 Idia ruaosi dala dekenai idia lao ela bona Etiopia tauna ia gwau: “Oi itaia, ranu be inai. Dahaka ese egu bapatiso ia koua?” Vadaeni, draiva ia oda henia kariota do ia haginia. Bena ia be Filipo ida ranu dekenai idia diho bona Filipo ese ia bapatisoa. Bena Iehova ena lauma ese haroro tauna Filipo ia hakaua oho, bona Etiopia tauna be ena dala dekenai ia lao mai ena moale ida.—Kara 8:26-39.
3 Bema oi ese Iehova ena Witness taudia oi bamodia noho to bapatiso oi do abia lasi, unai sivarai dainai reana do oi henanadai, do oi gwau: Dahaka dainai nega sisina sibona murinai Etiopia tauna ia bapatisoa? Bapatiso karaia dalana maorona be dahaka? Ia be dahaka ena toana? Bona dahaka ese lauegu bapatiso ia koua?
Bapatiso Ia Abia Haraga be Maoro
4 Bible ia gwau Etiopia tauna be “guriguri totona ia lao Ierusalema dekenai,” unai dainai ita diba ia be Iuda taudia edia tomadiho dalana ia badinaia bona ena kopina ia utua vadaeni. Ia be “eunuko tauna” ta, to tauanina dalanai lasi, badina be edia tauanina edia henuna kahana unai bamona idia hadikaia tataudia be Israel taudia edia hebou lalonai idia raka vareai diba lasi. (Deuteronomi 23:1) Unai Etiopia tauna be “eunuko tauna” idia gwauraia badina be ia be gaukara biaguna ta; ia be “dagi badana tauna, Kandake, Etiopia ena lohia hahinena ena kohu ia naria tauna.”—Kara 8:27.
5. Dahaka dainai Etiopia tauna be bapatiso ia abia haraga diba?
5 Gabeai, lagani 36 C.E. lalonai, Basileia sivaraina be Korenelio bona idau bese taudia ma haida dekediai idia abia lao, edia kopina idia utua lasi taudia unai. To unai idia do karaia lasi neganai, Etiopia tauna idia bapatisoa guna be maoro, badina be, ena be ia be idau bese tauna ta, to ia be Iuda taudia edia tomadiho ia badinaia noho dainai. Iuda taudia edia tomadiho dalana ia abia dae vadaeni dainai, Etiopia tauna be Dirava bona Iena Hereva ia diba vadaeni, to heduru be lauma dalanai do ia abia be namo. Unai dainai aneru ese Filipo ia hamaoroa do ia haroro henia, bena ia bapatisoa diba, sivarai namona be idau bese taudia dekediai idia do abia lao lasi neganai.
Keristen Bapatiso Dalana Ginigunana
6 Edena dala amo Etiopia tauna ia bapatisoa? Inai hereva “bapatiso” be Greek hereva ba·ptiʹzo amo ia mai, unai hereva ena anina be “ranu lalonai atoa diho, urua dobi.” Greek gado Bible ladana Septuagint ai, unai hereva be 2 Hanua Pavapavadia 5:14 dekenai idia torea. Bona mani inai ita laloa namonamo, “ranu gabuna ta dekenai idia ginidae” neganai, Etiopia tauna ese Filipo ia noia do ia bapatisoa. Bapatiso ia abia totona, ia be Filipo ida “ranu lalonai idia diho,” bena gabeai “idia ruaosi be ranu dekenai idia daekau mai.” (Kara 8:36-39) Unai dainai, Etiopia tauna ia bapatisoa dalana be, ranu lalonai ia atoa diho.
7. Bapatiso be ranu lalonai ia abia neganai, daika ena kara ia tohotohoa?
7 Iesu be bapatiso ia abia neganai ranu lalonai ia diho momokani, unai dainai Bible ia gwau, bapatiso be Ioridane Sinavaina lalonai ia abia murinai, “ranu dekena amo ia daekau.” (Mataio 3:13, 16) Momokani, Ioane Bapatiso ese taunimanima na Salim ena kahana dekenai ia bapatisodia, “badina ranu be ia bada unuseni ai.” (Ioane 3:23) Unai amo Buka Helaga ese ia hahedinaraia bapatiso ranu lalonai ita abia be maoro.
8. Farisea taudia bona Iuda taudia ma haida edia kara ita laloa neganai, dahaka ita diba bapatiso dekenai?
8 Bema ita ese Farisea taudia bona Iuda taudia ma haida edia kara ita tahua namonamo, bapatiso do ita lalohadailaia maoromaoro. Evanelia torea tauna Mareko ia gwau: “Hoihoi gabuna dekena amo idia mai, bema idia digu [Greek gado ai, ran·tiʹzo, anina be ranu negea] lasi guna, idia aniani lasi. Taravatu momo inai bamona idia naria, kapusi, sosipani, aniani udaia gaudia huria [ba·pti·smousʹ, anina be ranu lalonai idia atoa] taravatu.” (Mareko 7:3, 4) Unai tatau edia helaga karana koikoina ta be, maketi amo idia lou mai neganai ranu sisina be edia kopina dekenai idia negea guna bena idia aniani. To kapusi, sosipani bona aniani udaia gaudia ma haida be ranu lalonai idia bapatisoa, anina be ranu lalonai idia atoa.
9. Tertullian ese bapatiso edena bamona ia herevalaia?
9 Ena be aposetolo idia mase murinai tatau haida ese hereva gagevagagevadia amo ekalesia taudia momo idia hakaudia kerere, to Tertullian (lagani 160 ema bona 230 C.E. ai ia noho) ese bapatiso inai bamona ia gwauraia: “Taunimanima edia lalona ha-aukaia momokani gauna be inai: Dirava ese ia gwauraia karana haragana ta amo unai kara ia karaia tauna be Dirava ena gwauhamata hegeregerena anina bada mai hairaina do ia abia. Tau ta be helaga karadia idauidau amo idia hahegaegaea lasi neganai, ranu lalonai idia atoa diho, davana lasi, bona hereva momo lasi ia latanai idia gwauraia lalonai, ranu sisina be ia dekenai idia negea lao, bena ia toreisi lou. Unai ese ena kopina ia hagoevaia sisina sibona (o ia hagoevaia lasi). Unai dainai taunimanima momo idia abia dae diba lasi, tau ta be unai dala amo mauri hanaihanai do ia abia diba.” Mani inai oi laloa namonamo: Tertullian ia gwau, “Tau ta be . . . ranu lalonai idia atoa diho . . . bena ia toreisi lou.”
10. Diba momo taudia idia gwau Keristen ginigunadia be edena dala amo bapatiso idia abia?
10 Diba momo taudia ese danu idia hahedinaraia, matamana neganai Keristen taudia ese taunimanima idia bapatisodia negadiai, ranu lalonai idia hadihodia momokani. France gado bukana ta mai ena ladana badana be ia gwau: “Ranu idia davaria gabudia iboudiai dekenai, Keristen taudia ginigunadia be ranu lalonai idia atodia diho idia bapatisodia totona.” Bona buka ta ladana The Catholic Encyclopedia ia gwau: “Momokani, gunaguna taunimanima be ranu lalonai idia atodia diho.”—Volume 2, rau 261 (1907 gauna).
Hadibadia bona Bapatisodia Totona
11 Ta ia do bapatiso lasi neganai, namona be diba maoromaoro ia abia, bona unai diba hegeregerena ia kara. Keriso ese unai ia hahedinaraia goevagoeva, ena hahediba taudia be inai bamona ia hereva henidia neganai, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.”—Mataio 28:19 20.
12. Ta be ‘Tamana ena ladanai’ bapatiso ia abia, anina be dahaka?
12 Ta be “Tamana . . . ena ladanai” ia bapatiso, anina be ia ese Dirava ena dagi bona siahu ia diba bona ia matauraia. Ia abia dae Iehova be “Atai Momokani tanobada ibounai ataiai,” bona ia be gau iboudiai havaradia Diravana, bona guba bona tanobada edia Lohiabada danu. (Salamo 36:9; 83:18; 2 Hanua Pavapavadia 19:15) Unai bamona tauna ese danu ena lalona dekenai ia gwau Iehova be iena Hahemaoro Tauna, Taravatu Henia Tauna bona Pavapava.—Isaia 33:22; Salamo 119:102; Apokalupo 15:3, 4.
13 Ta be “Natuna . . . ena ladanai” ia bapatiso, anina be ia ese Keriso ena dagi bona siahu ia abia dae, bona ia diba Dirava ese iena amo taunimanima edia mauri davana ia karaia, “taunimanima ibounai hamauria totona.” (1 Timoteo 2:5, 6) Iesu Keriso ese kara maoromaoro ia badinaia ela bona mase, bena unai murinai Dirava ese “ia abia isi, gabu bada herea momokani ia henia”; unai dainai, namona be bapatiso idia abia gwauraia taudia ese Keriso do idia gwauraia hedinarai “ ‘Lohiabada,’ badina be unai dekena amo Tamana Dirava ena ladana do idia abia isi momokani.” (Filipi 2:9-11) Namona be idia ese danu idia abia dae Iesu be “Dirava ena hereva ia gwauraia maoromaoro tauna namona” bona “king ibounai edia King.”—Apokalupo 1:5; 19:16.
14. Ta be “Lauma Helaga ena ladanai” bapatiso ia abia totona, dahaka ia karaia guna be namo?
14 Ta ese danu “Lauma Helaga ena ladanai” ia bapatiso be namo. Namona be ia diba, lauma helaga be Dirava lasi, to ia be Dirava ena gaukara siahuna, unai siahu be ia ese ia gaukaralaia, guba bona tanobada bona idia noholaidia gaudia havaradia totona, bona Bible torea taudia hadibadia totona, bona unai bamona gaukara ma haida karaia totona. (Genese 1:2; 2 Samuel 23:1, 2; 2 Petero 1:21) Namona be ia diba momokani Iehova ena lauma ita abia be namo, “Dirava ena laloa dobu gaudia” ita lalo-pararalaia bona ena huahua namodia ita hahedinaraia totona; unai huahua be inai: “Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.” (1 Korinto 2:10; Galatia 5:22, 23) Namona be bapatiso ia abia gwauraia tauna ese danu ia abia dae Dirava ena lauma ia abia be namo Basileia harorolaia gaukarana do ia karaia diba totona.—Ioel 2:28, 29.
Bapatiso ese Ia Laulaulaia Gauna
15 Lauma helaga ena heduru amo Ioane Bapatiso ese taunimanima ia bapatisodia. (Kara 13:24) Ia bapatisodia, edia kara dikadia huria oho totona lasi, to edia helalo-kerehai toana hegeregerena ia karaia. (Kara 19:4) Ioane ese danu Iesu ia bapatisoa, “kara dika ta ia karaia lasi” tauna unai. (1 Petero 2:22) Bona Anania ese Taso tauna Saulo ia hereva henia, ia gwau: “Vadaeni, dahaka oi naria? Oi toreisi, bapatiso oi abia, oiemu kara dika ia huria totona, [Iesu ena] ladana dekenai oi boiboi dainai.” (Kara 22:12-16) Unai dainai, Keristen bapatisona ese kara dikadia ia huridia oho lasi. Dirava ese taunimanima edia dika ia gwauatao diba, badina be Iesu ena rara ia hebubu dainai bona badina be ‘iena ladana dekenai idia boiboi dainai.’—Heberu 9:22; 1 Ioane 1:7.
16. (a) Bapatiso ese kara dikadia ia huria oho lasi, to ia be dahaka ena toana? (b) Ta idia bapatisoa neganai, unai ese dahaka ia laulaulaia?
16 Ena be Keristen bapatisona ese kara dikadia ia huridia oho lasi, to ia be toa ta; ia hahedinaraia ranu lalonai idia hadihoa tauna ese Iesu Keriso ena amo Iehova Dirava ia gwauhamata henia vadaeni. (Mataio 16:24 itaia.) Ta ese Dirava ia gwauhamata henia neganai, ia be sibona ia henia, Dirava ena ura Keriso ena amo do ia karaia momokani totona. Bapatiso tauna be ranu henunai idia “guria” bena ranu amo idia abia isi; unai be toa ta, ia hahedinaraia ena mauri dalana gunana ia masetania bona ia toreisi lou, mauri dalana matamatana do ia rakalaia bona Iehova ena ura do ia karaia guguru totona.—Roma 6:4-6 itaia.
17. Dahaka dainai beibi bapatisodia karana be kerere?
17 Momokani, bapatiso be mai anina bada dainai, ita laloa namonamo be namo. Beibi bapatisodia karana be kerere, badina be beibi be gau ta idia lalo-pararalaia lasi, edia lalona idia hadaia diba lasi, bona hahediba taudia ai idia lao diba lasi. (Mataio 28:19, 20) Filipo be Samaria dekenai ia haroro neganai, “tatau bona hahine” ese bapatiso idia abia, beibi be lasi. (Kara 8:4-8, 12) Bapatiso idia abia diba taudia be inai: edia mauri lagani be hegeregere hahediba herevadia do idia dibaia bona do idia abia dae, bona abidadama do idia hahedinaraia. (Ioane 17:3; Kara 5:14; 18:8; Heberu 11:6) Idau negai taudia edia sivarai torea tauna Augustus Neander ia gwau: “Nega ibounai bapatiso be abidadama dainai ia vara; unai dainai ai laloa . . . [aposetolo edia nega lalonai] beibi idia bapatisodia lasi. . . . Lagani 200 bamona murinai idia gwau beibi bapatisodia herevana be aposetolo edia amo idia abia, to unai ese ia hahedinaraia aposetolo ese unai hereva idia halasia lasi.”—History of the Planting and Training of the Christian Church by the Apostles (New York, 1864), rau 162.
18. (a) Bible ese ia hahedinaraia hegeregerena, ta be dahaka ia karaia guna be namo, Iehova ena Witness tauna ta ai do ia lao totona? (b) Ta ese ena abidadama edena bamona ia hahedinaraia be namo, unai amo ia hahedinaraia ia hegeregere bapatiso do ia abia? (c) Bapatiso idia abia gwauraia taudia edena bamona idia hadibadia namonamo, Keriso ena boubou gauna idia abidadama henia be gau badana?
18 Buka Helaga ese kamonai taudia edia bapatiso ia gwauraia loulou. (Kara 4:4; 5:14; 8:13; 16:27-34; 18:8; 19:1-7) Unai dainai, kamonai taudia sibodia, abidadama idia hahedinaraia bona bapatiso idia abia taudia unai, be Iehova ena Witness taudia ai idia lao diba. Bapatiso idia do abia lasi neganai edia abidadama idia hahedinaraia daladia be inai: Kara namo idia karaia, Iehova idia abidadama henia, Basileia harorolaia gaukarana idia karaia, bona Iesu ena boubou karana idia abia dae. Bapatiso herevana ia harorolaia tauna ese bapatiso idia abia gwauraia taudia ia hadibadia, Iesu ena boubou gauna abidadama henia karana be mai anina bada; ia henidia henanadaidia ginigunana be inai: “Iesu Keriso ena boubou gauna dainai, emu kara dikadia amo oi helalo-kerehai vadaeni, bona Iehova oi gwauhamata henia vadaeni iena ura do oi karaia, a?” Bapatiso ia abia gwauraia tauna be ena haere amo unai hereva bema ia hamomokania, bona bema ia lalo-parara iena gwauhamata bona bapatiso ese idia hahedinaraia ia be Iehova ena Witness tauna ta, Dirava ese ena lauma amo ia hakaua oreana tauna ta ai ia lao, vadaeni ia hegeregere bapatiso be ranu lalonai do ia abia.
Guriguri amo Gwauhamata
19 Bapatiso idia abia taudia ese Dirava bona Keriso idia abidadama henia be namo. To dahaka dainai Iehova ena Witness taudia idia gwau namona be guriguri amo Dirava ita gwauhamata henia be namo? Badina be, bema iseda lalona ita hadaia Iehova sibona do ita tomadiho henia bona ia do ita badinaia momokani, namona be guriguri dekenai unai ita hamaorolaia. (Deuteronomi 5:8, 9; 1 Sisiga 29:10-13) Iesu ena ura be iena Tamana guba dekenai ena hesiai gaukarana helagana sibona do ia karaia, bona iena ura be guriguri lalonai ia gwauraia hedinarai. (Heberu 10:7-9) Ioane ese ia bapatisoa noho lalonai Iesu “ia guriguri noho”! (Luka 3:21, 22) Unai ese ia hahedinaraia goevagoeva guriguri amo Dirava ita gwauhamata henia be namo.
20. Dahaka dainai ita laloa Keristen taudia ginigunadia ese hahediba taudia matamatadia idia sisiba henidia goadagoada, idia be guriguri amo Dirava do idia gwauhamata henia?
20 Keristen taudia ginigunadia ese hahediba taudia idia sisiba henidia goadagoada, Dirava be guriguri amo do idia gwauhamata henia; unai hegeregerena, gabeai Tertullian ia gwau: “Bapatiso idia abia gwauraia taudia be idia guriguri loulou, idia anivaga loulou, bona idia tui diho loulou be namo.” Guna, Justin Martyr (lagani 100 ema bona 165 C.E.) be ia gwau: “Keriso ena amo ai ia hamatamataia neganai Dirava ai gwauhamata henia dalana, be do lau gwauraia hedinaraia danu . . . Emai hahediba herevadia idia abia dae bona idia badinaia gwauraia taudia be ai hadibadia, do idia guriguri bona anivaga amo Dirava do idia noia, edia kara dikadia gunadia do ia gwauatao; unai neganai ai be idia ida ai guriguri bona ai anivaga hebou.”
21. Ena be guna oi bapatiso neganai Dirava na guriguri amo gwauhamata henia karana idia gwauraia hedinarai lasi, to reana oi be edena bamona?
21 Lagani haida idia lao vadaeni bapatiso oi abia neganai, bema guriguri amo Dirava gwauhamata henia karana idia gwauraia hedinarai momokani lasi, unai dainai oi gwau lasi oiemu bapatiso be anina lasi. Momokani, momo be tau ta hegeregerena; guna, lagani 40 idia lao vadaeni, ia mero neganai, ia tui diho bona guriguri lalonai Dirava ia gwauhamata henia mai ena lalona ibounai ida. Unai neganai, ena be ta be guriguri amo Dirava ia gwauhamata henia guna lasi, to ena bapatiso dinana ai ia be bapatiso abia gwauraia taudia ma haida bona ma taunimanima haida ida idia gurigurilaia hebou, ta ese bapatiso herevana idia dekenai ia harorolaia neganai.
Haida be Bapatiso Idia Abia Lasi ena Badina
22 Dahaka dainai, ena be ta be Iehova ia gwauhamata henia bona ena witness tauna ai ia lao be hahenamo badana ta, to haida idia ura lasi bapatiso do idia abia? Badina be haida be Dirava idia lalokau henia momokani lasi dainai, iena Hereva idia badinaia lasi, Iesu hegeregerena idia kara lasi, bona bapatiso idia abia lasi. (1 Ioane 5:3) Momokani, bapatiso lasi taudia idia gwau lasi Iesu ena kara do idia tohotohoa lasi eiava Dirava do idia kamonai henia lasi. To, tanobada ena kara idauidau idia karaia momo dainai, edia nega be hegeregere lasi lauma gaudia do idia tahua. Bema oiemu hekwakwanai be unai, emu ura-heni bona helaro oi haidaua be namo, ani? Dirava idia lalokau henia momokani taudia ese inai tanobada danu idia lalokau henia diba lasi. (1 Ioane 2:15-17) Bona namona be oi be sibomu oi koia lasi; emu lalona dekenai oi gwau lasi, emu kohu momo bona moni momo dainai do oi noho namonamo. (Mataio 13:22) Do oi noho namonamo momokani dalana tamona be, Iehova Dirava do oi gwauhamata henia bena do oi badinaia.—Salamo 4:8.
23. Dahaka dainai ma haida idia ura lasi Iehova do idia gwauhamata henia bona unai gwauhamata ena toana hegeregerena bapatiso be ranu lalonai do idia abia?
23 Ma haida idia gwau Dirava idia lalokau henia, to idia ura lasi bapatiso do idia abia, badina be idia laloa, unai bamona idia noho neganai, ta ese edia kerere dainai do ia samanidia diba lasi. Idia ura Paradaiso lalonai do idia noho, to ema bona hari unai hahenamo idia tahua goadagoada lasi. (Hereva Lada-isidia 13:4) Unai bamona taudia be idia gwau diba lasi idia be kerere lasi, badina be, Iehova ena hereva idia kamonai murinai, unai hereva hegeregerena ia hahemaoro henidia diba. (Esekiel 33:7-9) Bema Dirava idia gwauhamata henia, idia hahedinaraia Dirava ena ura idia lalo-pararalaia bona idia ura bada do idia karaia. Unai bamona kamonai karana ese do ia hametaudia lasi, to ia dainai Iehova ese do ia hanamodia, bona do idia moale, badina be edia hereva, Iehova idia lalokau henia herevana, be edia kara amo do idia hamomokania dainai.
24. Dahaka dainai ma haida idia ura lasi bapatiso do idia abia?
24 Ma haida be bapatiso idia abia lasi, badina be idia laloa edia diba be hegeregere lasi Buka Helaga ena anina do idia gwauraia hedinarai. To Etiopia tauna be Filipo ida kariota lalonai idia herevahereva murinai, ia hegaegae, ena gwauhamata Dirava dekenai be bapatiso amo do ia hahedinaraia. Momokani, matamana neganai Etiopia tauna ese idia dekenai hereva momokani ia herevalaia taudia edia henanadai iboudiai ia haerelaia diba lasi. To ia kamonai vadaeni herevadia dainai, Dirava ia tanikiu henia mai ena lalona ibounai ida, bona gari dainai ia daradara lasi. “Lalokau tauna be gari lasi tauna, badina be lalokau momokani ese gari ia lulua siri momokani.” (1 Ioane 4:18) Ta ena kwarana be haere amo ia honu dainai lasi, to ena kudouna be lalokau amo ia honu dainai, Dirava ia gwauhamata henia bona bapatiso ia abia.—Luka 10:25-28.
25. Iehova Dirava ena ura be dahaka, idia gwau ia idia lalokau henia taudia dekenai?
25 Bema bapatiso oi do abia lasi, oi be sibomu dekenai oi nanadaia, oi gwau: Dirava ena ura be dahaka, idia gwau ia idia lalokau henia taudia dekediai? Ia ura ia sibona do idia tomadiho henia, bona ia ese “mai Lauma bona mai momokani danu Tamana do idia tomadiho henia . . . taudia ia tahua noho.” (Ioane 4:23, 24; Esodo 20:4, 5; Luka 4:8) Etiopia tauna ese unai bamona ia tomadiho henia, bona bapatiso abia dalana ia davaria neganai, ia naria lasi. Vadaeni, namona be harihari Iehova gwauhamata henia karana oi gurigurilaia mai emu momokani ida, bona sibomu dekenai oi henanadai, oi gwau: “Dahaka ese egu bapatiso ia koua?”
Henanadai Haida
◻ Dahaka dainai Etiopia tauna be bapatiso ia abia haraga diba?
◻ Keristen taudia ginigunadia be edena dala amo bapatiso idia abia?
◻ Ta be “Tamana, Natuna, Lauma Helaga ena ladanai” bapatiso ia abia, anina be dahaka?
◻ Keristen bapatisona be dahaka ena toana?
◻ Dahaka dainai guriguri amo Iehova ita gwauhamata henia be namo?
◻ Dahaka dainai haida idia ura lasi Dirava do idia gwauhamata henia bona bapatiso do idia abia?
4. Hari Etiopia tauna be daika?
6. Filipo ese Etiopia tauna be edena bamona ia bapatisoa, bona dahaka dainai unai bamona oi haere?
11. Iesu ese dahaka oda iena hahediba taudia ia henidia?
13. Ta be ‘Natuna ena ladanai’ bapatiso ia abia, anina be dahaka?
15. Dahaka dainai Keristen bapatisona ese kara dikadia ia huridia oho lasi?
19. Dahaka dainai ita ese Iehova na guriguri amo ita gwauhamata henia be namo?
22. Dahaka dainai haida idia ura lasi bapatiso do idia abia?