Mauri Be Mai Ena Badina

TAUNIMANIMA BE IDAU MOMOKANI​—ITA TORETORE, LAULAU ITA PENIA, GAUKARA TA ITA KARAIA, BONA HENANADAI BADADIA ITA LALOA DIBA: Dahaka dainai iunives ia noho? Edena bamona ita vara? Ita mauri ena badina be dahaka? Vaira negana ai dahaka do ia vara?

Haida idia ura lasi unai bamona idia henanadai, badina idia laloa haere do idia davaria lasi. Ma haida idia gwau unai bamona henanadai be anina lasi badina mauri be evolusen dalana amo ia vara. History bona biology ena Profesa ta ladana William Provine ia gwau, “Dirava be ia noho lasi.” Ma ia gwau: “Unai dainai, Dirava ia noho karana ita abia dae be anina lasi bona mauri be anina lasi.”

To haida be unai hereva dekenai idia lalotamona lasi. Idia itaia iunives ai gau ibounai be idia heau namonamo, toana be taravatu idia badinaia bamona. Idia ese guba gaudia bona tanobada gaudia edia toana idia moalelaia​—taunimanima be unai gaudia haida idia stadilaia bena edia toana hegeregerena gau haida idia karaia. Bona dina ta ta ai ita itaia gaudia idauidau ese ita ia hadibaia, unai gaudia ia havaraia tauna be aonega bada tauna, to idia be sibona idia vara kava lasi.

Unai bamona gaudia dainai, evolusen lalohadai idia abia dae taudia haida be edia lalona idia haidaua. Mani inai haheitalai rua ita itaia.

NEUROSURGEON DOKETAALEXEI MARNOV. Ia gwau, “Lau sikuli negadia ai, sikuli momo be Dirava ia noho lasi lalohadaina (atheism) bona evolusen idia hadibaia. Bema ta be Dirava ia noho lalohadaina ia abia dae, unai tauna idia gwauraia kavakava.” To lagani1990 ai, iena lalohadai ia idau matamaia.

Ia gwau, “Hanaihanai, gau idauidau hegeregere taunimanima edia kwara harana ia noho ena badina lau ura lalopararalaia. Iseda kwara harana be hoa gauna, iunives ai ita itaia gaudia ibounai ia hanaia. To iseda kwara harana be aonega amo do ita hahonua bena gabeai do ia mase,a? Unai be maoro lasi. Vadaeni lau sibona lau nanadaia: ‘Dahaka dainai ita mauri? Eda mauri be mai ena badina eiava?’ Gau ibounai lau laloa namonamo murinai lau laloparara, Havaraia tauna ta ia noho.”

Unai bamona lalohadai dainai Alexei be Baibel ia stadilaia. Gabeai, ena adavana​—ia be medikol doketa ta to ia danu ia laloa Dirava ia noho lasi​—be Baibel stadi ia abia dae badina ia ura ena tau ese ia abia dae gaudia ia hakoikoia! Hari idia abia dae Dirava ia noho bona Baibel amo idia diba Dirava be mai ena palani taunimanima totona.

PLASMA SCIENTIST DOKETAHUABI YIN. Huabi Yin be physics ia stadilaia, bona lagani momo lalonai, ia be dina ia stadilaia.

Huabi ia gwau, Ai saens taudia ese gau ta ai stadilaia neganai, nega momo ai davaria unai gaudia be taravatu ta idia badinaia dainai idia gaukara namonamo. Lau henanadai, ‘Unai taravatu be edena bamona idia vara? Bema ta be ia nadunadu lalonai lahi ia kontrol namonamo diba, vadaeni daika ese taravatu ia atoa dina ena siahu ia kontrol totona?’ Gabeai, lau abia dae Baibel ese ia gwauraia hereva ginigunana be maoro, ia gwau: ‘Matamaia neganai Dirava ese guba bona tanobada ia karaia.’”​—Genese 1:1.

Saiens ese idia davaria gaudia dainai henanadai momo idia vara, hegeregere: Eda kwara harana ai sel be edena bamona idia gaukara? Edena dala ai dina ia siahu bena diari ia halasia? To Alexei bona Huabi idia gwau, Baibel ese inai henanadai badadia ia haerelaia: Dahaka dainai iunives ia noho? Dahaka dainai taravatu ese idia ia hakaua o biagua? Bona dahaka dainai ita mauri noho?

Baibel ese tanobada be inai bamona ia herevalaia: “[Dirava] ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Isaia 45:18) Oibe, Dirava be tanobada ia karaia kava lasi, bona atikol ma ta ese do ia hahedinaraia vaira negana ai dahaka do ia vara ita moale totona.