Sisiba Namona Tahua

1. Edena dala ai abia hidi namodia ita karaia diba bona iseda palani do idia guguru? (Aonega Herevadia 13:10; 15:22)

ITA IBOUNAI ita ura abia hidi namodia do ita karaia. Bona ita ura ita karaia palani do idia guguru. Baibel ese ita ia hadibaia edena dala ai unai tahua gaudia rua ita hagugurua diba.—Aonega Herevadia 13:10; 15:22 duahia.

2. Iehova ia gwauhamata ita totona dahaka do ia karaia?

² Momokani, ita dekenai sisiba namodia ia henia Tauna be iseda Tamana Iehova. Ia gwauhamata ita do ia durua, ia gwau: “Lau ese oi dekenai sisiba lau henia neganai, egu matana be oi dekenai.” (Sal. 32:8) Unai hereva amo Iehova ia hahedinaraia ia ese sisiba namona do ia henia bona ita do ia durua unai sisiba ita badinaia totona.

3. Inai atikol ai dahaka do ita herevalaia?

³ Inai atikol ai, Baibel amo inai henanadai 4 do ita haerelaia: (1) Edena kara namodia lau hahedinaraia be namo, bema lau ura lau abia sisiba namodia amo namo lau davaria? (2) Daika ese sisiba namona ia henia diba? (3) Edena dala ai lau hahedinaraia haida amo lau abia sisiba lau laloa bada? bona (4) Dahaka dainai haida lau noia lasi lau totona abia hidi idia karaia?

EDENA KARA NAMODIA LAU HAHEDINARAIA BE NAMO?

4. Bema ita ura ita abia sisiba namona amo namo ita davaria, dahaka kara ita hahedinaraia be namo?

⁴ Ita be sisiba namona ita abia neganai, namona be ita manau. Bema gau haida ita diba lasi, namona be ma haida edia heduru ita abia be namo abia hidi namona ita karaia totona. Bema ita manau lasi, Iehova ese ita do ia durua lasi bona Baibel ita duahia neganai, ena sisiba ese ita do ia durua dalana do ita laloparara lasi. (Mika 6:8; 1 Pet. 5:5) To bema ita manau, do ita ura Baibel ena sisiba namodia ita abia dae bona ita badinaia diba.

5. King Davida be dahaka gaudia ia karaia dainai, do ia hekokoroku diba?

⁵ Mani King Davida ena haheitalai amo do ita dibaia gauna ita laloa. Ena be gau momo ia karaia, to unai gaudia dainai ia hekokoroku lasi. Ia be king ai ia do lao lasi neganai, momo idia diba ia be miusiki gaudia gadaralaia namonamo tauna. King totona miusiki ia gadaralaia danu. (1 Sam. 16:18, 19) Iehova ese Davida be king ai ia halaoa murinai, Iehova ese ena lauma helaga amo ia durua. (1 Sam. 16:11-13) Taunimanima ese Davida idia hanamoa, badina ia ese edia inai taudia momo ia hamasea, Filistia tauna badana Goliata danu. (1 Sam. 17:37, 50; 18:7) Gau namodia momo ia karaia tauna be do ia laloa ma haida amo sisiba ia abia be anina lasi. To Davida be unai bamona ia laloa lasi.

6. Edena bamona ita diba Davida be sisiba ia abia dae? ( ena laulau itaia danu.)

⁶ Davida be king ai ia lao murinai, ia be ia dekenai sisiba namodia idia henia taudia ia bamoa noho. (1 Siv. 27:32-34) To, Davida be king ai ia do lao lasi neganai, hanaihanai ma haida amo sisiba namodia ia abia dae. Ia be tatau sibona amo sisiba ia abia dae lasi, to hahine ta ladana Abigaila amo sisiba ia abia danu. Abigaila ena adavana be Nabala, ia be hekokoroku tauna, ma haida ia laloa bada lasi bona ia matauraia lasi. Davida be mai manau ida Abigaila ena sisiba namona ia abia dae dainai, kerere badana ia karaia lasi.—1 Sam. 25:2, 3, 21-25, 32-34.

7. Davida ena haheitalai amo dahaka ita dibaia? (Hadibaia Tauna 4:13) (Laulau itaia danu.)

⁷ Davida ena haheitalai amo gau haida ita dibaia. Hegeregere, reana ita be mai iseda diba gau haida ita karaia namonamo totona eiava iseda mauri lagani be ia bada. To, namo lasi ita laloa ita be gau ibounai ita diba bona sisiba ita abia be badina lasi. Davida bamona, ena be daika amo sisiba ita abia, to namona be mai ura ida unai sisiba ita kamonai. (Hadibaia Tauna 4:13 duahia.) Bema unai bamona ita karaia, kerere badadia do ita karaia lasi bona ita bona ma haida dekenai lalohisihisi do ita havaraia lasi.

DAIKA ESE LAU DEKENAI SISIBA NAMONA IA HENIA DIBA?

8. Dahaka dainai Ionatana ia hegeregere Davida dekenai sisiba namona ia henia totona?

⁸ Davida ena haheitalai amo ita dibaia gauna ma ta ita laloa. Davida be haida amo sisiba namodia ia tahua, badina idia be Iehova idia tura henia bona ia davaria hekwakwanai idia lalopararalaia. Hegeregere, Davida be ia ura King Saulo ida maino ia karaia totona, ia be Saulo ena natuna Ionatana ena sisiba ia kamonai. Dahaka dainai Ionatana ese Davida dekenai sisiba namona ia henia diba? Badina Ionatana ena hetura karana Iehova ida be ia goada bona ia be Saulo ia diba namonamo. (1 Sam. 20:9-13) Unai sivarai amo dahaka ita dibaia?

9. Sisiba ita abia totona, daika ena heduru ita tahua be namo? Herevalaia. (Aonega Herevadia 13:20)

⁹ Bema ita ura sisiba namona ita abia, namona be Iehova ia tura henia bona ita dekenai ia vara gauna ia diba namonamo tauna amo heduru ita abia.a (Aonega Herevadia 13:20 duahia.) Hegeregere, bema tadikaka matamata ta ia ura taihu ta ia tura henia. Daika ese ia dekenai sisiba namona ia henia diba? Ia headava lasi turana namona ta ese heduru namona ia henia diba bema Baibel ena hakaua herevadia amo ena sisiba ia henia. To bema unai tadikaka matamata be ia idia diba namonamo bona lagani momo lalonai Iehova idia hesiai henia headava taudia amo sisiba ia tahua, ia do ia durua bada sisiba namodia idia henia diba.

10. Hari dahaka do ita herevalaia?

¹⁰ Ita be kara namodia rua bona daika ese sisiba namona ia henia diba ita herevalaia vadaeni. Hari, ma haida edia lalohadai ita kamonai bona abia dae ena badina do ita herevalaia. Danu bema ma haida ita noia ita totona abia hidi idia karaia be maoro eiava lasi do ita herevalaia.

HAIDA EDIA SISIBA LALOA BADA DALANA

11-12. (a) Nega haida dahaka ita karaia diba? (b) King Rehoboama be mai anina bada abia hidi ta ia karaia totona, dahaka ia karaia?

¹¹ Nega haida, ta be oi amo heduru do ia tahua, to reana ia be abia hidi ia karaia vadaeni, to ia ura oi ese unai do oi hamomokania totona. Unai bamona tauna be ia ura lasi ma haida edia sisiba ia abia dae. Unai tauna be King Rehoboama dekenai ia vara gauna amo diba ia abia be namo.

¹² Rehoboama ese King Solomona ena gabu ia abia bona Israela ena king ai ia lao. Unai nega ai Israela taudia be mai edia kohu momo, to idia laloa Solomona be idia dekenai gaukara momo ia henia. Unai dainai taunimanima be Rehoboama dekenai idia mai bona ia idia noia edia maduna metau ia hamaragia totona. Rehoboama ese idia ia hamaoroa ia dekenai nega do idia henia unai gauna ia laloa totona. Ia karaia gauna ginigunana be namo, badina ia ese Solomona idia durua tatau badadia amo sisiba ia noia. (1 Ki. 12:2-7) To, Rehoboama be unai tatau badadia ese idia henia sisiba ia abia dae lasi. Dahaka dainai unai bamona ia karaia? Rehoboama be do ia karaia gauna ia abia hidi vadaeni, a? Bona ia ura ia karaia abia hidi dekenai do idia lalotamona taudia ia tahua, a? Ita gwau diba oibe, badina ena mauri lagani tamona taudia edia sisiba ia abia dae. (1 Ki. 12:8-14) Rehoboama be ena turadia ese idia henia sisiba hegeregerena taunimanima ia kara henia. Unai dainai, Israela taudia idia gwau-edeede, bona idia ura king ma ta idia abia hidi. Unai nega amo Rehoboama be hekwakwanai momo ia davaria.—1 Ki. 12:16-19.

13. Edena bamona do ita diba bema ma haida edia sisiba ita abia dae?

¹³ Rehoboama ena haheitalai amo dahaka ita dibaia? Bema heduru ita tahua, namona be ita hahedinaraia unai heduru ita abia dae. Edena bamona ita diba bema haida edia sisiba ita abia dae? Bema ita ura gau ta totona haida edia heduru ita tahua, namo lasi unai gauna dekenai iseda abia hidi ita karaia guna. To mai ura ida haida edia sisiba ita kamonai. Sibona ita nanadaia diba, ‘Lau be sisiba lau tahua bona gabeai lau dadaraia, badina unai sisiba be lau laloa gauna hegeregerena lasi, a?’ Haheitalai ta ita herevalaia.

14. Sisiba ita abia neganai, namona be dahaka ita laloatao? Herevalaia. (Laulau itaia danu.)

¹⁴ Mani inai ita laloa, tadikaka ta be moni gaukara namona ta ia laloa. Unai gaukara ia do abia dae lasi neganai, elda tauna ta ena sisiba ia tahua. Unai tadikaka ia gwau, unai gaukara dainai ia be ena ruma bese do ia rakatania bona nega daudau tano ma ta dekenai do ia noho. Elda tauna ese Baibel ena hakaua hereva hegeregerena tadikaka ia hadibaia, tau ena maduna badana be Dirava ena hakaua herevadia amo ena ruma bese do ia durua. (Efe. 6:4; 1 Tim. 5:8) Bema tadikaka be elda ena hereva dekenai ia lalotamona lasi bona tadikaka ma haida edia sisiba ia tahua noho, unai amo ia ura henia sisiba do ia abia. Unai tadikaka be momokani heduru ia tahua, a? Eiava ia be ena lalona ia hadaia vadaeni bona ia ura ta ese ia karaia abia hidi dekenai ia lalotamona, a? Namona be ita laloatao iseda kudouna ese ita ia koia diba. (Ier. 17:9) Nega haida, ita abia sisiba ita ura henia lasi to unai sisiba ese ita ia durua bada diba.

HAIDA LAU NOIA DIBA LAU TOTONA ABIA HIDI IDIA KARAIA?

15. Dahaka dekenai ita naria namonamo be namo, bona dahaka dainai?

¹⁵ Ita ta ta be sibona iseda abia hidi ita karaia diba. (Gal. 6:4, 5) Ita herevalaia bamona, aonega tauna be abia hidi namona ia karaia totona, Baibel amo bona lo Keristani taudia amo sisiba ia abia diba. To, namona be ita naria namonamo, namo lasi ma haida ita noia ita totona abia hidi idia karaia. Reana ma haida be idia matauraia tauna idia nanadaia, idia gwau, “Bema oi dekenai unai bamona gauna ia vara dahaka do oi karaia?” Ma haida be ta ese ia karaia abia hidi idia badinaia sibona, to idia sibona ese unai idia lalohadailaia lasi.

16. Korinto ai haida be vamu ania karana dekenai dahaka idia karaia? To abia hidi karaia totona be daika ena maduna? (1 Korinto 8:7; 10:25, 26)

¹⁶ Mani Korinto kongrigeisen dekenai ia vara gauna ita laloa, idia be kaivakuku dekenai idia bouboulaia vamu dekenai abia hidi idia karaia be namo. Paulo ese unai Keristani taudia ia hamaoroa, ia gwau: “Ita diba, tanobada ai kaivakuku be anina lasi, bona Dirava be tamona sibona.” (1 Kor. 8:4) Unai dainai, kongrigeisen ai haida idia laloa, bema kaivakuku dekenai idia bouboulaia vamu be gabeai maketi dekenai idia hoihoilaia, unai be idia ania diba. Haida be abia hidi idia karaia unai bamona vamu do idia ania lasi, badina dika edia lalomamina do ia hadikaia. (1 Korinto 8:7; 10:25, 26 duahia.) Unai abia hidi be ta ta sibona ese do ia karaia. Paulo be Korinto taudia ia hadibaia lasi haida totona abia hidi idia karaia eiava ma haida ese idia karaia gauna idia badinaia totona. Badina ‘Dirava ese idia ibounai ta ta be edia kara hegeregerena do ia hahemaoro henia.’—Roma 14:10-12.

17. Bema haida idia karaia abia hidi ita badinaia sibona, dahaka ia vara diba? Haheitalai gwauraia. (Laulau itaia danu.)

¹⁷ Edena dala ai unai bamona gauna be iseda nega ai ia vara diba? Mani rara abia karana ita herevalaia. Rara ena kahana maragidia idia abia dae eiava lasi karana dekenai Keristani taudia ta ta sibona ese abia hidi idia karaia diba.b Unai bamona hereva ita lalopararalaia totona be auka, to unai bamona abia hidi ita karaia amo ita ta ta be iseda maduna ita huaia. (Roma 14:4) Bema ita be ta ese ia karaia abia hidi ita badinaia sibona, ita be iseda lalomamina ita durua lasi. To, iseda lalomamina ita gaukaralaia diba, bema abia hidi be ita sibona ita karaia. (Heb. 5:14) Unai dainai edena nega ai lo Keristani tauna ta ena sisiba ita noia diba? Bema sibona iseda tahua gaukara ita karaia, to ita do lalopararalaia lasi Baibel ena hakaua herevadia be edena dala ai do ita badinaia, vadaeni heduru ita noia diba.

SISIBA TAHUA NOHO

18. Iehova ese ita totona dahaka ia karaia?

¹⁸ Iehova be ita ia koua lasi sibona iseda abia hidi ita karaia totona, unai amo ia hahedinaraia ita ia trast. Ia ese ita dekenai Baibel ia henia. Bona tura namodia ia henia, idia ese ita idia durua diba Baibel ena hakaua herevadia ita lalopararalaia totona. Iehova be unai amo hahedinaraia ia be iseda lalokau Tamana bona ita ia laloa bada. (Aon. 3:21-23) Dahaka ita karaia diba ia dekenai iseda tanikiu karana ita hahedinaraia totona?

19. Edena dala ai Iehova ita hamoalea noho diba?

¹⁹ Mani inai ita laloa: Bema tama sina idia itaia edia natudia be idia bada bona Iehova ena hesiai taudia namodia ai idia lao, do idia moale bada. Unai hegeregerena, Iehova be ia moale bema ia itaia iseda hetura karana ia ida ita hagoadaia noho, sisiba ita tahua, bona abia hidi namodia ita karaia ia ita hanamoa totona.