De ti pyès monnen ki prèske pa vo anyen

Yon fason enpòtan pou nou soutni enterè Wayòm nan se lè nou bay kontribisyon pou travay mondyal predikasyon an. Men, ki sa nou ka fè si nou pa gen gwo mwayen?

Yon jou, Jezi te wè yon malerèz ki vèv ki t ap mete de ti pyès monnen ki prèske pa vo anyen nan kès yo konn met ofrann nan tanp lan. Lanmou vèv sa a, “ki nan nesesite”, te genyen pou Jewova te pouse l bay “tout sa li te gen pou l viv”. (Mak 12:41-44.) Lefètke Jezi te pale de sa, sa montre kontribisyon vèv la te bay la te gen anpil valè nan je Bondye. Menm jan an tou, kretyen ki t ap viv nan premye syèk la pa t panse se moun ki rich yo sèlman ki gen privilèj e ki gen responsablite pou yo soutni travay predikasyon an nan domèn finansye. Apot Pòl te site egzanp kretyen Masedwàn yo. Malgre kretyen sa yo ‘te pòv anpil yo te mande apot yo pou yo jwenn privilèj pou yo bay ak tout kè yo’. — 2 Kor. 8:1-4.

Se sa k fè, si se “de ti pyès monnen ki prèske pa vo anyen” nou ka bay, nou mèt bay yo. Nou bezwen sonje piti piti fè chay. Ofrann nou bay ak tout kè nou ap fè kè Papa nou ki nan syèl la kontan, li menm ki renmen bay, paske “Bondye renmen moun ki bay ak kè kontan”. — 2 Kor. 9:7.