Iakobo Ena Hereva Dokodia amo Ita Dibaia Gaudia—Kahana 2

1. Inai atikol ai dahaka do ita herevalaia?

IAKOBO ese ena natudia ta ta edia hahenamo ia gwauraia neganai, idia ibounai be ia badinai idia helai noho. Atikol ginigunana ai ita herevalaia bamona, Iakobo ese Rubena, Simona, Levi bona Iuda dekenai ia gwauraia herevadia dainai, idia ibounai idia hoa. Unai dainai idia laloa Iakobo be ena natudia 8 dekenai ma dahaka do ia gwau. Iakobo ese Sebuluno, Isakara, Dano, Gado, Asere, Napatali, Iosepa, bona Beniamina dekenai ia gwauraia herevadia amo do ita dibaia gaudia mani ita herevalaia.a

SEBULUNO

2. Iakobo ese Sebuluno dekenai dahaka hereva ia gwauraia, bona edena dala ai ia guguru? (Genese 49:13) (Maua itaia danu.)

² Genese 49:13 duahia. Iakobo ia gwau Sebuluno ena bese taudia be davara kahirakahira do idia noho, unai be Gwauhamata Tanona ena not kahana. Lagani 200 mai kahana murinai, Sebuluno iduhu taudia be edia tano idia abia. Unai tano be Galilea Davarana bona Meditereinien huanai ia noho. Mose ia peroveta, ia gwau: “Sebuluno e, namona be emu laolao lalonai oi kwalimu bona oi moale.” (Deu. 33:18) Sebuluno iduhu taudia be davara rua huanai idia noho dainai, idia be gabu haida amo idia mai taudia amo kohu idia hoia diba, bona edia kohu idia hoihoilaia diba. Unai badina haida dainai Sebuluno ena bese taudia idia moale diba.

3. Dahaka ese ita do ia durua, unai amo ita abia dae ita dekenai idia noho gaudia be hegeregere?

³ Ita dibaia gauna. Herevana iseda noho gabudia bona noho daladia be idauidau, to ita moale diba. Ita moale noho totona, namona be ita dekenai ia noho gau namodia ita laloa. (Sal. 16:6; 24:5) Nega haida, ita be ita dekenai idia noho lasi gaudia ita laloa momo, to ita dekenai idia noho vadaeni gau namodia ita laloaboio. Unai dainai namona be ita laloatao, ita dekenai idia noho gaudia be hegeregere ita moale noho totona.—Gal. 6:4.

ISAKARA

4. Iakobo ese Isakara dekenai dahaka hereva ia gwauraia, bona edena dala ai ia guguru? (Genese 49:14, 15) (Maua itaia danu.)

⁴ Genese 49:14, 15 duahia. Isakara be gaukara goadagoada tauna dainai, Iakobo ese ia hanamoa neganai, ia gwau Isakara ena goada be metau ia huaia doniki goadana bamona. Danu Iakobo ia gwau, Isakara ena bese taudia ese Ioridane Sinavai badinai ia noho tano namona do idia abia. (Ios. 19:22) Momokani idia gaukara goada edia tano ai uma gabu idia karaia totona, to danu idia ese ma haida idia durua. (1 Ki. 4:7, 17) Hegeregere, Hahemaoro Tauna Baraki bona peroveta hahinena Debora be Sisera taudia tuari henia totona Israela taudia idia noia neganai, Isakara iduhu danu be heduru idia henia. Isakara iduhu taudia be tuari ma haida lalonai idia heduru danu.—Hah. 5:15

5. Edena dala ai Isakara ena iduhu taudia ita tohotohoa diba, bona dahaka dainai?

⁵ Ita dibaia gauna. Iehova ese iena hesiai gaukara lalonai ita karaia gaukara ia laloa bada, Isakara ena iduhu taudia edia gaukara goadagoada karana ia laloa bada hegeregerena. (Had. 2:24) Kongrigeisen naria totona idia gaukara goada tadikaka mani oi laloa. (1 Tim. 3:1) Unai tadikaka be tuari lalonai idia vareai lasi, to idia gaukara goada, unai amo tadikaka taihu edia hetura karana Iehova ida idia gimaia. (1 Kor. 5:1, 5; Iuda 17-23) Danu idia be edia tok idia hegaegaelaia namonamo, unai amo kongrigeisen idia hagoadaia diba.—1 Tim. 5:17.

DANO

6. Dano iduhu taudia be dahaka asainmen idia abia? (Genese 49:17, 18) (Maua itaia danu.)

⁶ Genese 49:17, 18 duahia. Iakobo ia gwau, Dano be gaigai ta bamona tuari ai idia gaukaralaia hosi ia koria diba. Dano iduhu taudia be gari lasi taudia, bona idia noho hegaegae Israela besena ena inai taudia idia tuari henia totona. Israela taudia be Gwauhamata Tanona dekenai idia lao neganai, Dano iduhu be “edia murinai idia raka bona idia gimaia.” (Num. 10:25) Idia be mai anina bada gaukarana idia karaia, to Israela taudia ese unai idia itaia lasi.

7. Iehova ena hesiai gaukara ita karaia neganai, dahaka ita laloatao be namo?

⁷ Ita dibaia gauna. Nega haida oi be asainmen ta oi karaia, bona oi mamia haida ese oi karaia gaukara idia itaia lasi, a? Reana oi be Kingdom Hall hagoevaia eiava hanamoa gaukara oi durua, hebouhebou ena gaukara totona oi volantia, eiava gaukara ma ta oi karaia. Bema oi be unai bamona gaukaradia oi durua, unai be namo herea! Namona be hanaihanai oi laloatao, Iehova be ia dainai oi karaia gaukara ibounai ia itaia bona ia laloa bada. Bona ia moale bada bema ia oi lalokau henia dainai ia oi hesiai henia.—Mat. 6:1-4.

GADO

8. Dahaka dainai ia auka lasi Israela ena inai taudia ese Gado iduhu idia tuari henia totona? (Genese 49:19) (Maua itaia danu.)

⁸ Genese 49:19 duahia. Iakobo ia peroveta, dadidadi oreana ta ese Gado do ia tuari henia. Lagani 200 murinai, Gado iduhuna be Ioridane Sinavai badinai ia noho tano idia abia, unai tano badinai idia noho besedia be edia inai taudia. Unai dainai ia auka lasi unai bese taudia ese idia tuari henia totona. To, Gado iduhu taudia idia ura unuseni idia noho, badina unai be tano namo herea edia animal naria totona. (Num. 32:1, 5) Unai ese ia hahedinaraia Gado iduhu taudia be gari lasi taudia. Danu idia diba edia tano gimaia totona edia inai taudia idia tuari henia neganai, Iehova ese idia do ia durua. Lagani momo lalonai edia tuari taudia ese iduhu ma haida idia durua Ioridane ena west kahanai ia noho tano idia abia totona. (Num. 32:16-19) Unai tuari taudia idia abia dae tuari totona idia lao neganai, Iehova ese edia adavadia bona natudia do ia naria. Idia be gari lasi karana idia hahedinaraia bona sibona edia ura idia dadaraia dainai, Iehova ese idia ia hanamoa.—Ios. 22:1-4.

9. Edena dala ai Iehova tabekau henia karana ese ita do ia durua abia hidi namodia ita karaia totona?

⁹ Ita dibaia gauna. Nega aukadia ai Iehova ita hesiai henia totona, ia dekenai ita tabekau be gau badana. (Sal. 37:3) Tadikaka taihu momo be tiokratik konstraksen gaukara idia durua eiava pablisa momo lasi gabuna dekenai idia heduru eiava asainment ma haida idia karaia neganai, idia hahedinaraia Iehova dekenai idia tabekau. Unai bamona idia karaia badina idia diba momokani Iehova ese nega ibounai idia do ia naria.—Sal. 23:1.

ASERE

10. Asere iduhu taudia be dahaka idia karaia lasi? (Genese 49:20) (Maua itaia danu.)

¹⁰ Genese 49:20 duahia. Iakobo ia peroveta Asere ena iduhu be taga taudia ai do idia lao, bona ia hereva hegeregerena ia vara. Israela lalonai, Asere ena iduhu taudia ese idia abia tano ai aniani idia tubu namonamo bona aniani momo idia abia. (Deu. 33:24) Unai tano be Meditereinien Davarana badinai ia noho, bona unai tano ai taga hanuana Sidono ena bouti abia gabuna ia noho. To, Asere ena iduhu taudia ese tano amo Kanana taudia idia lulua lasi. (Hah. 1:31, 32) Asere taudia be taga taudia, to Kanana taudia edia kara idia badinaia dainai, mai ura ida Iehova idia tomadiho henia lasi. Hegeregere, Hahemaoro Tauna Baraki be Kanana taudia tuari henia totona Asere iduhu taudia edia heduru ia noia neganai, idia ura lasi heduru idia henia. Unai dainai Iehova ena heduru amo Israela taudia idia kwalimu neganai, Asere ena iduhu taudia be unai idia itaia lasi. (Hah. 5:19-21) Asere iduhu taudia be Baraki bona Debora ese idia abia ane idia kamonai neganai, reana idia hemaraia, badina unai ane ai idia gwau: “Asere be kone dekenai ia noho sibona.”—Hah. 5:17.

11. Dahaka dainai moni bona kohu dekenai lalohadai maorona ita abia be namo?

¹¹ Ita dibaia gauna. Namona be mai goada ibounai ida Iehova ita hesiai henia. Unai ita karaia totona, tanobada taudia edia lalohadai moni bona kohu abia karana dekenai ita dadaraia. (Aon. 18:11) Ena be moni ita abia be namo, to namo lasi moni momo tahua karana ese ita ia koua Dirava ita hesiai henia totona. (Had. 7:12; Heb. 13:5) Namo lasi iseda nega bona goada ita haorea kava anina lasi gaudia totona. To iseda nega bona goada ita gaukaralaia Iehova ita hesiai henia totona, badina ita diba nega vaira ai ita dekenai mauri namona do ia henia.—Sal. 4:8.

NAPATALI

12. Edena dala ai Iakobo ese Napatali dekenai ia gwauraia peroveta herevadia idia guguru? (Genese 49:21) (Maua itaia danu.)

¹² Genese 49:21 duahia. Iakobo ia gwau, Napatali be “hereva goevadia” do ia gwauraia, bona unai be Iesu ena hereva dalana ia hahedinaraia. Iesu be hadibaia tauna namona, bona Kaperanauma be “ena siti” ai ia halaoa. Kaperanauma be Napatali ena tano ai ia noho. (Mat. 4:13; 9:1; Ioa. 7:46) Isaia be Iesu ia perovetalaia neganai, ia gwau, Sebuluno bona Napatali taudia be “diari badana ta” do idia itaia. (Isa. 9:1, 2) Iesu ena hadibaia karana dainai, ia be “taunimanima idauidau ibounai dekenai diari ia henia diari momokanina.”—Ioa. 1:9.

13. Edena dala ai iseda hereva amo Iehova ita hamoalea diba?

¹³ Ita dibaia gauna. Iehova ese ita herevalaia gaudia bona ita herevalaia dalana ia laloa bada. Iehova ita hamoalea totona, edena dala ai “hereva goevadia” ita gwauraia diba? Hereva momokani ita gwauraia. (Sal. 15:1, 2) Ita ura iseda hereva amo haida ita hagoadaia. Hegeregere, gau namona ta idia karaia neganai, idia ita hanamoa be namo. To, namo lasi haida edia kerere ita gwauraia eiava ita maumau. (Efe. 4:29) Bona namona be herevahereva namonamo daladia ita manadalaia, unai amo taunimanima dekenai sivarai namona ita herevalaia diba.

IOSEPA

14. Iakobo ese Iosepa totona ia gwauraia peroveta herevadia be edena dala ai idia guguru? (Genese 49:22, 26) (Maua itaia danu.)

¹⁴ Genese 49:22, 26 duahia. Iakobo be Iosepa dekenai ia moale bada—Iosepa be “ena tadikakadia amo idia abia hidi tauna.” Iakobo ese ia ia gwauraia “huahua momo ia havaraia au ena rigi matamata ta.” Unai au be Iakobo bona ena rigi matamata be Iosepa. Iosepa be Iakobo ena lalokau adavana Rahela ena vara guna natuna mero. Iakobo ia peroveta, Iosepa ese Rubena ena vara guna ahuna do ia abia. Rubena be Lea ena vara guna natuna mero. (Gen. 48:5, 6; 1 Siv. 5:1, 2) Unai peroveta herevana ia guguru, Iosepa ena natudia memero, Eparaima and Manase, be Israela ena iduhu rua ai idia lao bona idia ta ta be edia ahuna hegeregerena tano idia abia.—Gen. 49:25; Ios. 14:4.

15. Iosepa be nega aukadia lalonai dahaka ia karaia?

¹⁵ Danu Iakobo ia gwau, “peva gaukaralaia taudia ese [Iosepa] . . . idia pidia bona idia dagedage henia noho.” (Gen. 49:23) Unai peva gaukaralaia taudia be ena tadikakadia idia laulaulaia, idia be Iosepa dekenai idia mama, ia idia dagedage henia bona ia idia hahisia. To, Iosepa be ena tadikaka dekenai ia badu lasi eiava Iehova ia bleim lasi. Iakobo ia gwau: “[Iosepa] ena peva be ena gabu dekenai ia noho, bona ena imana be idia goada bona haraga.” (Gen. 49:24) Iosepa be nega aukadia lalonai Iehova dekenai ia tabekau, bona ena tadikaka edia dika ia gwauatao bona idia ia kara namo henia. (Gen. 47:11, 12) Ena be Iosepa ese hekwakwanai ia davaria, to ia be tau namona ai ia lao. (Sal. 105:17-19) Unai dainai, Iehova ese ia ia gaukaralaia mai anina bada gaudia ia karaia totona.

16. Nega aukadia ita davaria neganai, edena dala ai Iosepa ita tohotohoa diba?

¹⁶ Ita dibaia gaudia. Nega aukadia ai, Iehova bona emu tadikaka taihu edia heduru oi tahua. Laloatao nega aukadia ai Iehova ita hesiai henia noho neganai, ia ese ita ia treinia diba. (Heb. 12:7, ftn.) Unai ese ita do ia durua Keristani kara namodia ita hahedinaraia totona, hegeregere hebogahisi bona dika gwauatao karana. (Heb. 12:11) Bema ita haheauka, Iehova ese davana namona do ia henia, Iosepa dekenai ia karaia bamona.

BENIAMINA

17. Iakobo ese Beniamina totona ia gwauraia peroveta herevadia be edena dala ai ia guguru? (Genese 49:27) (Maua itaia danu.)

¹⁷ Genese 49:27 duahia. Iakobo ia peroveta Beniamina iduhu taudia be tuari taudia goadadia ai do idia lao, uda sisia bamona. (Hah. 20:15, 16; 1 Siv. 12:2) Israela ena Basileia ena “daba ai” eiava ena matamana ai, Beniamina ena iduhu amo Saulo be king ginigunana ai ia lao. Bona Saulo be Filistia taudia ia tuari henia neganai, ia hamomokania ia be tuari tauna goadana. (1 Sam. 9:15-17, 21) “Adorahi momokani ai” eiava lagani momo murinai, Beniamina ena iduhu amo Kwini Eseta bona Modekai ese Israela taudia be Parasa ena Basileia amo idia gimaia.—Est. 2:5-7; 8:3; 10:3.

18. Edena dala ai Beniamina iduhu taudia ita tohotohoa diba?

¹⁸ Ita dibaia gauna. Beniamina ena iduhu taudia be idia moale badina edia iduhu tauna Saulo be king ai ia lao. To gabeai, Iehova ese Iuda iduhu amo Davida ia abia hidi king ai ia lao totona. Bona Beniamina ena iduhu taudia be unai idia abia dae. (2 Sam. 3:17-19) Lagani momo murinai, iduhu 10 taudia be Iuda iduhu idia gwau-edeede henia neganai, Beniamina iduhu taudia be Iuda iduhu bona Iehova ese ia abia hidi king idia badinaia. (1 Ki. 11:31, 32; 12:19, 21) Namona be ita danu be Iehova ese ia abia hidi hakaua taudia ita badinaia.—1 Tes. 5:12.

19. Edena dala ai Iakobo ena peroveta herevana dokodia ese ita ia durua diba?

¹⁹ Iakobo ena peroveta hereva dokodia ese ita ia durua diba. Unai hereva idia guguru daladia ita stadilaia neganai, iseda abidadama do ia hagoadaia bona do ita abia dae momokani Iehova ese ia gwauraia peroveta hereva ibounai be do idia guguru. Bona Iakobo ena natudia memero ese idia abia hahenamo ita stadilaia neganai, Iehova hamoalea daladia do ita diba.