1 Kwonik
10 Twouve, moun Filisti yo t ap fè lagè ak pèp Izrayèl la. Sòlda izrayelit yo te kouri pou sòlda Filisti yo, e sòlda Filisti yo te touye anpil nan yo sou Mòn Gilbowa+. 2 Sòlda Filisti yo t ap kouri san rete dèyè Sayil ak pitit gason l yo. Yo te touye Jonatan, Abinadab ak Malkichwa+, pitit gason Sayil yo. 3 Batay la te vin rèd anpil pou Sayil. Sòlda Filisti ki t ap tire flèch yo te tire flèch ki pran Sayil, e flèch yo te blese Sayil+. 4 Apre sa, Sayil di sèvitè a ki t ap pote zam li yo: “Pran epe w la epi pèse m avè l pou mesye ki pa sikonsi sa yo pa vin maltrete m+.” Men, sèvitè l la ki t ap pote zam li yo pa t vle fè sa paske li te pè anpil. Lè sa a, Sayil pran epe a e li lage kò l sou li+. 5 Lè sèvitè l la ki t ap pote zam li yo wè l mouri, li menm tou li lage kò l sou epe pa l la e li mouri. 6 Konsa, Sayil ak twa pitit gason l yo ansanm ak tout moun lakay li mouri lè sa a+. 7 Lè tout moun nan pèp Izrayèl la ki te nan zòn vale a* wè tout moun kouri e Sayil ak pitit gason l yo mouri, yo kòmanse kouri kite vil yo. Apre sa, sòlda Filisti yo antre nan vil yo e yo pran vil sa yo.
8 Nan demen, lè moun Filisti yo vini pou yo pran tout bagay ki te sou kadav yo, yo jwenn Sayil ak pitit gason l yo blayi sou Mòn Gilbowa+. 9 Se konsa, yo pran tout sa k te sou Sayil, yo koupe tèt li, yo pran ekipman konba ki te sou li yo e yo voye moun nan tout tèritwa peyi Filisti al gaye nouvèl la nan tanp zidòl yo+ e pami tout moun nan pèp yo a. 10 Apre sa, yo mete ekipman konba l yo nan kay* dye y ap sèvi a e yo pandye tèt li sou kay Dagon an+.
11 Lè tout moun Jabès+ ki nan Galaad yo aprann tout sa moun Filisti yo fè Sayil+, 12 tout sòlda yo leve, yo pran kadav Sayil ak kadav pitit gason l yo, yo pote yo al Jabès epi yo antere zosman yo anba gwo pyebwa ki Jabès la+. Apre sa, yo fè sèt jou san yo pa manje.
13 Se konsa Sayil te mouri paske li te vin pa fidèl devan Jewova, paske li pa t obeyi pawòl Jewova+ e paske li t al pale ak yon moun ki konn chèche pale ak mò+ 14 olye l te pale ak Jewova. Se sa k fè Bondye te fè touye l e li te bay David, pitit Jese a+, wayòm nan.