Inai Oi Diba, A?

Ierusalema ena dubu helaga ai idia gaukara hahelaga taudia be boubou patana ai idia alaia animal edia rara dekenai dahaka idia karaia?

LAGANI ta ta lalonai, Israela ai hahelaga taudia ese animal tausen be dubu helaga ena boubou patana ai idia bouboulaia. Idaunegai Iuda edia histori torea tauna Josephus ia gwau, Pasova dinana ai mamoe 250,000 mai kahana be idia bouboulaia, unai dainai rara bada idia bubua. (Lev. 1:10, 11; Num. 28:16, 19) Unai rara ibounai be edeseni ia lao?

Saiens taudia be tahua gaukara idia karaia totona, Heroda ese ia haginia dubu helaga ena badina idia geia. Bona dubu ena badinai rara idia bubua ena drein idia davaria.

Mani unai drein idia hagoevaia daladia rua ita laloa:

• Boubou patana ena henunai idia noho matu: Lagani 200 C.E. bamona ai, Iuda taudia edia taravatu bona kastom ia herevalaia buka ta Mishnah ese unai dubu helaga henunai ia noho drein ia herevalaia. Unai buka ia gwau: “Boubou patana ena kona ta ta dekenai matu rua idia noho . . . boubou gaudia totona idia gaukaralaia rara bona boubou patana idia huria ranu be unai matu rua lalonai idia bubua, bena drein amo Kiderona sinavai dekenai ia lao.”

  Idaunegai boubou patana ai idia noho “matu” be akioleji taudia ese idia hamomokania danu. Buka ta The Cambridge History of Judaism ese dubu helaga badinai ia noho drein ena heau dalana ia hamomokania. Ia gwau: “Unai be boubou totona idia gaukaralaia rara bona ranu, dubu ena ororo amo ia diho mai gauna, be unuseni idia bubua.”

• Ranu momo idia gaukaralaia: Hahelaga taudia ese boubou patana ena floa idia huria bona drein idia hagoevaia totona, ranu momo idia gaukaralaia. Unai mai anina bada gaukarana idia karaia totona siti amo ranu momo idia abia. Boubou patana dekenai unai ranu namona ia aru mai totona tano idia geia, bona ranu ia heau dalana idia karaia. Danu ranu guri bona gohu idia karaia, ranu idia haboua totona. Saiens tauna ta Joseph Patrich ia gwau: “Unai bamona ranu abia dalana, dubu idia hagoevaia dalana bona ranu ia raka-lasi dalana be namo herea, gabu haida dekenai unai bamona idia karaia lasi.”