“Nega Dika Dinadia” ai Iehova Hesiai Henia

ERNST, ena mauri lagani be 70 bamona, ia gwau: “Nega momo lau gorere, bona egu tauanina idia hisihisi.”a Oi dekenai unai ia vara danu, a? Bema oi buruka oi lao bona oi mamia oi gorere momo bona emu goada ia ore, Hadibaia Tauna karoa 12 ena hereva do oi laloa. Siri 1 ia hahedinaraia buruka negana be “nega dika dinadia.” To, ia hahedinaraia lasi emu mauri ai dika sibona do oi davaria. Emu mauri oi moalelaia diba, bema Iehova oi hesiai henia.

ABIDADAMA HAGOADAIA NOHO

Tadikaka bona taihu burukadia e, umui davaria hisihisi be haida ese idia davaria danu. Baibel negadia ai, Iehova ena hesiai taudia burukadia be unai bamona hisihisi idia davaria. Hegeregere, Isako, Iakobo, bona Ahaisa idia buruka neganai, edia matana ia dika. (Gen. 27:1; 48:10; 1 Kin. 14:4) King Davida ia hegeregere lasi ‘iena tauanina ia hasiahua’ totona. (1 Kin. 1:1) Taga tauna Barasilai be aniani ena mamina ia mamia lasi bona ena taiana ia kudima. (2 Sam. 19:32-35) Aberahamo bona Naomi edia adavana idia mase dainai, idia lalohisihisi.—Gen. 23:1, 2; Ruta 1:3, 12.

Dahaka ese idia ia durua Iehova idia badinaia bona idia moale totona? Aberahamo ia buruka neganai, Dirava ena gwauhamata ia laloa dainai, unai ese iena ‘abidadama ia hagoadaia.’ (Roma 4:19, 20) Ita danu iseda abidadama ita hagoadaia be namo. Ena be ita buruka vadaeni, o eda mauri lalonai gau haida ita karaia diba lasi, eiava iseda noho dalana be auka, to abidadama goadana ita hahedinaraia diba. Hegeregere, ena be Iakobo ena goada ia ore, matana ia dika, bona bedi ai ia hekure, to Dirava ena gwauhamata ia abidadama henia. (Gen. 48:1-4, 10; Heb. 11:21) Ines ena mauri lagani be 93 bona masolo ia manoka gorerena ia abia, to ia gwau: Dina ta ta ai Iehova ese lau ia hanamoa. Dina ta ta ai Paradaiso lau laloa. Unai ese lau ia durua.” Ia be haheitalai namona!

Iseda abidadama ita hagoadaia daladia be inai: Guriguri, Dirava ena hereva ita stadilaia, bona Keristani heboudia dekenai ita lao. Peroveta tauna burukana Daniela be dina ta lalonai nega toi ia guriguri, bona Dirava ena Hereva ia stadilaia. (Dan. 6:10; 9:2) Vabu ladana Ana be “hanaihanai dubu helaga dekenai ia lao.” (Luka 2:36, 37) Bema emu goada hegeregerena hebou dekenai oi lao bona haere oi henia, oi bona ma haida oi hagoadaia diba. Bona Iehova be hanaihanai emu guriguri karana ia moalelaia, herevana gau momo oi karaia diba lasi.—Aon. 15:8.

Umui abidadama taudia momo umui ura duahiduahi, to emui matana ia dika, eiava umui ura hebou dekenai umui lao, to umui hegeregere lasi. Dahaka umui karaia diba? Emu ruma ai orea ena buka haida oi duahia, o orea ena vidio oi itaia, o iseda audio oi kamonaia diba. Hebou idia lao lasi burukadia momo be telefon amo hebou idia kamonai henia. Taihu Inge ena mauri lagani be 79 bona ena matana ia dika, to kongrigeisen tadikaka ta ese ia totona kompiuta amo toretore badadia ia printaia, unai amo hebou kahadia ia duahia bona ia hegaegaelaia diba.

To oi dekenai nega ia noho gau haida oi karaia totona. Hegeregere unai nega oi gaukaralaia diba idia rekodia Baibel ena hereva, tok haida, bona audio drama haida oi kamonai henia. Ma danu, reana telefon amo emu tadikaka taihu oi rini henia, bona ta ta ‘umui hagoadaia heheni.’—Roma 1:11, 12.

DIRAVA ENA HESIAI GAUKARA GOADALAIA

Mauri lagani 80 taihu ta ladana Christa be mai lalohisihisi ida ia gwau: “Bema guna oi karaia gaudia be hari oi karaia diba lasi, do oi lalohekwarahi bada.” To, edena dala ai buruka taudia idia moale noho diba? Tadikaka Peter, ena mauri lagani be 75, ia gwau: “Oi karaia diba lasi gaudia oi laloa lasi, to gau namodia oi laloa, bona oi karaia diba gaudia oi karaia.”

Haroro daladia haida oi laloa diba, a? Taihu Heidi be ruma-ta-ruma-ta gaukara ia karaia diba lasi, guna ia karaia bamona. Iena mauri lagani be 80, to kompiuta gaukaralaia dalana ia dibaia, unai amo revareva ia torea diba. Buruka pablisa haida be taunimanima idia laga-ani gabudiai eiava basi naria gabuna ai idia haroro. Eiava bema buruka taudia edia noho gabuna ai oi noho, reana unai gabu be emu teritori ai oi halaoa diba, hegeregere nesi taudia eiava unai gabu ai idia noho taudia haida oi haroro henia.

King Davida ia buruka neganai, tomadiho momokani ia durua. Dubu helaga haginia totona moni ia henia, bona dala ia karaia haginia gaukara idia matamaia totona. (1 Siv. 28:11–29:5) Unai hegeregerena, dala haida ai tanobada ibounai ena Basileia gaukara oi durua diba. Emu hagoadaia herevadia, harihari gauna ta, eiava aniani sisina amo kongrigeisen painia taudia eiava pablisa goadadia oi durua diba. Matamata taudia, ruma bese taudia, ful-taim hesiai gaukara idia karaia taudia, gorere taudia, bona maduna badadia idia huaia taudia totona oi guriguri.

Iehova ese oi bona oi karaia gaukara namona ia laloa bada. Iseda guba Tamana be umui buruka taudia do ia rakatania diba lasi. (Sal. 71:9) Iehova be umui ia lalokau henia bada. Kahirakahira, buruka negana do ia ore, bona hisihisi bona dika do ita abia lasi. To mai goada ida, Iehova Dirava do ita hesiai henia ela bona hanaihanai!