Ita Mase Neganai Dahaka Ia Vara?

Emu lalokau tauna ta ia mase, a? Unai bamona nega aukana lalonai reana do oi laloa: ‘Ita mase neganai dahaka ia vara? Iseda lalokau taudia itaia lou totona helaro ia noho, a?’ Inai leseni bona gabeai leseni ai Baibel ena hagoadaia herevadia amo ita abia haere mani ita laloa.

1. Ita mase neganai dahaka ia vara?

Iesu ese mase be mahuta ida ia hahegeregerea. Tau ta ia mahuta mase neganai, ia diba lasi ia badinai dahaka idia vara noho. Edena dala ai mase be mahuta bamona? Tau ta ia mase murinai, hisihisi ia mamia lasi. Iena lalokau turadia bona famili reaia karana ia doko. Baibel ia gwau, “mase taudia be gau ta idia diba lasi.”​​—Hadibaia Tauna 9:5.

2. Edena dala ai Baibel ena hereva momokani mase dekenai ita dibaia karana ese ita ia durua?

Taunimanima momo be mase dekenai idia gari​​—bona mase taudia idia gari henia danu! To Baibel ese mase ia herevalaia dalana amo goada oi abia diba. Iesu ia gwau: “Hereva momokani ese oi do ia ruhaia.” (Ioane 8:32) Tomadiho haida idia gwau, tau ta ia mase murinai, ia be gabu ma ta dekenai ia hanaia lao bona ia mauri noho. To unai be Baibel ena hahediba hereva lasi. Unai dainai ta ia mase murinai hisihisi ia mamia lasi. Danu, mase taudia be gau ta idia diba lasi dainai ita do idia hahisia eiava hadikaia lasi. Unai dainai namo lasi mase taudia ita hamoalea eiava tomadiho henia, bona idia totona ita guriguri lasi.

Taunimanima haida idia gwau mase taudia ida idia herevahereva diba. To, unai do idia karaia diba lasi. Matamanai ita herevalaia bamona, mase taudia be “gau ta idia diba lasi.” Haida idia laloa edia lalokau mase taudia ida idia herevahereva, to idia be demoni ida idia herevahereva noho, badina demoni be koikoi dalanai mase taudia edia gadona bona toana idia tohotohoa. Unai dainai Baibel ena hereva momokani ita dibaia neganai, unai ese demoni amo ita ia gimaia. Iehova ese ita ia sisiba henia mase taudia hereva henia karana ita dadaraia, badina ia diba demoni ida herevahereva karana ese ita dekenai dika do ia havaraia.​​—Deuteronomi 18:​10-12 duahia.

3. Mase taudia dekenai ia vara gauna oi dibaia

Tanobada ibounai ai taunimanima ese idia abia dae lalohadai mase dekenai be idauidau. To, unai lalohadai ibounai be momokani lasi.

• Emu gabu ai taunimanima momo edia lalohadai mase dekenai be dahaka?

VIDIO: Mase Taudia Dekenai Dahaka Ia Vara?—Ena Kahana Ta (1:​19)

Hadibaia Tauna 3:20 duahia, bena inai henanadai herevalaia:

• Unai siri hegeregerena, ta ia mase neganai dahaka ia vara?

• Mase tauna be gabu ma ta dekenai ia hanaia lao bona ia mauri noho, a?

Baibel ese Iesu ena turana namona, Lasaro ena mase ia sivarailaia. Ioane 11:​11-14 duahia neganai, mani Iesu ese Lasaro ena mase ia herevalaia dalana oi itaia. Bena inai henanadai herevalaia:

• Iesu ese mase be dahaka ida ia hahegeregerea?

• Unai ese dahaka ia hadibaia?

• Baibel ese mase ia herevalaia karana be edena bamona oi laloa?

4. Baibel ese mase ia herevalaia dalana ese ita ia durua

Mase ia herevalaia hereva momokani ita dibaia dainai, unai ese mase gari henia karana amo ita ia ruhaia. Hadibaia Tauna 9:10 duahia, bena inai henanadai herevalaia:

• Mase taudia ese ita idia hahisia diba, a?

Baibel ena hereva momokani ita abia dae neganai, mase taudia hamoalea eiava tomadiho henia lalohadai koikoina do ita dadaraia. Isaia 8:19 bona Apokalupo 4:11 duahia, bena inai henanadai herevalaia:

• Oi laloa Iehova ena hemami be edena bamona, bema ta ese mase tauna ia tomadiho henia eiava ena heduru ia tahua?

5. Mase ia herevalaia hereva momokani ese ita ia hagoadaia

Momo ese idia dibaia gauna be idia mase neganai edia kerere gunadia dainai panisi do idia abia. To ita ia hagoadaia gauna be, ita diba ta ia mase murinai hisihisi do ia mamia lasi, herevana ia be kara dikadia ia karaia. Roma 6:7 duahia, bena inai henanadai herevalaia:

• Baibel ai ita duahia bamona, bema mase ese ta be ena kara dika amo ia ruhaia, oi laloa unai mase tauna be ena kerere gunadia dainai hisihisi ia mamia noho, a?

Iehova ita dibaia namonamo neganai, do ita laloparara ia ese mase taudia be edia kara dika dainai do ia panisidia lasi. Deuteronomi 32:4; bona 1 Ioane 4:8 duahia, bena inai henanadai herevalaia:

• Oi laloa unai kara namodia ia hahedinaraia Diravana ese mase taudia hahisia karana do ia abia dae, a?

• Mase ia herevalaia hereva momokanina ese oi ia hagoadaia, a? Dahaka dainai?

POINT BADANA

Ta ia mase neganai ena mauri ia doko. Mase taudia be hisihisi idia mamia lasi bona mauri taudia do idia hahisia lasi.

Riviu

• Ita mase neganai dahaka ia vara?

• Mase ia herevalaia ena hereva momokani ese ita dekenai dahaka namo ia havaraia?

• Mase ia herevalaia ena hereva momokani ese edena dala ai ita ia hagoadaia?

REFERENS ITAIA

Baibel ai inai hereva “lauma” ena anina korikorina be dahaka oi itaia.

“Tau ta Ia Mase Neganai, ena Lauma ia Mauri Noho, A?” (Websait atikol)

Oi tahua bema Dirava ese hel ia gaukaralaia kara dika taudia ia panisia totona.

Hel be Hisihisi Abia Gabuna, A? (3:​07)

Mase ita gari henia be namo, a?

Mase Taudia Edia Lauma—Oi Idia Durua Diba Eiava Oi Idia Hadikaia Diba, A? Idia be Momokani Idia Noho, A? (buklet)

Tau ta ena sivarai oi duahia, ia be hereva momokani ese ia hagoadaia dainai ita mase neganai dahaka ia vara ia dibaia.

“Baibel Ena Haere Maorodia Dainai Lau Moale” (Gima Kohorona, February 1, 2015)