Annou fè moun konnen non Jewova sou tout latè
1 Lè Jezi te bay disip li yo misyon pou yo temwen l “ jis nan rejyon ki pi lwen sou tè a ”, li te deja ba yo modèl pou yo swiv la (Travay 1:8). Nenpòt lè e nenpòt kote li te jwenn moun, li te pale ak yo sou pwogram Bondye fikse pou limanite a. Pou imite Jezi, esklav fidèl la antanke gwoup, sèvi ak yon bann mwayen pou fè moun ‘ konnen non Jewova sou tout latè ’. — Iza. 12:4, 5.
2 Sa k te konn fèt otrefwa : Nan ane anvan yo, yo te konn pibliye sèmon nan jounal, yo te fè “ Fotodram kreyasyon an ” e yo te prezante l devan dè milyon moun. Yo te konn sèvi ak machin ki gen pòtvwa sou yo. Yo te sèvi anpil ak fonograf, epitou pandan yon tan yo te sèvi ak radyo. Tout sa se te pou preche bon nouvèl la. Natirèlman, yo te toujou plis mete aksan toudabò sou kontak pèsonèl ak moun yo. Konsa, yo te kapab travay enterè yo jwenn nan. Pakonsekan nou gen prèv preche kay an kay se yon mwayen trè efikas pou fè moun konnen non Jewova toupatou. — Travay 5:42.
3 Sa nou reyalize jodi a : Avèk tan yo ki ap chanje, monn nan vin gen yon mache prese sou li e nan anpil kote se raman ou jwenn moun lakay yo. Pa gen anpil moun ki dispoze pran tan pou yo li e pou yo medite sou bagay espirityèl. Kidonk, nou dwe adapte ministè nou dapre sitiyasyon an. Pandan n ap kontinye rann moun yo vizit kay an kay, nou resevwa ankourajman pou n al jwenn yo kote yo ye a e pou nou “ toujou pare ” pou defann esperans ki nan nou an (1 Pyè 3:15). Sa vle di n ap fè efò pou nou preche kòlèg travay nou, kanmarad lekòl, moun ki nan lari, ki sou plas piblik, magazen an magazen ak nenpòt lòt kote nou ka rankontre moun. Piske nou gen Jewova k ap soutni nou, nou jwenn bon rezilta nan efò n ap fè. Èske w patisipe nan travay chèche jwenn moun yo kèlkeswa kote yo ye a ?
4 Se pou nou chak eseye tout mwayen posib lè n ap chèche fè moun konnen non Jewova nan tèritwa nou. Nou kapab jwenn gwo gwo satisfaksyon si nou akonpli ministè nou nèt, pandan nou konte sou Jewova pou l rale moun ki sensè yo. — Jan 6:44.