Iesu ena Mauri bona Gaukara

Mauri Abia Dalana

MAURI abia dalana be Iesu ena hahediba herevadia badinaia karana. To ta ese unai bamona ia karaia be mai ena hekwarahi. Farisea taudia ese taunimanima idia hahemaoro henidia auka, bona reana taunimanima momo ese Farisea taudia edia kara idia tohotohoa. Unai dainai Iesu be ororo dekenai ia haroro neganai inai sisiba ia henia: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi. Badina be umui gwauraia kerere karana hegeregerena Dirava ese umui do ia gwauraia kerere.”

Farisea taudia ese taunimanima idia maumauraidia momo; bema ta ese edia kara ia tohotohoa, kerere ia vara diba. Iesu ese unai kerere be inai bamona ia parabolelaia; ia gwau: “Matakepulu tauna ta ese matakepulu tauna ma ta do ia hakaua diba o? Idia ruaosi guri dekenai do idia moru lasi, a?”

Taunimanima maumauraidia momo karana, edia kerere habadaia karana bona gwau henidia momo karana, be kerere bada. Unai dainai Iesu ia henanadai, ia gwau: “Badina be dahaka oiemu tadikakana oi hamaoroa, oi gwau, ‘Mani au ena momoru oiemu matana dekena amo lau kokia,’ to au badana be oiemu matana dekenai ia do noho? Koikoi tauna e, au badana oiemu matana dekena amo do oi kokia guna, oi itaia namonamo totona. Unai murinai au ena momoru oiemu tadikakana ena matana dekena amo do oi kokia diba.”

Unai hereva ena anina be, Iesu ena hahediba taudia ese taunimanima edia kara idia lalohadailaia be kerere, a? Lasi, badina Iesu ia gwau: “Helaga gaudia sisia dekenai umui henia lasi, idia giroa bona umui idia koria garina, bona emui kavabukavabu boroma edia vairana dekenai do umui negea lasi.” Bible ena hereva momokanidia be helaga. Idia be kavabukavabu bamona. Bema taunimanima ese unai hereva momokani idia moalelaia lasi, edia kara be sisia o boroma edia kara bamona; unai dainai namona be Iesu ena hahediba taudia ese unai taudia idia rakatanidia bona idia ura kamonai taudia idia tahudia.

Ena be Iesu ese inai haroro lalonai guriguri karana ia herevalaia vadaeni, to hari ia hahedinaraia, guriguri goadalaia karana be gau badana. Ia gwau: “Umui noinoi [noho], vadaeni do ia henia umui dekenai.” Parabole ta amo Iesu ese ia hahedinaraia Dirava be mai ena ura ida taunimanima edia guriguri ia haere henidia; ia gwau: “Tamana taudia e, umui daika ena natuna paraoa ia noia neganai be nadi do ia henia? . . . Umui be dika taudia, to umui emui natudia dekenai gau namodia umui henia diba, unai dainai emui Tamana guba dekenai ia noho, be gau namodia idia noia taudia do ia henidia momokani, ani?”

Unai murinai Iesu ese taravatu namona ia gwauraia; ia gwau: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” Unai taravatu badinaia totona, namona be taunimanima ita kara namo henidia, ita ura taunimanima ese ita do idia kara namo henia hegeregerena.

Iesu ia gwau mauri abia dalana be mai ena hekwarahi; ia gwau: “Iduara maragina dekenai do umui raka vareai. Badina be [mase] gabuna ia lao dalana ena iduara ia bada bona ena dala danu bada herea. Bona taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”

Haida ese ita idia hakaua kerere diba, unai dainai Iesu ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona.” Au edia huahua amo do oi diba idia be au namodia o au dikadia, unai hegeregerena, peroveta koikoi taudia be edia kara bona edia hahediba herevadia amo do oi diba idia.

Iesu be ma ia gwau, taunimanima ta be Iesu ena hahediba tauna ai ia lao dalana be, iena hereva amo lasi, to iena kara amo. Taunimanima haida idia gwau Iesu be edia Lohiabada, to bema ena Tamana ena ura idia karaia noho lasi, Iesu ia gwau: “Idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”

Ena haroro hadokoa totona, Iesu ia gwau: “Lauegu hereva inai ia kamonai, bona ia karaia tauna ta ta be aonega tauna bamona, ia ese ena ruma nadi latanai ia haginia. Vadaeni medu bada ia diho, sinavai ia abata, lai bada ia botaia unai ruma dekenai. To unai ruma be ia moru lasi, badina ia be nadi latanai tau ese ia haginia.”

To, ma ia gwau: “Lauegu hereva ia kamonai, to ia karaia lasi tauna ta ta be kavakava tauna bamona. Inai tauna ena ruma be miri latanai ia haginia. Vadaeni medu bada ia diho, sinavai be ia abata, lai bada ia botaia unai ruma dekenai. Vadaeni, ia moru. Ia moru neganai be ia dika momokani.”

Iesu ese ena haroro ia hadokoa neganai, taunimanima hutuma ese ena hadibaia dalana idia hoalaia, badina ia hadibadia mai ena siahu ida, edia tomadiho gunalaia taudia ese idia hadibadia hegeregerena lasi. Mataio 7:​1-29; Luka 6:​27-49.

◆ Iesu ese taunimanima hahemaoro henidia karana be edena bamona ia gwauraia; to edena bamona ia hahedinaraia ena hahediba taudia ese taunimanima edia kara idia lalohadailaia be namo?

◆ Iesu ena hereva ma ta guriguri dekenai be dahaka, bona edena taravatu ia gwauraia taunimanima kara henidia karana dekenai?

◆ Iesu ese edena bamona ia hahedinaraia mauri abia dalana be mai ena hekwarahi bona haida ese ena hahediba taudia idia koidia bona idia veridia siri diba?

◆ Iesu ese ena haroro na edena hereva amo ia hadokoa, bona ena hereva dainai taunimanima edia lalohadai be dahaka?