Nonb
27 Annapre, pitit fi Selofeyad yo+ te pwoche bò tant reyinyon an. Selofeyad se te pitit gason Efè ki te pitit gason Galaad, ki li menm te pitit gason Maki ki te pitit gason Manase. Non pitit fi Selofeyad yo se te Mala, Nowa, Ogla, Milka ak Titsa. Yo sot nan tribi Manase, pitit gason Jozèf. 2 Yo te parèt devan Moyiz ak Eleyaza, prèt la, e devan chèf yo+ ak tout pèp la nan antre tant reyinyon an. Yo te di yo: 3 “Papa nou te mouri nan dezè a, men li pa t nan gwoup moun ki te rasanble kont Jewova yo, patizan Kore yo+. Li te mouri pou peche pa l e li pa t gen pitit gason. 4 Poukisa pou non papa nou ta disparèt nan fanmi an poutèt li pa t gen pitit gason? Ban nou yon pòsyon tè pami frè papa nou yo.” 5 Konsa, Moyiz prezante pwoblèm yo a devan Jewova+.
6 Men sa Jewova te di Moyiz: 7 “Pitit fi Selofeyad yo gen rezon. Ou dwe fè yon jan pou w ba yo yon pòsyon tè kòm eritaj pami frè papa yo e ba yo eritaj papa yo a+. 8 Epi di Izrayelit yo: ‘Si yon gason mouri san l pa gen pitit gason, nou dwe bay pitit fi l eritaj li a. 9 Men, si l pa gen pitit fi, n ap bay frè l yo eritaj li a. 10 Si l pa gen frè, n ap bay frè papa l yo eritaj li a. 11 Si papa l pa gen frè, n ap bay pi pwòch fanmi l lan eritaj li a e eritaj la ap vin pou moun sa a. Se yon kòmandman k ap sèvi kòm lwa pou Izrayelit yo, dapre lòd Jewova bay Moyiz.’”
12 Epi, Jewova di Moyiz: “Monte nan Mòn Abarim+, epi gade peyi m pral bay Izrayelit yo+. 13 Lè w fin wè l, ou pral menm kote ak moun pa w yo*+, menm jan ak Arawon, frè w la+. 14 Paske lè pèp la t ap fè rebèl ak mwen nan Dezè Zin nan, nou pa t obeyi lòd mwen te ban nou pou nou onore m devan pèp la, bò dlo a, pou n montre se mwen ki sen+. Dlo sa a se dlo Meriba+ ki nan Kadès+, nan Dezè Zin+.”
15 Epi, Moyiz di Jewova: 16 “Jewova, Bondye ki bay tout moun lavi a*, se pou w mete yon moun alatèt pèp la, 17 yon moun ki pou devan yo lè y ap soti ak lè y ap antre, e k ap dirije yo lè y ap soti ak lè y ap antre, yon fason pou pèp Jewova a pa vin tankou mouton ki san bèje.” 18 Lè sa a, Jewova di Moyiz: “Pran Jozye, pitit gason Noun nan, yon nonm ki responsab, epi poze men w sou li+. 19 Apre sa, fè l kanpe devan Eleyaza, prèt la, ak devan tout pèp la, e ou dwe mete l chèf devan yo tout+. 20 Ou dwe ba l yon pati nan otorite* ou genyen an+ pou tout pèp Izrayèl la ka obeyi l+. 21 Epi, Jozye ap kanpe devan Eleyaza, prèt la, k ap sèvi ak Ourim nan pou l mande Jewova ede l konn sa l deside pou Jozye+. Se sou lòd li* Jozye menm ak tout pèp Izrayèl la ap soti, e se sou lòd li y ap antre.”
22 Konsa, Moyiz te fè egzakteman sa Jewova te ba l lòd fè a. Li pran Jozye, li mete l kanpe devan Eleyaza, prèt la, e devan tout pèp la, 23 epi li poze men l sou li e li mete l dirije+, jan Jewova te di l fè a+.