“Laulau Itaia!”

Inai magasin matamata ta oi kehoa neganai, nega hida oi sibona dekenai eiava ma haida dekenai unai bamona oi hereva? Tadikaka be nega bada lalonai unai laulau namodia idia hegaegaelaia bona magasin lalonai idia atoa ita idia durua totona. Idia be hadibaia tulu namodia iseda lalohadai bona hemami idia veria totona. Gima Kohorona Stadi totona ita hegaegae bona ita haere neganai, laulau ese ita idia durua.

Hegeregere, stadi totona oi hegaegae neganai, hereva kwarana badana ena badinai idia atoa laulau oi laloa dobu be namo. Unai laulau be dahaka ia hahedinaraia? Edena dala ai unai laulau ese stadi ena hereva kwarana eiava ena siri badana ia durua? Laulau ma haida oi itaia neganai, stadi atikol ai idia atoa ena badina, bona emu mauri do idia durua dalana oi laloa dobu be namo.

Gima Kohorona Stadi naria tauna ese helai taudia ia noia laulau ta ta idia herevalaia totona. Hegeregere, laulau ese stadi ena point badana ia hahedinaraia dalana, eiava idia ta ta ia durua dalana do idia herevalaia. Nega haida laulau ta ena badinai paragraf ta ena namba do idia torea. To laulau ma haida dekenai, stadi naria tauna ese do ia abia hidi edena paragraf dekenai unai laulau ta do idia herevalaia. Unai dala amo duahia tauna do ia durua, Baibel ena hahediba herevadia ia lalopararalaia totona.

Tadikaka ta be inai bamona ia gwau, “Atikol namona ta lau duahia murinai, ena laulau ese egu laloparara ia habadaia.”