Natudia Dekenai Dirava Oi Hadibaia Dalana​—Edena Dala Namodia?

‘Inai Taravatu, hari dina umui dekenai lau henia gaudia do umui laloaboio lasi. Emui natudia dekenai do umui hadibaia goada, ruma dekenai, dala dekenai, umui hekure o umui gaukara noho neganai, inai Taravatudia do umui herevalaia.’​—⁠DEUTERONOMI 6:​6, 7.

NEGA haida tama sina haida idia lalohekwarahi edia natudia idia hadibaia totona, badina idia laloa unai be maduna badana. Bona natu hadibaia totona heduru idia tahua neganai, idia daradara badina hereva idauidau be momo. Nega momo varavara bona turadia idia ura edia lalohadai idia gwauraidia. Bona tanobada ena buka bona magasin bona Intanet ai, hereva idauidau momo herea idia noho tama sina totona, to nega haida unai hereva idia tamona lasi.

To Baibel be idau, badina tama sina dekenai sisiba hereva namodia ia henia, edia natudia dekenai dahaka do idia hadibaia, bona edena dala ai do idia hadibaia. Atai sirina ena hereva bamona, gau badana be tama sina ese dina ta ta ai dala idia tahua edia natudia dekenai Dirava idia herevalaia. Henunai be Baibel amo heduru herevadia foa idia noho. Unai ese tama sina tausen momo ia durua vadaeni, edia natudia dekenai Dirava idia hadibaia totona.

1. Havaraia gaudia amo diba abia. Aposetolo Paulo ia gwau: “Dirava be ta ese ia itaia diba lasi, to gau ibounai ia havaraia negana amo ema bona hari, taunimanima ese iena siahu bona iena kara idauidau idia lalopararalaia diba. Bona ia karaia gaudia amo unai idia lalopararalaia, danu idia diba iena siahu be ia doko diba lasi bona momokani ia be Dirava.” (Roma 1:20) Natudia ese Dirava idia tura henia diba, bema tama sina idia hekwarahi idia dekenai Dirava ia havaraia gaudia idia herevalaia, bona idia durudia havaraia gaudia amo Dirava ena kara idia lalopararalaia.

Iesu be ena hahediba taudia ia hadibaia neganai, unai dala ia gaukaralaia. Hegeregere ia gwau: “Guba manudia umui itaia namonamo, idia be uhe idia hadoa lasi, idia geigei lasi bona haboua rumana dekenai aniani idia haboua lasi. To emui guba Tamana ese idia ia ubua. Umui ese idia umui hereaia, ani?” (Mataio 6:26) Iesu ese Iehova ena lalokau bona hebogahisi karadia ia gwauraia hedinarai. Unai sibona lasi, to ia ese ena hahediba taudia ia durua, Dirava ese ena natudia dekenai unai kara ia hahedinaraia dalana idia laloa totona.

Aonega tauna, King Solomona be Dirava ese dimairi dekenai ia henia aonega ia herevalaia, bona unai amo ita dekenai mai anina bada gauna ta ia hadibaia. Ia gwau: “Lahedo taudia ese, dimairi edia kara bamona do idia karaia be namo. Dimairi be mai edia king lasi, mai edia lohia ta lasi, bona mai edia biaguna lasi. To medu lasi neganai edia aniani idia haboua, bona medu ena nega totona idia hegaegae noho.” (Aonega Herevadia 6:​6-8) Ita dibaia gauna be inai: Mai anina bada tahua gaudia ita atoa bona Dirava ese ia henia goadana amo unai ita hagugurua!

Tama sina ese Iesu bona Solomona edia hahediba dalana idia tohotohoa diba, bema inai idia karaia: (1) Edia natudia idia nanadaia edena tubutubu gaudia o animal idia ura henia. (2) Unai tubutubu gaudia bona animal dekenai diba haida tahua. (3) Unai havaraia gaudia amo Dirava ena kara dibaia dalana idia herevalaia.

2. Iesu ia hadibaia taudia ia kara henia dalana tohotohoa. Tanobada ai idia noho taudia ibounai amo, Iesu ese mai anina bada gaudia ia herevalaia. To, ena nega bada ia gaukaralaia henanadai momo ia henia totona. Ia ura bada ia hadibaia taudia edia lalohadai bona hemami ia diba. (Mataio 17:​24, 25; Mareko 8:​27-29) Unai hegeregerena, tama sina ese mai anina bada gaudia be natudia dekenai idia hadibaia. To unai ese anina ia havaraia totona, gau badana be Iesu idia tohotohoa bona edia natudia idia hagoadaia, mai gari lasi ida edia hemami idia gwauraia.

Bema natudia edia kara be namo lasi bona mai anina bada gaudia idia dibaia haraga lasi, be edena bamona? Iesu ese aposetolo taudia ia kara henia dalana mani ita laloa. Nega haida idia huanai idia hepapahuahu bada bona manau karana ena namo idia dibaia haraga lasi. To, Iesu ia haheauka bona idia ia hereva henia loulou idia manau totona. (Mareko 9:​33, 34; Luka 9:​46-48; 22:​24, 25) Tama sina ese Iesu ena kara idia tohotohoa totona, namona be mai haheauka ida edia natudia edia kara idia hamaoromaoroa, bona bema mai dalana, do idia hadibaia loulou ela bona unai ena anina idia lalopararalaia.a

3. Haheitalai amo hadibadia. Tama sina ese aposetolo Paulo ena sisiba Roma Keristani taudia dekenai idia badinaia be namo. Idia dekenai ia gwau: “Oi ese ta oi hadibaia, to oi sibona oi hadibaia lasi, a? Oi haroro oi gwau, ‘Henaohenao lasi,’ to oi henaohenao, a?”​—⁠Roma 2:⁠21.

Unai hereva be mai anina bada, badina natudia ese tama sina edia kara idia laloa bada, to edia hereva lasi. Momokani, bema natudia idia itaia tama sina ese edia hereva idia badinaia, vadaeni do idia kamonai henidia.

4. Natuna ia maragi negana amo hadibaia. Aposetolo Paulo ena misinari turana, Timoteo, be ia noho hanuana lalonai ladana namona ia abia. (Kara 16:​1, 2) Badina Timoteo ia “beibi negana amo Toretore Helagadia” idia hadibaia. Iena sinana bona tubuna be ia dekenai Baibel idia duahia sibona lasi, to ia idia durua danu Baibel ena hereva momokani ia lalohadailaia totona.​—⁠2 Timoteo 1:5; 3:​14, 15.

Heduru Abia Gabuna

Iehova ena Witnes taudia ese tama sina durua totona, Baibel buka bona magasin idia karaia, unai amo idia ia durua edia natudia dekenai Dirava ena hereva momokani idia hadibaia. Unai buka bona magasin haida be natudia maragidia durua totona idia karaia. Bona ma haida be tama sina bona edia natudia​—⁠mauri lagani 13-19​—⁠ia durua edia herevahereva karana idia hanamoa totona.b

Momokani, tama sina be natudia dekenai Dirava idia do hadibaia lasi neganai, natudia edia henanadai aukadia edia haere idia diba guna be namo. Hegeregere, inai bamona henanadai be edena bamona do oi haerelaia: Dahaka dainai Dirava ese hisihisi ia koua lasi? Dirava ena ura tanobada totona be dahaka? Mase taudia be edeseniai? Iehova ena Witnes taudia be mai moale ida oi idia durua unai bona henanadai ma haida edia haere oi diba totona, unai amo oi bona emu famili be Dirava kahirakahira umui lao diba.​—⁠Iamesi 4:⁠8.

[Footnotes]