Sibona Biagua Karana O Self-control ena Namo

SIBONA BIAGUA KARANA ENA ANINA BE DAHAKA?

Sibona biagua karana oi hahedinaraia diba

• bema mai haheauka ida oi naria

• bema emu ura oi dadaraia

• bema gaukara ta oi hagugurua ena be oi ura lasi

• bema ma haida edia ura oi atoa guna

DAHAKA DAINAI SIBONA BIAGUA KARANA BE MAI ANINA BADA?

Bema natudia be sibona biagua karana idia dibaia, gau dikadia idia dadaraia diba, ena be idia dekenai unai ese nega sisina lalonai moale ia havaraia. To, bema natudia be sibona biagua karana idia dibaia lasi

• do idia dagedage

• do idia lalohisihisi

• kuku o drag do idia abia eiava bia do idia inua

• idia ania gaudia do idia abia hidi namonamo lasi

Ripoti ta ese ia hahedinaraia, sibona biagua karana idia hahedinaraia natudia be idia gorere momo lasi, moni idia lalohekwarahilaia lasi, bona taravatu idia badinaia namonamo. Unai ripoti dainai University of Pennsylvania ena Professor Angela Duckworth, ia gwau: “Sibona biagua karana be mai ena namo.”

SIBONA BIAGUA KARANA HADIBAIA DALANA

Inai hereva ‘lasi’ gwauraia karana oi dibaia bona oi badinaia be namo.

BAIBEL ENA HAKAUA HEREVANA: “Namona be emui ‘oibe’ be oibe bona emui ‘lasi’ be lasi.”—Mataio 5:37.

Natu maragidia be gau ta idia ura henia neganai, idia tai bona unai ese tama sina edia haheauka karana ia tohoa​—taunimanima edia vairanai unai bamona idia karaia danu. Bema tama sina be edia natudia edia ura gauna idia henia, natudia be unai kara do idia manadalaia.

Danu, bema tama sina idia gwau ‘lasi’ bona edia hereva idia badinaia, vadaeni edia natuna dekenai mai anina bada gauna ta idia hadibaia​—ita ura henia gaudia be nega ibounai do ita abia lasi. Doctor David Walsh, ia gwau: “Momokani, sibona biagua karana idia manadalaia taudia be idia moale. Bema natudia ita hadibaia namonamo lasi bona hanaihanai idia dekenai edia ura gaudia ita henia, unai be lalokau karana lasi.”a

Bema hari emu natuna dekenai inai hereva, ‘lasi’ oi gwauraia bona oi badinaia, unai ese do ia durua ia tubu daekau neganai sibona ia biagua diba bona gau dikadia, hegeregere drag abia karana, ia adavaia lasi mero o kekeni ida mahuta hebou karana, eiava kara dikadia ma haida ia dadaraia totona.

Emu natudia oi durua edia kara ese do ia havaraia namo bona dika idia lalopararalaia totona.

BAIBEL ENA HAKAUA HEREVANA: “Tau ta ese ia hadoa gauna, unai gauna sibona do ia abia.”​—Galatia 6:7.

Namona be emu natuna ia laloparara ta ena kara ese namo eiava dika ia havaraia diba, unai dainai bema sibona biagua karana ia hahedinaraia lasi, hekwakwanai momo idia vara diba. Hegeregere, bema emu natuna be nega momo ia badu kava, taunimanima ese ia do idia ura henia lasi. To, bema ia badu bona ena badu ia biagua​—hegeregere ta ia hereva neganai mai haheauka ida ia kamonai​—taunimanima be ia do idia ura henia. Namona be emu natuna oi hadibaia, unai amo do ia laloparara ena mauri ia moalelaia diba bema ena badu karana ia biagua.

Emu natuna oi hadibaia mai anina bada gaudia ia dibaia totona.

BAIBEL ENA HAKAUA HEREVANA: “Mai anina bada gaudia do umui diba.”​—Filipi 1:10.

Sibona biagua karana ese ita ia durua kara dika ita dadaraia, bona mai anina bada gaudia ita karaia totona. Namona be emu natuna oi hadibaia, unai amo mai anina bada gaudia do ia diba bona unai gaudia do ia atoa guna. Hegeregere, namona be ena homework ia karaia guna bena gabeai ia gadara diba.

Namona be haheitalai namona oi hahedinaraia.

BAIBEL ENA HAKAUA HEREVANA: “Lau ese umui dekenai dala lau hahedinaraia vadaeni, umui dekenai lau karaia hegeregerena, umui danu unai bamona umui karaia be namo.”​—Ioane 13:15.

Hekwakwanai ta ia vara neganai, emu badu oi hahedinaraia dalana be emu natudia ese idia itaia diba. Namona be emu kara amo oi hahedinaraia sibona biagua karana ese anina namona ia havaraia. Hegeregere, bema emu natuna ese emu haheauka karana ia tohoa, do oi badu haraga eiava mai manau ida do oi kara?