Emai orea ai pei idia abia pris o pasto idia noho lasi. To Keristani kongrigeisen idia hamatamaia neganai idia karaia bamona, lauma helaga ese ia abia hidi naria taudia ese “Dirava ena kongrigeisen” idia hakaua. (Kara 20:28) Unai naria taudia o elda taudia be lo Keristani taudia bona idia ese kongrigeisen idia hakaua bona naria, ‘ta ese idia ia doria dainai lasi, to sibona edia ura dainai idia karaia. Koikoi dalanai kohu abia totona idia karaia lasi, to mai edia ura bada ida idia karaia.’ (1 Petero 5:1-3) Ai idia durua totona dahaka gaukara idia karaia?

Ai idia laloa bada bona gimaia. Elda taudia ese kongrigeisen idia hakaua bona gimaia, unai amo Iehova kahirakahira ia noho. Idia diba Dirava ese idia dekenai mai anina bada maduna ia henidia dainai, Dirava ena taunimanima edia namo idia laloa bada, to idia biagua auka lasi. (2 Korinto 1:24) Mamoe naria tauna be ena mamoe ta ta ia naria namonamo hegeregerena, elda taudia idia gaukara goada kongrigeisen taudia ta ta idia diba namonamo totona.​—Aonega Herevadia 27:23.

Dirava ena ura karaia dalana be ai idia hadibaia. Wiki ta ta ai, elda taudia be kongrigeisen ena hebou idia hakaua, unai amo emai abidadama idia hagoadaia. (Kara 15:32) Danu, idia ese haroro gaukara idia hakaua, ai idia bamoa, bona ai dekenai haroro daladia idauidau idia hadibaia.

Ai idia hagoadaia. Iehova ai tura henia noho totona, elda taudia be emai ruma dekenai ai idia vadivadi henia o Kingdom Hall ai Baibel amo ai idia durua bona hagoadaia.​—Iamesi 5:14, 15.

Elda taudia be kongrigeisen gaukara sibona idia karaia lasi, to momo be mai edia moni gaukara bona famili​—unuseniai edia nega bona goada idia gaukaralaia danu. Elda taudia ibounai ita matauraia bada be namo.​—1 Tesalonika 5:12, 13.

• Kongrigeisen elda taudia edia maduna be dahaka?

• Edena dala ai elda taudia be ai idia laloa bada?

Baibel ese kongrigeisen ena maduna idia huaia Keristani tatau edia grup rua ia herevalaia​—“naria taudia, bona hesiai taudia.” (Filipi 1:1) Kongrigeisen ta ta ai, unai bamona tatau momo idia noho. Hesiai taudia be dahaka gaukara idia karaia ai idia durua totona?

Elda oreana idia durua. Hesiai taudia be Iehova idia tura henia, idia ai abidadama henia diba, edia maduna idia huaia namonamo bona laloa bada. Idia haida be idia matamata bona ma haida be idia buruka. Idia ese kongrigeisen bona Kingdom Hall totona, gaukara haida idia karaia. Unai bamona idia karaia dainai, elda taudia be mamoe vadivadi bona hahediba gaukara idia huaia namonamo.

Kongrigeisen idia durua. Hesiai taudia haida be atendan gaukara idia karaia, unai amo hebou dekenai idia mai taudia idia welkam henia. Ma haida be saun idia naria, buka bona magasin idia haria, kongrigeisen ena akaun idia naria, bona haroro gaukara ena teritori idia abia hidi. Danu, idia be Kingdom Hall ena meintenens gaukara idia durua. Nega haida elda ese hesiai taudia idia noia, buruka taudia idia durua totona. Hesiai taudia be mai edia ura ida edia maduna idia huaia dainai, kongrigeisen taudia ese idia matauraia bada.​—1 Timoteo 3:13.

Haheitalai namona idia hahedinaraia. Hesiai taudia be Keristani kara namodia idia hahedinaraia dainai, unai maduna o dagi idia abia. Hebou ena tok haida idia henia neganai, emai abidadama idia hagoadaia. Haroro gaukara idia karaia dainai, ai idia durua haroro gaukara ai laloa bada totona. Elda oreana ida idia gaukara hebou namonamo dainai, moale bona lalotamona ia noho. (Efeso 4:16) Gabeai, reana idia danu be elda ena maduna o dagi do idia abia.

• Hesiai taudia be edena bamona taudia?

• Edena dala ai hesiai taudia ese kongrigeisen idia durua?

Keristani Grik Toretoredia ese Banaba bona aposetolo Paulo idia herevalaia momo. Idia be loaloa naria taudia, edia negai idia noho kongrigeisen momo idia vadivadi henia. Dahaka dainai? Idia be edia tadikaka bona taihu edia namo idia laloa bada. Paulo ia gwau ia ura ia ‘giroa lou, bona tadikaka ia vadivadi henia,’ ia itaia idia be edena bamona. Ia be mai ura ida kilomita handred momo ia loaloa, unai amo ia lao bona ena tadikaka ia hagoadaia. (Kara 15:36) Hari inai negai, emai loaloa naria taudia idia ura unai bamona idia karaia.

Idia mai ai idia hagoadaia totona. Sekit naria taudia ta ta be kongrigeisen 20 bamona ia vadivadi henia. Lagani ta lalonai, nega rua kongrigeisen ta ia vadivadi bona idia ida wiki ta lalonai ia haroro hebou. Sekit hebouhebou ai, ia be seamani gaukara ia karaia. Unai tadikaka (bona ena adavana, bema ia be headava tadikaka) ese ai idia hagoadaia bada diba. Idia ura matamata taudia bona burukadia idia dibaia, bona haroro gaukara bona Baibel stadi gaukaradia dekenai ai idia bamoa. Loaloa naria taudia be elda idia bamoa, mamoe vadivadi idia karaia. Idia ese hebou badadia bona maragidia dekenai tok namodia idia henia, unai amo ai idia hagoadaia.—Kara 15:35.

Idia be ai emai namo idia laloa bada. Sekit naria taudia be kongrigeisen edia hetura karana Iehova ida idia laloa bada. Idia be elda bona hesiai taudia ida idia hebou neganai, kongrigeisen durua daladia bona elda bona hesiai taudia edia gaukara hanamoa daladia idia herevalaia. Idia ese painia taudia idia durua edia haroro gaukara idia hanamoa totona. Bona idia ura diba daidia be kongrigeisen idia bamoa taudia matamatadia, bona unai taudia idia goada idia lao eiava lasi. Sekit naria taudia ta ta be edia namo idia laloa lasi, to ‘emai namo totona ai ida idia gaukara hebou.’ (2 Korinto 8:23) Namona be idia edia abidadama bona Dirava badinaia karana ita tohotohoa.​—Heberu 13:7.

• Dahaka dainai sekit naria taudia be kongrigeisen idia vadivadi henia?

• Edena dala ai idia edia vadivadi ese oi ia durua diba?

Disasta ia vara negadiai, Iehova ena Witnes taudia be karaharaga heduru idia henia dika idia davaria tadikaka durudia totona. Unai amo ai hahedinaraia ta ta ai lalokau henia. (Ioane 13:34, 35; 1 Ioane 3:17, 18) Edena dala ai heduru ai henia?

Kontribusen moni ai henia. Idaunegai Iudea ai, hitolo bada ia vara neganai, Antioka Keristani taudia ese edia heduru monina be edia Iudea tadikaka dekenai idia siaia lao. (Kara 11:27-30) Hari negai danu, bema ai kamonai tano haida ai emai orea taudia be metau idia davaria, vadaeni emai kongrigeisen amo kontribusen moni ai siaia, unai amo idia be heduru idia abia diba.​—2 Korinto 8:13-15.

Heduru ma haida ai henia. Elda haida be disasta ia vara gabuna idia lao neganai, kongrigeisen taudia ta ta idia sekea, bema ibounai idia namo o lasi. Komiti ta (relief committee) be heduru gaudia haria gaukarana ia gunalaia, hegeregere aniani, ranu, dabua, mahuta gabudia, bona medikol heduru gaudia. Witnes taudia momo be idia volantia bona sibona edia moni idia gaukaralaia, unai bamona gabudia idia lao bona idia dika rumadia bona Kingdom Hall idia hanamoa. Emai orea taudia huanai lalotamona ia noho bona gaukara hebou karana ai manadalaia dainai, disasta ia vara negadiai heduru ai henia haraga. Ena be emai “abidadama tamona tadikaka bona taihu” ai durua, to dala ia noho negadiai ma haida ai durua danu, herevana idia be dubu idauidau taudia.​—Galatia 6:10.

Baibel amo edia lalona ai hagoadaia. Disasta negadiai dika idia davaria taudia idia ura ma haida ese idia hagoadaia. Unai bamona negadiai Iehova, “lalogoada ibounai ia henia Diravana,” amo goada ai abia. (2 Korinto 1:3, 4) Idia lalometau taudia dekenai mai moale ida Baibel ena gwauhamata namodia ai herevalaia, bona ai hadibadia, kahirakahira Dirava ena Basileia ese hisihisi idia havaraia gaudia ibounai do ia kokia vaitani.​—Apokalupo 21:4.

• Disasta negadiai dahaka dainai Witnes taudia be heduru idia henia haraga?

• Disasta negadiai dika idia davaria taudia be edena bamona ai hagoadaia?

Iesu ena mase negana ia kahirakahira neganai, ena hahediba taudia foa​—Petero, Iamesi, Ioane bona Andrea​—ida ia herevahereva. Iesu be nega oromana ena dokona ai do ia noho ena toa ia perovetalaia neganai, inai henanadai badana ia gwauraia: “Igui hesiai tauna mai ena kamonai bona mai ena kara maoromaoro, ena Biaguna ese ia abia hidi ena hesiai taudia do ia naria, bona nega korikori ai edia aniani do ia henia tauna be daika?” (Mataio 24:3, 45; Mareko 13:3, 4) Iesu ese ena hahediba taudia ia hamaoroa, ia be edia “biaguna” dainai, ia ese haida do ia abia hidi inai nega dokonai, aniani o Dirava ena hereva amo biaguna murinai idia raka taudia do idia ubua. Igui hesiai tauna mai ena kamonai bona kara maoromaoro be daika?

Ia be Iesu murinai ia raka horoa orea maragina ta. “Igui hesiai tauna” be nega korikori ai aniani o hereva namodia amo Iehova idia tomadiho henia taudia ia ubua. Ai ese unai igui hesiai tauna mai ena kamonai ai abidadama henia, badina ia ese ‘nega korikori ai emai aniani ia henia’ noho.—Luka 12:42.

Ia be Dirava ena ruma bese ia naria. (1 Timoteo 3:15) Iesu ese igui hesiai tauna mai ena kamonai ia abia hidi Iehova ena tanobada oreana ena gaukara ibounai ia naria totona, hegeregere Kingdom Hall, Assembly Hall bona brens ofesi ia naria, haroro gaukara ia gunalaia, bona emai kongrigeisen taudia ia hadibaia. “Igui hesiai tauna mai ena kamonai bona mai ena kara maoromaoro” ese nega korikori dekenai ia henia gaudia haida be inai: Emai haroro gaukara dekenai ai gaukaralaia bukadia, bona hebouhebou badadia bona maragidia edia tok idauidau.

Igui hesiai tauna be mai ena kamonai, badina Baibel ena hereva momokanidia ia badinaia bona sivarai namona ia harorolaia, bona ia be mai ena kara maoromaoro ida Keriso ena tanobada kohudia ia naria. (Kara 10:42) Iehova ese unai igui hesiai tauna ena gaukara ia hanamoa dainai, Dirava ena hereva namodia momo ia halasia noho.​—Isaia 60:22; 65:13.

• Iesu ese daika ia abia hidi iena hahediba taudia ia ubudia totona?

• Edena dala ai igui hesiai tauna be mai ena kamonai bona kara maoromaoro?

Idaunegai, “Ierusalema ai idia noho aposetolo bona tau badadia” be hakaua oreana (governing body)​—unai grup maragina be horoa Keristani kongrigeisen ibounai totona disisen badadia ia karaia. (Kara 15:2) Unai orea taudia be Baibel bona lauma helaga ena heduru idia gaukaralaia dainai, mai lalotamona ida disisen tamona idia karaia. (Kara 15:25) Hari ia noho Hakaua Oreana be unai dala ia badinaia danu.

Unai orea amo Dirava be ena ura ia hagugurua. Hakaua Oreana ai idia gaukara horoa tadikakadia be Dirava ena Hereva idia stadilaia namonamo, emai haroro gaukara idia gunalaia, bona Baibel ena henanadai idauidau idia haerelaia. Idia be wiki ta ta ai idia hebou neganai, tanobada ibounai tadikaka oreana durua dalana idia herevalaia. Aposetolo edia negai bamona, Hakaua Oreana ese Baibel ena hadibaia herevadia be leta o loaloa naria taudia o ma haida amo kongrigeisen ibounai ia hadibaia. Unai dala amo Dirava ena taunimanima ia durua mai lalotamona ida idia gaukara hebou totona. (Kara 16:4, 5) Hakaua Oreana be emai buka bona magasin hegaegaelaia gaukarana ia naria, ai ia hagoadaia haroro gaukara ai laloa bada, bona tadikaka dekenai dagi o maduna henia gaukarana ia naria.

Unai orea be Dirava ena lauma ena hakaua dalana ia badinaia. Hakaua Oreana ese Guba bona Tanobada edia Lohia Badana, Iehova, bona kongrigeisen ena Kwarana, Iesu, edia hakaua dalana idia badinaia. (1 Korinto 11:3; Efeso 5:23) Hakaua Oreana taudia idia gwau lasi, idia be Dirava ena taunimanima edia bosi o biaguna. Idia, bona horoa Keristani taudia ma haida, be “Mamoe Natuna [Iesu]” ena “murinai idia raka noho.” (Apokalupo 14:4) Hakaua Oreana ia moale, bema ai be ia bona ena gaukara totona ai guriguri.

• Aposetolo edia negai, daidia be hakaua oreana taudia?

• Hari, edena dala ai Hakaua Oreana ese Dirava ena hakaua dalana ia badinaia?

Heberu herevana, Betele, ena anina be “Dirava ena Ruma.” (Genese 28:17, 19) Tanobada ibounai lalonai, Iehova ena Witnes taudia ese brens ofesi o ruma badadia idia haginia bona edia ladana idia gwauraia Betele. Unuseniai idia gaukara taudia ese emai haroro gaukara idia naria bona durua. New York, U.S.A. ai, ia noho hedikwota ai be emai Hakaua Oreana ia gaukara. Ia ese tano momo ai idia noho brens ofesi edia gaukara ia gunalaia. Unai brens ofesi ai idia gaukara taudia ibounai idia gwauraia, Betele famili. Idia be ruma bese ta bamona, badina mai lalotamona ida idia gaukara hebou, noho hebou, aniani hebou, bona Baibel idia stadilaia hebou.—Salamo 133:1.

Unuseniai idia noho taudia be mai edia ura ida idia gaukara. Betele ibounai dekenai idia noho Keristani tatau bona hahine be Dirava ena ura bona Basileia ena gaukara idia karaia goadagoada. (Mataio 6:33) Idia be mai edia mahuta daiutu bona aniani. Danu moni sisina idia abia, sibona edia ura gaudia haida idia hoia totona. Betele taudia ta ta be mai edia gaukara, hegeregere haida be ofesi ai idia gaukara, kisini ai idia nanadu, printa gabudiai idia gaukara, daiutu idia hagoevaia, dabua idia huria, bona meintenens gaukara idia karaia.

Unuseniai Basileia harorolaia gaukarana durua karadia idia karaia. Betele taudia edia gaukara badana be inai: Baibel ena hereva momokani be taunimanima momo dekenai idia halasia. Hegeregere inai buklet be Betele taudia ese idia karaia taunimanima durua totona. Hakaua Oreana ese gwaumaoro ia henia inai buklet idia torea, kompiuta amo tanobada ibounai dekenai idia siaia, trensleisen tim handred momo ese idia hahanaia, Betele haida edia printa masini badadia amo idia printaia haraga, bena kongrigeisen 110,000 mai kahana dekenai idia siaia. Unai dala idauidau amo Betele famili be gaukara badana—sivarai namona harorolaia gaukarana—idia durua.—Mareko 13:10.

• Daidia be Betele ai idia gaukara? Bona edena bamona heduru idia abia?

• Betele ta ta be edena gaukara badana ia durua?

Betele famili taudia be dipatmen idauidau ai idia gaukara, tano ta o haida ai idia karaia haroro gaukara idia durua totona. Unai dipatmen haida be trensleisen, magasin idia printaia, buka idia hakapua, buka idia siaia, rekodi gaudia (audio/video) idia karaia, o gaukara ma haida.

Brens Komiti ese gaukara ia naria. Hakaua Oreana ese Brens Komiti ia abia hidi, brens ofesi ta ta ena gaukara ia naria totona. Nega haida lo elda toi o ma haida be unai komiti gaukara idia karaia. Unai komiti ese ia naria tanodia ta ta ai gaukara ia bada ia lao o dahaka hekwakwanai ia vara ena ripoti be Hakaua Oreana dekenai ia hadibaia. Hakaua Oreana be unai ripoti ia abia dainai, ia itaia dahaka topik o hereva be gabeai emai buka ai do ia torea, bona hebou maragidia o badadia ai do ia halasia. Hakaua Oreana ese ia siaia tadikakadia ladana, Hakaua Oreana ena gwaukau taudia be hanaihanai brens ta ta idia vadivadi henia, bona Brens Komiti ia durua edia gaukara idia karaia namonamo totona. (Aonega Herevadia 11:14) Hedikwota ena gwaukau tauna ena vadivadi negana ai, brens ese spesel hebou ta ia hegaegaelaia, unai tadikaka ese brens ia naria gabunai idia noho tadikaka bona taihu dekenai hagoadaia tok ta ia henia totona.

Ia ese kongrigeisen ta ta ia durua. Brens ofesi ai gaukara idia naria tadikakadia ese kongrigeisen matamatadia haginia ena gwaumaoro idia henia. Danu, unai tadikaka ese edia brens ena teritori ai idia gaukara painia taudia, misinari taudia, bona sekit naria taudia edia gaukara idia naria. Unai tadikaka ese hebouhebou idauidau idia hegaegaelaia, Kingdom Hall matamatadia haginia gaukarana idia naria, bona idia itaia kongrigeisen ese buka bona magasin idia abia eiava. Brens ofesi ena gaukara idauidau ese emai haroro gaukara ia durua.​—1 Korinto 14:33, 40.

• Edena dala ai Brens Komiti be Hakaua Oreana ia durua?

• Brens ofesi ai dahaka gaukara idia karaia?

Ai ese “sivarai namona” be “bese ibounai bona iduhu ibounai, gado idauidau, bona kopi idauidau taudia ibounai dekenai” ai harorolaia namonamo totona, emai buka bona magasin be gado 700 mai kahana dekenai ai halasia. (Apokalupo 14:6) Edena dala ai unai gaukara badana ai karaia? Emai toretore taudia be tano idauidau ai idia noho, bona trensleita o gado hahanaia taudia be 3,300 bamona​—idia ibounai be Iehova ena Witnes taudia.

English gado gauna torea dalana. Emai Hakaua Oreana be Toretore Dipatmen ena gaukara ia naria. Unai dipatmen ese emai tadikaka haida, toretore taudia unai, dekenai gaukara ia henia​—unai toretore taudia be emai hedikwota bona ma brens ofesi haida ai idia noho. Emai toretore taudia be tano idauidau ai idia noho dainai, emai buka bona magasin ai taunimanima mai edia kastom idauidau do ia durua gaudia ai torea, badina ai ura taunimanima ibounai ese unai idia duahia.

English gado gauna be trensleita taudia dekenai idia siaia. English gado gauna idia haorea murinai, ena faila be kompiuta amo tanobada ibounai ai idia noho trensleisen dipatmen dekenai idia siaia, bena emai gado dekenai ai hahanaia (translate), ai sekea (check), bona ai duahia namonamo (proofread). Ai ura English gado gauna ena anina ibounai be emai gado dekenai ai hahedinaraia namonamo dainai, ai ese hereva “momokani bona maoromaoro” ai abia hidi.—Hadibaia Tauna 12:10.

Kompiuta ese gaukara ia haharagaia. Kompiuta be toretore taudia bona trensleita taudia edia gabu ia abia diba lasi. To, toretore taudia bona trensleita taudia be kompiuta amo edia gaukara idia haharagaia diba. Iehova ena Witnes taudia ese kompiuta program ta ladana, Multilanguage Electronic Publishing System (MEPS) idia karaia. Unai program dainai, idia ese gado handred momo be kompiuta dekenai idia taip, laulau badinai hereva idia atoa, bena idia siaia idia printaia totona.

Dahaka dainai emai buka bona magasin be taunimanima momo o haida sibona ese idia herevalaia gadodia dekenai ai hahanaia? Badina Iehova ia ura “taunimanima idauidau do ia hamauria bona hereva momokani ena diba maoromaoro do idia abia.”​—1 Timoteo 2:3, 4.

• Emai buka bona magasin be edena bamona ai torea?

• Dahaka dainai emai buka bona magasin be gado idauidau dekenai ai trensleit?

Lagani ibounai lalodiai, emai orea ese Baibel bona buka milioni momo ia karaia bona hariharilaia, davana lasi. Ai ese Kingdom Hall bona brens ofesi ai haginia bona naria. Betele bona misinari taudia tausen momo ai durua. Disasta negadiai, heduru ai henia. To, reana oi henanadai, ‘Iehova ena Witnes taudia ese moni be edeseni amo idia abia?’

Kontribusen amo emai hebou maragidia bona badadia ai durua. Ena be emai haroro gaukara totona moni bada ai gaukaralaia, to taunimanima amo moni ai noia lasi. Gima Kohorona magasin gunadia idia gwau, ai laloa Iehova ese ai ia naria, bona do ‘ai noinoi lasi taunimanima dekenai durua abia totona’​—bona unai ai badinaia noho!​—Mataio 10:8.

Kontribusen amo emai gaukara idauidau ai durua. Taunimanima momo be emai Baibel hadibaia gaukarana idia moalelaia bona kontribusen moni idia henia. Iehova ena Witnes taudia sibodia danu be mai moale ida edia nega, goada, moni, bona ma gau haida idia gaukaralaia, tanobada ibounai lalonai Dirava ena ura idia karaia totona. (1 Sivarai 29:⁠9) Kingdom Hall bona hebouhebou gabudia ai, kontribusen mauadia idia noho, bona taunimanima be unuseniai edia kontribusen idia udaia. Nega momo, moni momo lasi taudia ese kontribusen moni idia henia. Hegeregere, Iesu ese ogogami vabuna ta ia hanamoa badina dubu helaga ena moni mauana ai koini maragidia rua ia udaia. (Luka 21:​1-4) Unai dainai, taunimanima idauidau ese hanaihanai ‘moni sisina idia haboua’ diba, bena ‘edia kudouna ai idia laloa vadaeni gauna hegeregerena do idia henia.’—1 Korinto 16:2; 2 Korinto 9:7.

Haida idia ura Dirava idia hanamoa dainai edia “kohu” amo Basileia ena gaukara idia durua. Ai diba momokani, Iehova be hanaihanai idia edia kudouna do ia hamarerea, unai bamona heduru idia henia totona, unai amo Dirava ese ena ura do idia hagugurua.​—Aonega Herevadia 3:9, BHḡ.

• Dahaka dainai emai orea be dubu ma haida amo ia idau?

• Kontribusen moni be edena bamona ai gaukaralaia?

Kingdom Hall dekenai Baibel ena hereva bona “Dirava ena Basileia,” Iesu ese ia harorolaia hereva badana unai, ai herevalaia.​—Luka 8:1.

Gabu ta ta ai idia noho Kingdom Hall be Iehova ai tomadiho henia gabuna. Kingdom Hall ai dala ai karaia Basileia ena sivarai namona ai harorolaia totona. (Mataio 24:14) Kingdom Hall ai haginia daladia (size bona design) be idauidau, bona edia herahera o sitaelo gaudia be momo lasi. Nega momo kongrigeisen momo be Kingdom Hall tamona idia gaukaralaia. Lagani haida gunanai, ai ese Kingdom Hall matamatadia tausen momo (anina be, dina ta ta lalonai Kingdom Hall faiv bamona) ai haginia, badina emai pablisa bona kongrigeisen edia namba idia bada idia lao. Edena dala ai Kingdom Hall ai haginia diba?​—Mataio 19:26.

Taunimanima idia henia kontribusen ai gaukaralaia Kingdom Hall ai haginia totona. Unai kontribusen ibounai be brens ofesi dekenai ai siaia, unai amo ia ese unai moni ia gaukaralaia diba kongrigeisen ma haida edia Kingdom Hall idia hanamoa o matamatana idia haginia totona.

Volantia taudia idauidau ese Kingdom Hall idia haginia. Tano momo ai, Kingdom Hall Konstraksen Grup idia noho. Unai grup (haginia taudia bona volantia taudia) be taoni o gunika gabudiai idia noho kongrigeisen ta ta dekenai ia lao bona ia durua Kingdom Hall ia haginia totona. Tano ma haida ai, Witnes taudia haida idia abia hidi, Kingdom Hall haginia bona hanamoa gaukarana idia naria totona. Ena be gaukara idia diba namonamo volantia taudia be momo, to Kingdom Hall ta ta ai haginia neganai, nega momo kongrigeisen taudia be unai gaukara dekenai idia volantia. Iehova ena lauma helaga ena heduru bona iena taunimanima idia gaukara goada dainai, ai ese King­dom Hall ai haginia diba.—Salamo 127:1; Kolose 3:23.

• Dahaka dainai emai tomadiho rumadia ai gwauraia Kingdom Hall?

• Edena dala ai tanobada ibounai dekenai Kingdom Hall ai haginia diba?

Iehova ena Witnes taudia edia Kingdom Hall ibounai dekenai Dirava ena ladana helagana ia noho. Unai dainai, ai laloa hanaihanai Kingdom Hall hagoevaia bona meintenens gaukara ai karaia be namo—unai be gaukara namona, bona emai tomadiho ena kahana badana ta. Ibounai be unai gaukara idia durua diba.

Hebou murinai Kingdom Hall hagoevaia gaukarana ai durua. Hebou ta ta murinai, tadikaka bona taihu be mai moale ida Kingdom Hall ena kahana haida idia hagoevaia. Wiki lalonai, dina ta ai makaia, Kingdom Hall ibounai ai hagoevaia namonamo totona. Elda o hesiai tauna ta ese unai gaukara ia naria, bona nega momo do ai karaia gaukaradia ena lista ta ai badinaia. Ai karaia gaukaradia haida be inai: Foloa ai daroa, mopua, kahu ai kokia, sea ai atoa namonamo, toileti ai hagoevaia, windo bona hevarivari ai huria, momoru ai negea, ava ai utua, bona gaukara ma haida. Lagani ta ta ai, dina ta ai makaia, hagoevaia gaukara badana ai karaia totona. Danu, emai natudia dekenai gaukara haida ai henia, unai amo ai hadibadia emai Kingdom Hall idia matauraia totona.—Hadibaia Tauna 5:1.

Kingdom Hall ena meintenens gaukara ai durua. Lagani ta ta ai, Kingdom Hall ibounai—lalona bona murimurina—ai sekea namonamo. Hanaihanai meintenens gaukara ai karaia, unai amo Kingdom Hall do ia namo, bona moni bada ai negea kava lasi. (2 Sivarai 24:13; 34:10) Kingdom Hall namona bona goevana lalonai emai Dirava ai tomadiho henia be gau badana. Kingdom Hall ena meintenens gaukara ai durua neganai, ai hahedinaraia ai be Iehova ai lalokau henia bona emai Kingdom Hall ai laloa bada. (Salamo 122:1) Danu, komiuniti ai idia noho taudia be emai Kingdom Hall namona bona goevana idia itaia neganai idia moale.—2 Korinto 6:3.

• Dahaka dainai emai Kingdom Hall ai naria namonamo be namo?

• Kingdom Hall be edena bamona ai hagoevaia?

Baibel dekenai emu diba oi habadaia totona, oi ura emai buka haida ai heduru oi tahua, a? Oi ura siri ta, tau ta o hahine ta, gabu ta, o Baibel ese ia sivarailaia gauna ma ta oi dibaia namonamo, a? Eiava oi ura oi tahua, Dirava ena Hereva ese oi ia durua diba emu metau ta oi hanaia eiava? Vadaeni, Kingdom Hall ena laiberi oi gaukaralaia be namo.

Laiberi ai tulu namodia idia noho. Reana Iehova ena Witnes taudia edia buka momo, emu gado ai idia hahanaia gaudia, be oi dekenai idia noho lasi. To, Kingdom Hall ena laiberi ai buka matamata momo idia noho. Danu unuseniai Baibel idauidau, diksenari namona ta, bona buka namodia ma haida idia noho. Hebou vairanai bona murinai, unai laiberi oi gaukaralaia diba. Bema laiberi ai kompiuta ta ia noho, reana program ta ladana, Watchtower Library ia noho. Unai program lalonai emai buka idauidau idia noho, bona unuseniai hereva ta o siri ta ena anina oi tahua be auka lasi.

Tiokratik Haroro Sikuli ena stiuden ese laiberi idia gaukaralaia diba. Bema Tiokratik Haroro Sikuli ai oi be mai emu tok, namona be Kingdom Hall ena laiberi oi gaukaralaia emu tok oi hegaegaelaia totona. Sikuli naria tauna be unai laiberi ia naria. Ia ese laiberi ia sekea, buka bona magasin matamatadia idia noho vadaeni eiava, bona edia gabu korikori ai ia atodia namonamo. Ia o emu Baibel tisa ese oi ia durua diba edena bamona unuseniai emu tahua gaukara oi karaia totona. To, namona be Kingdom Hall ena laiberi ena buka be eda ruma dekenai ita abia lao lasi. Danu, ita ura laiberi ena buka ita gaukaralaia namonamo bona unai buka dekenai ita toretore lasi.

Baibel ese ia hahedinaraia, ‘Dirava do ita diba’ bema iena hereva ita tahua goada, kohu momo, idia hunia gaudia, do ita tahua bamona. (Aonega Herevadia 2:1-5) Kingdom Hall ena laiberi dekenai unai diba oi tahua matamaia diba.

• Kingdom Hall ena laiberi ai dahaka tulu idia noho?

• Daika ese oi ia durua diba laiberi oi gaukaralaia namonamo totona?

Iesu Keriso be ena murinai idia raka taudia ia hamaoroa: “Taunimanima vairanai emui diari umui hahedinaraia, vadaeni emui kara namodia do idia itaia bena emui Tamana guba ai ia noho do idia hanamoa.” (Mataio 5:16) Unai dainai, ai ese hari inai negai idia noho teknoloji bona kompiuta ena Intanet ai gaukaralaia. Emai Intanet Web sait, jw.org, be Iehova ena Witnes taudia edia gaukara bona gau ma haida ia hahedinaraia. Emai Web sait ai dahaka gaudia idia noho?

Baibel amo taunimanima momo edia henanadai ia haerelaia. Taunimanima ese idia gwauraia henanadai haida edia haere oi davaria diba. Unai bamona henanadai siks be pepapepa ladana, Oi Ura Hereva Momokani Oi Diba, A? ese ia haerelaia. Unai pepapepa be gado 400 mai kahana ai idia hahanaia, bona emai Web sait ai ia noho. Danu, gado 100 mai kahana dekenai ai hahanaia New World Translation Baibel, bona emai stadi buka haida hegeregere, Baibel be Dahaka Ia Hadibaia? bukana, Gima Kohorona o Awake! matamatadia be emai Web sait ai ia noho. Unai gabu dekenai emai buka momo herea oi duahia o kamonai diba, eiava audio gaudia, bona PDF o EPUB format gaudia oi download diba. Danu, kamonai tauna ena gado ai ia noho buka o magasin ena rau haida be unuseni amo oi printaia bona ia dekenai oi hariharilaia diba. Taia kudima edia saini gado edia vidio momo herea be unuseniai idia noho. Baibel duahiduahi, Baibel drama, bona miusiki namodia be unuseni amo oi download diba, bena emu laga-ani negadiai oi kamonai totona.

Iehova ena Witnes taudia edia sivarai momokanidia ia gwauraia. Danu, tanobada ibounai dekenai ai karaia gaukarana ena sivarai matamatadia bona vidio kwadogidia, Iehova ena Witnes taudia dekenai idia vara gaudia, bona disasta negadiai taunimanima ai durua sivaraidia be emai Web sait ai ia noho. Emai hebouhebou gabudia, negadia, bona emai brens ofesi edia adres bona telefon namba be unuseniai ia noho danu.

Unai Web sait dainai, ai ese tanobada ena gabu daudaudia dekenai hereva momokani ena diari ai hahedinaraia. Tano badadia ibounai, Antarctica danu, ai idia noho taudia be hereva momokani idia dibaia. Ai guriguri tanobada ibounai dekenai “Iehova ena hereva be do ia tubu haraga noho,” unai amo Dirava idia hanamoa diba.​—2 Tesalonika 3:1.

• Edena dala ai jw.org/ho ese momo ia durua Baibel ena hereva momokani idia dibaia totona?

• Oi ura emai Web sait dekenai dahaka gaudia oi itaia?