1 Samyèl
28 Nan jou sa yo, moun Filisti yo te rasanble lame yo pou y al fè lagè ak pèp Izrayèl la+. Se sa k fè Akich te di David: “Se sèten ou konnen fòk ou menm ak mesye w yo al nan lagè a ansanm avè m+.” 2 David di Akich: “Ou konnen byen sa sèvitè w la ap fè.” Epi, Akich di David: “Poutèt sa, m ap fè w vin sekirite m nètale*+.”
3 Samyèl te gentan mouri e tout pèp Izrayèl la te nan lapenn pou li. Yo te antere l nan Rama, vil kote l moun nan+. Sayil te retire moun ki konn chèche pale ak mò yo ak divinò yo nan peyi a+.
4 Sòlda Filisti yo te rasanble e yo t al monte kan yo nan Chounèm+. Se sa k fè Sayil te rasanble Izrayelit yo, e yo menm yo t al monte kan yo nan Gilbowa+. 5 Lè Sayil te wè kan sòlda Filisti yo, li te vin pè e kè l t ap bat fò anpil+. 6 Byenke Sayil te konn pale ak Jewova+, Jewova pa t janm reponn li, ni nan rèv ni pa mwayen Ourim nan+, ni li pa t voye pwofèt al pale avè l. 7 Alafen, Sayil di sèvitè l yo: “Chèche jwenn yon fi ki konn pale ak mò pou mwen+ e mwen pral kote l.” Sèvitè l yo reponn li: “Gen yon dam nan Enndò ki konn chèche pale ak mò+.”
8 Sayil te kache figi l pou moun pa rekonèt li, li te abiye ak lòt rad epi l al kot dam nan lannuit ak de nan mesye l yo. Epi, li di dam nan: “Tanpri, sèvi ak pouvwa w genyen pou w chèche pale ak mò a pou w fè m konnen sa k pral rive+. M ap di w ki moun pou w fè monte pou mwen.” 9 Men, dam nan di l: “Ou byen konnen sa Sayil te fè, ki jan l te retire moun ki konn chèche pale ak mò ansanm ak moun ki divinò yo nan peyi a+. Poukisa w ap eseye pran m* nan pyèj pou w fè yo touye m+?” 10 Epi, Sayil fè sèman devan Jewova bay dam nan, li di l: “Menm jan li klè Jewova vivan, mwen fè sèman ou pap koupab pou sa!” 11 Epi, dam nan mande l: “Kiyès pou m rele pou ou?” Li reponn: “Fè Samyèl monte pou mwen.” 12 Lè dam nan wè “Samyèl”*+, li rele byen fò, apre sa, li di Sayil: “Poukisa w pran m sou plan? Men, ou se Sayil!” 13 Wa a di l: “Ou pa bezwen pè. Ki sa w wè?” Dam nan reponn: “Mwen wè yon moun ki sanble ak yon dye k ap monte sot anba tè a.” 14 Menm moman an, li mande dam nan: “Ki jan w wè l ye?” Epi, dam nan di l: “Se yon granmoun gason ki monte a. Li gen yon manto san manch sou li+.” Lè sa a, Sayil konprann se “Samyèl”. Apre sa, li met ajenou e li bese fas atè.
15 Epi, “Samyèl” di Sayil: “Poukisa w deranje m, ou fè m monte?” Sayil reponn: “Mwen nan gwo pwoblèm. Moun Filisti yo ap fè lagè avè m. Epi, Bondye kite m, li pa reponn mwen ankò, li pa ni voye pwofèt vin pale avè m ni li pa pale avè m nan rèv+. Se poutèt sa mwen vin rele w pou w fè m konnen sa pou m fè+.”
16 Epi, “Samyèl” di l: “Poukisa menm ou vin pale avè m piske Jewova lage w+ e li vin ènmi w? 17 Jewova ap fè sa l te voye m anonse a: Jewova ap retire wayòm nan nan men w, epi l ap bay David li, yon moun parèy ou+. 18 Piske w pa t obeyi pawòl Jewova e w pa t elimine moun Amalèk yo ki te fè l vin an kòlè anpil+, se sa k fè Jewova ap aji avè w konsa jodi a. 19 Jewova ap lage ni pèp Izrayèl la ni ou menm nan men moun Filisti yo+, epi demen+ ou menm ak pitit gason w yo+ ap menm kote avè m. Epitou, Jewova ap lage lame Izrayèl la nan men moun Filisti yo+.”
20 Menm moman an, Sayil tonbe tou long atè e pawòl “Samyèl” te di l yo te fè l pè anpil. Epi, li pa t gen fòs nan li ditou ankò, paske li pa t manje ni lajounen ni lannuit. 21 Lè dam nan vin bò kote Sayil e li wè jan l gen pwoblèm, li di l: “Mwen menm, sèvant ou an, mwen te obeyi sa w te di m nan, mwen te riske lavi m*+ e mwen te fè sa w te mande m nan. 22 Kounye a, tanpri, koute sa sèvant ou an gen pou l di w. Kite m ba w yon moso pen, epi manje l pou w ka gen fòs pou w kontinye wout ou.” 23 Men, li te refize, li di: “Mwen pap manje.” Malgre sa, sèvitè l yo ansanm ak dam nan te kontinye ankouraje l manje. Alafen, li koute yo, li leve atè a, epi li chita sou yon kabann. 24 Dam nan te gen yon ti bèf byen gra lakay li. Li kouri al touye l*, apre sa, li pran farin, li fè yon pat, epi li fè kèk pen ki pa t gen ledven. 25 Li sèvi Sayil ak sèvitè Sayil yo manje a e yo manje. Apre sa, yo leve y ale nan nuit lan+.