Gaukara Hebou ese Ruma Bese Ia Durua Ia Goada Totona

TAMA sina haida idia ura edia ruma bese be Iehova idia lalokau henia bona tomadiho henia, to idia gaukara hebou be gau badana. Iehova ese Adamu bona Heva ia karaia neganai, ia gwau idia ruaosi idia gaukara hebou be gau badana. Heva be Adamu ena “bamona.” (Gen. 2:​18, BHğ) Tau bona hahine idia headava neganai, idia durua heheni be gau badana. (Had. 4:​9-​12) Danu, tama sina bona natudia be Iehova ese ia henia gaukaradia idia karaia namonamo totona, idia gaukara hebou be gau badana.

Ruma Bese be Dirava Idia Tomadiho Henia

Barry bona Heidi edia natudia be 5. Idia itaia ruma bese stadi totona idia gaukara hebou neganai, unai ese idia ia durua idia goada idia lao totona. Barry ia gwau: “Nega ta ta ai, natudia maragidia dekenai gaukara haida lau henia. Hegeregere, idia lau noia Awake! ta idia duahia bona ruma bese stadi dekenai idia herevalaia totona. Danu, emai ruma dekenai haroro gaukara ena hamatamaia herevadia ai tohoa guna, unai amo natudia ta ta idia diba haroro gaukara ai dahaka idia gwauraia totona.” Heidi ia gwau: “Ai ta ta be mai emai tahua gaudia, bona ruma bese stadi negadia ta ta ai unai gaudia ai kikilaia, unai amo ai itaia ai goada ai lao noho eiava.” Barry bona Heidi idia gwau dina haida idia be televisen idia itaia lasi, bona unai nega idia gaukaralaia Baibel bona buka ma haida idia duahia totona.

Kongrigeisen Heboudia

Mike bona Denise edia natudia be 4. Gaukara hebou karana ese edena dala ai edia ruma bese ia durua? Mike ia gwau: “Nega haida, palani ai karaia nega bada lalonai hebou dekenai ai ginidae totona, to ai leiti momo. Gabeai, lau itaia ruma bese idia gaukara hebou be mai anina bada, bona unai ese ai ia durua nega bada lalonai hebou dekenai ai ginidae haraga totona.” Denise ia gwau: “Natudia idia tubu daekau neganai, idia ta ta be ruma gaukara haida idia karaia. Hegeregere, emai natuna kekeni, Kim be aniani ia nadua bona teibolo ia hegaegaelaia.” Edia natuna, Michael ia do laloatao gauna ta be inai: “Tuesday hanuaboi ai, kongrigeisen ena hebou ta be emai ruma dekenai ai abia. Unai dainai, daiutu bona foloa ai hagoevaia bona sea ai atodia namonamo.” Edia natuna ma ta, Matthew ia gwau: “Hebou totona, emai tamana be moni gaukara amo ia giroa haraga, bona ai ia durua.” Dahaka namo idia vara?

Ita Hekwarahi be mai Ena Namo

Mike ia gwau: “Lagani 1987 ai, lau bona Denise be painia gaukara ai karaia. Unai negai emai natuna memero toi be ai ida idia do noho. Gabeai, rua be painia gaukara idia karaia, bona ma rua be Betele konstraksen gaukarana idia karaia. Ai ibounai ai moale badina taunimanima 40 ai durua edia mauri idia gwauhamatalaia bona bapatiso idia abia. Danu, nega haida ai ibounai be konstraksen gaukaradia​​—⁠bona tano ma haida dekenai​​—⁠ai durua.”

Oibe, ruma bese idia gaukara hebou neganai, edia hekwarahi be mai ena namo. Oi laloa edena dala ma haida ai emu ruma bese ida oi gaukara hebou diba? Bema emu ruma bese ida oi gaukara hebou, unai ese umui do ia durua diba umui goada umui lao totona.

[Picture on page 28]

Haroro namonamo totona, ruma ai umui tohoa guna