Iseda Haroro Bona Mauri Dalana Hebou Pepana Edia Referens
July 5-11
BAIBEL ENA HEREVA BADADIA | DEUTERONOMI 11-12
“Iehova Ia Ura Henia Dalana ai Ia Ita Tomadiho Henia”
it-2-E 1007 par. 4
Mauri
Ta be mai Ena Mauri Ibounai ida Hesiai Gaukara ia Karaia. Anina be taunimanima ta ena “mauri” ia herevalaia. To Baibel be ita ia hagoadaia lalokau ita hahedinaraia bona Dirava ita hesiai henia ‘mai kudouna ibounai bona mai iseda mauri ibounai ida’ (De 4:29; 11:13, 18), hegeregere Deuteronomi 6:5 ia gwau: “Namona be Iehova emui Dirava umui lalokau henia mai emui kudouna ibounai, mai emui mauri ibounai, bona mai emui goada ibounai.” Bona Iesu ia gwau, emu hesiai gaukara be mai emu mauri ibounai, mai emu goada ibounai bona danu, “mai emu lalona ibounai ida” oi karaia. (Mr 12:30; Lu 10:27) To reana do ita henanadai, dahaka dainai unai gaudia be mauri ida ita herevalaia? Badina idia be ta ena mauri ena kahana. Haheitalai ta be inai: Reana taunimanima ta be sibona ia henia (ena mauri) ma ta ena hesiai gaukara ia karaia totona, unai dala amo ia be ena biaguna ena kohu ai ia lao. To reana unai tauna be ena biaguna ia hamoalea lasi, badina ia be mai ena kudouna bona goada ibounai ida ena hesiai gaukara ia karaia lasi. (Ef 6:5; Kl 3:22 hahegeregerea.) Unai dainai mauri ida ita herevalaia gaudia ese ita idia durua Iehova ita hesiai henia totona. Badina ia be iseda biaguna bona iena natuna ese ena mauri davana amo ita ia hoia. “Mai kudouna ibounai” ida Dirava ena hesiai gaukara ita karaia ena anina be, mai iseda mauri ibounai, goada bona mai iseda ura ida ia ita hesiai henia.—Mt 5:28-30; Lu 21:34-36; Ef 6:6-9; Fp 3:19; Kl 3:23, 24 hahegeregerea.
it-1-E 84 par. 3
Boubou Patana
Iehova ese Israela taudia ia hamaoroa Kanana taudia edia boubou patadia, nadi du helagadia bona au helagadia idia hadikaia totona. (Eso 34:13; De 7:5, 6; 12:1-3) Danu, namo lasi Kanana taudia bamona edia natudia be lahi dekenai idia bouboulaia. (De 12:30, 31; 16:21) Bona Israela taudia ese boubou patadia momo idia karaia lasi be namo, to boubou patana tamona sibona idia haginia, unuseniai Dirava momokanina tamona idia tomadiho henia diba. Bona Iehova ese ia abia hidi gabuna dekenai idia haginia diba. (De 12:2-6, 13, 14, 27; to Babulonia taudia be idau idia be edia dirava hahinena Ishtar totona boubou patadia 180 idia haginia.) Ioridane sinavai idia hanaia murinai, Iehova ese Israela taudia ia hamaoroa, idia utua lasi nadi amo boubou patana do idia karaia (De 27:4-8), bona Iosua ese Ebala ororona ai unai ia haginia. (Ios 8:30-32) Israela besena idia parara murinai, Rubena, Gado bona Manase iduhu kahana ta be Ioridane kahirakahira ai, boubou patana ta idia haginia, bona haida ese unai idia itaia. Unai dainai Israela ena iduhu ma haida idia lalohisihisi, bena gabeai idia davaria unai boubou patana be tomadiho koikoi totona lasi.—Ios 22:10-34.
Hakaua Hereva Namodia
it-1-E 925-926
Gerisima Ororona
Israela ese Ai hanua idia halusia murinai, Mose ese Iosua dekenai ia henia hakaua hereva hegeregerena, Israela taudia be Gerisima bona Ebala Ororona dekenai idia haboua. Unuseniai Iosua ese taunimanima ibounai dekenai Dirava ena oda ia duahia bema idia ese Iehova idia kamonai henia hahenamo do idia abia, to idia kamonai henia lasi neganai dika do idia davaria. Simeona, Levi, Iuda, Isakara, Iosepa bona Beniamina edia iduhu be Gerisima Ororona vairanai idia gini. Levi taudia idia gini gabunai taravatu mauana be idia ida ia noho, bona Israela ena iduhu oredia siks be Ebala Ororona vairanai idia gini. (De 11:29, 30; 27:11-13; Ios 8:28-35) Gerisima Ororona vairanai idia haboua iduhuna be do idia abia hahenamo dekenai idia lalotamona. Bona Ebala Ororona vairanai idia haboua iduhuna be idia kamonai hadikaia herevana dekenai idia lalotamona. Gerisima Ororona totona hanamoa herevana idia gwauraia badina, ia be gabu hairaina bona aniani idia tubu diba. To Ebala Ororona be idau, ia be nadi gabuna bona aniani idia tubu namonamo lasi, danu Baibel ese unai Ororo totona hereva ma haida ia gwauraia lasi. Iosua ese taravatu be “Israela taudia ibounai, hahine, natudia, bona idia huanai idia noho idau tano taudia, edia vairanai ia duahia badabada.” (Ios 8:35) Bona iena hereva be ororo vairanai idia gini taudia ibounai ese idia kamonai diba. Reana gabu namona ai ia gini dainai ia gwauraia hereva ta ta be ibounai ese idia kamonai.—EBAL, MOUNT itaia.
July 12-18
BAIBEL ENA HEREVA BADADIA | DEUTERONOMI 13-15
“Iehova Ena Taravatu ese ia Hahedinaraia Ogogami Taudia Ia Laloa Bada”
it-2-E 1110 par. 3
Kahana 10
Toana be Israela taudia ese kahana 10 ena kahana ta idia atoa siri. Lagani ta ta ai badina ma haida totona idia gaukaralaia, to unai kahana ta be Levi taudia ia durua danu. Nega momo aria badadia edia moale idia karaia neganai, Israela taudia be unai kahana 10 idia gaukaralaia. Ierusalema ena dala be ia daudau dainai Israela taudia be edia kahana 10 idia huaia diba lasi, unai dainai idia hoihoilaia bona moni sibona idia abia lao. Bena hebouhebou negana lalonai, unai moni idia gaukaralaia aniani bona gau ma haida idia hoia totona. (De 12:4-7, 11, 17, 18; 14:22-27) Lagani namba 7 ibounai Israela taudia be sabati laganina idia hahelagaia. To lagani namba 3 bona 6 edia dokonai, inai kahana 10 ena kahana ta be hebouhebou totona idia gaukaralaia gaudia edia davana do idia karaia lasi. To idia gaukaralaia Levi taudia, idau bese taudia, vabu taudia bona tamana lasi taudia idia durua totona.—De 14:28, 29; 26:12.
it-2-E 833
Sabati Lagani
Sabati laganina be idia gwauraia “abitorehai gwauatao laganina [hash·shemit·tahʹ].” (De 15:9; 31:10) Unai lagani lalonai tano do idia birulaia lasi, do ia noho kava. (Eso 23:11) Danu, unai lagani dekenai ta be abitorehai davana totona do ia noinoi lasi. Badina “Iehova ena vairanai unai abitorehai ia gwauatao vadaeni.” To haida edia lalohadai be ia idau, idia laloa unai abitorehai ia abia tauna be gabeai unai do ia haloua. Bona henitorehai tauna be ena tadikaka do ia doria lasi ena abitorehai ia haloua totona, badina unai lagani lalonai abitorehai tauna be moni lasi; to idau bese tauna dekenai abitorehai davana ia noia diba. (De 15:1-3) Rabi taudia idia laloa ogogami taudia durua totona, abitorehai monina abia karana idia koua, to bisinesi totona abitorehai monina abia karana idia koua lasi. Ma idia gwau, aposetolo taudia edia negai, Hillel be dala ta ia karaia henitorehai tauna be kota ena vairanai do ia gini bona iena abitorehai monina ia abia totona do ia hereva.—The Pentateuch and Haftorahs, edited by J. Hertz, London, 1972, pp. 811, 812.
it-2-E 978 par. 6
Igui Hesiai Tauna
Taravatu ese igui hesiai tauna bona ena biaguna ia hakaua. Israela taudia huanai Heberu hesiai taudia be idau bese taudia bona idau taudia amo idia idau. Unai Heberu lasi taudia be edia biaguna ena kohu bamona do idia noho bona edia igui hesiai gaukara be edia natuna ese do idia abia (Le 25:44-46), to Heberu hesiai tauna be lagani seven eiava Iubili laganina dekenai ena biaguna ese do ia ruhaia. Ia be ena hesiai laganina lalonai ena biaguna ese davana ia henia be namo. (Eso 21:2; Le 25:10; De 15:12) Bema Heberu tauna ta be sibona ia hoihoilaia, idau bese taudia eiava idau tano taudia edia hesiai gaukara ia karaia totona, ia be sibona ia hoia lou diba eiava mai ena maoro tauna ese ia hoia lou diba. Hoia lou davana be lagani hida ia gaukara ela bona Iubili laganina eiava lagani seven hegeregerena ia henia diba. (Le 25:47-52; De 15:12) Heberu igui hesiai tauna be ena biaguna ese ia ruhaia neganai, ia dekenai harihari gauna ta ia henia be namo. (De 15:13-15) Bema ia be ena hahine ida ia mai ia danu do ia giroa lou. To bema biaguna ese hahine ta ia henia ia adavaia totona (idau bese hahinena be maoro lasi lagani seven dekenai idia ruhaia totona), unai hahine bona ia havaraia natudia be biaguna ena kohu bamona do idia noho. Unai ia vara neganai, Heberu hesiai tauna be abia hidi ia karaia diba ena biaguna ena hesiai tauna bamona ia noho totona. Ia be ena biaguna ese auri mai matana amo ena taiana dekenai matu do ia karaia, unai ese ia hahedinaraia ia be ena mauri ibounai lalonai ena biaguna ena hesiai gaukara do ia karaia.—Eso 21:2-6; De 15:16, 17.
Hakaua Hereva Namodia
Duahia Taudia Edia Henanadai
Esodo 23:19 ia gwau, “nani ena natuna be iena sinana ena rata lalonai do umui nadua lasi,” unai hahegani amo dahaka ita dibaia?
Mose ena Taravatu ese ia gwauraia hahegani be Baibel lalonai nega toi ia hedinarai, unai ese ita ia durua, Iehova ena lalohadai kara maorona dekenai bona ena hebogahisi ita lalopararalaia totona. Danu, unai hahegani ese ia hahedinaraia, Iehova ese tomadiho koikoi ia inai henia.—Esodo 34:26; Deuteronomi 14:21.
Nani natuna eiava animal ma haida be edia sinana ena rata lalonai nadua karana be Iehova ena kara hegeregerena lasi. Sinana ena rata ese natuna ia ubua bona ia durua ia tubu namonamo totona. Diba bada tauna ta ena hereva hegeregerena, nani natuna be sinana ena rata lalonai nadua karana ese ia hahedinaraia, “Dirava ese sinana bona natuna huanai ia atoa hetura karana idia matauraia lasi.”
Danu, haida idia laloa, nani natuna be sinana ena rata lalonai nadua karana be kaivakuku tomadiho henia taudia edia kara ta, idia laloa unai ese medu ia mailaia. Bema unai be momokani, vadaeni Mose ena Taravatu lalonai ia noho haheganina ese Israela taudia ia gimaia, unai amo idia kahirakahira idia noho besedia edia hebogahisi lasi tomadiho karadia lalonai idia vareai lasi. Mose ena Taravatu ese Israela taudia ia taravatudia unai bese taudia edia kara idia tohotohoa lasi totona.—Levitiko 20:23.
Unai hahegani ese Iehova ena hebogahisi ia hahedinaraia danu. Momokani, Taravatu ese animal dagedage henia karana dekenai hahegani ma haida ia henia bona unai hahegani ese Israela taudia ia durua, Iehova ena kara idia badinaia totona. Hegeregere, Taravatu ia gwau, vara matamata animal be ena sinana ida dina 7 ia noho murinai do idia bouboulaia, animal bona ena natuna be dina tamona dekenai do idia hamasea lasi, bona manu bona ena gatoi eiava natuna be ena ruma dekenai do idia abia lasi.—Levitiko 22:27, 28; Deuteronomi 22:6, 7.
Unai ese ia hahedinaraia goevagoeva, Taravatu be hahegani sibona lasi, to idia be hakaua herevadia. Ita idia durua Iehova ena kara badadia ita dibaia bona badinaia totona.—Salamo 19:7-11.
July 19-25
BAIBEL ENA HEREVA BADADIA | DEUTERONOMI 16-18
“Hahemaoro Karaia Dalana Ena Hakaua Herevadia”
it-1-E 343 par. 5
Matakepulu
Kota gageva be matakepulu ida idia hahegeregerea, Taravatu ese taunimanima ia hagoadaia laloani herevadia, harihari gaudia, eiava ma ta ena toana laloa karana, idia dadaraia totona. Badina unai gaudia ese diadi tauna ena matana ia hakepulua diba. “Laloani moni abia karana ese laloa namonamo tauna ena matana ia hakepulua.” (De 16:19 Eso 23:8) Ena be diadi tauna be kara maoromaoro bona laloparara tauna, to kota lalonai idia noho taudia ese idia henia harihari gauna dainai, hahemaoro kererena ia karaia diba. Danu, Dirava ena taravatu ese ia hahedinaraia diadi tauna be ena lalohadai hegeregerena, hahemaoro ia karaia lasi totona. Baibel ia gwau: “Namo lasi ta umui hebogahisi henia badina ia be ogogami tauna, eiava namo lasi ta umui matauraia bada badina ia be taga tauna.” (Le 19:15) Namo lasi iseda lalohadai eiava hutuma edia lalohadai ita badinaia, diadi tauna be iena hahemaoro ia karaia neganai, ogogami taudia bona taga taudia be maka tamona dekenai do ia kota henia.—Eso 23:2, 3.
it-2-E 511 par. 7
Namba
Rua. Kota negadiai, taunimanima rua idia abia hidi. Ta ena hereva hamomokania totona taunimanima rua idia noho be namo. Gau ta hamaoromaoroa totona, diadi vairanai witnes rua o toi idia gini be namo. Danu, Keristani kongrigeisen lalonai inai hakaua dalana ita badinaia. (De 17:6; 19:15; Mt 18:16; 2Ko 13:1; 1Ti 5:19; He 10:28) Dirava be taunimanima hamauria totona, iena Natuna ia henia neganai, unai hakaua dalana ia badinaia. Iesu ia gwau: “Umui sibona emui Taravatu ia gwau: ‘Bema witnes taudia be rua, unai hereva do idia hamomokania.’ Lau be sibona lau herevalaia, bona Tamana, lau ia siaia tauna, ese lau ia herevalaia danu.”—Ioa 8:17, 18.
it-2-E 685 par. 6
Hahelaga Tauna
Hahelaga taudia edia hahenamo be Dirava ena taravatu idia herevalaia bona Israela taudia totona hahemaoro gaukara idia karaia. Idia noho siti lalonai diadi taudia idia durua danu. Bema kota gabunai hekwakwanai badana ta idia hamaoromaoroa diba lasi, hahelaga taudia be diadi taudia idia durua danu. (De 17:8, 9) Bema ta ia mase bona idia diba lasi daika ese ia alaia, hahelaga taudia be unai siti ena tau badadia do idia durua unai hekwakwanai idia hamaoromaoroa totona, unai amo dala maorona idia badinaia bona siti be rara dekenai ia kerere lasi. (De 21:1, 2, 5) Bema tau ta ia mama badina ia laloa ena hahine be tau ma ta ida ia mahuta hebou, vadaeni unai hahine be dubu helaga dekenai do idia hakaua lao, bena hahelaga tauna be Iehova ese ia gwauraia herevadia do ia badinaia, unai amo do ia itaia unai hahine be ia kerere eiava lasi. (Nu 5:11-31) Bema hahelaga tauna o diadi tauna ese ia karaia disisen be ta ese ia matauraia o badinaia lasi unai tauna be maoromaoro idia hamasea be namo.—Nu 15:30; De 17:10-13.
Hakaua Hereva Namodia
it-1-E 787
Kerere Tauna Idia Hamasea
Taravatu henunai bema idia ura kerere tauna idia hamasea, hereva hamomokania taudia rua edia hereva amo unai idia karaia be namo. (De 19:15) Unai taudia rua ese kerere ia karaia tauna be nadi amo do idia hodoa guna. (De 17:7) Unai ese do ia hahedinaraia Dirava ena taravatu idia laloa bada bona kongrigeisen be do ia goeva, unai kara amo taunimanima idia hadibaia idia koikoi lasi o idia hereva haraga lasi totona.
JULY 26–AUGUST 1
BAIBEL ENA HEREVA BADADIA | DEUTERONOMI 19-21
“Iehova Dekenai Taunimanima Edia Mauri be mai Anina Bada”
Iehova Ena Hahemaoro Goeva Bona Hebogahisi Karana Tohotohoa
4 Heau mauri hanuadia 6 dekenai ta ia lao be auka lasi. Iehova ese Israela taudia ia hagania, Ioridane Sinavaina ena kahana kahana amo hanua toi do idia abia hidi. Dahaka dainai? Unai amo ia heau tauna be unai heau mauri hanuadia dekenai ia lao haraga diba. (Num. 35:11-14) Heau mauri hanuadia edia dala be idia namo. (Deu. 19:3) Iuda taudia edia kastom hegeregerena, dala badinai saini idia atodia, unai amo ia heau tauna be hanua maorona dekenai ia lao diba. Heau mauri hanuadia idia noho dainai, aksiden amo ta ia alaia tauna be tano idauna dekenai ia lao lasi, dika unuseniai tomadiho koikoi ia badinaia.
Iehova Ena Hahemaoro Goeva Bona Hebogahisi Karana Tohotohoa
9 Heau mauri hanuadia ese Israela taudia idia gimaia, unai amo idia be rara dekenai idia kerere lasi. (Deu. 19:10) Iehova be mauri ia ura henia, bona “kerere lasi taudia alaia karana” ia inai henia. (Aon. 6:16, 17) Ia be kara maoromaoro bona helaga Diravana dainai, aksiden amo ta alaia karana ia laloa bada danu. Momokani, aksiden amo ta ia alaia tauna ia hebogahisi henia. To ia karaia karana be tatau badadia vairanai do ia gwauraia, bema aksiden amo unai tauna ia hamasea, ia be heau mauri hanuana dekenai do ia noho ela bona hahelaga tauna badana ia mase. Anina be ena mauri dinadia ibounai lalonai ia be unuseni do ia noho. Unai amo Israela taudia idia diba mauri be helaga. Edia Mauri Ia Henia Tauna idia hanamoa totona, namona be idia naria namonamo dika ta ena mauri idia hadikaia kava.
it-1-E 344
Rara
Dirava ese taunimanima dekenai mauri ia henia idia moalelaia totona, bema tau ta ese ma ta ia hamasea Dirava vairanai unai tauna be ia kerere. Dirava ese ala-ala tauna Kaino ia hereva henia dalana amo unai ita dibaia, ia gwau: “Emu tadina ena rara be tano amo lau dekenai ia boiboi noho.” (Ge 4:10) Bema tau ta be ena tadikaka ia inai henia, bona ia laloa ia mase be namo eiava ena ladana ia hadikaia o samania hereva koikoidia ia gwauraia bona unai bamona koikoi karadia dainai ena tadikaka be iena mauri ia haboioa neganai, unai tauna be ena tadikaka ena rara davana do ia abia.—Le 19:16; De 19:18-21; 1Io 3:15.
Hakaua Hereva Namodia
it-1-E 518 par. 1
Kota, Hahemaoro
Kota karaia gabuna be siti ena geiti dekenai ia noho. (De 16:18; 21:19; 22:15, 24; 25:7; Ru 4:1) Inai hereva “geiti” ena anina be siti lalonai geiti badinai ia noho ariara ia gwauraia. Unai geiti ai taunimanima idia haboua neganai, Mose ena Taravatu idia duahia bona oda herevadia ma haida idia gwauraia. (Ne 8:1-3) Geiti ai hekwakwanai ta idia ura hamaoromaoroa totona be auka lasi, hegeregere tano hoihoilaia karana bona gaudia ma haida, badina dina ai taunimanima momo be geiti amo idia vareai bona raka lasi. Bema taunimanima ese geiti vairanai edia hekwakwanai idia mailaia, namona be diadi taudia ese mai maoromaoro bona momokani ida edia disisen do idia karaia, badina pablik be unai idia itaia noho. Geiti ai gabu ta ia noho diadi taudia ese edia gaukara idia karaia totona. (Iob 29:7) Samuela be Betele, Gilegala, bona Misipa ia vadivadi henia bona “unai gabu ibounai lalonai Israela taudia ia hahemaoro henidia” bona Rama danu, unai be ia noho gabuna.—1Sa 7:16, 17.
August 2-8
BAIBEL ENA HEREVA BADADIA | DEUTERONOMI 22-23
“Mose Ena Taravatu ese ia Hahedinaraia Iehova be Animal Ia Laloa Bada”
it-1-E 375-376
Metau Gaudia
Baibel negadiai, animal idia gaukaralaia metau gaudia idia huaia totona, Mose ena taravatu ia gwau, bema Israela tauna ta ia itaia ena inai tauna ena doniki be metau ia huaia dainai ia moru, ia rakatania lasi to ‘animal ia ruhaia’ be namo.—Eso 23:5.
it-1-E 621 par. 1
Deuteronomi
Deuteronomi bukana ese animal laloa bada karana ia herevalaia. Israela taudia idia taravatua manu be ena ruma dekenai ena natudia ia gimaia lalonai, ia do idia abia lasi. Namona be manu sinana idia rakatania ia roho bona natudia idia abia be namo. Unai amo manu edia sinana be natudia ma haida ia havaraia diba. (De 22:6, 7) Biru tauna ese boromakau bona doniki do ia gaukaralaia hebou lasi, unai amo goada lasi animal do ia hekwarahi lasi. (De 22:10) Biru tauna ia itaia boromakau be kahirakahira witi moia gaukarana do ia haorea neganai, boromakau ena uduna do ia koua lasi, unai amo do ia hitolo lasi.—De 25:4.
“Abidadama Lasi Taudia Danu Do Umui Hakapua Tamona Lasi”
INAI rau dekenai oi itaia kamelo bona boromakau be tano makohia gauna idia veria hebou, to edia toana be hisihisi idia mamia bamona. Idia huaia auna ese idia ruaosi ia veria hebou—unai amo edia bada bona edia goada be hegeregere animal rua—be idia hisihisi hebou diba. Dirava ese unai bamona animal edia namo ia laloa bada dainai Israela taudia ia hamaorodia, ia gwau: “Emui tano geia totona, boromakau bona doniki ruaosi ese tano geia aurina do idia veria hebou lasi.” (Deuteronomi 22:10) Unai hakaua herevana be ia idau lasi, boromakau ta eiava kamelo ta dekenai.
Nega momo, biru tauna ese iena animal dekenai unai bamona metau do ia atoa lasi. To bema boromakau rua be lasi, reana ia dekenai idia noho animal rua edia aiona dekenai au metauna ia atoa, unai amo tano makohia gauna idia veria diba. Toana be, lagani 1800 lalonai ia noho biru tauna, haheitalai ese ia gwauraia tauna unai, be unai bamona ia karaia. Animal edia bada bona metau be idauidau dainai, ia goada lasi animal be do ia hekwarahi ia raka haraga totona bona animal goadana be maduna metauna momokani do ia huaia.
Hakaua Hereva Namodia
it-1-E 600
Abitorehai, Abitorehai Tauna
Abitorehai ena anina be tau ta ese ia abia moni eiava gau ta ena davana ia haloua karana. Israela taudia edia negai, ta be moni ena hekwakwanai ia davaria neganai, ia abitorehai. To bema Israela tauna ia abitorehai ia be henitorehai tauna ena hesiai tauna ai do ia lao. (Ao 22:7) Unai dainai taravatu ia gwau, Israela tauna ta be ena tadikaka dekenai hariharibada karana do ia hahedinaraia bona atoa kau moni do ia noia lasi. (Eso 22:25; De 15:7, 8; Sa 37:26; 112:5) To idau tauna dekenai atoa kau moni idia noia diba. (De 23:20) Iuda edia diba bada taudia idia gwau, inai bamona abitorehai karana be bisinesi gaudia sibona totona idia karaia, to gaudia ma haida totona lasi. Israela dekenai hoihoi gaukara totona ia mai idau tauna be atoa kau monina do ia henia, badina ia be ma haida amo abitorehai ia abia.
August 9-15
BAIBEL ENA HEREVA BADADIA | DEUTERONOMI 24-26
“Mose Ena Taravatu ese ia Hahedinaraia Iehova be Hahine Ia Lalokau Henidia”
it-2-E 1196 par. 4
Hahine
Mose Ena Taravatu ia gwau tau ta be ia headava matamata neganai, tuari totona do ia lao lasi, to iena adavana ida lagani tamona do ia noho. Unai amo inai headava matamata taudia be natuna idia havaraia diba. Bona tau be tuari totona ia lao eiava tuari lalonai ia mase neganai, sinana be natuna ia itaia bona goada do ia abia.—De 20:7; 24:5.
it-1-E 963 par. 2
Aniani Oredia
Iehova ese inai dala ia hegaegaelaia karana amo Israela taudia ese heabidae karana idia hahedinaraia, sibona idia laloa bada lasi bona Iehova ena hahenamo dekenai idia tabekau. To namo lasi ogogami taudia idia lahedo. Unai ese Davida ena hereva ia hamomokania, ia gwau: “To nega ta lau itaia lasi kara maoromaoro tauna ta be Dirava ese ia rakatania, iena natudia danu be aniani idia tahua lasi.” (Sa 37:25) Mose Ena Taravatu ese ogogami taudia ia durua idia gaukara goada totona, unai amo do idia hitolo lasi bona edia natudia be aniani totona do idia noinoi lasi.
w11-E 3/1 23
Inai Oi Diba, A?
Israela ai bema tau ta ia mase bona ia be natuna lasi, ena tadikaka ese vabu do ia adavaia bona ia mase tadikakana ena bese ia havaraia diba. (Genese 38:8) Gabeai nakimi adavaia karana be Mose Ena Taravatu lalonai idia atoa. (Deuteronomi 25:5, 6) Ruta bukana lalonai Boasi ese ia karaia karana ese ia hahedinaraia, bema hahine ta be ena tau ia mase bona ena tau ena tadikaka ibounai idia mase, vadaeni vabu be ena tau ena varavara ma haida ia adavaia diba.—Ruta 1:3, 4; 2:19, 20; 4:1-6.
Iesu ena negai nakimi adavaia karana ena taravatu idia badinaia, Mareko 12:20-22 ai, Sadukea taudia ese unai idia hahedinaraia. Aposetolo taudia edia negai, histori ia torea Iuda tauna, Flavius Josephus ia gwau: Unai kara dainai famili ena ladana bona edia ahuna idia haboioa lasi, danu tauanina dalanai vabu be namo ia davaria diba. Unai negai hahine be maoro lasi tau ena ahuna ia abia totona. To ena nakimi ese ia adavaia bona idia havaraia natuna ese ia mase tauna ena ahuna do ia abia.
Hakaua Hereva Namodia
Divos
Iehova be headava taudia huanai idia vara gaudia ibounai ia diba. Ia ura Israela tatau ese edia hahine idia kara namo henia. Unai taravatu ia matauraia tauna be ena hahine do ia lalokau henia bona ena hahine do ia divos henia kava lasi. (Deu. 24:1-4; Mat. 19:3, 8) Bema tau be kara dika badana ta ia karaia dainai ena hahine ia divos henia, namona be hahine dekenai divos pepana ia henia. Unai pepa ese hahine do ia gimaia unai amo ma haida ese ia do idia gwauraia dika lasi. To, tau ese divos pepa be hahine dekenai ia do henia lasi neganai, tau ese elda taudia ida ia herevahereva be namo. Unai dala amo, elda taudia be reana dala do idia tahua headava taudia idia durua idia divos lasi totona. Bema Israela tauna ta be badina namona ta lasi dainai iena hahine ia divos henia, nega haida Iehova ese elda taudia bona peroveta taudia ia gaukaralaia lasi unai hekwakwanai idia hamaoromaoroa totona. To, Iehova be Israela hahinedia edia taitai ia itaia bona edia hisihisi ia mamia.—Mal. 2:13-16.
August 16-22
BAIBEL ENA HEREVA BADADIA | DEUTERONOMI 27-28
“Umui Dekenai . . . Hahenamo Momo Do Ia Henia”
Lauma Helaga ese Ia Hakaua King be Oi Do Ia Hanamoa!
18 Kamonai karana ita hahedinaraia dalana ta be, Baibel ese ia gwauraia gaudia ita badinaia bona Iehova ena heduru herevadia ita laloa bada. (Mat. 24:45) Danu, namona be Dirava bona ena Natuna ita kamonai henidia. Iesu ia gwau: “Guba Basileia do idia vareai taudia be daika? ‘Lohiabada e, Lohiabada e,’ idia gwau taudia ibounai, a? Lasi momokani. Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.” (Mat. 7:21) Danu, Keristani kongrigeisen ai Dirava ese ia abia hidi “harihari gaudia,” elda taudia unai, ita kamonai henidia bona matauraidia be namo.—Efe. 4:8.
Iehova Ena Hahenamo Do Oi Davaria, A?
2 Heberu herevana, Deuteronomi 28:2 ai idia hahanaia “kamonai henia,” ese kara ta karaia noho lalohadaina ia hahedinaraia. Namo lasi Iehova ena taunimanima ese nega haida sibona ia idia kamonai henia; namona be edia mauri ibounai lalonai ia idia kamonai henia noho. Unai negana sibona ai Dirava ena hahenamo do idia davaria. Heberu herevana idia hahanaia “davaria” ena anina be labana lalonai idia gaukaralaia hereva “lulua bona dogoatao” eiava “abia” hegeregerena.
Mai Momokani Ida Iehova Ena Hanamoa Tahua
4 Namona be Israela taudia be mai moale ida Iehova do idia hesiai henia. Badina Dirava ena taravatu ese ia hahedinaraia bema Israela taudia ese edia ‘hesiai gaukara be mai moale danu idia karaia lasi,’ Iehova be idia dekenai do ia moale lasi. (Deuteronomi 28:45-47 duahia.) Unai dainai, mai iseda lalona ibounai ida Iehova ita badinaia be gau badana. Animal bona demoni danu be oda hereva idia kamonai, to mai edia lalona ibounai ida idia badinaia lasi. (Mar. 1:27; Iam. 3:3) Lalokau dainai mai iseda kudouna ibounai ida Dirava ita badinaia momokani. Bona mai moale ida Dirava ita kamonai henia badina ita diba iena taravatu be metau lasi, bona “Dirava ese mai momokani ida ia idia tahua taudia edia davana do ia henia.”—Heb. 11:6, NW; 1 Ioa. 5:3.
Hakaua Hereva Namodia
it-1-E 360
Tano Hetoana Ena Maka
Iehova ese tano hetoana ena maka kokia karana ia taravatua. (De 19:14; Ao 22:28 itaia danu.) Unai dainai “ena dekena tauna ena tano hetoana ena maka ia kokia tauna” be dika do ia davaria. (De 27:17) Badina tano biagudia be edia tano ese ia havaraia aniani amo namo idia davaria, unai dainai ta ena tano hetoana ena maka kokia karana ena anina be ena aniani oi kokia bamona. Baibel negadia ai, ta be unai bamona ia karaia neganai unai be ia henaohenao. (Iob 24:2) To taunimanima haida be unai bamona kara idia karaia, bona idia be Hosea ena negai idia noho Iuda ena lohia taudia ida idia hahegeregerea.—Ho 5:10.
August 23-29
BAIBEL ENA HEREVA BADADIA | DEUTERONOMI 29-30
“Iehova Hesiai Henia Karana be Auka Lasi”
w09-E 11/1 31 par. 2
Iehova ese Ita Ta Ta Dekenai Abia Hidi Ia Henia
Dirava ena ura ita dibaia bona ita karaia totona be auka, a? Mose ia gwau: “Hari dina umui dekenai lau gwauraia oda herevadia be idia auka lasi umui lalopararalaia totona, unai oda herevadia umui badinaia diba.” (Deuteronomi 30:11) Iehova be ita karaia diba lasi gauna totona ita do ia noia lasi. Ia ura ita karaia gauna be ita lalopararalaia bona ita karaia diba. Dirava ena ura ita dibaia totona, “guba dekenai” eiava “davara ena kahana ma ta dekenai” do ita lao lasi. (Deuteronomi 30:12, 13) Baibel ese iseda mauri do ita noholaia dalana ia hadibaia.—Mika 6:8.
w09-E 11/1 31 par. 1
Iehova ese Ita Ta Ta Dekenai Abia Hidi Ia Henia
Keristani hahine ta be ia maragi neganai, ia dekenai ia vara gauna dainai ia laloa ia be anina lasi, ia gwau: “Nega momo lau gari badina lau laloa Iehova do lau badinaia lasi.” Oi danu be unai bamona oi mamia, a? Ita dekenai idia vara gaudia haida dainai heduru ita abia diba lasi, a? Heduru ita abia diba. Iehova be ita dekenai ura kwalimu ia henia, unai dainai iseda noho dalana dekenai ita sibona ese abia hidi ita karaia diba. Iehova ia ura abia hidi maorodia ita karaia bona unai ita karaia dalana be iena Hereva Baibel, ese ita ia hadibaia. Deuteronomi karoa 30 dekenai Mose ena hereva oi duahia.
w09-E 11/1 31 par. 4
Iehova ese Ita Ta Ta Dekenai Abia Hidi Ia Henia
Iehova ese ita abia hidi dalana ia laloa, a? Oibe! Mose be Dirava ena lauma helaga ena siahu amo ia gwau: “Mauri umui abia hidi.” (Deuteronomi 30:19) To edena dala ai mauri ita abia hidi diba? Mose ma ia gwau: “Iehova emui Dirava umui lalokau henia, ena hereva umui kamonai bona ia umui badinaia.” (Deuteronomi 30:20) Bema Iehova ita lalokau henia ena be dahaka ia vara, to ia do ita kamonai henia bona badinaia noho. Ita be mauri dalana ita abia hidi bona unai be dala hereadaena, hari bona vaira negai Dirava ena tanobada matamatana ai do ita mauri hanaihanai.—2 Petero 3:11-13; 1 Ioane 5:3.
Hakaua Hereva Namodia
it-1-E 665 par. 3
Taiana
Iehova be iena hesiai taudia amo kwara auka bona kamonai lasi Israela taudia ia hamaoroa, idia be “taiana ena kopina idia utua lasi” taudia bamona. (Ier 6:10; Ka 7:51 ftn.) Idia be hegeregere gau ta ese edia taiana ia koua dainai idia kamonai diba lasi. Idia be Iehova ena hereva idia kamonai lasi dainai, edia taiana ia koua, to ia idia kamonai henia taudia edia taiana ia kehoa dainai idia laloparara diba. (De 29:4; Ro 11:8) Aposetolo Paulo ia gwau, nega do ia mai Keristani taudia haida be edia abidadama do idia rakatania bona aposteit ai do idia lao bona do idia ura lasi Dirava ena Hereva momokani idia kamonai, to “idia ura henia gaudia sibona idia kamonai” unai dainai do idia ura hadibaia hereva koikoi idia kamonai. (2Ti 4:3, 4; 1Ti 4:1) Danu haida “edia taiana do idia hemaihemai” badina sivarai dikadia idia kamonai bona do idia hoa.—1Sa 3:11; 2Ki 21:12; Ier 19:3 ftn.
August 30–September 5
BAIBEL ENA HEREVA BADADIA | DEUTERONOMI 31-32
“Baibel ai ia Noho Ane Ena Laulau Herevadia amo Diba Abia”
“Egu Lalona Do Oi Hatamonaia, Vadaeni Oiemu Ladana Do Lau Gari Henia”
8 Israela taudia be Gwauhamata Tanona idia do abia lasi neganai, Iehova ese Mose dekenai ane ta ia hadibaia. (Deu. 31:19) Unai murinai Mose ese taunimanima dekenai unai ane ma ia hadibaia. (Deuteronomi 32:2, 3 duahia.) Siri 2 bona 3 ita laloa dobu neganai, ia hahedinaraia goevagoeva Iehova ia ura lasi ena ladana ita hunia, eiava ita laloa ena ladana be helaga momokani dainai ita gwauraia lasi. Ia ura aneru bona taunimanima ibounai ese ena ladana idia diba! Israela taudia idia moale badina Mose ese Iehova bona Iena ladana hairaina be idia dekenai ia hadibaia! Medu ese tubutubu gaudia ia durua bona idia tubu namonamo hegeregerena, Mose ese idia dekenai ia hadibaia gaudia ese idia ia durua bona edia abidadama ia hagoadaia. Edena dala ai ita hahedinaraia iseda hahediba dalana be unai bamona?
9 Ruma-ta-ruma-ta haroro eiava pablik gabudia ai ita haroro neganai, namona be iseda Baibel ita gaukaralaia taunimanima dekenai Dirava ena ladana, Iehova, ita hadibaia totona. Idia dekenai pablikeisen idauidau, vidio bona iseda websait amo Iehova idia hanamoa gaudia momo ita hariharilaia diba. Gaukara gabuna, sikuli eiava loaloa gabudia ai, dala ia kehoa neganai ma haida dekenai iseda lalokau Diravana bona ena kara ita herevalaia diba. Ita davaria taudia dekenai Iehova ena ura taunimanima bona tanobada totona ita herevalaia neganai, reana unai be nega ginigunana do idia laloparara Iehova ese idia ia lalokau henia bada. Ma haida dekenai iseda lalokau Tamana ena hereva momokani ita herevalaia neganai, ita ese Dirava ena ladana ita hahelagaia unai. Taunimanima ita durua Iehova idia gwauraia koikoi herevadia bona ena ladana idia hadikaia herevadia idia dadaraia totona. Baibel amo taunimanima ita durua neganai idia moale.—Isa. 65:13, 14.
w09-E 5/1 14 par. 4
Baibel ese ia Gwauraia Laulau Herevadia Oi Lalopararalaia, A?
Baibel ese Iehova be mauri lasi gaudia ida ia hahegeregerea. Hegeregere ia gwauraia “Israela ena Nadi Badana,” “kesi,” bona “magu aukana.” (2 Samuela 23:3; Salamo 18:2; Deuteronomi 32:4) Point be dahaka? Nadi badana be oi hamarerea diba lasi, unai hegeregerena Iehova Dirava be iseda heau mauri gabuna ena Badina goadana.
Emui Natudia Umui Hadibaia Neganai Iehova Umui Tohotohoa
7 Iehova ese Israela taudia ia kara henia lalonai ia hahedinaraia lalokau mani oi laloa. Mose ese Iehova ena lalokau Israela bese matamatana dekenai ia herevalaia totona haheitalai namona ta ia gwauraia. Ia gwau: “Ugava manu bamona, iena natuna be roho dalana ia hadibaia neganai. Ia be iena natuna ugava danu ia roho noho, bona iena natuna idia moru, o roho hegeregere lasi neganai, ugava ese iena hanina ia atoa maoromaoro, hanina dekena amo iena natuna ia gobea, bona natuna be iena sinana ena hanina dekenai do idia helai, do idia moru garina. Lohiabada sibona ese [Iakobo] ia hakaua.” (Deuteronomi 32:9, 11, 12) Ugava hahine be ena natudia dekenai “roho dalana ia hadibaia neganai,” ena hanina ia hamarerea bona ena natudia ia hagoadaia idia roho totona. Nega momo ataiai momokani ororo gabuna ai ia noho manu rumana amo manu maragina ia roho neganai, ena sinana be iena ataiai “ia roho noho.” Bema toana be natuna be tano dekenai do ia moru, ena sinana be ia roho diho bona “ena hanina dekenai” ia huaia. Iehova ese mai ena lalokau ida Israela bese matamatana be unai bamona ia naria. Idia dekenai Mose amo Taravatu ia henia. (Salamo 78:5-7) Bena Iehova ese ena bese ia gimaia namonamo, ia gini hegaegae hekwakwanai negana lalonai ia durudia totona.
Hakaua Hereva Namodia
Deuteronomi Bukana Ena Hereva Badadia
31:12. Namona be kongrigeisen heboudia dekenai maragidia be badadia danu idia helai bona namona be hereva idia kamonai bona diba idia abia.