Ezekyèl
1 Nan 30yèm ane a, nan senkyèm jou nan katriyèm mwa a, pandan mwen te nan mitan moun ki te ann egzil+ bò kot Rivyè Keba yo+, syèl la te ouvri e Bondye te kòmanse fè m wè yon seri vizyon. 2 Nan senkyèm jou nan mwa a, nan senkyèm ane apre wa Jewoyakin t al ann egzil la+, 3 Jewova te pale avèk mwen menm, Ezekyèl*, pitit gason Bouzi, prèt la, pandan m te nan peyi moun Kalde yo+, bò kot Rivyè Keba. Pandan m te la, pisans* Jewova te vin sou mwen+.
4 Pandan m t ap gade, mwen te wè yon gwo van+ ki t ap sot nan direksyon nò, mwen te wè yon gwo nyaj ak dife* k ap flache ladan l+ e te gen yon limyè byen klere ki antoure l. Nan mitan dife a, mwen te wè yon bagay ki sanble ak lò blan*+. 5 Nan mitan bagay sa a, mwen te wè kat bagay ki sanble ak kat kreyati vivan+. Yo chak te sanble ak yon moun. 6 Yo chak te gen kat figi ak kat zèl+. 7 Pye yo te dwat, pla pye yo te sanble ak pla pye ti bèf. Pye yo te klere tankou kuiv ki byen poli+. 8 Anba chak zèl yo te gen yon men moun. Toule kat te gen figi ak zèl. 9 Zèl yo te touche youn lòt. Kreyati vivan yo pa t vire lè yo t ap deplase, yo te ale dwat devan yo+.
10 Men ki figi yo te genyen: Yo toule kat te gen yon figi moun, yon figi lyon+ sou bò dwat, yon figi towo bèf+ sou bò goch ak yon figi+ èg+. 11 Se figi sa yo yo te genyen. Zèl yo te ouvè anlè. Yo chak te gen de zèl ki te touche youn ak lòt e yo te gen de zèl ki te kouvri kò yo+.
12 Yo chak te ale dwat devan yo, yo te ale kèlkeswa kote lespri a te pouse yo ale+. Yo pa t vire lè yo t ap deplase. 13 Kreyati vivan yo te sanble ak chabon dife ki tou limen. Mete sou sa, te gen yon bagay ki te sanble ak yon dife byen klere ki limen sou yon bwa ki t ap fè ale vini nan mitan kreyati vivan yo. Epi te gen kout zèklè ki t ap soti nan dife a+. 14 Lè kreyati vivan yo t ap fè ale vini, yo te deplase tankou kout zèklè.
15 Pandan m t ap gade kreyati vivan yo, mwen te wè yon wou atè a bò kote chak kreyati vivan ki te gen kat figi yo+. 16 Wou yo te klere menm jan ak krizolit e yo toule kat te fèt menm jan. Fason yo te fèt la se te tankou yon wou ki nan mitan yon lòt wou*. 17 Lè yo t ap deplase, yo te ka ale nan nenpòt nan kat direksyon yo san yo pa t bezwen vire. 18 Jant wou yo te ka fè moun fremi tèlman yo te wo. Te gen yon pakèt je sou tout kò jant yo+. 19 Chak fwa kreyati vivan yo t ap deplase, wou yo te deplase avèk yo. Lè kreyati vivan yo te monte anlè, wou yo te monte anlè tou+. 20 Yo te ale kote lespri a te pouse yo ale, nenpòt kote lespri a te ale. Wou yo te konn monte anlè ansanm ak yo, paske, lespri ki t ap aji nan kreyati vivan yo* te nan wou yo tou. 21 Lè yo te deplase, wou yo te deplase tou. Lè yo te rete anplas, wou yo te rete anplas tou. E lè yo te monte anlè, wou yo te konn monte anlè ansanm ak yo, paske, lespri ki t ap aji nan kreyati vivan yo te nan wou yo tou.
22 Pa anlè tèt kreyati vivan yo, te gen yon bagay ki te sanble ak yon platfòm an kristal ki te enpresyonan e ki te ouvri byen laj+. 23 Anba platfòm nan, zèl yo te byen dwat* youn nan direksyon lòt. Yo chak te gen de zèl pou kouvri yon bò nan kò yo e de zèl pou kouvri lòt bò a. 24 Lè mwen te tande bri zèl yo t ap fè a, se te tankou bri yon gwo dlo k ap desann, se te tankou vwa Toupisan an+. Lè yo t ap deplase, bri yo te fè a te tankou bri yon lame. Lè yo te ret kanpe, yo te kite zèl yo pandye.
25 Te gen yon vwa pa anlè platfòm ki te anlè tèt yo a. (Lè yo te ret kanpe, yo te kite zèl yo pandye.) 26 Pa anlè platfòm ki te anlè tèt yo a, te gen yon bagay ki te sanble ak yon wòch safi+ e ki te sanble ak yon twòn+. Sila a ki te chita sou twòn nan te sanble ak yon moun+. 27 Soti nan sa k te sanble ak senti l la monte, mwen te wè yon bagay ki te klere tankou lò blan+ e ki te tankou dife. Soti nan senti l desann anba, mwen te wè yon bagay ki sanble ak dife+. Te gen yon limyè toutotou l ki t ap klere 28 e ki te tankou lakansyèl+ ki parèt nan nyaj lè gen lapli. Se konsa limyè ki t ap klere toutotou l la te ye. Li te sanble ak glwa Jewova+. Lè m te wè l, mwen te tonbe fas atè. Apre sa, mwen te kòmanse tande vwa yon moun k ap pale.