LESENI 20

Kongrigeisen Ena Gaukara Dalana

Printaia Gauna

Iehova be gau ibounai ia karaia namonamo Diravana. (1 Korinto 14:33) Unai dainai iena taunimanima ese gau ibounai idia karaia namonamo be namo. Keristani kongrigeisen ena gaukara be edena bamona ia karaia? Bona edena dala ai unai gaukara ita durua diba?

1. Daika be kongrigeisen ena kwarana?

“Keriso be kongrigeisen ena kwarana.” (Efeso 5:23) Iesu be guba amo, Iehova ena taunimanima edia gaukara tanobada ibounai ai ia hakaua. Iesu ese elda orea maragina ta ia abia hidi, unai be “hesiai tauna mai ena kamonai bona mai ena aonega,” eiava Hakaua Oreana. (Mataio 24:45-47 duahia.) Keristani ginigunadia edia nega ai aposetolo taudia bona Ierusalema ai idia noho tau badadia hegeregerena, Hakaua Oreana ese tanobada ibounai kongrigeisen dekenai hakaua herevadia ia henia. (Kara 15:2) To unai tatau be orea ena gunalaia taudia lasi. Idia ese Baibel idia duahia, Iehova ena ura idia totona idia dibaia, bona mai edia ura ida Iesu ena hakaua dalana idia badinaia.

2. Elda taudia be dahaka gaukara idia karaia?

Elda taudia be orea lalonai lagani momo idia noho abidadama Keristani taudia. Idia ese Baibel amo Iehova ena taunimanima idia hadibaia, hagoadaia bona durudia. Idia karaia gaukara dainai davana idia abia lasi. To, ‘Dirava ena vairanai mai edia ura ida idia karaia. Koikoi dalanai kohu abia totona lasi, to mai edia ura bada ida idia karaia.’ (1 Petero 5:1, 2) Elda taudia be hesiai taudia ese idia durudia, unai hesiai taudia be gabeai elda taudia ai idia lao.

Hakaua Oreana ese elda taudia haida ia abia hidi sekit naria gaukara idia karaia totona. Sekit naria taudia ese kongrigeisen idauidau idia vadivadi henia, hakaua herevadia bona hagoadaia hereva idia henia totona. Danu, sekit naria taudia ese Baibel ai idia noho taravatu idia gaukaralaia unai amo do idia itaia bema tadikaka ta be hegeregere elda eiava hesiai tauna ai ia lao totona.—1 Timoteo 3:1-10, 12; Tito 1:5-9.

3. Witnes taudia ta ta edia gaukara be dahaka?

Kongrigeisen taudia ibounai be kongrigeisen heboudia ai kahana idauidau idia durua, bona edia noho dalana hegeregerena haroro gaukara idia karaia neganai “Iehova ena ladana idia hanamoa.”—Salamo 148:12, 13 duahia.

DIBA MA HAIDA ABIA

Iesu be edena bamona hakaua tauna, elda taudia ese iena haheitalai idia tohotohoa dalana, bona Iesu bona elda taudia ida ita gaukara hebou dalana dibaia.

4. Iesu be hakaua tauna namona

Iesu ese ita ia boiria. Mataio 11:28-30 duahia, bena inai henanadai herevalaia:

Iesu ia ura ena hakaua dalana be edena bamona do ita laloa?

Edena dala ai elda taudia ese Iesu ena haheitalai idia tohotohoa? VIDIO itaia.

VIDIO: Nepal ai Ia Vara Tano Mareremarere Dainai Elda Taudia ese Heduru Idia Henia (4:56)

Baibel ese elda taudia do idia karaia gaukara ia hahedinaraia namonamo.

Isaia 32:2 bona 1 Petero 5:1-3 duahia, bena inai henanadai herevalaia:

Iesu bamona, elda taudia idia gaukara goada ma haida idia durua karana oi itaia neganai, emu hemami be edena bamona?
Edena dala ma haida ai elda taudia ese Iesu idia tohotohoa?

5. Elda taudia be haheitalai namona idia hahedinaraia

Iesu ia ura elda taudia ese edia gaukara be edena bamona do idia laloa? VIDIO itaia.

VIDIO: Elda Taudia be Hakaua Gaukara Idia Karaia! (7:39)

Iesu ese kongrigeisen idia hakaua taudia dekenai sisiba namona ia henia. Mataio 23:8-12 duahia, bena inai henanadai herevalaia:

Baibel ena hakaua herevadia idia badinaia elda taudia bona tomadiho gunalaia taudia amo dahaka idau oi itaia?

A. Laulau: Elda ta be ia sibona bona ena famili ia durua edia hetura karana Dirava ida idia hagoadaia totona. 1. Ia guriguri murinai Baibel ia stadilaia. 2. Ia bona ena adavana ese Baibel amo edia natuna kekeni maragina idia hadibaia.

B. Unai elda bona ena adavana ese hospital ena bedi ai ia hekure kongrigeisen taihu ta idia vadivadi henia.

Elda taudia ese edia hetura karana Iehova ida idia hagoadaia, bona edia famili idia durua unai bamona idia karaia totona
Elda taudia ese kongrigeisen taudia ibounai idia naria namonamo
Elda taudia be idia haroro hanaihanai
Elda taudia be hahediba taudia. Danu, idia ese hagoevaia gaukara bona gaukara ma haida idia durua

6. Elda taudia ida ita gaukara hebou diba

Baibel ese ia hahedinaraia dahaka dainai elda taudia ida ita gaukara hebou be mai anina bada. Heberu 13:17 duahia, bena inai henanadai herevalaia:

Dahaka dainai Baibel ia gwau mai iseda ura ida ita idia hakaua taudia ita kamonai henia bona edia henunai ita noho be namo? Dahaka dainai unai bamona oi laloa?

Luka 16:10 duahia, bena inai henanadai herevalaia:

Dahaka dainai nega ibounai elda taudia ita kamonai henia be namo, ena be gau haida dekenai do ita laloa ia be gau maragina sibona?

HAIDA IDIA GWAU: “Tomadiho oreana ta lalonai oi vareai be gau badana lasi.”

Bema ta be kongrigeisen ta ai ia noho bona Dirava ia tomadiho henia, oi laloa ena namo haida ia dekenai be dahaka?

POINT BADANA

Iesu be kongrigeisen ena kwarana. Namona be Iesu henunai mai moale ida edia gaukara idia karaia elda taudia ida ita gaukara hebou, badina idia ese ita idia hagoadaia bona edia kara amo haheitalai namona idia hahedinaraia.